Yohanis 7
7
Yesus ne waniu oparisaa tanui tewa
1Yesus ianamana osi sio panesi pusi, oyo ieu ihori otoe Galilea. Ipenei ieu poe otoe Yudea. Areimo tau sio Yahudiu no sio mainaya wason onina arena nanie ohunui.
2Ne tau rei mo, haineke ami Yahudiu ma karisaa wan oiki tau karisaa orueso sui wanana.#7:2 Karisaa wani oiki tau karisaa orueso sui wananamo, sio Yahudiu no karisaa mainae isa arihon sio no karisaa mainaya tonu. Tau karisaa rei mo, sio Yahudiu okure anggur huaya na orueso sui wanana waron ounare arihon ai sana atua. Ouna san rei na anoo rapeka na no upu momou orueso pani otoe huie musum hutu ate. Sio Yahudiu panesi mka oeuso pani otoe Yudea roe kota Yerusalem na pusiso ouna karisaa rei kata umau. Karisaa rei reeu onona wanu. Karisaa wan anoo rapeka runa Anahatana ihoka no upu momou arihon otoe Mesir, hunana nome samatoro ounai. 3Yesus ne waniu oasau osiki ata, “Nene iake mo, aeua poe otoe Yudea na auna sima-simana arihon Anahatana poe rei na me mampusua rei onoore. 4Ia sia man wain inina na sio panesi oationai mo, iuna sae isa iauhun-iauhun tewa. Reiso sani me kawasa, areimo auna sima-simana arihon Anahatana na atuhete osi sio pusiso mai tuniai reini.” 5Ne waniu rei oasau sani rei tau sio ruao iae oparisaa tanui tewa oi.
6Reiso Yesus iasau osiso. Iahata, “Nene orase tau Au ueuku roe kota Yerusalem tewasi. Ne omi mo, supan man tau oeu iae iake. 7Areimo tau sio mai tuniai reini mo, openeso tau omi tewa. Ne openeso tau Au. Openeso tanuku noso uasau ata no haliu waron kahatena. 8Reiso omi oeumo na roe karisaa rei. Ne Au mo, ueu tewa. Tea mo, Au mo, nene orase tau ueu roe rei tewasi.” 9Yesus iasau san rei pusi, oyo iruei pan otoe Galilea asi.
Yesus ieui roe karisaa wan orueso sui wanana
10Yesus ne waniu oeuso roe karisaa wan orueso sui wanana rai. Oyo Yesus iae ieu pususo. Ne ieui mene-mene man na pene mansia hutue oaneiki. 11Roe karisaa rei, sio Yahudiu no sio mainaya wason onina-nina Yesus. Oasei tau mansiau oahata, “Ia mo, wainpa?”
12Mansia panesi wason roe karisaa rei oarahuhu osi umau rerihoni Yesus. Sio umau oahata, “Ia mo, Ia mansia iake!”
Ne sio umau honu oasau ata, “Tewa. Ia mo, Ia iakarota sio panesi.”
13Ne ia sia man ikaitau ianamana mainae rerihoni Yesus na mansia pusiki oatinu. Areimo tau okaitau sio Yahudiu no sio mainaya.
Yesus iatuhete roe Yerusalem
14Karisaa rei reeu onona tonu te ate sani rei nea, oyo Yesus ieui roe Anahatana ne numa mainisie nusue na iatuhete mansiau roe rei. 15Sio Yahudiu no sio mainaya osira oatinu Yesus iatuhete sio panesi roe rei. Oasau ata, “Ia reini mo, isikola akama tewa, tea! Reiso sapan na ianamana sani rei?”
16Oyo Yesus iasau osiso ata, “Sae wan uatuhetei osimo reini mo, rehokai on mai Au ruaku mo, tewa. Ne usupui arihoni Anahatana wain iaisosiku rei. 17Ia seia nanie ipusu Anahatana ne maue mo, mka ianei ata sae waron Au uatuhetere reini mo, rahoka arihon Anahatana te arihon Au ruaku. 18Ia sia wain iatuhete mansia pusu ruai ne pikiran, areimo hasae inina na mansiau oamuira ia man. Ne Au uatuhete maunauna waron rauna mansiau oamuira Amaku wain iaisosiku rei. Areimo retuhete ata Au mo, uakarota tewa. Reiso oparisaa tau we matuhetene iae, iake. 19Anomo rapeka runa Anahatana ne maunauna waron Musa ikanure rei. Ia sia man arihon omi ipusu pusire ia-ia tewa. Sinana opusure, areimo mka onina arena na ohunuku tewa.”
20Oyo sio panesi oahata, “Amukea! Auwena na sakahatene reiso anamana sani rei si? Ia sia nanie ihunua?”
21Yesus iasau ata, “Au una sima-simane arihon Anahatana osa man tau ranie hatae wan ita Yahudiu iamuira Anahatana, oyo pusimo osira. 22Ne rerihoni ranie hatae wan ita Yahudiu iamuira Anahatana mo, naone Musa ikanu ata omi mo, kahurae orehi mo sio iki hanaia wason mato oamrae pannuhu no onona itu. Ne nene manisate mo, mo upu Abraham sahoro isupu maunaune rei naone. Reiso noso maunaune rei, omi iae taua-taua orehi mo hehuka hanaia tau ranie hatae wan iamuira Anahatana sirinia.#Aikune 17:10; Imam 12:3 23Omi orehi mo hehuka hanaia tau ranie hatae wan iamuira Anahatana sirinia repusu Musa ne maunauna, reiso nanie anomo rasaa tau Au noso usuisene ia isa pannuhu ranie hatae wan iamuira Anahatana nanie tau sae? 24Pene oapasana Au tau onoo usuisene ia isa tau ranie hatae wan iamuira Anahatana rei. Pene arinii pusu sae waron mansiau onoore man. Ne kahurae onoo sae wan manisate na iakahai mansiau.”
Sio oasei ata kani Yesus mo, Ia Aia wain Anahatana Ihitiki na Iapuheu Mansiau
25Tau Yesus ianamana osi sio Yahudiu roe Anahatana ne numa mainisie nusue roe kota Yerusalem mo, sio Yerusalem umau oasei tau umau ata, “Ia reini mo, Ia wain sio nanie ohunui rei, tea! 26Masi onooi. Iatuhete mansia panesi san rei, ne sio mainaya osopoi tewa. Pene tu-tu oata kani Ia reini mo, Ia Aia wain Anahatana Ihitiki na Iapuheu Mansiau te sae rei? 27Ne Ia reini mo, Ia Aia wain Anahatana Ihitiki na Iapuheu mansia mo, tewa. Tea mo, sani Ia Aia wain Anahatana Ihitiki na Iapuheu Mansiau ihokai mo, ia sia man ianeiki tewa ata ihokai on supa. Ne Ia reini mo, ita ianei ihokai on supan.”
28Yesus wain iatuheteso roe Anahatana ne numa mainisie nusue asi oyo iatinu oasau san rei, ianamana nioi mainae ata, “Omi oationaku na oanei Au reini mo, on supa. Areimo manisate. Ne uhokaku reini mo, pusu ruaku we maue mo, tewa. Ne uhokaku reini mo, Amaku sahoro iaisosiku. Omi oationai tewa. 29Ne Au mo, uationai. Tea mo, uhokaku reini mo, on roe Ia. Ia sahoro iaisosiku na uhokaku mai tuniai reini.”
30Oatinui iasau ata Anahatana iaisosiki ihokai mai tuniai reini, sio onata onina arena na osota Yesus. Ne ia sia man arihon sio rei pusiso hanao rakahuui man tewa oi. Areimo, tau nene orase tewasi tau osotai. 31Ne arihon sio panesi wason noi rei mo, sio panesi oparisaa tanui. Oahata, “Ia seia man iuna kua sima-simana waron ratuhete ata ne kawasa arihon Anahatana panesi sani Ia onate reini tewa. Reiso, Ia onate reini mo, titue-tue Ia mo, Ia Aia wain Anahatana Ihitiki na Iapuheu Mansiau reini nea rei, tea!”
32Ne sio onata arihon akama Yahudiu oatinu sio panesi oarahuhu ata Yesus mo, Ia Aia wain Anahatana Ihitiki na Iapuheu Mansiau. Reiso okata sio imam no sio mainaya pusiso oeuso roe sio mamsaka Anahatana ne numa mainisie rei na oaisosiso oeu osota Yesus.
33Reiso Yesus iasau osi sio panesi rei. Iahata, “Mka ukatamo potuina tewa nea. Nanie ununiku na urueku ukata Amaku wain iaisosiku uhokaku mai reini. 34Omi mka oninaku ne osupuku tewa. Areimo tau omi mo, mka oeumo roe Au naniaku wan urueku rei mo, iake tewa.”
35Oyo sio mainaya arihoni akama Yahudi rei pusiso oasau mai umau. Oahata, “Nanie ieui sui supan tu-tu ita mka isupui tewa? Kani nanie ieui sui niana-niana ikata sio Yahudiu wason orue oneka sio wason sio Yahudi tewa rei na iatuheteso te sae rei? 36Iasau ata mka ininai ne isupu kuai tewa. Na iasau mka ieu noi naniai ikatai tewa. Iasau sani rei nanie tau sae ano?”
Yesus mo, tihu wan reuna iamahaita
37Nene onone wan tau muie, tau sio Yahudiu no karisaa wan oiki tau karisaa orueso sui wanana rei mo, onone wan mainae nai osa. Tau onone rei Yesus ihitio oyo ianamana nioi mainae. Iahata, “Ia seia man wain anoi kasae mo, ieu mai tanuku na ininu sae wan uruiki osiki na ininu. 38Sio okanu tau Anahatana ne anamanaya rerihoni sio wason oparisaa tau Au ata, mka waena hunaya rania on pan anoo wan mka raunaso oamahaiso.#Sakaria 14:8; Yesaya 58:11 39Yesus waimo ianamana rerihoni Anahatana ne Inaha. Sio wason oparisaa tau Yesus mo, mka Anahatana irui ne Inaha osiso. Ne Anahatana iruiki tewasi tau Yesus imatai na isaa isupu muiran manetane roe noiyaha tewasi.”
40Sio umau oatinu Yesus iasau san rei oyo oahata, “Titue! Ia reini nea rei tea! Ia reini sahoro ia mamsima runa Anahatana ne maunauna wain ami anapa-napai rein, tea!”
41Sio umau honu oasau ata, “Ia reini nea rei, tea! Ia Aia wain Anahatana Ihitiki na Iapuheu Mansiau rei, tea!”
Ne sio umau honu oasau ata, “Tewa te sae rei? Ia Aia waini Anahatana Ihitiki na Iapuheu Mansiau mo, ihokai on poe otoe Galilea tewa, tea! 42Sio okanu tau Anahatana ne anamanaya nea oi, tea! Okanu ata Ia Aia wain Anahatana Ihitiki na Iapuheu Mansiau mo, Ia aia Daud upui momoi wain iamrae pan kota Betlehem,#2 Samuel 7:12; Mika 5:1 ia aia Daud ne niane.”#7:42 Yesus iamrae pan kota Betlehem. Kota Betlehem mo, wapan otoe Yudea. Ne on Yesus ia ikine asi, inai na amai ororiki oyo orueso pan otoe Galilea. Reiso Yesus iruhu pan otoe Galilea. Sio reini oanei tewa ata iamrae pan Betlehem. Naone, ia mamsima na Anahatana ne maunauna ikanu ata Ia Aia wain Anahatana Ihitiki ne Iapuheu Mansiau mo, mka iamrae pan Betlehem. 43Pusiso otuntana na umau noso Yesus. Sio umau oparisaa tau Yesus, ne sio umau mo, tewa. 44Sio umau nanie osotai, ne ia seia man hanai rekahuu man tewa oi.
45Sio mamsakaya wason osaka Anahatana ne numa mainisie rei onunso roe sio imam no sio mainaya runa sio onata arihon akama Yahudi wason oaisosiso rei. Oyo sio onata rei oasei tanso ata, “Ororiki mai tewa tau sae rei?”
46Oyo sio mamsakaya rei oasau ata, “Rotu reini ami atinu ia sia man ianamana sani ia onate rei tewasi.”
47Oyo sio onata arihon akama Yahudi rei oasau osiso honu ata, “Pene tu-tu iakarotamo oi te sae rei? 48Masi onoo ia-ia ata ia isa arihoni re sio mainaya runa sio onata arihon akama Yahudi iparisaa tau Ia rei te tewa. Tewa, tea! 49Ne, sio panesi rei oparisaa tau Ia rei tau oanei Anahatana ne maunauna waron Musa ikanure rei tewa. Sio mo, mka Anahatana iapasanaso.”
50Ia isa arihon sio rei nanai Nikodemus. Ia mo, naone ieui noi Yesus tau pumono. Iasau osi sio wason ikataso rei ata, 51“We amau. Ita mo, pusu Anahatana ne maunauna waron Musa ikanre rei kahurae iarinii ia isa ia-ia naone ee. Iasei tanui oyo iatinu tanui samatoro iapasanai sani resana.”
52Nikodemus iasau san rei oyo oasau osiki ata, “Ano reini mo, on pan otoe Galilea nooi sani ia hanaie reini oi te sae rei? Ano mo, arinii Anahatana ne maunauna ia-ia na anei ata Anahatana ne ia mamsima runa ne maunauna mo, ihokai on pani otoe Galilea tewa.”
Ia pina isa wain inekei na ia hanaie wain sahai tanui tewa
[ 53Oasau sani rei suka, oyo pusiso onunso sakakau sui no numau.]
Voafantina amin'izao fotoana izao:
Yohanis 7: ANA
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© (Active), Wycliffe Bible Translators, Inc., All rights reserved.
