Yorhaq Jashaw-eu Dawq
Jashaw-eu Dawq
Yaerbof yawshuif-euq lafkhoer, yawbae oeq pur-anr, “Laqkhaq Caer-eu Guiqlanqdawq” laer kur-eu mae. Aqjeq mirnae aernar-aq, heumyav pur-euq lafkhoer Yeqsur Kali daefle-awr, yashir-awr nae ghofdaef lar-euq garkawv deuq boftaq-euq mae. Garkawv heudeuq-aq, Kalizaq, mirtsaq doeni ya’maeq-ir-eu garkawv uqdzan deuq pyeuf-eu mae. Ghaqkhaer Yorhaq, sanqbof heupur bof ngae, mirtsaqzaq yawqghaq navluf-euq gharduq bof-euq mae. Aqyawfmaf, Yeqsur-aq, Kali pyeuf-eu Miqyaer-euq Zaqyo ngar-a laer bi janlar-eu gharduq bof-euq mae (Yh 20:30-31). Aqyawf, sanqbof heupur A.D. 85-90 khof-anr bof-euq mae. Guiqlanqdawq yawpuryawq bof-euq maeqnan ghawqmyanrni nanq-eu mae.
Yorhaq-euq aqda aqma-aq, Zeqbeqdaer hawr-eu Saqloqmeq laer kur-awr, aqyawf-euq ardov-aq, ghaqkhaer Yaqkov mae. Yorhaq, yawqhar yawqha, “Yeqsur zawr gaq-eu zaqlanr” laer kur-eu mae (Yh 13:23-24; 21:7, 20, 24). Yorhaq-aq, Beqtuvluv hawr-eu Yaqkov naeq-aer Yeqsur-euq dawqpae taeqni jawr-awr, ghaqkhaer nuideuq ghoeq ghaq maqya mawr-euq jeq khawf ya’mawr-euq mae (Mk 5:37; 9:2; 14:33). Miqyaer, Yorhaq-anr zmq-awr Yaerbof yawshuif-euq lafkhoer ngaq pur bibof-euq mae. Khoer-aq, Guiqlanqdawq Yorhaq, 1 Yorhaq, 2 Yorhaq, 3 Yorhaq hawr-eu Panmaeq-eu sanqbof mae.
Yorhaq nae bof-euq guiqlanq dawq-aq, yawqghaqyawq smr ghaq (Maqtaeq, Maqkuv, Lurkaf) nae bof-euq gar nae ghawqmya jeq beugar-eu mae. Yorhaq, garkawv kawvma pyeuf-eu Yeqsur daefle-euq garkawv hawr-eu Yeqsur-euq yawjeq majeq dawqdeuq maq bofanr taq-aq. Aerkhawf, Yorhaq, khoer smr ghaq nae maq bofanr taq-euq jeq boftaq-euq mae. Yorhaq sanqbof ardanq baelar-eu gar boftaq-euq deuvma ngaq deuv-euq garkawv-aq, Yorhaq sanqbof-euq lafkhoer taef-aer anr-eu mae. Heu-aq, Yeqsur bartirsaq hageuf-awr guiqlanq-euq gar mrdanq baelar ngae-euq garkawv mae. Yorhaq, Yeqsur-aq, Miqyaer mae laer bisiq-eu gharduq khavjeq-aer ghae-eu jeq shif jeq boftaq-awr, khavjeq-aer ghae-eu jeq heudeuq-anr, Yorhaq “Bisiq bimawr-eu jeq” laer kur-eu mae. Bisiq bimawr-eu heudeuq-aq, deuvma 2, 4, 5, 6, 9 hawr-eu 11 lafkhoer boftaq-euq mae. Yorhaq, Yeqsur-euq dawqmaeq dawqdzawr shif pov mr-euq garkawv khawf, deuvma 3, 4, 5, 6, 8,10 hawr-eu 14-16 lafkhoer boftaq-euq mae. Khoeruqtaf, Yeqsur nae “Ngar-aq,…pyeuf-eu ma” laer aertaq-euq deuq khawf, Yh 6:35; 8:12; 9:5; 10:11, 14; 11:25; 14:6 hawr-eu15:1 lafkhoer boftaq-euq mae. Yorhaq sanqbof ardanq baelar-eu gar nae Yeqsur Kali-aq, Miqyaer mae laer byacaevni toeqmaeq-awr nae (Yh 1), Yeqsur byacaevni guiqlanq-euq gar mr-euq garkawv boftaq-euq mae (Yh 2-12). Khoernar-aq, Yeqsur nae aqyawf-euq ghaqkhaer deuq-anr yawcof cof-aer maeq-euq dawq boftaq-awr (Yh 13-17), Yeqsur lafyaq-euq khoertav yashir-euq garkawv boftaq-euq mae (Yh 18-19). Khoernar-aq, arsaq saqlar-eu naeq-aer Yeqsur shir-euq gar nae ghofdaef lar-awr, gar mr-euq garkawv boftaq-euq mae (Yh 20-21).
Yorhaq, Yeqsur-aq, Kali pyeuf-eu Miqyaer-euq Zaqyo mae laer byacaevni toeqmaeq taq-euq mae. Aqdui mqmaq maqbyav yarzir daef-eu jeq za’ni Yeqsur Kali-anr yajan-eu mae.
Yorhaq Sanqbof-euq Mawrkawr:
I. Yeqsur Kali-anr toeqmaeq naeq-eu (Yh 1)
II. Yeqsur Kali byacaevni guiqlanq-euq gar mr-euq (Yh 2-12)
III. Yeqsur Kali, aqyawf-euq ghaqkhaer deuq-anr yawcof cof-aer maeq-euq (Yh 13-17)
IV. Yeqsur Kali, lafyaq-anr yashir-euq (Yh 18-19)
V. Yeqsur Kali shir-euq gar nae ghofdaef lar-awr, cantae-eu deuq-anr bimawr-euq (Yh 20-21)
Voafantina amin'izao fotoana izao:
Yorhaq Jashaw-eu Dawq: AKA
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
2018 ©
Bibles International ®
The Bible Society of Baptist Mid-Missions