Tabekacane 7
7
Telebe
1Ku Tamatama la iya kai ki Nua, “Kusu si wacekecekelesu lri mudaane numi makanaelre ki varukuru, asi lwiyane wadrelaku ikai kai ki zidai kathanesu ku mwalecege ku kakwakudhane. 2Lri ilukusu ki nilapulapwane mudaane ki varukuru: Sanaka tinumabulane ki takisuswane, ki taingeane ka sawvalai si ababai lrika taipitwane; ku kaika mabula, ku taingeane ka sawvalai si ababai lrika taingeangeane; 3ku laadhadhame lrika taipitwane ka tadradrusa ku sawvalai si ababai. Lu mia kai, ku makaelaela ku nilapulapwane, adhadhame lri kipalakebe, lri edhale ikai ki kadaengane. 4Lu maka pitulunga, lri pulebeaku ku madradrau ku udale maka masupatele ki vaiyane si maungu, malra amudu patuelre kai bekaceli.” 5Ku Nua la singikai ku tadrekasane ki Tamatama nguvavaeva pangimia.
6Ku Nua satara 600 ku cailini, watelebe kai kawmasane. 7Ku Nua si taelrelreini, lalalake ka sawvalai si lakiathareve mwadaane ki varukuru makanaelre, mubere ki telebe. 8Lu singikaiyane ki lrisi ku nikelretane ka mabula si kaika mabula ka makaelaela ka nilapulapwane, adhadhame, wagulagulai, 9mialri singikaai ku drekase ki Twaumase ku sawvalai si ababai tarudradrusa tupapalra ki Nua mudaane ki varukuru. 10Samaka pitulunga, la telebe kai kawmasane.
11Ku Nua sa taraeneme ka idai ku cailini, kwini ki caili, sakadrusa ki dramare 17 ki vai, kai adringi ki kadaengane kai acilai la mubelenge berai, kai subelebelenge la nguelebane, 12si kainganai gugu ku udale maka masupatele ki vaiyane si maungu. 13La ikai kwini ki vai, ku Nua si taelrelreini, si tatulru ka lalalake: Seme, Hame, Yapethe, si lakiathareve mwadaane ki varukuru makanaelre. 14Ku makaelaela ku labulabulai, nilapulapwane, wagulagulai, si adhadhame la mialri singikai ku sakamanemanane, 15tarudradrusa tupapalra ki Nua mubelenge ki varukuru. 16Sanaka waudriwdripi la singikai ku drekase ki Twaumase, ku sawvalai si ababai tarudradrusa mubelenge ki varukuru. Ku Tamatama la atalingikaiyane ki Nua elebe ku lrawlrawdru ki varukuru.
17Ku telebe la pacungulu makamasupatele ka vai. Ku acilai la aru kadradrau, ku varukuru la kipelai twalai ki kadaengane. 18La aru kadradrau ku acilai, ku varukuru la pathagili kipeapelai ki acilai. 19Ku telebe la sueetenga ki kadaengane, kai kawmasane ku latabebelenge ku lregelrege kialreenepenga patuelre. 20Ai padrimadriimana aru kadrau ku acilai, ku talribatane ki lregelrege ku acilai wakelanga ki pitu ka mituru. 21Kai kadaengane sanaka waudriwdripi: Adhadhame, nilapulapwane, bulabulai, wagulagulai si laumawmase la pacai patuelre. 22Kai kadaengane sanaka yakaai ku niake la mialri pacai patuelre. 23Ku Tamatama waamudu sanaka panianianiake kai kawmasane: Laumawmase, lanilapulapwane, lawagulagulai si laadhadhame; kathane ku Nua si taelre iniane ikai ki varukuru ka panianiake. 24Watelebe kai kawmasane tara 150 ku vai.
Voafantina amin'izao fotoana izao:
Tabekacane 7: NDV
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© The Bible Society in Taiwan, 2017
All rights reserved
© 臺灣聖經公會版權所有，2017