Lurkaf 24
24
Yeqsur Ghofdaef Lar-euq
Mt 28:1-10; Mk 16:1-8; Yh 20:1-10
1Tiqjaw-euq lafkhoer yawbae ngae nan uqbya byataw, zaqmiq aqbur khoerdeuq, aqyawfmaf nae laeqhmq taq-euq yawsaw jeq yur-awr, zaqmiq aqbur nuideuq naeq-aer lmqbymr-anr ir-euq mae. 2Khoerngae, lmqbymr-euq ghaqkhaeq-anr ngawqtsoeq taq-euq khaqlo khoersiq ngawqdzae taq-euq gar ya’mawr-euq mae. 3Aqyawfmaf urler ngae, Sanqpaq Yeqsur-euq mawrdo jav-eu maqmawr-aq. 4Khoerngae, heulof-aer pyeuflar-euq mae. Aqyawfmaf garkawv khoer-anr zanq duidui ler-awr jawrluf ngae, yawshaef bya-eu maeqtsoeq dmluf-eu tsawrhaq nyiq ghaq dovle-awr, dawqpae yawfluf-eu mae. 5Zaqmiq aqbur khoerdeuq guv-ir-awr, mirtsa awbyav taq-euq mae. Tsawrhaq khoer nyiq ghaq, aqyawf maf-anr heulof-aer aernaeq-euq mae, “Aqjeq mirnae daefluf-eu tsawrhaq-anr shir-euq tsawrhaq taqduq-anr povle-euq le? 6Aqyawf ghofdaef lar-awr, heugar maqpar jawr-eu mae. Aqyawf, Gaqliqlaer mirkhanq-anr jawr ngae nae, nawmaf-anr aqjox-aer aernaeq taq-euq dawq-anr noeqmawr-awq. 7Aqyawf aer-eu, ‘Tsawrhaq-euq Zaqyo-aq, iqbaxzaq-euq aqlaf-anr yabi a’naeq taef-a. Khoernar-aq, lafyaq-euq khoertav yabi tafsaef-awr, smq nan keuvlar nar-aq, par ghofdaeflar taef-a.’ ”
8Khoerngae, aqyawfmaf, Yeqsur-euq dawq noeqdov ler-awr, 9lmqbymr-anr nae ghoflar-awr, ghaqkhaer 11 ghaq hawr-eu nuideuq dawqtawv luf-anr garkawv khoerdeuq dawqtawvluf dzawrnaeq-euq mae. 10Ghaqkhaer deuq-anr garkawv khoer dzawrnaeq ler-euq zaqmiq aqbur khoerdeuq-aq, Maqliv Maqgaqdaqlar, Yorhaqna, Yaqkov-euq aqma Maqliv hawr-eu, aqyawfmaf naeq-aer jawr-eu zaqmiq aqbur nuideuq mae. 11Zaqmiq aqbur khoerdeuq-euq dawq-aq, ghaqkhaer deuq-euq gharduq gardanr maqtsoeq-eu garkawv-a laer noeq-eu mirnae, ghaqkhaer deuq, aqyawf maf-anr maqjan-a. 12Beqtuvluv tur-awr, lmqbymr-euq ghaqkhaeq-anr caevkeuv ghae-awr, uqduq tanqmof-awr lafkhoer pawdzer cuhu ngae, sheqsha saqpar taef-aer jav-eu gar ya’mawr-euq mae. Pyeuflar-euq garkawv deuq-anr aqyawf zanqler-awr ghofler-euq mae.
Ermawf Pu-anr Ir-euq
Mk 16:12-13
13Khoerngae nan, zaqlanr deuq-euq lafkhoer keuq-eu nyiq ghaq Yeqlursaqlaeq-anr nae shif lotsov#24:13 Shif lotsov Heu-aq, shif maiq (mile), maqngeur nar-aq, 11 kivlomanr (kilometer) aerghaq kaq-eu gar aermawf-eu mae. kaq-eu, Ermawf laer kur-eu pu-anr irluf-eu mae. 14Pyeuflar-euq garkawv khoerdeuq dawqtawvluf, aqyawfnyaf jaluf-eu mae. 15Aqyawfnyaf khoerlof-aer ja’ur jasawx-eu lafkhoer canluf ngae, Yeqsur, aqyawf nyaf-euq dawqpae lar-awr, aqyawfnyaf naeq-aer canluf-eu mae. 16Aerkhawf, Yeqsur nga laer maqya siqni, aqyawf nyaf-euq myavnuiv-anr daeqkaq taq-euq lof-aer dur-eu mae.
17Yeqsur, aqyawf nyaf-anr narhaq-eu, “Nawnyaf aqjeq-euq garkawv jaja-aer noeqshaq-eu lafkhoer canluf-eu le?”
18Khoerngae, aqyawf nyaf-euq lafkhoer nae Gaqlawrpar laer kur-eu ghaq, aqyawf-anr aernaeq-eu, “Nymq-mr heumyav nan-euq lafkhoer pyeuflar-euq garkawv deuq maq siqnya-eu, Yeqlursaqlaeq-anr lartaq-euq daqyan-aq, nawr tiq ghaq jawr-eu taef jeq ngar-a.”
19Yeqsur, aqyawf nyaf-anr narhaq-eu, “Aqjeq pyeuflar-euq la?” Khoerngae, aqyawfnyaf heulof-aer aer-eu mae: “Naqzaqlaer tsawrhaq Yeqsur-euq garkawv lawr. Aqyawf-aq, Miqyaer gharduq ngaeqdan-eu tsawrhaq tiq ghaq mae. Miqyaer-euq maeqshi hawr-eu tsawrhaq dawqtawv luf-euq maeqshi, ngaeq-awr mr-eu baoq zawr huiq-eu tiq ghaq mae. 20Pirma aqyuif deuq hawr-eu aqdui-anr uvlanr-eu aqyuif aqtsu deuq, aqyawf yashirni yarkhaq bidar-eu gharduq a’naeq-awr, lafyaq-euq khoertav bi tafsaef-euq mae. 21Aqyawf-aq, Irsaqleqlav tsawrjeuq tsawrca-anr kakhof le-eu ghaq ngeur-eu paq laer nga’maf noeqtmq-euq ma. Khoeruqtaf, garkawv heudeuq pyeuflar-euq-aq, iqnan smq nan byanlar-euq mae. 22Khoernar-aq, nga’maf-euq armur-euq lafkhoer jawr-eu, zaqmiq aqbur tiqpavnav deuq, nga’maf-anr yawkhav-aer zanqler paq-aer janrnaeq laf-eu mae. Nymrshawq yawnaf-aer aqyawfmaf lmqbymr-anr irkeuv ngae, 23Yeqsur-euq mawrdo jav-eu gar maqmawr-aq jer. Khoerngae, aqyawfmaf ghoflar-awr, aqyawf maf-anr mqtav ghaqkhaer mawrle-awr, Yeqsur daefluf mae laer mqtav ghaqkhaer, aqyawf maf-anr aernaeq laf-euq mae laer aer-eu mae. 24Nga’maf-euq tsawrhaq tiqpavnav deuq lmqbymr-anr haw-ir ngae, zaqmiq aqbur khoerdeuq nae aer-eu lof-aer jav-eu gar ya’mawr-euq khawf, Yeqsur-anr-aq maqya mawr-aq.”
25Khoerngae, Yeqsur, aqyawf nyaf-anr heulof-aer aernaeq-euq mae, “Aqdzawq argan deuq-or! Nawmaf-aq, Miqyaer gharduq ngaeqdan-eu tsawrhaq nae aertaq-euq dawqtawv luf-anr jan-eu gharduq, nawmaf-euq nuima zawr-aer myaf-eu nga! 26Kali shaqzanq heudeuq yadaq ghaq-awr nae taef-aer, aqyawf-euq yawshaef khanqsaer-euq lafkhoer ya urler-eu maqngeur-a lor?”
27Khoernar-aq, aqyawf-euq garkawv boftaq-euq Yaerbof dawqtawvluf, Morseq nae boftaq-euq gar nae danqbae-awr, Miqyaer gharduq ngaeqdan-eu tsawrhaq deuq nae boftaq-euq gar keuvni, aqyawf nyaf-anr dawqtsuif jashaw maeqnaeq-euq mae.
28Aqyawfmaf irluf-eu pudzer irkeuv ngae, Yeqsur maeqhu paw irdzeur ghae-eu laer ghae-eu mae.
29Khoerngae, aqyawfnyaf, Yeqsur-anr yawkhav-aer aer-eu, “Mq cifle-awr, nanrma ga’anr shaw-iq ngar-a. Nga’nyaf naeq-aer yaf-awq.” Khoermirnae, Yeqsur, aqyawfnyaf naeq-aer yaf-eu laer urler-euq mae. 30Khoerngae, heulof-aer pyeuflar-euq mae. Yeqsur, aqyawfnyaf naeq-aer jawq-awr dzaq-eu laer ghae ngae, Yeqsur kaqmur yur-awr jaceuq-euq mae. Khoernar-aq, ngawqpyaeq-awr aqyawf nyaf-anr bifnaeq-euq mae. 31Khoerngae, aqyawf nyaf-euq myavnuiv panlar-awr, Yeqsur nga laer ya siqnya-euq naeq-aer, Yeqsur, aqyawf nyaf-euq myavkhae nae byov-ir-euq mae. 32Khoerngae, aqyawfnyaf yawkaq ja-eu, “Garpaer-anr canluf ngae nae, aqyawf, arnyaf-anr dawq ngaeqcawq lar-awr, Yaerbof panmaeq naeqlaf ngae, arnyaf-euq nuima-euq lafkhoer miqdzaq dof-eu lof-aer ghaelar-euq maqngeur nya lor?”
33Khoerngae, aqyawfnyaf tiqpov taef-aer tsawqtur-awr, Yeqlursaqlaeq-anr par ghofler-euq mae. Khoergar lekeuv ngae, ghaqkhaer 11 ghaq hawr-eu aqyawfmaf naeq-aer jawr-eu deuq, tiqgar uiqler taq-awr jawr-eu gar ya’mawr-euq mae. 34Aqyawfmaf aer-eu, “Sanqpaq Yeqsur aqdirma-aer ghofdaef lar-euq mae. Aqyawf-euq mawrdo Sirmoq-anr bimawr-euq mae.”
35Khoerngae, aqyawfnyaf khawf, garpaer-anr pyeuflar-euq garkawv hawr-eu kaqmur ngawqpyaeq ngae taef-aer Yeqsur nga laer yasiq-euq garkawv, aqyawf maf-anr ja’naeq-euq mae.
Yeqsur, Zaqlanr Deuq-anr Bimawr-euq
Mt 28:16-20; Mk 16:14-18; Yh 20:19-23; Ghkh 1:6-8
36Aqyawfmaf khoerlof-aer jaluf ngae, Yeqsur, aqyawf maf-euq ghanrcae yawfle-awr, aqyawf maf-anr aernaeq-eu, “Nawmaf nuisar of luf-ur.”
37Aerkhawf, aqyawf maf-aq, naef mawrle-euq jeq nga laer noeq-awr tsawqguv-ir-awr, guv duidui-eu mae. 38Khoerngae, Yeqsur heulof-aer aernaeq-euq mae, “Nawmaf-euq nuima aqjeq mirnae maqsar-eu la? Nuima-euq lafkhoer aqjeq mirnae maq jancoer-eu le? 39Ngaq-euq aqkuir, ngaq-euq aqlaf-anr haw-awq. Aqdir aqmar ngar nga laer yasiq taef-a. Ngaq-anr toeqciv-awr nae hawduq-awq. Ngar-aq, nawmaf mawrluf-eu lof-aer mawrdo baw-eu ma. Naef-aq, shaqyoeq hawr-eu shaqjir maqbaw-a.”
40Khoerlof-aer aernaeq ghaq-awr, aqyawf-euq aqkuir aqlaf, aqyawf maf-anr bihaw-euq mae. 41Aqyawfmaf laqkhaq caer-awr zanqler taq-euq baqda’nae, maq janni jawrluf ngae, Yeqsur, aqyawf maf-anr aernaeq-eu, “Nawmaf, heugar dzaq-eu jeq tiqjeqpaq maqjav laq?”
42Khoerngae, aqyawfmaf, taeqba taq-euq ngaqshaq tiq pyaeq hawr-eu byaquir uicuiv yur-awr Yeqsur-anr bifnaeq-euq mae. 43Yeqsur yur-awr, aqyawf maf-euq maeqshi dzaq-euq mae.
44Khoerngae, Yeqsur, aqyawf maf-anr aernaeq-eu, “Morseq-euq zanrdawq, Miqyaer gharduq ngaeqdan-eu deuq-euq sanqbof hawr-eu, Jaceuq-eu sanqbof-euq lafkhoer, ngaq-euq garkawv khar boftaq-euq dawqtawvluf ya byanlar taef-a laer, ngar, nawmaf naeq-aer jawr ngae, dawq heudeuq aernaeq dzeur-euq ma.”
45Khoerngae, aqyawfmaf, Yaerbof-anr ghovshaw nya’ni, Yeqsur, aqyawf maf-euq nuima pannaeq-euq mae. 46Yeqsur, aqyawf maf-anr heulof-aer par aernaeq-euq mae, “Yaerbof-euq lafkhoer boftaq-euq lof-aer, Kali-aq, shaqzanq yadaq-awr, smq nan byanlar nar-aq, shir-euq gar nae ya ghofdaeflar taef-a. 47Khoeruqtaf, nawmaf, aqyawf-euq tsawrmyanr-anr ghoe-awr, iqbax noeqpov-eu jeq hawr-eu iqbax pyaeqnaeq-eu garkawv, Yeqlursaqlaeq-anr nae mirkhanq-euq tsawrjeuq tsawrca dawqtawv luf-anr dawqmaeq ya’maeq-ir taef-a. 48Nawmaf-aq, garkawv heudeuq-euq gharduq sarkir yakamq-eu tsawrhaq deuq mae. 49Narhaq sher-eq. NgaqDa-euq sarjax, ngar, nawmaf-euq khoertav bi jawrle ma. Nawmaf mq-euq khoertav-euq baoq maqza-euq khoerkeuvni meuq-euq lafkhoer dawqtawq siq.”
Yeqsur Mq-euq Khoertav Ghofdav Ler-euq
Mk 16:19-20; Ghkh 1:9-11
50Khoernar-aq, Yeqsur, aqyawf maf-anr Beqtaqnir pudzer sheuqkeuvghae ngae, aqlaf bafdir-awr aqyawf maf-anr dawq ngaeqghae naeq-euq mae. 51Khoerngae, heulof-aer pyeuflar-euq mae. Dawq ngaeqghae naeqluf ngae, Yeqsur, aqyawf maf-anr nae ghawq-ir-awr, mq-euq khoertav bi sheuqdav lef-euq mae. 52Aqyawfmaf, aqyawf-anr uqduq tanq-awr, laqkhaq caertavni Yeqlursaqlaeq-anr ghofler-euq mae. 53Khoernar-aq, aqyawfmaf aqmyanluf uqduq tanqnymr nymrma-euq lafkhoer jawr-awr, Miqyaer-anr ciqhuiq ciqmanr-awr jaceuq luf-eu mae. Aqmeq.
Voafantina amin'izao fotoana izao:
Lurkaf 24: AKA
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
2018 ©
Bibles International ®
The Bible Society of Baptist Mid-Missions
