Amangʼana agha Abhatomwa 5
5
Obhorongo ubhwa Anania na Safiira
1Yaare-ho ömöntö uwöndë yaabherekerwanga igha Anania na mokaaye igha Safiira. Abheene bhonswe bhakaghörya ömöghöndö ughwabho. 2Hano bhaaghörri ömöghöndö, Anania akabhisa seehera syëndë. Mokaaye wonswe akaikërrya igha bhabhise. Mbe, Anania akaghegha seehera seno syaatighaayë, akaherra abhatomwa abha Yëësu. Akabhatëëbhya igha, siyö nsyo bhaanyöörrë mö-möghöndö ghono bhaaghörri.
3Peetero akamötëëbhya igha, “Uwe Anania! N-kwakë Oghosambwa#5:3 Oghosambwa. Maaha mo-faharaasa. ghoroghaini enkoro iyaaho, kora ghöghërrë ötëëbhëri Umwika Ömöhörëëru obhorongo? Seehera isyëndë otabhööyë-ko, ubhisirë ka. 4Hano waanyöörrë otaraaghörya ömöghöndö ghuyö, nu-ghwaho ghwaarë. Na hano waaghöghörri, seehera ni-syaho syaarë, nokaasëkörëëyë emeremo bhono ukutuna. Bhoono n-kwakë ökörrë engʼana eno? Te-bhantö ötëëbhëri obhorongo hë, kasi Waryobha umwene we ötëëbhëri obhorongo!”
5Ni-igho Anania yaaighuurë amangʼana ghayö Peetero yaaghambirë, akaghwa hansë, akakwa. Bhonswe igho bhano bhaaighuurë amangʼana ghayö mu-nyumba muyö, bhakoobhoha bhököngʼu. 6Ho abhamura bhaaimökirë, bhakakundikirya ömöbhërë ughwa Anania ingibho, bhakamurishökya kebhara, bhakamobheeka.
7Hano syaahëtirë-ho seesa isatö, mokaa Anania wonswe akasoha igho atamanyirë keno kebhaayë. 8Peetero akamöbhöörya igha, “Ntëëbhya, seehera seno, nsyo mwaanyöörrë hano mwaaghörri ömöghöndö ughwënyu?” Mokaa Anania akamohonshora igha, “N-sëngʼana igho twaanyöörrë!” 9Peetero akamötëëbhya igha, “N-kwakë uwe na umushaasha uwaaho mwikererraini ukushaashya okongʼaina Umwika uwa Omonene Waryobha? Tigha nkötëëbhi! Abhamura bhano bhaarë bhaghëëyë okobheeka mushaasha uwaaho, bhakyörrë mo-kesaku hayö bharë. M-boono igho bharaasohe, bhakurishöki kebhara hayö ukuurë.”
10Kamwë igho, Safiira wonswe akaghwa hansë bhöröngë ubhwa amaghörö agha Peetero, akakwa. Abhamura bhano bhaabhëëkirë mushaasha uwaaye, bhakasoha, bhakanyoora Safiira wonswe akuurë. Bhakamurishökya kebhara, bhakamobheeka haangʼë na embeehera iya mushaasha uwaaye. 11Ghayö ghakaghira abhantö bhonswe igho abha ekanisa bhoobhohe bhököngʼu, hamwë na abhandë bhano bhonswe igho bhaaighuurë amangʼana ghayö.
Abhatomwa abha Yëësu bharahwënia abhantö abhaaru
12Abhatomwa abha Yëësu bhaahaaywë obhotoro ubhwa okokora amakono na ebhemanyërryö ibhyaru mo-bhantö. Na abhakumya abha Yëësu bhonswe igho, mbaaikomanianga hamwë mu-risengerro irya Waryobha. Ahasë hayö bhaaikomanianga, haabherekerwanga igha, Ëghösöryö iya Seremaani. 13Kasi abhantö bhandë bhoobhohanga okoghootana hamwë na abhakumya abha Yëësu, nokaanyoora mbaabhasookanga. 14Nokaanyoora yaabhaayë igho, kasi abhantö m-baaru këmwëkëmwë bhano bhaakumiri Omonene Yëësu, abhashaasha na abhakari. Ekerengere ikya abhakumya, nkiyëngëryanga bhököngʼu.
15Ko okoghera ukwa amakono agha abhatomwa abha Yëësu, abhantö mbaahiranga abharööyë kebhara haangʼë na enshera. Bhaabharaaryanga ko-mashambi, okore hano Peetero araashe ahete, bhano ikiiriiri ikyaye keraakuni, bhahwene. 16Abhantö m-baaru bhano bhaarwanga mu-mighi gheno ghyaainaaranga Yërusarëëmu, bharahira abharööyë abhaabho, na bhano bhaarë na amasambwa. Abharööyë bhayö mbaahwëniibhwi bhonswe igho.
Abhatomwa abha Yëësu bharanyankibhwa
17Mbe, omonene uwa abhasëngëri na bharikyaye bhonswe igho abha rikomo irya Abhasadukaayo, bhakakorra orongʼeera abhatomwa abha Yëësu. 18Ku bhuyö, bhakaghoota abhatomwa bhayö, bhakabhabhoha mu-nyumba enene iya ekebhohe. 19Kasi maraika uwa Omonene Waryobha,#5:19 Maraika uwa Omonene Waryobha. Maaha mo-faharaasa. akaasha ubhutikö, akeeghora ebhesaku ibhya inyumba iyö, akabharishökya kebhara. Hano yaamarrë akabhatëëbhya igha, 20“Moghende mwimerre mo-bhogho ubhwa risengerro irya Waryobha, mötëëbhi abhantö amangʼana ghonswe igho, agha öbhöhöru obhohya bhono!” 21Ku bhuyö abhatomwa bhayö, bhakamwighwera, bhakamuta nyinkyo shiri, ukughya mo-bhogho ubhwa risengerro irya Waryobha, bhakasimya ukwëghya abhantö.
Enkaagha iyöiyö, omonene uwa abhasëngëri hamwë na bharikyaye bhaara, bhakabherekera abhanene bhonswe igho abha Abhaisiraëri, okore bhasikane mo-bharasa enene. Bhakatoma abharëndi mu-nyumba iya ekebhohe, bhareete abhatomwa bhaara. 22Kasi hano bhaasöhirë-mo, tebhabhanyöörrë-mo hë. Bhakakyora ko-bhanene, bhakatëëbhya abhanene bhayö igha, 23“Hano tuhikirë mu-nyumba iya ekebhohe, ntunyöörrë ebhesaku bhisiikirwë bhuuya, kora abharëndi mbaarë bhaimërëëyë kebhara hayö bhararenda. Kasi hano twighööyë-ho ebhesaku, titunyöörrë-mö ömöntö wowonswe oora hë!” 24Mbe hano omonene uwa abharëndi, na abhanene abha abhasëngëri bhaaighuurë ghayö, bhakahaha, tebhaamanyirë keno kyaabhaayë hë.
25Hake igho akaasha ömöntö uwöndë, akabhatëëbhya igha, “Mwighwe mbatëëbhi! Abhantö bhano mwaabhöhirë, mbarööshë bhoono igho bharëngë mo-bhogho ubhwa risengerro irya Waryobha, bharëëghya-mo abhantö.” 26Ho omonene uwa abharëndi, hamwë na abharëndi abhaaye, bhakaghya okogheera bhatomwa bhayö, okore bhabhareete. Kasi tebhabhaghöötirë kwa nguru hë, ko bhoora mbööbhöhirë abhantö bhatakaashe bhabhateme na amaghena.
27Bhakabhatangatya ukughya mo-bharasa iya abhaghaaka. Bhakabhaimërrya bhöröngë ubhwa bhonswe igho. Omonene uwa abhasëngëri akabhabhöörya igha, 28“Tetwabhakaanëri kwa öbhörrö igha motakëëghya abhantö ku iriina irya ömöntö uyö? Bhoono n-kwakë mököghëndërrya ukwëghya abhantö amangʼana aghaaye Yërusarëëmu yonswe igho? Morabhatëëbhya igha m-bëëtö ikibhuno ikya uruku urwaye.”
29Peetero na abhatomwa bharikyaye, bhakabhahonshora igha, “Ntötöndörëëywë ukwighwera Waryobha, okokera ukwighwera abhantö! 30Bhëënyu mwaaitirë Yëësu, ko okomohaneka ko-mosarabha, kasi Waryobha uwa abhakörö abhëëtö, yaamuryökya. 31Akamuriinia, akamohaana obhonene ko okomotoora orobhareka urwaye urwa bhoryo, ahasë aha okosookwa, abhe Ömötöngi na Ömöhönia uwa abhantö. Waryobha yaakörrë igho, okore Abhaisiraëri, bhahongore ëbhëbhë ibhyaho, bhaabherwe. 32Bhëëtö hamwë na Umwika Ömöhörëëru, ono Waryobha yaahaana abhantö bhonswe igho bhano bhakumwighwera, mbo abhaimërërri abha ghayö ghonswe igho.”
33Hano abhanene bhayö bhaaighuurë amangʼana ghayö, bhakarerra bhököngʼu, bhakatuna bhaite abhatomwa bhayö. 34Kasi mo-bharasa hayö, yaare-ho Omofarisaayo#5:34 Omofarisaayo. Maaha mo-faharaasa engʼana, Abhafarisaayo. uwöndë ono yaabherekerwanga igha Ghamariëri. Ghamariëri uyö, m-mwëghya uwa amaraghërryö agha Mosa yaarë, kora yaasookwanga na abhantö bhonswe igho. Akaimerra akahamera igha, abhatomwa bharishökibhwi kebhara nkaagha enke igho. 35Ho yaamarrë, akatëëbhya abhanene bharikyaye bhayö igha, “Bhëënyu abhantö abha Isiraëri, mwitegherre kanga motaraabha okokora engʼana iyö mukutuna okokorra abhantö bhano! 36Morahiita-ko sinsikö seno syaahëtirë bhöngö hano igha, yaaibhökirë ömöntö ono yaabherekerwanga igha Teuda. Teuda uyö, yaaibhaakanga igha m-möntö omonene. Abhantö kya amaghana ane, bhakaghootana nawe. Kasi ekahekera-ho enkaagha, akaitwa, abhasoorani abhaaye bhonswe igho, bhakanyaraghana. Emeremo ighyabho ghyasika. 37Hano riyö ryaahööyë, ko-nkaagha iya okobhara abhantö, yaaibhökirë-ho ömöntö uwöndë, ono yaabherekerwanga igha Yuuda. Yuuda uyö, m-Moghariraaya yaarë. Uyö wonswe, yaabhaayë na abhasoorani abhaaru, kasi wonswe akaitwa, abhasoorani abhaaye bhonswe igho, bhakanyaraghana. 38Mbe bhoono ndabharaghërrya igha, mohaterane na abhantö bhano! Motakaabhakorra engʼana engogho yoyonswe igho, ko bhoora hano oraanyoore igha, ësëëmyö na ghonswe ghano bhakokora na-ghaabho, ngaraasike. 39Kasi hano oraanyoore igha omoremo ghuyö nu-ghwa Waryobha, temotore okobharebherra hë, ko bhoora noraanyoore Waryobha we mukushaashya okorebherra.”
Mbe, obhoghambi ubhwa Ghamariëri bhuyö yaaghambirë, 40bharikyaye bhakabhwikërrya. Bhakabherekera abhatomwa bhaashe. Bhakahamera igha bhatemwe. Bhakabhakaania ghwiki igha bhatakëëghya abhantö, ko okohetera iriina irya Yëësu, bhakabhahaatera bhaghende.
41Abhatomwa bhayö, bhakarwa mu-ribharasa hayö bhashömëëywë, ko bhoora Waryobha yaatunirë bhasookwe ko enshera iya okoserwa ko okohetera iriina irya Yëësu. 42Kasi tebhaatighirë ukughya ukwëghya abhantö mu-sinyumba isyabho, na okoraarekera abhantö Amangʼana Amaiya mo-bhogho ubhwa risengerro irya Waryobha. Bhaaraarekanga sinsikö syonswe igho igha, Yëësu we Kiristo.#5:42 Kiristo. Maaha mo-faharaasa.
Voafantina amin'izao fotoana izao:
Amangʼana agha Abhatomwa 5: ssc
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2021, Wycliffe Bible Translators, Inc. All rights reserved.