Luk 23

Kkukum Paylét ke Jisas

(Matyu 27:1-2, 11-14; Mark 15:1-5; Jan 18:28-38)

1Kewót le bè yó ne yó kem tau mogot kukum yó, nit le Jisas ebè Gubérnor Paylét. 2Yóm deng kkól le bè yó, tódô gotu tulón le yóm kdê tifù le du, yó mon le, “Nim tau ni, deng mom niten lu hetlas yó kem Ju, ne bnekelen yóm gel kbayad me bwis bè yóm tau hol geta bè Rom. Ne yó sotu gel monen nim tau ni, du kun yóm Misaya, sotu tau hol geta.”

3Snólók Paylét Jisas, monen, “Uu kô yóm tau hol geta bè yó kem Ju?”

Ne bnalà Jisas, monen, “Duhen yó sem deng monem yó.”

4Okóm bud mudél Paylét ebè yó kem tau hol geta gel demsù ebè Dwata ne ebè yó kem dumu tau sbung bè yó, monen, “Laen kô dù salà tonu béléen nim tau ni ke mò gónóhu tmuled du nim tau ni.”

5Mom lenwê le keseblang le mon du, “Yó sem gel ktoloken nim tau ni, gel senbewegen yó kem tau bè klamangen prubinsya Judiya. Kewóten bè yó bè prubinsya Galili efet ni nem kkólen edini ni, yó se yóm tendo nmoen.”

6Tikóng gungol Paylét nim mon le ni, bud snólóken bélê le ke lemwót bè Galili Jisas. 7Ne mon le se, “Tau lemwót bè Galili se nim tau ni.” Tikóng gtukul Paylét yóm kewót Jisas bè yóm benwu kun nogot Hirod, tódô hwiten Jisas ebè Hirod. Abay se bè yóm kdaw yó, tolo geslaen knô Hirod bè Jirusalim.

Kwit le ke Jisas ebè Hirod

8Tikóng gefet bè Hirod Jisas, timu óyô Hirod, abay se wen yóm gel gungolen lemwót béléen, ne deng legen ne yóm tô kóyóen ke wen gónóhen mton du. Hendeenen ke wen hentaw ton nmò Jisas. 9Yóm deng kkól Jisas bè yó yó, tey dê snólók Hirod béléen, okóm balù sekteb ke wen balà Jisas du. 10Ya tey dê tifù le du yó kem geta gel demsù ebè Dwata ne yó kem tau gel tmolok hlau. 11Yó nmò Hirod ne yó kem sendaluhen, mom senflowon le Jisas, lel le hemnê du. Hesek le du yóm nes gel lesek yóm tau hol geta, ne bud heted Hirod Jisas ebè Paylét. 12Yó se gónó le baling swè Hirod ne Paylét bè yóm kesefwit le ke Jisas, igò le tehe gel sfohon ni kem lewu tau ni.

Hatay yóm kukum le ke Jisas

(Matyu 27:15-26; Mark 15:6-15; Jan 18:39—19:16)

13Yóm deng bud kkól Jisas ebè Paylét, gotu htaba Paylét lu yó kem tau hol geta gel demsù ebè Dwata, ne yó kem tuha gónó le gel galak yó kem Ju kkólen bè yó kem tau hkawang. 14Yó udél Paylét ebélê le, monen, “Deng nwit ye ebéléu yóm tau gel mon ye niten hetlas yó kem tau. Blaem nim tau ni, deng hen-gugud snólóku se bè ni lem blóng ye, ne kdê yó kem tifù ye mò duón ye du, là sem tonu du béléen. 15Dalang se ke Hirod, yó gónóhen tódô bud hulék du edini bélê tekuy. Laen dù bang duón ye du nim tau ni ke tô mò gónó hmatay du. 16Yó dou tô kukum du,” monen, “olohu habid hfes du dé, ominu yó tódô bud hewà du.” 17Yó gónó Paylét mon du nim ni, yakà yó du kun sana gel adat sok deng gel hto yóm buteng gel kmò le ken bong bè Kdaw Khius, sal gel sotu bè yó kem tau deng bnanggù hefewaen ebélê le.

18Tikóng deng gungol yó kem tau yóm udél Paylét yó, deng mom dalil le gotu hetê, yó mon le, “Tódô hfatayem nim tau ni. Yó dém Barabas bud hefewaem kum.” 19(Nim Barabas mon le ni, tehe bnanggù le lanen tehe mung mit sfatay bè yóm kul gubérnor, ne lanen tehe monok snéen.) 20Bong ke Paylét kun, yó hol kun tô kóyô ke hewaen Jisas, yó gónón bud mudél ebè yó kem tau. 21Bede yó kem tau yó, mom lenwê le hetê ebè Paylét, mon le, “Htutukem bè kros. Htutukem bè kros.”

22Bud mon Paylét bè getluhen dulék, monen mò yó kem tau, “Moen de? Tedu deng salaen bélê ye? Laen dù bang tonu béléen nim tau ni ke mò gónón matay. Olohu habid hfes du dé, ominu yó, bud hewà du.”

23Tnódónem yó kem tau, mom lenwê le hetê, mon le, “Hfatayem. Htutukem bè kros.” Ngang le hetê efet tódô gmung Paylét bè yóm kul kóyô. 24Tódô hatay kukumen du. 25Ne hewaen elem blóng le Barabas, yóm tau hni le béléen, yóm tehe bnanggù le lanen mit sfatay bè gubérnor ne lanen monok. Tódô nmung Paylét yóm kul kóyô nmò bè Jisas yó kem tau yó.

Ktutuk le ke Jisas bè kros

(Matyu 27:32-44; Mark 15:21-32; Jan 19:17-27)

26Bè yóm kwit le ke Jisas ebè tum gónó le e hmatay du, tódô geslong le yóm sotu tau boluyen Simun, tô mógów ebè Jirusalim. Tódô gnaga htihang le du huli ke Jisas yóm kros. Nim Simun ni, sotu tau lemwót bè Sayrin.#23:26 23:26 Nim Sayrin ni, sotu syudad là sekna bè benwu Libya bè Afrika.Bè yóm deng kwit le ke Jisas yó, tey tau wen lemolò huli du. Wen se kem libun mkik dmumu le huli ke Jisas. 27Bè yóm deng kwit le ke Jisas yó, tey tau wen lemolò huli du. Wen se kem libun mkik dmumu le huli ke Jisas. 28Okóm beklil ebélê le Jisas, monen mò kul, “Yu kem libun lemwót bè Jirusalim, bê ye nkik ou. Yó dé hol nkik ye yóm kuy knô, ne yó kem kuy ngà. 29Yakà angat wen kdawen, sut bélê ye yóm tey hlayam bong. Ngem kà mon ye du, ‘Tey hyu kul yó kem libun atil laen dù ngà le, ne yó kem libun laen kul hebón.’ 30Ke sok deng angat bangen kól du yóm kdaw yó,” monen, “yó angat mon yó kem tau ebè yó kem bulul, ‘Lubék ye kum eta me.’ Ne yó bud mon le, ‘Bnos ye mi.’ 31Abay se,” mon Jisas, “ke ni se nmò le béléu, yóm koyu hanà matak, milud he kmò le du bélê ye, yu kem koyu deng mékéng.”

32Bè yóm kwit le ke Jisas yó, wen lewu tau gel mò sidek homong hnatay le. 33Tikóng le kól bè yóm ngà bulul gel bnoluy le Bangag Kulu, bè yó gónó le tmutuk ke Jisas bè yóm kros. Dalang se kul yó kem lewu tau gel mò sidek yó, sotu hteg le fi bè kwanan Jisas, ne sotu se fi bè iwóngen.

34Yóm igò le tmutuk ke Jisas, yó udélen, monen, “Hol hnifótem lu, Mà, abay se là tngón le du yóm nmò le.” Lemwót yó kem sendalù tmutuk ke Jisas yó, sensatù le nesen.

35Tey dê tau mdà bè yó, yóm na a gbót temngel du. Yó nmò yó kem tuha gónó le galak yó kem Ju, senflowon le Jisas, mon le, “Deng gel lenowilen yó kem dumu tau, yake lenowilen yóm kun knô ke du se yóm Misaya, yóm deng nélék Dwata.” 36Balù yó kem sendalù, sana kul kegbót hmowon ke Jisas. Hloni le ebéléen, ne tô hinum le du yóm kul ninum là mebtesen, 37ne mon le mò du, “Ke tahu uu yóm hol geta bè yó kem Ju, lenwaem knóem kun.” 38Hyu wen se snulat le dket le senta kuluhen, yó monen, “Ni se yóm tau hol geta bè yó kem Ju.”

39Sotu bè yó kem tau mò sidek mung tnutuk le yó koni, sidek kebkóhen ebè Jisas, monen, “Ke uu se yóm Misaya, lenwaem knóem kun anì homongem se mi.”

40Okóm mudél se yóm sotuhen, monen, “Béem wóyó kebkóhem. Ilóem là knikoem ke Dwata kô igò tekuy deng megtuled? 41Maya mon ni dum kut, abay se wen tahu duón le kut, ne ni se kguta te balà yóm tehe kut nmò. Là ni dum kun nim tau ni. Tódô hnatay le hkawang.” 42Ne yó monen mò ke Jisas, “Ó Jisas, hol hentulónem ou nawa ke deng kól du yóm hol kegetahem.”

43Bnalà Jisas se, monen, “Ni fasadu kóm, ditu béléu bè dou benwu bè longit gónóm e mefet nim kemdaw ni.”

Katay Jisas

(Matyu 27:45-56; Mark 15:33-41; Jan 19:28-30)

44Tikóng deng móyónen gtungu, tódô là buden mnóng kdaw, baling kmifu talak tonok efet sóól mosol kdaw. 45Uma kóm bè yóm Gónô Dwata, wen tey nes mfól mò seng yóm dfél gónóhen nô Dwata, tódô ton le lómón ke hninggel dnólóhem bè gónón sóól. 46Bè yóm kekséen yó, omin Jisas hgel udélen, monen, “Ó Mà, hogotu kóm nim klowilu.”#23:46 23:46 Lingón 31:5. Kogol yóm kudélen yó, tódô milot se nawahen.

47Bè yóm kehto Jisas, mdà bè yó yóm kfitan bè yó kem sendalù, ne gtanuden yóm kmoen, botong dóyónen Dwata, monen, “Tahu laen dù salaen ilóu tau ni.” 48Tikóng ton yó kem tau sbung na a temngel bè yó ni kem kdê ton le ni, tódô gotu gdofì le kfu le bè yóm kulék le lemwót bè yóm alì khuli sel le. 49Bong yó kem tehe dumu Jisas, dalang se yó kem libun tehe gel lemolò du lemwót bè Galili, gotu le mdà bè yó se kul, bede malù le hlayuk béléen. Gotu ton le yóm kdéen.

Kebeng le ke Jisas

(Matyu 27:57-61; Mark 15:42-47; Jan 19:38-42)

50,51Wen sotu tau boluyen Jusif, lemwót bè Arimatiya, sotu benwu snakuf prubinsya Judiya. Nim tau ni, tey hyu kmoen, ne tedeng knawahen. Gel hendónen snéen kun yóm kdaw angat kogot Dwata tau. Du se sotu bè yó kem geta mogot kukum lem blóng yó kem Ju, okóm là gbóten du kun yóm atul yó kem dumuhen bè yóm kkukum le ke Jisas. 52Bè yóm deng kehto Jisas, tódô mógów ebè Paylét yóm Jusif ni nan e bal du yóm kwahen yóm lówó Jisas. Ne tahu se, hlus Paylét du. 53Kewót Jusif bè yó, mógów ebè tum gónó Jisas nô, ne nahen elaan yóm lówóhen, ominen bmaus du yóm nes bukay. Tódô suen bè yóm léhék deng eles nokol le mò gónó lembeng. Hanà yó he yóm kwen tau na le e lebeng du yóm kilib yó. 54Nim kebeng le ke Jisas ni, deng móyón kimel ne bè Byérnis. Sok deng sdef kdaw, yó ne kbuten yóm Kdaw Kehegnô.

55Bè yóm na le e kebeng ke Jisas yó, mung le se kul yó kem libun tehe gel mung ke Jisas lemwót bè Galili. Hyu ton le yóm kilib ne yóm kmò kehlasà le ke Jisas lemen. 56Omin le yó mulék, hentifes le yóm alì minggel boohen angat sù le bè lówóhen, duhen yó kem dê kay doun ne hboo. Okóm laen dù nmò le bè yóm Kdaw Kehegnô, ulit le bè yóm kul hlau.

Voafantina amin'izao fotoana izao:

Luk 23: tbl

Asongadina

Hizara

Dika mitovy