Yohane 1
1
Heyi ka Kari
1Niqan Kari ka pnrdingan, mnsuupu Utux Baro ka Kari, Utux Baro ka Kari. 2Mnsuupu Utux Baro pnrdingan ciida ka Kari nii. 3Mnoda heya wada slmean ka kana ani maanu ma kana snmalu we uka ani 1 ka uxe mnoda heya. Kana smnalu, 4ga heya ka knuudus ma knuudus nii we kika ledax seediq. 5Lmedax ckceka kuung ka ledax ma ini pnkala heya ka kuung.
6Niqan 1 seediq snkgulan Utux Baro. Ngayan na we Yohane. 7Meyah pgkela ka seediq nii. Ledax ka spgkela na. Kiya de spoda na heya ssnheyi kana seediq. 8Uxe ledax ka heya. Ledax ka yahan na pgkela. 9Bale ba ledax ka ledax kiya, meyah bobo dxeral pkledax kana seediq. 10Meniq bobo dxeral ka heya ma mnoda heya wada smlean ka bobo dxeral. Kiya de ini kela heya ka qnlangan. 11Meyah dxeral na nanak ka heya ma ini psteme heya ka seediq na. 12Kana psteme heya we, kiya ka dseediq snhii heya. Kiya de biqan beyax maha mlaqi Utux Baro. 13Uxe mntuting dara ma uxe mntuting smkuxul toma mtuting. Pnoda Utux Baro nanak mtuting.
14Kiya de wada mseediq ka Kari ma meniq ckceka menan, gaga stngayan huwe ma bale ba. Ntaan miyan ka knledax na. Kiya ka knledax 1 ba laqi Tama Baro. 15Heya ka spgkeela Yohane ma mdiras rmengo: “So nii ka rnengo mu: ‘Gisu bukuy mu we mkala kenan, ado tena niqan meniq berah mu ka heya.’” 16Peyah knttuku na, wada ta mangal huwe na ma malan huwe dungal ka huwe. 17Ado pnoda Moseh ka gaya. Kiya de mnoda Yesu Kiristo meyah ka huwe ma bale ba. 18Uka ani ima seediq qmnita Utux Baro. Wano 1 ba laqi kmehun berah tama ka wada na spgkela.
Pnugkela Yohane Ptgaya Smino
(Mat 3:1-12. Mrk 1:1-8. Ruk 3:1-18)
19So nii ka pnugkela Yohane: Seediq Yudaya we peeyah Yerusalem smkagul dmsapuh ma seediq Lewiy mosa Yohane hiya, smiling heya: “Ima su ka isu ho?” 20Pkleexan ma ini deqo rmengo ka heya: “Uxe ku Kiristo ka yaku.” 21Smiling dungal ka dheya: “So kiya de ima su ho? Eliyah ho?” Rmengo ka heya: “Uxe.” “Mpgeela kari su ho?” Cmiyuk: “Uxe.” 22Kiya de rmengo ka dheya: “Ima su bale ka isu? So miyan cciyuk seediq smnkagul menan. Ima kesun su ka isu nanak ho?” 23Rmengo ka heya:
“Yaku we kiya ka seediq nii mlawa ckceka tadus brenux:
‘Psderux elu ddaun Bukung.’
So nii ka rnengo Isaya mpgeela kari.”
24Snkgulan seediq Parisay ka duma seediq, 25dheya we smiling heya: “Nasi su uxe Kiristo ka isu, uxe su Eliyah ma uxe su mpgeela kari uri de hmuwa, ma su ptgaya smino seediq ho?” 26Cmiyuk rmengo dheya ka Yohane: “Qsiya sptgaya mu smino ka yaku. Kiya de niqan ka 1 pheyu ckceka namu we uxe namu gnklaan. 27Kiya ka mmeyah gisu bukuy mu. Ini ku mnuglengu ani lhelah negul ramil na ka yaku.” 28Nii we kiya ka pnugkela Yohane ptgaya smino nniqan na sipo Yarden alang Betania hiya.
Wawa Miric Rudu Utux Baro
29So kusun, Yohane we mita Yesu meyah heya, kiya de rmengo: “Qtai! Wawa miric rudu Utux Baro mpkaangal qnquwan noda bobo dxeral! 30So nii ka rnengo mu: ‘Gisu bukuy mu we mkala kenan, ado tena niqan meniq berah mu ka heya’ mnesa ku we kika seediq nii. 31Yaku we ini ku kela heya han. Pttuura mu quri Israel ka heya, kiya ka ptgaya ku smino qsiya saya.” 32Kiya de pgkela rmengo ka Yohane dungal: “Ntaan mu ka Bgihur Utux mntena so snkiya byugu peeyah baro meyah meeniq heyi na. 33Yaku we ini ku kela heya han. Kiya ka smnkagul ptgaya mu smino qsiya we rmnengo kenan: ‘Taan su ka Bgihur Utux peeyah baro meyah msange heyi nima de kika heya ka mooda psino Bgihur Utux.’ 34Ntaan mu ka nii de, kika nii mu spgkeela: Heya we laqi Utux Baro.”
Pnlaale ba Gmao Tnugsaan
35Kiya de so kusun dungal, mtheyaq 2 tnugsaan na mheyu hiya ka Yohane. 36Qtaan na gisu mkkesa ka Yesu de rmengo: “Qtai, wawa miric rudu Utux Baro!” 37Mbahang rnengo Yohane ka 2 tnugsaan na de smnegul Yesu. 38Kiya de mspgeriq heyi na ka Yesu ma taan na nii smnegul heya de rngagan na ka dheya: “Maanu ka pgsaun namu ho?” Rmengo heya ka dheya: “Rabi, ga su meeniq inu?” (Hdilun ka Rabi we mptgesa kesun.) 39Rmengo ka Yesu: “Eyah mita bino!” Maanu so kiya de saan daha mita ka ga na niqan. Kiya de msuupu heya ali ciida ka dheya. Ciida we yaa ba 4 toke bobo ceka naali. 40Mnbahang kari Yohane smnegul Yesu ka 2 heyi nii we 1 na heya we Andreas mtswai Simon Petros. 41Pllayun na migin ka qbsuran na Simon ma rngagan na: “Qmnita miyan Misaya da.” (Hdilun ka Misaya we Kiristo kesun.) 42Kiya de Andreas we desun na berah Yesu ka Simon. Tlleus mita heya ka Yesu ma rmengo: “Isu we Simon laqi Yohane. Kepas kesun tmngayan ka isu.” (Hdilun ka Kepas we Petros kesun.)
Splawa ka Pilipos ma Natanael
43So kusun mkmosa Galil ka Yesu. Slayan na Pilipos de rngagan na: “Eyah snegul kenan!” 44Pilipos nii we seediq Betsaida alang Andreas ma Petros. 45Pilipos we slayan na ka Natanael, ma rngagan na: “Ga spatis Moseh ckceka patis gaya ma ga spatis dmpgeela kari ka heya we qntaan nami da. Kiya ka Yesu seediq Najare laqi Yosehu.” 46Rmengo heya ka Natanael: “Mtduwa ppeeyah malu ka Najare ho?” Cmiyuk heya ka Pilipos: “Eyah mita bino!” 47Yesu we taan na meyah heya ka Natanael ma rmengo quri heya: “Qtai, nii ka bale ba seediq Israel. Lhebun na we uka mberiq.” 48Smiling Yesu ka Natanael: “Wada saku huwa kesun mkela ho?” Cmiyuk heya ka Yesu: “Ini plawa sunan ka Pilipos meeniq su toma qhuni nunuh berah na ciida we teena ku mita sunan da.” 49Rmengo heya ka Natanael: “Mptgesa! Isu we laqi Utux Baro. Isu we qbsuran paru Israel!” 50Rmengo heya ka Yesu: “Ado rmnengo ku: ‘Taan misu ga su meeniq toma qhuni nunuh,’ de snhii su di ho? Mpqita su ka mgkala nii knparu ooda!” 51Rmengo dungal: “Bale ba rngage maku, mpqita namu ga mtraguh ka karac baro ma meeyah heyi Laqi seediq ka snkgulan Utux Baro, mtbrberih mosa baro ma meyah toma dungal.”
Voafantina amin'izao fotoana izao:
Yohane 1: Stgdaya
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Bible Society in Taiwan, 2020
© 台灣聖經公會版權所有，2020
