Yaaya 14

Iisa ay botol ma kataa wikirti Baaba

1Gaa Iisa beneyyiyyoo payya gaa: «Gu galbigeetoŋ addo naŋga ɗa. Duwoŋgu oko Mellayi o ku duwoŋgu kulla oko naa. 2Were maa ga Tattu alɗo lekka wereeriyee maani ku nuntiti. Na kataa na deeɗitoŋ pana were. Gaa alɗo ɗa seene, na beneyyatoŋ ɗa. 3Naa kaate na deeɗitoŋga pana were kaaka pa, na yokaa na asikkitoŋ kaata ma naa, ku maa ga kuŋ kulla deeɗo nunta sariptu were maa na alɗo, 4o ku ebenna botol ma katawkitoŋ were maa na katawɗo.»

5Gaa Toma tiiliɗe gaa: «Miltu, ni ibinya ɗa were maa ki katawɗo. Kaaka pa, ni ebenna pe nii me botol?» 6Gaa Iisa tiiliyee gaa: «Naa ay botol o na ay seene o na ay hayaatane. Lekka ɗa gimu ma gederra ga kaatiɗo wikirti Mella Baaba bala naa. 7Kuu ibinno, ku ebenna kulla Tattu. Min haŋka soopa ku ibinya o ku elliyya.»

8Gaa Pilip tiiliyyee gaa: «Miltu, gaaraniiga Mella Baaba, gi maanani appe.» 9Gaa Iisa tiiliyyee gaa: «Na domokke paaɗe ma kuŋ Pilip, kii alɗino ibina ɗa? Maa gaa ellino, elliyya Mella Baaba. A ayme payya ki enewɗino kii na gaaratoŋga Mella Baaba? 10Ki amanne ɗa kadar ga na aayee ɗakko oko Mella Baaba o gata aayaw ɗakko oko naata e? Beneyyi maa na beneyyatoŋ keeke, na cemekkiya ɗa min kayaatu ka. Mella Baaba, ma aayaw ɗakko oko naa, ay gata ma leewa kanti maa ga aŋka. 11Amannoŋga beneytu kadar ga naa aayee ɗakko oko Mella Baaba, o gata aayaw ɗakko oko naata. Kuu amanna ɗa saananti beneytu keeke, ku amannoŋ ɗe saananco garrarritaw ku ajjibiti maa na leewa.

12«Giyyoŋ! Na beneyyatoŋca seene. Gimu ma duwca galbanti oko naa, leewa ga gata kulla gaari ku ajjibiti aleŋ maa na leewa, o ga leewa kulla ma ƴiilay kunni, asan ga naata kataa wikirti Mella Baaba. 13Na leeway gaari paracco maa ku enaa ma semeetaw, ku maa gi darjanti Mella Baaba deeɗo gaarenta saananti Runti. 14Kuu inne aɗe goŋŋa maatiki ma semeetaw, na leewaa.»

Mella Baaba n̰akammaca Ruuhanti

15Gaa Iisa beneyyiyyoo payya gaa: «Kuu ƴekkano aɗe goŋŋa, ku akkiy jobba hukumnigeetaw. 16Naa pa enaa Mella Baaba, ga n̰aamittoŋ gayaawa kaƴi, ma akka nunta ta kaw ma kuŋ. 17Gayaawa kaaka pa, ay Ruuhane ta seeniti. Giimi ku dunuune teete ma amanne ɗa oko beneytu gederra ɗa gu gassicca, asan gu ellaca ɗa o gu ebennaca ɗa, kuŋ soopa ibinca, asan gi gita nowotta ma kuŋ o gi akka ala galbigeetoŋ. 18Na otokkatoŋ ɗa kaytoŋ ka aleŋ ooree. Na yokaatoŋ. 19Marakke pe wikinne paalta ka, guu giimi ku dunuune teete asinno parsa pe ta kaw. Kuŋ soopa akkino ella payya asan na yooka hayaatanti gaa kuŋ kulla gassicca hayaatane. 20Meene maa na asiɗo yooka hayaatanti taata pa, ku leewa paaɗe kabarre kadar ga naa aaye ɗakko oko Tattu, o kuŋ kulla aayaw ɗakko oko naata o naa kulla aaye ɗakko oko kuŋ. 21Gimu ma ibiniy hukumnigeetaw o ga jobbiy ay gata kaaka appe ma ƴekkano. Maa gaa ƴekkano ga Tattu kulla ƴekekka, gaa naa kulla ƴekkiyya o na oyee ga ibininno ta tirta teete.»

22Gaa Yud, mettanti Yudas Iskariyot, inniyya gaa: «Miltu, ayme ki oyowɗini ni ibinɗum ta tirta teete ga nii ka, a giimi ku dunuune teete pa ki oyaayo ɗa gu ibinɗum?» 23Gaa Iisa tiiliyyee gaa: «Gaa gimu ƴekkino, ga jobokkaa beneytu. Gaa Tattu ƴekkiyya, o ga naa ma Tattu ni asee wikirti ni asiɗo nunta ma gata.» 24Gimu ma ƴekkano ɗa, jobokka ɗa beneytu, o ga beneyyi keeke maa ku geewaa asaa ɗa min oko naa, ay min oko Mella Baaba ma n̰akamminoo.

25«Na beneyyitoŋgu gaari kooko paracco maa na alɗo missa ma kuŋ. 26Mella Baaba soopa n̰akammaca Ruuhanti ma semeetaw. Ay gita appe ma akkitoŋ gaaya, o gi akkitoŋgu gaara gaari paracco, o gi akkitoŋ gaaya ku moyowɗiy gaari paracco maa na beneyyitoŋ.

27«Na merekkatoŋca aapiya. Ay aapiya tanni maa na beraatoŋ. Naa pa beraatoŋca ɗa aleŋ maa gu giimi ku dunuune teete beraa. Gu galbigeetoŋ addo naŋga ɗa o gu kellemtoŋ addo ooma ɗa. 28Ku giyye appe maa na beneyyittoŋ naa na kataa, naa yookittoŋ aɗe soopa. Kuu ƴekeɗɗino aɗe goŋŋa ma seene, ku parhanna kuu leeɗo kabarre kadar na kataa wikirti Mella Baaba, asan ga gata tatta ƴiila min oko naa. 29Na beneyyitoŋ appe min haŋka, maa gu gaari kooko alɗe asaa ɗa missa, ku maa ga ya oko wikinne maa guu ase asa pa, ku asiɗo amanna oko beneytu keeke. 30Na lekka ɗa payya wikinne maani maa na beneyyiɗo ma kuŋ, asan ga Seetanne ma ay sultan ka dunuune teete asaa. Naa soopa ga hekemeyyano ɗa ta kaw, 31innasoopa, na leeway gaari paracco maa ga Mella Baaba beneyyiyaw, ku maa gu giimi ku dunuune teete leeɗo kabarre kadar na ƴekka Mella Baaba o gu gaari paracco maa na leewa ay maa ga beneyyiyaw gaa na leyyiy.

«Haŋka pa ku wacoŋ, parne min iŋee.»

Voafantina amin'izao fotoana izao:

Yaaya 14: mmy

Asongadina

Hizara

Dika mitovy