Luk 24

Bud klowil Jisas

(Matyu 28:1-10; Mark 16:1-8; Jan 20:1-10)

1Hanà tolo minal mwas bè Akad, lemwót yó kem libun ebè yóm kilib gónón lebeng Jisas. Gotu nit le yó kem alì minggel boohen deng tehe eles hentifes le. 2Yóm deng kkól le ditu, tódô ton le yóm bak kilib deng mom hnas. Deng mluy gu bè baken yóm botu tehe seng le du. 3Ne tódô le husek elemen, okóm là bud ton le du lówó Jisas yóm gónó le mogot. 4Yóm igò le temnga du, tódô wen lewu tau hegfan bélê le bè yó, mdà klohok le, ne tey sminang yóm nes le. 5Ya tey sidek klikò le ni kem libun ni, tódô le gotu kudung. Yó mon yó kem lewu tau yó mò yó kem libun, “Moen de ke hnebel ye bè nim gónóhen gel nô tau matay yóm tau mowil? 6Là buden nô bè ni ne. Deng hlowil Dwata. Hentulón ye nawa dé yóm tehe deng monen mò kuy yóm hanà tolo knóen bè Galili, 7‘Angat eted le yóm Ngà Tau ebè yó kem tau gemsalà, ne htutuk le bè kros. Okóm bè getluhen kdaw, bud mowil.’ ”

8Ne tahu se, gbel bè nawa yó kem libun yóm tehe deng mon Jisas yó. 9Kewót le bè yó, mulék le, ne gotu tulón le yóm kdéen bè tu kem sfolò sotu dù lemolò ke Jisas, ne bè yó kem dumu tau nô bè yó. 10Yó boluy le ni kem libun ni, Midi lemwót bè Magdala, ne yóm Juhana, ne yóm sotu Midi, yóm Yê Jim, ne wen he kem dumu libun mung kul. Lu se fen tmulón du bè yó kem tau tehe hógów Jisas yóm deng ton le. 11Okóm là kô dog hentahu le du yó kem tehe hógów Jisas yó, ofo kul ke tódô kem kul lenbù tulón. 12Okóm ke Pitér kun, tódô hfésék lemwót mlóy etu bè yóm kilib. Tikóng kól ditu, ominen hkogò temngel elemen, ne tek són tonen, són yóm nes bukay tehe baus le ke Jisas. Bud kewót Pitér bè yó, mulék ebè gónô, ne ya tey ketngahen du se kun yóm là bud ktonen du bè yó yóm lówó Jisas.

Kehegfan Jisas bè yó kem lewu tau mógów ebè Imiyus

(Mark 16:12-13)

13Bè yóm kdaw yó, wen lewu tau deng gel lemolò ke Jisas mógów ebè yóm sotu benwu udì boluyen Imiyus, wen dô sfolò sotu kilumitru klayuken ebè Jirusalim. 14Bè yóm igò le mógów ni kem lewu tau ni, sónmò le semtulón du mulit lan yóm kdê deng nmò le bè Jisas yó kem tau. 15Yóm igò le stulón mógów yó, tódô ten-gafit Jisas lu, ne slomong kul, 16okóm là dog hdilô Dwata du kul. 17Yó mon Jisas mò kul, monen, “Tedu de nim kuy alì sentulón mógów ni?”

Tódô le na hegsud mdà, lel yóm tey keblat nawa le. 18Ne mudél yóm sotu tau boluyen Klupas, monen, “Ilóem tek són u dilóu yóm tau mauy bè Jirusalim là dog temngón du yóm deng lomi nmò le bè yó.”

19Ne bud hensokol Jisas bélê le, monen, “Boluyen de?”

Omin le bud malà du, mon le, “Yó sem nmò le bè Jisas, yóm tau lemwót bè Nasarit. Nim tau ni,” mon le, “du se hol tugod Dwata. Laen kô dù bang gemsenged du bè solu Dwata nim Jisas ni, sélét mom tô bè kem tau tonok ne. Tey gemseb yóm gel ktoloken, ne tey wen hentaw ton gbek nmoen snéen. 20Yó nmò le béléen yó kem geta bè yó kem tau gel demsù ebè Dwata ne yó kem dumu tau mogot kukum lem blóng tekuy, nit le ebè Gubérnor Paylét anì hfatayen. Ne tahu se, tódô htutuk le bè kros. 21Ofo kum mon du ke du yóm tau angat lemwà tekuy kem tau Israél gu bè yó kem hmohon tekuy. Getluhen kdaw ni yóm deng khatay le du. 22Lel yó hem hentnga tulón le kum yó kem libun bélê me. Hanà tolo minal mwas, mógów le ebè yóm kilib gónó le lembeng ke Jisas. 23Bè yóm kkól le bè yó, là kô bud ton le du lemen yóm lówóhen. Ne bè yóm kulék le yó, tulón le kum wen lewu hógów Dwata gu bè longit hegfan bélê le, ne yó tulón le kul yóm deng bud klowil Jisas. 24Ne wen se bélê me bud na a tmufì mauy du yóm kilib. Hol lómón yóm kul kton du yó kem libun yóm kul ton se kul. Là kô bud ton le du yóm lówó Jisas.”

25Ne bud mudél ebélê le Jisas, monen mò kul, “Tey kem tau là hulung hedem nim yu. Tey mima bélê ye hemtahu du kdê yó kem tehe gel tulón yó kem gna tugod Dwata ekni.” 26Deng tehe eles tulón le yóm nan na keglayam yóm Misaya, omin Dwata yó he hegeta du. 27Ne gotu hetngón Jisas kul yóm gónón e temnef yóm tehe gel hsulat Dwata ekni gbak ebéléen, kewóten bè yóm tehe snulat Musis efet kól bè yóm kul snulat yó kem dumu tau tugod Dwata ekni.

28Ngang le stulón mulit lan efet le deng moni bè yóm benwu gónó le e solu. Yóm deng kkól le bè yóm benwu yó, tódô tô hekteng ke Jisas, 29okóm mon le mò du, “Nam na mefet bélê me he, yakà dengen kimel, lelen deng sdef kdaw.” Ne tahu se, haking mung kul Jisas. 30Bè yóm kkól le bè gónô, omin le gotu seyón mken. Ne nwa Jisas yóm mambang, ne mni bè Dwata, ne ominen kembéng du, ne sket benlayen lu. 31Yó he yóm kdilô le du, okóm tódô bud sennganen se lana lem mata le.

32Ne tódô le stulón, mon le, “Kô mon se ke alì te gduf hmungol du mulit lan yóm igoen hetngón du kut yóm tennefen yóm tehe gel hsulat Dwata ekni.” 33Ne tódô bud kewót le bè yó ni kem lewu tau ni, bud le mulék ebè Jirusalim. Ne bè yóm deng kkól le bè yó, tódô glo le yó kem sfolò sotu dù tau deng gel lemolò ke Jisas, ne wen kem dumu le stifun bè yó. 34Yó sentulón le, mon le, “Deng tahu mowil yóm gónó tekuy mogot. Deng hegfan ke Simun.”

35Ne bud tulón ni kem lewu tau ni koni yóm kul kton du se kul, yóm deng tódô keslomongen kul mulit lan, ne yóm kehdilóen bélê le bè yóm koguhen kul mambang.

Kehegfan Jisas bè yó kem gel lemolò du

(Matyu 28:16-20; Mark 16:14-18; Jan 20:19-23; Kul Nmò 1:6-8)

36Bè yóm igò le tolo tmulón du ni kem lewu tau ni, tódô bud hetnga mdà lem blóng le se yóm gónó le mogot, yó udélen ebélê le, monen, “Dwata he hol henek nawa ye.” 37Bè yóm hmung kton le ke Jisas yó, ya tey klikò le, ofo kul ke busaw. 38Okóm yó udél Jisas ebélê le, monen, “Mò ye kat likò ni du? Moen de ke megewu se nawa ye dou du? 39Tenngel ye ni dém hólólu dalang se tihu. Ni se ou. Na ye e nkem o dé anì hen-gnóm ye lówóhu. Yóm busaw,” monen, “laen kô ungeden, ne laen se kô tiolen ke lómón nim kmò kton ye dou ni.” 40Yóm igoen mudél ebélê le ni, toloken kul hólólen ne tihen.

41Ewenem tolo mgel bélê le hemtahu du yóm deng klowilen, balù yóm tey kligal le, ne yóm tey ketnga le du. Bud mudél ebélê le Jisas, monen, “Wen ken ye kut kô?” 42Ne tahu se, nogu le yóm utón él deng tógó, 43ne nahen, ne kenen bè yó lem blóng le.

44Omin Jisas yó bud mon du mò kul, “Yóm deng katayu lem blóng ye, ne yóm bud klowilu, ni se yóm tehe deng gel tulónu kuy bè yóm hanà tolo knóu lem blóng ye. Nan na gotu dohò etahu he kdê yó kem tehe deng snulat Musis, dalang se yóm kul tehe gel snulat yó kem dumu gna tugod Dwata kkólen bè yóm tehe snulat le bè yóm bok Lingón.” 45Ominen yó heglileb du kul yóm tehe deng hsulat Dwata yó, 46yó monen mò kul, “Yó tehe snulat le, mon le, ‘Nan na glayam yóm Misaya, bede angat bud mowil bè getluhen kdaw. 47Lemwót bè kun boluy, wen lan Dwata hmifót salà yó kem tau deng hegsel.’ Ni se,” monen, “yóm tulón angat hlós sensból ye bè klamangen benwu. Bè ni bè Jirusalim gónó ye mbut hból du. 48Abay se yu deng gemtanud du ni kem ni.

49Angat hwitu ebélê ye yóm deng tehe fasad Mà kuy. Na ye na hangat bè ni he bè Jirusalim yóm kfasangen gu bè longit yó.”

Khaway Jisas ebè longit

(Mark 16:19-20; Kul Nmò 1:9-11)

50Kogol yóm kudél Jisas lem blóng le yó, niten lu ebè yóm sotu benwu udì boluyen Bitani. Bè yóm deng kkól le bè yó, hdaen eta lewu sigelen, ne mni bélê le bè Dwata. 51Bè yóm igoen mni yó, tódô ganag hesò lem blóng le, ne haway ebè longit. 52Ya tey kdóyón le du, ne tey kligal le bè yóm kulék le ebè Jirusalim. 53Kogolen bè yó, tódô ket kdaw le nô lem yóm Gónô Dwata, ne tey tendo gel kdóyón le ke Dwata.

Voafantina amin'izao fotoana izao:

Luk 24: tbl

Asongadina

Hizara

Dika mitovy