Yaaya 13

Iisa apallayoogu asinco jobookeetee

1Katta maa gi laalane ta Pakti asiɗo, ga Iisa ibinya appe kadar ga wikinniti ase maa ga uttitti oko dunuune teete, gaa kaatiɗo wikirti Mella Baaba. Gaa gaariyyooca ƴekkiti oko gimtee ku dunuune teete, o gi ƴekkiti gaame ɗa ya deesiti.

2Ma pootimooko maa ga Iisa ma jobookeetee tewɗo, caŋ gaa Seetanne pa esekkeeca paaɗe oko Yudas, runti Simo Iskariyot, ku maa ga biriyyooga Iisa oko taattuweeco Yawudigeyyo. 3Iisa pa lekka kabarre kadar ga asee min Mellayi o ga yokaa oko Mellayi, o ga Mella Baaba kapakkeeca darjanti ta lawwi paracco. 4Wikinne maa gu tewɗo, ga Iisa wace ga seetiyya kaɗiyyiti ka tatta, gaa icciɗe kaɗiyye ga onnicca abuuti. 5Gaa ɗabbiɗe ammi ga kalliɗiy daakuwayyi, gaa diiliɗe ga apalɗiyoogu asinco jobookeetee, gaa semeɗɗiyoogu ma kaɗiyye maa ga onokke abuuti.

6Maa ga sariyyee oko Simo Piyer, gaa Simo leeɗiyee gaa: «Miltu, ki apallawgu asintaw ga kii e?» 7Gaa Iisa pa tiiliyyee gaa: «Ki ibinya ɗa latta ma na leewa keeke haŋka, ki akkiya ibina pe ya omma.» 8Gaa Piyer beneyyiyee gaa: «Haha, ki apallawgu ɗa ta kaw asintaw!» Gaa Iisa tiiliyyee gaa: «Naa apilamgu ɗa, ga lekekka ɗa payya maatiki ma wagaayeŋ.» 9Gaa Simo Piyer beneyyiyyee gaa: «A gaa goŋŋa pa, Miltu, ki aɗawgu apila ɗa asintaw ka, apilawgu kulla pittaw o kayaatu.» 10Gaa Iisa beneyyiyyee gaa: «Gimu ma acakke paaɗe ɗelekka ɗa payya acco illa ay asintee ka pe ga apallay, asan ga ziiti paratti samaane. Kuŋ samaane unti Mellayi, soopa ga parattoŋ ɗa.» 11Iisa pa ibinya paaɗe gimu ma beraa oko taattuweeco Yawudigeyyo. Ay ɗakko appe ga beneyyiɗe gaa gu samaane unti Mellayi, soopa ga paracco ɗa.

12Maa ga Iisa gaamiɗe apilo ta asinco jobookeetee, gaa issiyya kaɗiyyiti gaa nuntiɗe ga beneyɗiyo gaa: «Ku ibinya aɗe butulco gaari kooko maa na leetoŋ e? 13Ku kolaano kuu na ay Miltoŋ o kuu na ay Garaawatoŋ o ga beneytoŋ keeke ay butulti. Ay seene appe. 14Gaa naa ma ay Miltoŋ o ma ay Garaawatoŋ apiltoŋgu asintoŋ, ga kuŋ kulla dee apallo asintoŋ aattoŋ. 15Na gaaritoŋga keeke ku maa ga kuŋ kulla dalinno, kuu leeɗiya aleŋ maa na leetoŋ. 16Giyyoŋ! Na beneyyatoŋca seene: Lubaaka ƴiilaa ɗa tattuwti o n̰amaaka ƴiilaa ɗa gimu ma n̰amakkaa. 17Haŋka pa, ku ibinya appe keeke paratti. Kuu leewaa keeke ku deewa baarikenta.»

18Gaa Iisa beneyyiyyoo payya gaa: «Na beneyyatoŋ ɗa maa ka parattoŋ, na ibintoŋ aɗe kuŋ maa na aparre! Innasoopa, ga aŋka ga beneyti Kitamniti Mellayi asiɗo butulti. Gita pa beneyyiye gee: “Gimu ma teero ma naata deero kasiimintu#13.18 Elloŋ Soom 41.10..” 19Na eyaatoŋgu saa deytoŋ min haŋka maa gu gaari alɗe asaa ɗa missa, ku maa guu ase asa pa, ku amanniɗo kadar ga ‘Naata ay Ma Aaye Diiman’#13.19 Elloŋ Oomiti min Masir 3.14.. 20Giyyoŋ! Na beneyyatoŋca seene: Gaa gimu joobiya gimu maa na n̰akamme, ga jobowwino naa kulla. A gaa joobino naa pa, ga jobowwiya gata ma n̰akamminoo.»

Gimu ma beraa Iisa picco giimo

(Elloŋ Matiye 26.20-25, Mark 14.17-21, Lik 22.21-23)

21Maa ga Iisa beneyyiɗe goŋŋa pa, gi galbanti naŋge. Gaa beneyyiyyoo saa pe purta gaa: «Giyyoŋ! Na beneyyatoŋca seene: Kaƴi min aattoŋ akkino bira picco giimo.» 22Guu jobookeetee elelɗo zeneeco, guu alɗo ibina ɗa baŋ ga beneyya ma gaartee we. 23Gaa jobooka ka kaƴi pa maa ga ƴekka maani nowoɗɗe katta saripti. 24Gaa Simo Piyer kekkiɗiyya gaa ga inniya ƴa Iisa, baŋ ga beneyya ma gaartee we. 25Gaa jobooka kaaka daaliyyee oko Iisa, gaa inniyya gaa: «Miltu, gata ay we ɓa soo?» 26Gaa Iisa tiiliyyee gaa: «Gimu maa na bereeca lugumatu teete maa na noƴaa tiwwo, ay gata appe ma akkino bira picco giimo.» Gaa goyyiɗe luguma ga nuuƴicca, gaa n̰aamiyyeeca oko Yudas runti Simo Iskariyot. 27Gaa maa ga Yudas iccicca kaaka saa, ga Seetanne issiyyeeca. Gaa Iisa beneyyiyyee gaa: «Maa ki aŋka ki leeɗiya, ki leyya appe koɗokka.»

28Min oko gittee ma nowotte gu tewɗo kotti pa, lekka ɗa ya kaƴi ma ibine baŋ ga ayme ga Iisa beneyyiyee goŋŋa. 29A mileŋ ga Yudas appe pa, ma bakammiyooga gurusco, gu jobookee daare pa leewe goo walaŋ ga Iisa leyyee gaa ga addo giɗa tiyaw ta laalanti, e baŋ goo ga aɗaayo bira gurus oko saamuweyyo. 30Maa ga Yudas iccicca luguma, gaa oomiɗe saa pe diwil renta. Were pa ay aandoŋ appe.

Hukumnigee ku marawta

31Maa ga Yudas oomiɗe, gaa Iisa beneyyiɗe gaa: «Haŋka pa gu giimi akkica ella darjanti Runti Gimi o ga ma Runti Gimi gu giimi akkica ella darjanti Mellayi. 32Aleŋ maa ga Runti gaaricca darjanti Tatti, ga Mella saa kulla akkica gaara darjanti Runti ma garrarritee maa ga akka lee. Keeke pa, ga Mella leewaa katta. 33Rontaw, na aaye ma kuŋ wikinne paalta ka pe. Ku akkino diyya. Aleŋ maa na beneyyiyoo oko taattuweeco Yawudigeyyo min omma, ga kuŋ kulla na beneyyatoŋ ga haŋka: Ku gederra ɗa ku kaatiɗo were maa na katawɗo. 34Na beraatoŋ hukumne ta marawta: Ƴekkoŋ zeneetoŋ beenannitoŋ. Aleŋ maa ga naata ƴekkittoŋ, ga kuŋ kulla ƴekkoŋ zeneetoŋ beenannitoŋ. 35Kuu ƴekka zeneetoŋ goŋŋa, gu giimi paracco leewa kabarre kadar ku ay jobookeetaw.»

Iisa beneyya gaa ga Simo Piyer akka meela

(Elloŋ Matiye 26.31-35, Mark 14.27-31, Lik 22.31-34)

36Gaa Simo Piyer inniyya gaa: «Miltini, ki kataa ŋa?» Gaa Iisa tiiliyyee gaa: «Oko haŋka keeke ki gederra ɗa ki jobbinno were maa na katawɗo. Ki akkino jobba pe soopa ya omma.» 37Gaa Piyer beneyyiyyee gaa: «Miltu, ayme na alɗo gederra ɗa na jobbiɗum haŋka? Na oyee na biricca hayaatantu oko kii.» 38Gaa Iisa inniyya gaa: «Ki oyee aɗe ma seene ki biricca hayaatancum oko naa e? Giyyu! Na beneyyamca seene, kadar ga kokkor bookiɗo, ki melaa subbatiŋ kii ki ibinno ɗa.»

Voafantina amin'izao fotoana izao:

Yaaya 13: mmy

Asongadina

Hizara

Dika mitovy