GYƆNI 9

1Yisa ŋɔn daa kyɛnni maa, u daa ti nya dɔsɔ ban daa dɔ'ai ka u pun nyɛ zooma. 2U nyaandɔliba daa boosi u n‑yɛli, ni, “Ti Karimba, ŋɔni tumbeeri n‑kyɛ ka ba dɔ'ai u zooma wa? Di daa nyɛ la u mammantoori tumbeeri, bee, u ba ni u ma tumbeeri zugu?” 3Yisa daa labsi n‑yɛli, ni, “Ŋɔn n zoom seem maa pa la u tumbeeri zugu, ka laa m‑pa la u badima tumbeeri zugu. Ay! - Ŋɔn zoom maa muna - din nin kyɛ ka Naawunni yiiko ti yi paalu u zugu. 4Din na nyɛ wuntaŋŋa saha wa, faasee ka ti tum n‑tisi Ŋɔn tum ma na maa; yuŋŋu yi ti zibi sɔsɔ ku ti laa n‑toaai n‑tum. 5Man ŋɔn na bɛ duniya wa ni maa, mani n nyɛ duniya neesim.” 6Ŋɔn daa ti yɛli nŋɔ maa nyaaŋŋa, Yisa daa tusi nantoori m‑basi tiŋŋa ka gyɛri n‑gyɛri tanni ni nantoori maa. U daa zaŋŋi tanni maa n‑tari n‑tari doo maa nini 7ka yɛli u, “Kyɛma nti peaai i nindaa Sailɔ'am beeŋŋu la ni.” (‘Sailɔ'am’ gbinni nyɛ la “Tumpu”): ka doo maa daa kyaŋŋi nti peaai u nindaa maa ka labi na ka u nini nyara.

8Tɔ, ka u ziziitaaba daa ti nya u, ban ni niriba ban daa pun nya u ka u daa susira pɔi ka dinŋɔ daa ti niŋi maa. Ka ba daa boosi, ni, pa doo wa n yi zi tiŋŋa n‑susiri la? 9Seeba daa yɛliya, ni, “Ŋɔna nla, ” amaa ka seeba mun daa yɛli, ni, “Ay, pa ŋɔna nla; u kur ŋmani u ni.” Ka doo maa mammaŋŋa daa ti yɛli, ni, “Ay! - Mani nla.” 10Ka ba daa boosi u, ni, “Ka di kyaŋŋi la wula ka i nini yi nɛ pampaŋŋɔa?” 11Ka u daa labsi n‑yɛli, ni, “Dɔsɔ ban boonni Yisa la n daa niŋi tanni n‑tari n‑tari n nimbiya ka yɛli ma, ni, n kyɛma nti peaai n nindaa Sailɔ'am beeŋŋu la ni. Ka n daa kyaŋŋi, ka man daa ti peaai n nindaa maa n‑naai, n di neaai ni.” 12Ka ba boosi u, ni, “U bɛ la yani?” Ka u labsi n‑yɛli, ni, “N bu mi.” 13Tɔ, ka ba daa zi dɔsɔ ŋɔn daa nyɛ zooma maa n‑kyaŋŋi Farisii dima saani. 14Dindahinseaa Yisa ŋɔn daa niŋi tanni n‑tibi doo la zoonsi maa daa nyɛ la Vuusim Dabsiri daari. 15Tɔ, ka Farisii dima daa laa m‑boosi u ŋɔn niŋi seem ka u nini maa ti nyara maa yaasa. U yɛli ba, ni, “U daa niŋi la tanni n‑niŋi n nimbiya ni; ka n peaai n nindaa maa, ka yi di nyara pampaŋŋɔa.” 16Farisii dima seeba daa yɛliya, ni, “Dɔsɔ ŋɔn niŋi nŋɔ maa ku toaai n‑yi Naawunni saani na, dama u bu dɔli la Vuusim Dabsiri zaaligu.” Ka seeba daa yɛli, ni, “Bɔ zugu ka dɔsɔ ŋɔn nyɛ ala'akyi daana ti tum alahazibu nŋɔ taabu?” Ka ba nɔya daa di wali. 17Ka Farisii dima daa laa m‑boosi doo maa yaasa, ni, “I yɛliya, ni, u tibi la i zoonsi maa: tɔ, ka nyin teesiya, ni, u nyɛ la ŋɔni?” Ka doo maa labsi n‑yɛli, ni, “Anabi n nyɛ u.”

18Halli gba Yɛhudiya kpambaya maa daa na bu boori ni ba niŋi yɛdda, ni, u daa nyɛ la zooma ka pampaŋŋɔ n yi nyara, halli ka daa ti booli u ba ni u ma na 19nti boosi ba, ni, “Ya bii nŋɔa? Ya yɛliya, ni, ya daa pun dɔ'ai u la zooma; tɔ, ka pampaŋŋɔ di kyaŋŋi la wula ka u nini yi nyara?” 20U ba ni u ma maa daa labsi n‑yɛli, ni, “Ti mi, ni, u nyɛ la ti biiya, ka ti laa m‑mi, ni, ti daa pun dɔ'ai u la zooma. 21Amaa ti bu baŋŋi pampaŋŋɔ ŋɔn yi niŋi seem nti nyaŋŋi n‑yi nyara maa, ti mun bu mi ŋɔn tibi u zoonsi maa. Boosim u; u pa bibila, u mammaŋŋa nin toaai n‑tɔ'asi n‑labsi!” 22U ba ni u ma maa daa yɛli lala dama ba daa zɔri la Yɛhudiya kpambaya maa dabeem maa, dama ban daa pun naai taaba noori n‑yɛli, ni, sɔ zaa yi ti sakki n‑yɛli, ni, u niŋi yɛdda, ni, Yisa nyɛ la Masiiya maa, ba nin ti yiisi di daama ba la'aŋŋu duu maa ni m‑basi. 23Lala maa zugu ka u ba ni u ma maa daa yɛli, ni, u pa bibila; ni, ba boosim u maa.

24Ba daa laa m‑booli ban daa pun dɔ'ai dɔsɔ ka u nyɛ zooma maa ni u ti kyɛ na napɔmbuyi daana yaasa, n‑yɛli u, “Yɛlim Naawunni zugu, ni, i nin tɔ'asi yɛlimaŋni! Ti pun mi, ni, dɔsɔ ŋɔn tibi i maa nyɛ la ala'akyi daana.” 25Ka doo maa labsi n‑yɛli, ni, “Man bu mi, ni, u nyɛ la ala'akyi daana, bee, u pa ala'akyi daana. Yɛlli yinni ka man kur mi: n daa zoomna, ka pampaŋŋɔ n mun nini yi nyara.” 26Ba daa boosiya, ni, “Bɔ ka u daa dee n‑niŋi i? U daa dee n‑tibi i zoonsi maa la wula?” 27U daa labsi n‑yɛli ba, ni, “N daa pun yɛli ya, ka ya daa za'asi wumpu. Wula zugu ka ya laa m‑boori ya wum ka yaasa? Bee, ya gba boori la ya niŋi u nyaandɔliba?” 28Ka ba daa di gbaai u tuuri ka yɛli u, “Nyini n nyɛ lala doo maa nyaandɔla; amaa tirima ŋɔn mun nyɛ la Musa nyaandɔliba. 29Ti mun mi, ni, Naawunni daa tɔ'asi n‑ti Musa; amaa lala doo maa ŋɔna, halli ti bu mi ŋɔn yi ya'aseaa na.” 30Ka doo maa labsi n‑yɛli, ni, “Mma! - alahazibu nŋɔa! Ya bu mi ŋɔn yi ya'aseaa na, amaa u mun tibi ma n zoonsi ni! 31Ti mi, ni, Naawunni bu wumni n‑tiri ala'akyi dima, u wumni n‑tiri la ninvugseeba ban tiri u gyirima ka niŋni ŋɔn boori ba tum seem. 32Ti na zi n‑wum, ni, sɔsɔ neaai ban pun dɔ'ai sɔ zooma nini duniya piiligu ni sa. 33Di yi da pa ni doo maa yi la Naawunni saani na, u naa n‑ku nyaŋŋi n‑niŋi nŋɔ taataabu wa.” 34Ka ba labsi, ni, “Ba daa dɔ'ai i ka i zoaai la ala'akyi ni, ka i mun ti laa m‑boori i wulisi tirima?” Ka ba daa kari u n‑yiisi la'aŋŋu duu maa ni.

35Yisa ŋɔn daa ti wum bunseela din daa niŋi maa, u daa bɔ doo maa ziiya nti boosi u, ni, “Kala i niŋi Ninsaala Bii maa yɛdda?” 36Ka doo maa labsi n‑yɛli, “M Bapira, yɛlim ma ŋɔn nyɛ ninvugsɔa, ka n nin niŋi u yɛdda!” 37Ka Yisa yɛli u, “I daa pun nya doo maa, halli ka mani, ninvugsɔ ŋɔn tɔ'asiri n‑tiri i wa pampaŋŋɔ, nla.” 38Ka doo maa daa di gbaani tiŋŋa Yisa tooni ka yɛli, ni, “N niŋi yɛdda, n dugma!” 39Yisa daa yɛliya, ni, “N kyɛ duniya wa na ni n ti di la sariya, ka zoomma nini neaai ka ban nini nyari mun leebi zoomma.”

40Farisii dima seeba daa bɛ bɛni ka daa wum ŋɔn yɛli seem maa, ka ba boosi u, ni, “Yɛlimaŋni, i bu wulisi, ni, tirima gba nyɛ la zoomma, bee?” 41Yisa daa labsi n‑yɛli ba, ni, “Ya yi da nyɛ la zoomma dinŋɔna ya da bu tum taalli; amaa yan yɛtti, ni, ya nini nɛ wa ŋɔna, di wulisiya, ni, ya na bɛ taalli ni.”

Voafantina amin'izao fotoana izao:

GYƆNI 9: maw

Asongadina

Hizara

Dika mitovy