Yohanis 6
6
Yesus ipana sio nihu nima
1Sio Yahudiu no karisaa pusiki nea oyo Yesus inuniki on roe kota Yerusalem. Ieu ria nakane wan nanae Galilea ria hae. Nakane rei mo, nene nanae isa oi mo, Tiberias. 2Mansia hutue oeu pusui. Opusui tau onoo sima-simana waron ratuhete ata ne kawasa arihon Anahatana waron iunare na sio kupua iake. 3Ihokai ria nakane ria hae, inoai na roe pupue isa. Hoka roe, iruei poe ikata ne mampusua. 4Tau rei mo, ami Yahudiu ma karisaa anoma rapeka na Anahatana ihoka ma upu momou arihon otoe Mesir haineke nea.
5Yesus ihetu unui inoo ria nau. Inoo san rei mo, mansia hutue wason oeuso mai tanui. Reiso iasau osi ne mampusue isa wain nanae Pilipus. Iahata, “Pilipus. Kani ihane poroti sui supa na ipana sio panesi reini?”
6Yesus iasau san rei osi Pilipus tau nanie ireai man. Areimo, tau Yesus ianei nea ata nanie iuna sae.
7Oyo Pilipus iasau osi Yesus ata, “Ama. Masike ia isa ipakarian hunana wanu oi, ne kati relai tewa na ihane poroti osi pusiso. Masike kihore mkana-mkana na samare sinta-sinta osiso sana osa-osa oi.”
8Ne Yesus ne mampusue isa honu wain nanai Anreas. Ia mo, Simon Petrus wanin. Iasau osi Yesus ata, 9“Ama. Ia iki hanaie isa wain rei. Irori poroti wan unai arihoni jelai. Irori hua nima runa ikaya use ua. Ne ralai tau ipana sio panesi reini tewa nai osa!”
10Oyo Yesus iasau osi ne mampusua rei ata, “Aisosi sio panesi rei oru-rueso.”
Noi tihue rei mo, monota panesi. Reiso sio rei oru-rueso poe. Tau sio hutue rei mo, sio hanaia, sio mainaya nihu nima runa sio pinau na sio ikina oi.
11Oyo Yesus inana poroti rei oyo, iainisi iake arihoni Anahatana. Iahata, “Amaku Anahatana, Ano mo, Ano iake. Asamama tau muaina raini.” Pusi, oyo isama-samare osi sio wason orueso sui monota rei pusiso. Inana ikaya use ua rai. Iainisi, oyo ikuparehire oyo isama-sama osi sio mansiau panesi rei oi. Isama-sama ikaya osiso oi. Pusiso oaiso rotu-tu tiao pokona.
12Pusiso oaiso tiao pokona oyo Yesus iasau osi ne mampusua. Iahata, “Oeu oamanou muaina nesia rai ee. Pene pesi sai-saire.”
13Reiso oamanou muaina nesia rai. Oaiinure tau pakuna hutusa rahana ua na poroti nesia rai oi.
14Sio panesi rei onoo sima-simane wan retuhete ata Yesus ne kawasa arihon Anahatana wan iunai rei oyo oahata, “Titue-tue! Ia reini mo, ia mamsima runa Anahatana ne maunauna wain Anahatana itotoe runai nea ata mka ihokai mai tuniai.”
15Ne Yesus ianei ata sio panesi reimo nanie otentenei na iuna no aia. Reiso ieu arihon tihue otoe rei roe pupua honu na ruai man pan rei.
Yesus ieu roe waene hahae
16Resou-sou nea, ami, Yesus ne mampusua, amusuma nau nakane wani nanae Galilea. 17Oyo asaa ma arupae nanie aeuma ria hae, ria kota Kapernaum. Wapan pumono nea. Ne Yesus masi ihoka nau tanuma tewa sirinia. 18Wan asaai, sira tau ihute reuhona mainae reuna kolau mainaya. 19Asaai hainau kani kilo nima nomesa san rei nea. Oyo anoo Yesus ieu roe waene hahae, nanie ieui mai tanuma mai arupae rei. Akaitau hunu ruama. 20Ne Yesus iasau osima ata, “Ee! Pene okaitau! Au ruaku reini, tea!”
21Reiso akaumin hunu ruama rotu-tu apusaai roe ma arupae. Anoo oi mo, ahokama ria hae nea.
Sio panesi onina Yesus
22Yesus ieu roe waene hahae, sio panesi asi wason nau nakane wan nanae Galilea nusue sirinia. Nene han roe san rei, osira tau Yesus tutui tewa nea. Potusi onoo arupae osa mtola man. Ne oanei ata Yesus ne mampusua osaa arupae rei na ria hae ria kota Kapernaum nea, ne isaa ikataso tewa.
23Oyo sio umau ohokaso osaa no arupaeu on pan Kota Tiberias. No arupaeu rai ramanu-manuso haineke Upuri Yesus naniai wan potusi iainisi iake arihoni Anahatana oyo ipana sio panesi rei tau porotiu hua nima rei. 24Sio panesi rei onoo Yesus runa ne mampusua wasumo rei tewa nea. Reiso osaa no arupaeu rai oyo oeuso na ria kota Kapernaum onina Yesus.
Yesus mo, poroti wan reunata iamahaita
25Sio panesi oeu onina Yesus oyo osupui pan nakane wani nanae Galilea on pan hae. Osupui pan kota Kapernaum. Oyo oasau ata, “Ano Ona Matuhetene! Reiso ahokaya mai rei onnaha inasi nea rei?”
26Iahata, “Oatinu mai ia-ia nanie uasau osimo. Oeu oninaku tewa noso onoo sima-simana waron ratuhete ata we kawasa arihon Anahatana. Ne oninaku noso oai poroti wan oaiki rotu-tu tiamo pokona rei. 27Pene opakarian onina muaine wan mka rekopui. Ne, onina muaine wan mka rekahate tewa. Onina muaine wan reunamo oamahaimo okata Anahatana rotu-tu ria supan. Muaine rei mo, hasae Au, Tumata Reini mo, Anahatana Ihitiku sahoro mka uruiki osimo. Areimo tau Au mo, Amaku irui kawasa osiku nea.”
28Oyo oasei tanui ata, “Ama! Reiso munata san rei mo, kahurae auna sae na apusu Anahatana ne maue?”
29Iahata, “Anahatana ne maue mo, na omi oparisaa tau Au wan iaisosiku uhokaku mai tuniai reini.”
30Oasei ata, “Munata sani rei mo, masi auna sima-simane isa wan retuhete ata me kawasa arihon Anahatana osima mai. Mka anoo na aparisaa ata Ano mo, Anahatana iaisosia mai rei! Reiso nanie auna sae? 31Naone ami ma upu momou orueso pani otoe huie okata Musa mo, oai poroti wan on roe noiyaha wan sio oiki tau manna. Anahatana ne anamanaya raasau, ‘Irui poroti on roe noiyaha osiso na oai.’”#Ohokaso 16:31
32Oyo Yesus iasau ata, “Oatinu mai ia-ia nanie uasau osimo. Musa ipanaso mo, tewa. Ne Amaku sahoro irui poroti on roe noiyaha rei osi omi mo upu momou. Muie reini nanie irui poroti tunne on roe noiyaha osi omi. 33Areimo tau poroti tunne wan Anahatana iruiki mo, ikaisunu on roe noiyaha. Ia sahoro iapuhai mansia mai tuniai reini rotu-tu ria supan.”
34Oahata, “Upu, masi arui poroti wan on roe noiyaha rei osima sui osa nea.”
35Yesus iahata, “Au reini mo, poroti wan uapuhai mansia na ikata Anahatana rotu-tu ria supan. Ia sia wain ihoka mai tanuku mo, mka imakanea tewa nea. Na ia sia wain iparisaa tanuku mo, mka anoi kasae tewa nea. 36Ne uasau osimo nea. Onooku nea, ne oparisaa tanuku tewa sirinia. 37Ia sia man wain Amaku iruiki na ouna we mansiau rei mo, mka oeuso mai tanuku. Na ia sia wain ihokai mai tanuku mo, mka uapusaa pusiso. Uneiso tewa. 38Areimo tau usipu on roe noiyaha na una pusu ruaku we maue mo, tewa. Ne nanie una pusu Amaku wain iaisosiku rei ne maue. 39Amaku iaisosiku rei mo, ne maue na ia seia man wain iruiki osiku nea rei mo, pene iamaninui. Ne ne maue na iapuhai sio pusiso honu pannuhu tuniai reini repena. 40Areimo tau Amaku ne maue mo, ia sia man wain ianei ata Au reini mo, Anahatana Anai oyo iparisaa tanuku, ia mo, mka iamahaiki ikata Anahatana rotu-tu ria supan. Oyo tau tuniai reini nanie repena mo, Au mka uapuhaiki honu pannuhu tuniai reini repena.”
41Oatinu Yesus iasau ata “Au mo, Au poroti wan on roe noiyaha.” Reiso sio Yahudiu oana-namanaso pani muie. 42Oasau osi umau ata, “Ia reini mo, Yesus wain inai na amai ita iationaso rei, tea! Yusup anai, tea! Reiso nanie iasau ata ihokai on roe noiyaha mo, iakarota.”
43Ne Yesus iasau ata, “Pene oana-namanamo pani muie. 44Tea mo, Amaku wain iaisosiku rei sahoro iunaso oparisaa tanuku. Oparisaa pusu ruao no maue tewa. Oparisaa oyo mka uapuhaiso honu tau tuniai reini nanie repena. 45Yesaya, ia mamsima runa Anahatana ne maunauna rei, iasau nea. Ikanu ata, ‘Anahatana mka iatuhete pusiso.’#Yesaya 54:13 Reiso, ia seia man wain iatuheteso na oatinu tanui mo, mka iparisaa tanuku. 46Ia sia man inoo Amaku Anahatana tewasi. Hasae Au wan iaisosiku mai tuniai reini man sahoro unooi nea.
47Oatinu mai ia-ia nanie uasau osimo! Omi wan oparisaa tau Au mo, mka oamahaimo okata Anahatana rotu-tu ria supan. 48Sani poroti reuna tinairi ramahaiso, Au mo, uapuhaimo na okata Anahatana rotu-tu ria supan. 49Tau omi mo upu momou pani otoe huie mo, oai poroti wani oiki tau manna rei nea. Ne masike oai poroti rei nea, ne omataso sirinia. 50Ne poroti tunne rekaisunu on roe noiyaha nea. Poroti rei reuna mansia wason oaiki omata rotu-tu ria supan tewa. 51Au mo, poroti wan reuna mansia oamahaiso rotu-tu ria supan ukaisunu on roe noiyaha. Ia seia wain iai poroti rei mo, mka iamahaiki ikata Anahatana rotu-tu ria supan. Poroti wan uasau runai rei mo, Au ruaku tinaiku wan uruiki osi mansia mai tuniai reini na oamahaiso okata Anahatana rotu-tu ria supan.”
52Sio Yahudiu rei oatinu san rei, oyo otuntana na umau. Oahata, “Ia hanaie reini ianamana ne sae reini? Sapani na irui tinain osi ita iaiki?”
53Oyo Yesus iasau ata, “Oatinu mai ia-ia nanie uasau osimo. Ia sia wain iai Au Tumata reini Anahatana Ihitiku tinaiku tewa, na ininu nasiku tewa, ia mo, mka iamahaiki ikata Anahatana rotu-tu ria supan tewa. 54Ne ia sia wain iai Au tinaiku runa ininu nasiku mo, mka iamahaiki ikata Anahatana rotu-tu ria supan. Na mka unai iamahaiki honu tau tuniai reini nanie repena. 55Tea mo, Au tinaiku mo, muaine wan manisate. We nasi mo, mamninue wan manisate. 56Ia sia iai tinaiku na ininu we nasi mo, anoi osa runa Au nea. Na Au iae, anoku osa runa ia nea oi. 57Au Amaku wain iapuhai pusire sahoro iaisosiku uhokaku mai tuniai reini. Na Au uamahaiku reini mo, noso Amaku iapuhaiku. Reiso sio wason oai Au tinaiku mo, mka oamahaiso rotu-tu ria supan noso sae wan Au unai osiso. 58Reiso Au reini mo, poroti wan rekaisunui on roe noiyaha. Poroti wani Au uruiki mo, nooi sani poroti wan mo upu momou oaiki rei mo, tewa. Masike oai poroti rei iae omataso sirinia. Ne ia sia man iai poroti wan Au uruiki mo, mka iamahaiki ikata Anahatana rotu-tu ria supan.”
59Yesus iasau runa rai pusire osi sio panesi reimo tau wain iatuhete sio panesi pan sio Yahudiu no numa mananoune pan kota Kapernaum.
Sio panesi wason mataanoe pusu Yesus oeu arihoniki
60Sio panesi wason opusu Yesus oatinu iruni rerihoni poroti rei oasau ata, “Maunaune reini mo, mtinte mainae. Ia sia man ianei kuai tewa.”
61Yesus ianei ata sio wason saka oeu pusui rei wason oana-namanaso pani muie rerihoni ne maunauna waron iasaure osiso rei. Reiso iasau osiso ata, “Openemo oatinu uasau san rei nan tau sae? 62Munata san rei, mka omi sapan sani onoo Au Tumata Reini Anahatana Ihitiku usaa na roe noiyaha honu? 63Anahatana ne Inaha sahoro iuna mansia oamahaiso okatai rotu-tu ria supan. Mansia mo, ruai ikua iuna na iamahaiki rotu-tu ria supan mo, tewa. Maunauna waron uasau runare rei mo, on roe Anahatana ne Inaha. Maunauna rai raunamo oamahaimo okata Anahatana rotu-tu ria supan. 64Ne Au uanei ata arihoni omi reini mo, sio umau wason oparisaa we maunauna tewa.”
Yesus iasau san rei tau, on naon-naone nea mo, ianei ia sia man wason oparisaa tanui tewa. Na ianei nea ia sia wain mka iaheniki.
65Oyo iasau ata, “Omi umau wan oparisaa we maunauna tewa reiso uasau osimo nea ata hasae sio wason Anahatana ihuka anoo sahoro oparisaa tanuku na oamahaiso rotu-tu ria supan.”
66Oni orase reini, sio panesi wason opusui rei, oeu oarihoniki na openeso oeu pusui nea.
67Oyo Yesus iasei tau ami, ne mampusua hutusa rahana ua rei. Iahata, “Pene tu-tu omi iae nanie oeu oarihoniku oi?”
68Ne Petrus iasau osi Yesus. Iahata, “Upu, nanie aeuma tau ia sia honu? Hasae Ano man sahoro asima runa sapan na amahaima akata Anahatana rotu-tu ria supan. 69Ami aparisaa na anei ia-ia ata Ano mo, Ano manisate onate. Anahatana iaisosia ahokaya mai tuniai reini.”
70Oyo Yesus iasau ata, “Masike Au ruaku sahoro uroma omi hutusa rahana ua reini tau we mampusua, ne ia isa arihoni omi reini mo, mka ipusu ia aia sakahatene ne maue.” 71Yesus ianamana rerihoni Yudas. Yudas mo, amai tau Simon on pan nia Iskariot. Masike ia mo, ia isa arihon Yesus ne mampusua hutusa rahana ua rei iae, mka iaheniki sinia.
Voafantina amin'izao fotoana izao:
Yohanis 6: ANA
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© (Active), Wycliffe Bible Translators, Inc., All rights reserved.
