Yohane 2
2
Pntriyan Alang Gana
1Mk3 ali de niqan mpsterung riso ma weewa ka alang Gana ga Galil hiya. Ga hiya ka bubu Yesu. 2Splawa daha hiya uri ka Yesu ma tnugsaan na. 3Wada daha qhdeun mimah ka sino de rmengo Yesu ka bubu na: “Uka sino daha da.” 4Rmengo ka Yesu: “Bubu, maanu pnugluban ta isu ma yaku ka nii? Ini dehuk ka ali mu nana.” 5Rmengo dmpmiyak ka bubu na: “Ani maanu ka srengo na yamu we qpahi.” 6Muyu gaya seediq Yudaya bnkegan gaya psbgurah we ga hiya ka 6 salo psaan qsiya snmalu btunux. Knkingal salo we mtduwa psaan 2 ma 3 huur qsiya. 7Rmengo dheya ka Yesu: “Stngai qsiya ka salo.” Kiya de pstngayan daha. 8Rmengo dungal ka Yesu: “Saya de dahur ma adis berah qbsuran uqan psterung.” Kiya de desun daha hiya. 9Tnguhan qbsuran uqan psterung ka qsiya wada ma sino ma ini na klai pneeyah inu ka sino. Wano dseediq dmpmiyak dmnahu qsiya ka mkela. Kiya de splawa na ka riso pstreengan. 10Rngagan na ka heya: “Ani ima seediq we pllayun na peeyah ka malu sino han betaq mndungus ka nmahan seediq de pyahun ka tgnaqah. Isu we skuwan su betaq saya ka malu sino!” 11Nii ge tgkingal pnskraya qneepah Yesu meeniq alang Gana ga Galil hiya ma sptuura na ka knledax na. Kiya de snhii heya ka tnugsaan na.
12Bobo na nii de msuupu bubu na, mtswai na ma tnugsaan na mosa Kaparnaom ka Yesu. Ini qbsiyaq hiya ka dheya.
PkMrtaso Sapah Thmkuwan
(Mat 21:12-13. Mrk 11:15-17. Ruk 19:45-46)
13Kiya de smdaling ka smseman hrnasan seediq Yudaya ma mosa Yerusalem ka Yesu. 14Taan na Sapah Thmkuwan ka dmpsbaruy dapa, miric rudu ma byugu. Taan na uri ka dmpriyux pila ga tleung hiya. 15Kiya de smlean na ssebuc ka snuyuk ma pqdriqun na peeyah Sapah Thmkuwan ka kana dapa ma miric rudu. Kiya de srehak na ka pila dmpriyux pila ma spoxun na ka psaan pryuxan daha pila. 16Kiya de rngagan na ka dmpsbaruy byugu: “Adis peeyah hini ka nii! Iya ngali bbrigan ka Sapah Thmkuwan Tama mu!” 17Tnugsaan na de asi lngelung pnatis Patis: “Mtbeyax ba lhebun mu quri Sapah Thmkuwan mntena puniq sqama.” 18Maanu so kiya de smiling heya ka dseediq mdudul Yudaya: “Ptuura su maanu pnskraya pqita su yami pgkela su mooda qmeepah so nii ho?” 19Cmiyuk dheya ka Yesu: “Hrahun namu ka Sapah Thmkuwan nii de mk3 ali phyegun mu dungal.” 20Rmengo ka seediq Yudaya: “Sapah Thmkuwan nii we wada 46 knkawas snlmean. Isu de mk3 ali dhekun su pheyu peni?” 21Kiya de Yesu we spaangal na Sapah Thmkuwan rmengo ka heyi na. 22Kiya de bobo wada muudus peeyah hnqilan ka heya de hani lmngelung rmnengo kari so nii ka dheya. Kiya de snhiyun daha ka ga spatis Patis Mrtaso ma kari rnengo Yesu.
Mita Lhebun ka Yesu
23Meeniq Yerusalem smseman Hrnasan ciida ka Yesu we mita pnskraya qneepah na ka hbaro ba seediq de snhii ngayan na da. 24Yesu we ini na snhii ka dheya, ado klaun na ka kana seediq, 25ani nanak uka ka pgkela mmaanu ka seediq, ado klaun na nanak ka lhebun seediq.
Voafantina amin'izao fotoana izao:
Yohane 2: Stgdaya
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Bible Society in Taiwan, 2020
© 台灣聖經公會版權所有，2020
