Ubwandilo 13
13
Abụlamụ na Lotị bịkupāgukana
1Buno buno Abụlamụ alinkufyuka ukufụma nkị̄su kya Mwegịpịtị pamopēne nu nkasị nifị̄ngị fyosa ifị āli nafyo, kangi na ju Lotị, balinkwakufịka kukị̄su kya kwịtōngo.
2Pakabalilo kala Abụlamụ āli nkabị fị̄jo āli ni ng'ōmbe ni ndalama isya fesa ni sya sahabu. 3Ukufụma kukị̄su kya kwịtōngo kila kila alinkwendelela ni njila jāke mpaka ukwakufịka ku Betelị kuno ājēngịle īhēma pa kwanda pakati pa Betelị na Ai. 4Pala ājēngịlepo ikigemo kya kwikemēkesyapo ulutasị, pala pala po alinkwịpụ̄ta ku NTWA. 5Jōpe Lotị uju ēndaga pamopēne na Abụlamụ mbuhēsya bula bula āli nagyo imịtị̄mo gya ng'ōsị ni gya ng'ōmbe kangi āli nasyo ni hēma. 6Buno buno ikị̄su kilinkusịta kubafwana ukuti bajege pamopēne; lukālipo ulukubo ulwēlēfụ lwa mịtị̄mo gyabo igi gyabēle. 7Abatị̄mị ba Abụlamụ balinkulwa na batị̄mị ba Lotị. Nkabalilo kala kala abākikolo kya Kanānị ni kikolo kya Pelisị bālịmo nkị̄su kila kila.
8Po papo Abụlamụ alinkunsūma Lotị alinkuti: tungalwanaga, bōpe abatị̄mị bāngu nabāko bangalwaga uswe tuli banya mụ̄ndu. 9Kukikēta ikị̄su kyosa iki kili nkyenị mmyako? Oko, tujabane. Linga ugwe kwega ikya ku kiboko ikị̄mama po une nịkwegaga ikya kukiboko ikị̄līlo, pamo linga ugwe kulabila kulubafụ lwa kukị̄līlo, po une nịkulabilaga kulwa kukị̄mama. 10Umwene Lotị alinkukelenganịa alinkugubona untebēla gwa Jolịtanị, ugu ikị̄su kyali kibisị kyosa, bo UNTWA akāli ukupyụta ikya Sotomụ na Gomala, gulinkufwana nngūnda gwa malafyale, kifwene bo akāja ka Egịpịtị ukulabila ku Soalị. 11Po papo Lotị alinkwịsalila untebēla gōsa gwa ndwisi lwa Jolịtanị alinkulabila kulubafụ lwa kubusōkelo ilịsuba. Po lelo balinkwenda nukupāgukana. 12Abụlamụ alinkujenga nkị̄su kya Kanānị. Umwene Lotị alinkujenga ntwaja utukulūmba utwa mụntebēla alinkusāma ukubūka ku Sotomụ ko alinkujenga īhēma jāke. 13Abēne abāndu ba mụ Sotomụ bo bālị babị̄bị kangi bāli batulanōngwa fị̄jo nkyenị mụ NTWA.
Abụlamụ ịkusāmịla ku Hebulonị
14Bo Abụlamụ apāgukēne na Lotị. UNTWA alinkummbūla Abụlamụ alinkuti: Ukufụma apa gwimịle ukēte kulūlu na kwịtōngo, kubusōkelo ilịsuba na kubujōngelo ilịsuba. 15Ikị̄su kyosa iki kukibona kyo nịsakukupaga ugwe na ba nndujụ̄ngụ lwako, ukuti kijege kyinụ bwịla na bwịla. 16Nịsakubabāsyaga aba nndujụ̄ngụ lwako, uju linga amēnye ukubala ulufụ̄mbi lwa nkị̄su jo ịsakumanyaga nukubabala bōpe na ba nndujụ̄ngụ lwako. 17Sụmụka lelo gwendemo mbutalị na mbwēlēfụ bwa kị̄su kyosa iki nịkukupaga. 18Po lelo Abụlamụ alinkusāmịsya īhēma alinkwakujēnga pabupị̄pị ni mịpịkị gya pị̄syeto lya mu Mamule mụ Hebulonị. Kula kula ko alinkujenga ikigemo kya kwịkemēkesyapo ku NTWA.
Voafantina amin'izao fotoana izao:
Ubwandilo 13: NYB96
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Nyakyusa Bible © Bible Society of Tanzania, 1996.