Amangʼana agha Abhatomwa 4
4
Peetero na Yohana bharahirwa mo-bharasa iya Abhayahudi
1Hano Peetero na Yohana bhaarenga bhakiishumaasha na abhantö bhayö, abhasëngëri,#4:1a Abhasëngëri. Maaha mo-faharaasa. Abhasadukaayo,#4:1b Abhasadukaayo. Maaha mo-faharaasa. na omonene uwa abharëndi abha risengerro irya Waryobha, bhakatora. 2Abhanene bhayö, bhaarenga bharërëëyë bhököngʼu, ko bhoora Peetero na Yohana bhëëghyanga abhantö, na okoraareka igha, ukuryoka nkooho, ko bhoora Yëësu yaaryökirë mo-bhaku. 3Ku bhuyö, bhakabhaghoota ko-moghoroobha, bhakabhaseekera mu-nyumba iya ekebhohe, okohekera nyinkyo yaako. 4Kasi amangʼana ghano Peetero na Yohana bhaatëëbhëri abhantö abha rikomo riyö, abhaaru mbaakumiri. Abhakumya bhonswe igho, bhakahika ekerengere ikya ëbhëkwë bhitaano, abhashaasha abheene igho bhano bhaakumiri Yëësu.
5Nyinkyo yaako abhasëngëri, abhaghaaka abha Ikiyahudi, na abhëëghya abha amaraghërryö agha Mosa,#4:5 Abhasëngëri, abhaghaaka abha Ikiyahudi, na abhëëghya abha amaraghërryö agha Mosa. Abhantö bhayö mbo abhatangati abha Abhayahudi, bhaarenga abhantö abha ribharasa reno ryaabherekerwanga igha Sanihedirini. Maaha mo-faharaasa engʼana, Ribharasa. bhakaikomania Yërusarëëmu hayö. 6Mo-sango muyö, yaare-mo Anaasi, omonene uwa abhasëngëri, hamwë na Kayafa, Yohana, Arekisanda, na abhahiiri abha Anaasi. 7Bhakaraghërrya igha, Peetero na Yohana bhareetwe mo-bharasa. Bhakabhaimërrya bhöröngë ubhwabho mo-bharasa hayö, bhakabhabhöörya igha, “Ghayö mwaakörrë, m-botoro kë bhwaaghërrë mokaghakora, handë igha, n-ku bhwera ubhwa wë mwaakörrë igho?”
8Ho Peetero aishöribhwi Umwika Ömöhörëëru, akabhatëëbhya igha, “Abhanene, abhatangati, na abhaghaaka abha Ikiyahudi bhano moohano! 9Moratöbhöörya amangʼana kya bhono twatöörri ömöntö ritengʼo oora, kora moratöbhöörërrya bhono yaahwëniibhwi. 10Bhoono mbe bhëënyu bhonswe igho, hamwë na Abhaisiraëri abhandë bhonswe igho, ndatuna momanye obhoheene igha, ono aimërëëyë bhöröngë ubhwënyu hano, nahwënirë ko obhotoro ubhwa iriina irya Yëësu Kiristo uwa Nazarëëti. Uyö, we bhëënyu mwaahanëkirë ko-mosarabha, kasi Waryobha, akamuryökya ukurwa mo-bhaku. 11We Amaandeko Amahörëëru ghakushumaashera igha,
‘Reghena reno bhëënyu abhahaghaashi mwangirë,
ndyo rebhaayë reghena rinene, irya ko-koona iya umusingi ughwa inyumba.’#4:11 Maaha mo-ketabho ikya Zabhuri 118:22.
12“Öbhöhönia nku-Yëësu Kiristo umwene igho bhokotooka! Mu-kyaro kyonswe igho, taaho ömöntö ono Waryobha yaahaana ubhwera ubhwa ökötöhönia, kasi n-Yëësu Kiristo umwene igho!”
13Abhanene bhayö, bhakamaaha igha Peetero na Yohana, bhaashumaashirë ko bhokarë, bhakaroghoora bhököngʼu, ko bhoora mbamanyirë igha, tebhaasömirë hë. Kasi bhakahiita igha, Peetero na Yohana, n-hamwë bhaabhanga na Yëësu. 14Ko bhono abhanene bhayö bhaamaahanga umushaasha uyö yaahwëniibhwi aimërëëyë hamwë hayö na bhaabho Peetero na Yohana, bhakabhorwa engʼana iya okoghamba. 15Ku bhuyö, bhakahamera Peetero na Yohana bharishoke kebhara iya ribharasa irya ikiina kiyö. Bho bhakatighara bhararaghërrania bhono bharaakore. 16Bhakabhoorania igha, “Iyakë tokaakora abhantö bhano? Abhamënyi bhonswe igho abha Yërusarëëmu hano, mbamanyirë igha, bhakörrë ekemanyërryö ekenene ikya rikono, keno totaatore ukukikaana. 17Ku bhuyö tobhakaani igha, bhatakashumaasha na ömöntö wowonswe oora, ku iriina irya Yëësu, okore torebherre amangʼana agha engʼana iyö, ghatakaromaana bhököngʼu mo-bhantö.”
18Hano abhanene bhayö bhaamarrë, bhakabherekera Peetero na Yohana. Bhakabhakaania bhörrö igha, “Motakaasha kushaashya ghwiki ukwëghya abhantö ku ubhwera ubhwa iriina irya Yëësu, motakaatara iriina riyö!” 19Kasi Peetero na Yohana bhakabhahonshora igha, “Mwahokani bhëënyu abheene, nyoore nkomaaha mörë igha nkongʼarra ërë Waryobha ukwanga ukumwighwera, kasi tobhaighwere bhëënyu. 20Bhëëtö tituutighe ukushumaashera amangʼana ghano twaaighwa na ukwimaahera bhëëtö abheene!”
21-22Hano Peetero na Yohana bhaamarrë okoghamba amangʼana ghayö, abhanene bhayö tebhaarööshë engʼana iya okobhashibhya hë, ko bhoora abhantö bhonswe igho, mbaatöönianga Waryobha bhököngʼu ku ukughira iya ekemanyërryö ikya rikono keera bhaakörrë. Mbaamanyirë igha, ömöntö uyö yaahwëniibhwi, ni-tengʼo yaarë ukurwa ukwebhorwa ukwaye.#4:21-22 Maaha mo-ketabho ikya Amangʼana agha Abhatomwa 3:2. Ömöntö uyö yaahwëniibhwi, yaarë na imyoka okoheteera merongo ene. Ku bhuyö abhanene bhakabhöbhöhërrya ghwiki bhököngʼu kwa öbhörrö, bhakabhahaatera bhaghende.
Abhakumya abha Yëësu bharasaasaama Waryobha igha abhatogheke
23Hano Peetero na Yohana bhaahaatëëywë, bhakakyora ko-bhakumya bharikyabho, bhakabhatëëbhya amangʼana ghonswe ghano bhaatëëbhiibhwi na abhanene abha abhasëngëri, na abhaghaaka abha Ikiyahudi. 24Hano bharikyabho bhaaighuurë amangʼana ghayö, bhonswe igho bhakaghootana hamwë okosaasaama Waryobha. Bhakasaasaama igha, “Uwe Omonene uwëëtö, nu-uwe ömötöngi uwa bhyonswe igho. Nu-uwe waabhömbirë mu-ryobha bheena ekebhara, sinyansha, na ëbhëntö bhyonswe igho bheno bheemo. 25Uwe waaghambirë okohetera ku-Mwika Ömöhörëëru ko bhoghambi ubhwa ömökörö uwëëtö Daudi, ömököri uwa emeremo uwaaho igha,
‘N-kwakë Abhakyaro bhakorerra?
Kora abhantö abha Waryobha, bharasëëmya okokora amangʼana ghano ghataana enshera?
26Abhakama abha ko-kebhara na abhatöngi, bhaikomaini hamwë,
okore bharebherre Omonene Waryobha, na Kiristo uwaaye.’#4:25-26 Maaha mo-ketabho ikya Zabhuri 2:1-2.
27“M-maheene, amangʼana ghayö ngaaikörrë mu-mughi monomono. Omokama Herode Antipa,#4:27 Herode Antipa. Maaha mo-faharaasa. na Pontio Piraato, bhaasikaini hamwë na Abhakyaro, na Abhaisiraëri, okore bharebherre Yëësu, ömököri uwa emeremo uwaaho, umwahorwa ömöhörëëru. 28Amangʼana ghayö bhakörrë, ngo waatunanga ukurwa okosemoka igha ghabhe. Kora waaghatangatirë ko obhotoro ubhwaho. 29Omonene uwëëtö, wighuurë ibhyöbhöhërryö ibhyaho. Bhoono uwe ototogheke bhëëtö abhaköri abha emeremo abhaaho, okore toraareke engʼana iyaaho, ko bhokarë obhonene. 30Orambeke okobhoko ukwaho, abhantö bhahwene, tokore amakono na ebhemanyërryö, ko okohetera iriina irya Yëësu, ömököri uwa emeremo uwaaho ömöhörëëru!”
31Hano bhaamarrë okosaasaama Waryobha, inyumba eno bhaarenga bhaikomaini-mo, ekasingisa. Bhakaishöribhwa Umwika Ömöhörëëru bhonswe igho, bhakaghëndërrya ukwëghya abhantö engʼana iya Waryobha ko bhokarë.
Okosanga hamwë ëbhëntö
32Abhakumya bhonswe igho mbaarë na öbhömwë ko maitegherro aghaabho, na senkoro isyabho. Taaho ömöntö ono yaaghambirë igha, ëbhëntö ibhyaye ni-bhyaye umwene igho hë. Kasi mbasanganga hamwë hayö. 33Abhatomwa abha Yëësu, mbaaimererranga amangʼana agha Omonene Yëësu ko-bhantö bhököngʼu, igha Omonene Yëësu yaaryökirë. Waryobha yaabhahaananga bhonswe igho örööbhö urwaye oronene, 34kora tiyaare-ho ömöntö mo-bheene muyö, ono yaanyöörrë obhohabhë. Ko bhoora abhantö bhano bhaarenga na ëmëghöndö handë sinyumba, mbaabhëghörri, bhakareeta seehera isya ëbhëntö bhiyö bhaaghörri, 35ko-bhatomwa abha Yëësu. Abhatomwa, mbaatweneranga abhantö seehera siyö, ko okorengʼaana na obhohabhë bhono bhaarë nabho.
36Mbe, yaare-ho Omoraawi uwöndë, ono yaabherekerwanga igha Yusufu, umwebhorwa uwa kwi-ghinga irya Kiipuro. Uyö we abhatomwa abha Yëësu bhaarökirë igha Bharinaabha (ensonga yaamo ni-igha, “Ömötërëmya.”) 37Bharinaabha yaaghörri ömöghöndö ughwaye, akaghöötya abhatomwa abha Yëësu seehera siyö yaaghörri ömöghöndö.
Voafantina amin'izao fotoana izao:
Amangʼana agha Abhatomwa 4: ssc
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2021, Wycliffe Bible Translators, Inc. All rights reserved.