Matiyò 11
11
Yòwanìrzɛ̀ e Mòlùhwìrzèlì à mà òma hwà-òkòwèlì hwa eni ò ma Yerzù
(Luk 7.18-35)
1È hvònda Yerzù à mà kulɛ lì kòkòhwɛ̀lɛ̀ lìyòmɛ la eni la Hwà-òkòwèlì na hwahwakɛ, à mà anjiya aŋga lì ɛ̀ndɛ lì òkòlɛ̀ na lì òhwa Èya ya Lohwà ò mambòwà ema mà ma kòmbɛnɛ.
2O eŋge hvònda òma Yòwanìrzɛ̀ e Mòlùhwìrzèlì à mà aŋgɛhwɛ ò hwèwòwà na òma à mà hwèya hweyà hwe arzɛ ema Krirztò à mà hwɛ lì gbeyà, rzìi a mò òmeya hwà-òkòwèlì wa eni. 3A ma òhwa ama hwa ɛndɛ hwa ijòwa Krirztò nanù ema, “O wa ndi ò hwèlì e Mɔ̀ ema Lohwɛ̀ à mà òhwe nanù ema a òma e? Ŋga i lìmeya ndi ò lì ambɛ̀lɛ òhvɛhvɛ mòtò e?” 4Yerzù rzìi a hwa tìmbìrzɛ̀lɛ̀lɛ̀ nanù ema, “È tìmbè ò ma Yòwanìrzɛ̀, e mò òhweyà mamɛ inyɔ e hweyi na mamɛ hvɛ ema e ɛnì.” 5È mò òhweyà nanù ema, “I ndima je ɛnɛ̀, i mbòkò je ɛ̀ndɛ, e wɔ̀ hwa nyàmbɛ ja mɛ̀lɔ̀ŋgɔ̀ hwa wɔ̀wìrzɛ̀hwɛ̀yi, e wɔ̀ hwa hwètòòtò hwa hweya. È wɔ̀ hwa ŋwelì hwa tìmbì hvɛ ò lòŋgɛ, ŋmɛ̀ndì mò gbamù mɔ̀ hvɛ mò òhwàyɛ̀lɛ̀hwɛ̀yi mèlìrzà me hwatò. 6Mònàmɛ̀ na òŋgò mòtò ema a rza àyèŋgòwɛ̀ ŋmèma mò eni lì nò hvòmɛ̀nɛ̀.”
Yerzù à òhwi lì hvòmɛ̀nɛ̀ Yòwanìrzɛ̀ e Mòlùhwìrzèlì
7È hvònda ema hwà-òkòwèlì hwa ama Yòwanìrzɛ̀ hwà mà hwɛ lì timba, Yerzù rzìi a wòteyà lì òhweyà è ŋgìndì lì hvòmɛ̀nɛ̀ Yòwanìrzɛ̀. À ma hwa ijòwa nanù ema, “È hvònda ema e ma anjiye lì ɛndɛ lì ùŋmanɛ̀lɛ̀ Yòwanìrzɛ̀ ò mòrzànjɛ̀, mamɛ inyɔ e mà ɔ̀ŋgɛ̀lɛ̀ nanù ema è ma ɛnɛ e? È mà ɛnɛ ndi yàlì ema è mbɛ̀hvɛ̀nì e nyìŋgìrzɛ̀nɛ̀ e? 8Mamɛ ema inyɔ e ma ɛ̀ndɛ lì ɔ̀ŋgɔ e? Mòtò ema à mà wɔ̀tɔ̀ lìwɔtì la gbamù e? Hwatò ema hwa wɔ̀tɔ̀ iŋgi nyayi ja màwɔ̀tì hwa lìya ndi ò màndawò ma hwàkànèlì. 9È na òhweyà rzɔ mamɛ ema inyɔ e ma wurze ò lì ɛndɛ lì ɛnɛ e? Mòòhwèlì wà èlìŋgɛ̀ ndi e ma arze lì ɛnɛ e? Ò jɔ̀kɛ̀ inyɔ e ma ɛnɛ mòtò ema a akayi Mòòhwèlì wà èlìŋgɛ̀. 10Yòwanìrzɛ̀ ndi à hwèlì e mɔ̀ ema hwa ma hwɛ lì òhwa lìrzakò ema hwa ma tìle e mbɔrzi ema Lohwɛ̀ a òhwi nanù ema, ‘Ɔ̀ŋgɔ tɛ, na òmà mèèrzènjà mè ami ò lì ɛ̀ndɛ ò wòrzò wò aŋgɔ̀ a ò rzèkeyà e njiya ya aŋgɔ̀.’ 11Nà è òhweyà nà è jɔ̀kɛ̀ nanù ema, ò hwaŋga hwa arzɛ ema hwa ma lìya anù rze ya mɔ̀nyɛ̀, ò rza enje tɔ̀ mɔ̀kɔ ema a akayi Yòwanìrzɛ̀ è Mòlùhwìrzèlì. Ndi tɔ̀ e mɔ̀ ema a hwèlì e Njùŋgɛ̀ ò Lìkànèyà la ama Lohwɛ̀, a akayi Yòwanìrzɛ̀ wòlìtò. 12Lìwòteyà è hvònda ema Yòwanìrzɛ̀ è Mòlùhwìrzèlì à mà wòteya lì òhwa Èya ya Lohwà natɛ̀ɛ na naŋgɛ, Lìkànèyà la ŋmanyu lì ma luwa mètàkà rzayi-rzayi ò màà mà hwatò, ndèŋgànɛ̀lɛ̀ hvɛ hwatò hwa mòhvùŋgu hwa hwèlì hwa lì ìnɛ̀lɛ̀ na e njuma. 13È mbenda ya ama Mòrzè na hwà-òhwèlì hwa hwèlìŋgɛ̀ hwa ma òhwa lì hvòmɛ̀nɛ̀ lìni lìkànèyà natɛ̀ɛ nà ò ene hvònda yà ama Yòwanìrzɛ̀. 14O èŋgànɛ̀lɛ̀ e wòŋgirzɛnɛ tɛ ò lì lòkɛ̀ e mbɔrzi ya awu, Yòwanìrzɛ̀ ndi à hwèlì e mɔ̀ ema hwa ma hwɛ lì òhwa e hvònda ema hwa ma òhwe nanù ema Èlàyijà a hwèlì a jà. 15Tɔ̀ ima mòtò ema à òhvi matò, a hweye.
16“Nɛ na tànɛyi lì mɛnɛ ene nyɔ̀ŋgɔ̀nì e? Ène nyɔ̀ŋgɔ̀nì e gbèyi ndi nàa ŋgìndì ya hwàna ema hwa lìyayi ò èwòka ya màlòkò rzìi hwa a tɛɛnɛ mɔ̀kɔ na ɔ̀nɛyi nanù
17ema, ‘Je e tòŋgelì hvòle,
ndì e rza rzàyi.
Je e embelì mɛ̀rzɔ̀kɔ̀ me kpelì,
ndi inyɔ e rza ɛhwi.’
18Nà è òhweyà ndì hwene hweyà nanù ehwànja e hvònda ema Yòwanìrzɛ̀ è Mòlùhwìrzèlì à mà hwɛ, a rzìi nyàmɛ̀lɛ̀ lì laa mòlelì na lì nyɔ mimba. Hwa ma hwɛ lì òhwa nanù ema, ‘A òhvi èlìŋgɛ̀ ya wòhwe ò nyò ya eni.’ 19È Ŋmanà wà è Mòtò wà Hwènàmà à mà jèe, mɔ̀ à mà làa mòlelì, a nyɔ hvɛ mììmba, e òhwa nanù ema, ‘È mò ɔ̀ŋgɔ aŋga a lìŋgàni mòlelì rzayi-rzayi. A hwèlì hvɛ ndì mòtò wa mbòma, a hwèlì hvɛ ndì e mbunda ya hwarzàŋgelì hwa e njàŋge ya lìkànèyà na hwatò hwa wòhwe.’ Ndi ò lìrzukù hweyà ema hwe ò gbèyɛ̀nɛ hwe ò uŋmɛ̀lɛ̀ nanù ema lìhwiyè la ama Lohwɛ̀ lì hvòmɛ̀nɛ̀yi.”
Màmbowà mà hwatò ema hwa rzìi lòkɛ̀yi Yerzù
(Luk 10.13-15)
20Hwatò ema hwa ma hwɛ ò màmbowà ema Yerzù à mà gbeeya hweyà hwe mànyakà rzayi-rzayi wɔ̀ hwa rzìi kìnyɛ̀lɛ̀ wòhwe wò awu. O èŋgànɛ̀lɛ̀ rzɔ Yerzù à mà wòteya lì hwa kanja, 21ò lì òhwa nanù ema, “Lìkunde lì ndɛnɛ̀ lì hwèlì lì e àmbɛ̀lɛ̀, inyɔ hwatò wa Kòràrzinì! Lìkunde lì ndɛnɛ̀ hvɛ nà hwatò hwa Bɛ̀trzàyìdà! Mànyakà ema Lohwɛ̀ a mà gbèye ò mbòwà yà anyu, ma mà gbèyɛnɛ tɛ ndì ò mbòwà yà Tàyi nà Rzidònì, hwaŋga hwatò ema hwa ma wɔtɔ̀ màatù ma màyɛ̀ɛhwɛ̀, rzìi hwa akòmɛ hvɛ lìwù ò inyò ja awù ò lì uŋmɛ̀lɛ̀ nanù ema hwa mà ayèŋgòwɛ̀ ò wòhwe wò awu. 22Nà è òhweyà ndi e jɔ̀kɛ̀ nanù ema, ò wùnyà wò hwèkàyìrzèlèlì, ɛ̀kɔ̀kìrzɛ̀ ema hwatò hwa Tàyi nà Rzidònì hwa ò lùwà e hwɛ̀nɛ̀ rzìhwɛ lì akà è hwe anyu. 23Inyɔ hvɛ hwatò hwa Kàpɛ̀nàwɔ̀mì, è ɔ̀ŋgɛ̀lɛ̀ nanù ema, e ma uka ò ŋmanyu ya Lohwɛ̀, ndi è hwɛnì lì rzìhwirzɛhwɛ ò tenì yà mùnya. È ma hwɛ tɛ ema hweyà hwe mànyakà ema Lohwà à mà gbèye ò mbòwa ya anyu hwe mà gbeyàhwa tɛ ndi ò mbòwa ya Rzòdòmi òma eŋge mbòwà e hwèlì natɛ̀ɛ na yàwònò. 24Nà è òhweyà ndi e jɔ̀kɛ̀ nanù ema, ò wùnyà wò hwèkàyìrzèlèlì Lohwɛ̀ à ò uŋmɛ̀lɛ̀ ììlì ò hwatò hwa Rzòdòmì lì aka inyɔ.”
Yerzù à yòhwɛ hwatò ema hwa je na mɔ̀
(Luk 10.21,22)
25O èŋge hvònda Yerzù rzìi a òhwa nanù ema, “Ìi Tatɛ̀, Rzàŋgò wà ŋmanyu yà lohwà nà è rze ya mɔ̀nyɛ̀, nà ò ekì ehwànja ò ùŋmɛlɛ jùma hwanà hweyà ema ò ma wunane hwàŋgà ema hwa òhvi mahwiye na hwaŋga hwatò ema hwa rzɔ̀ŋgìtɛ̀nɛ̀. 26Ɛ̀ɛ ìi Tatɛ̀, nanù ndi ò mà àrze òma e gbeyɛ̀nɛ̀.” 27“Tatɛ̀ wa ami a nò ŋgbelì hweyà hwe arzɛ ò màà mà ami. Tɔ̀ mòtò a rza hwi a hwiya e ŋmanà lì aka tɛ Lohwɛ̀ e Tatɛ̀. O rza enje hvɛ tɔ̀ mòtò ema a hwi a hwiya nɛ e Tatɛ̀ yɔ hvɛ e hwèlì lì aka tɛ e ŋmanà na tɔ̀ ima mòtò ema e ŋmanà a ò lìŋgànɛ ò lì mò uŋmɛ̀lɛ̀.
28“È je na imba, inyɔ hwatò hwa arzɛ ema e ma ɔ̀tɔ̀ ò lì hwanɛ̀ miyuna ema me lìti, na e ŋgbà lì arziyòlɛ. 29Inyɔ e hwɛni lì emeyà ò lì nɔ̀ŋgɔ i mbɔ̀ɔ ja ami ja matàŋga, ndèŋgànà e nò òkòwàna, ehwànja na hwèlì ŋmɛɛ na òhvi hvɛ ŋmèma mò ami ema mò wɔ̀wi. È jèe e luwa la arzìyòlɛ̀. 30Ehwànja hwèyòkòlèlì hwe ami hwe rza ambi ndèŋgànà mùùnà mò ami mò rza lìti.”
Voafantina amin'izao fotoana izao:
Matiyò 11: bri
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
