GYƆNI 10

1Ka Yisa daa yɛli, ni, “Yɛlimaŋni ka n yɛtti ya wa, ni, ninvugsɔ ŋɔn bu dɔli zampakka maa za'anɔri ni n‑kpɛa, amaa u ba ya'aseaa zaa n‑kpɛa, lala doo maa nyɛ la na'ayiga ni fafaara. 2Dɔsɔ mun yi dɔli zampakka za'anɔri ni n‑kpeera, ŋɔna n nyɛ peesi maa pɛgura. 3Za'anɔgura maa nin yoaai za'anɔri n‑ti u, ka bunkɔbri maa nin wum u kukɔri maa. U nin booli u maŋtoori peesi ba yuya ni, ka ba nin dɔli u ka yi na. 4Ba yi dɔli u n‑yi na n‑naai, u nin bɛ ba tooni, ka bunkɔbri maa dɔli u, ba m mi u kukɔri la zugu. 5Ba ku dɔli sɔ m‑paasi u zugu: ban na zi dɔsɔ yi ti kpɛ na, ba nin zɔ ka kyɛ u, dama ba bu mi u kukɔri.” 6Yisa daa yɛli yɛttɔ'a wa n‑ti ba, amaa ba daa bu wum di gbinni ŋɔn nyɛ seem.

7Ka Yisa daa laa n‑yɛli ba, “Yɛlimaŋni ka n yɛtti ya wa, ni, man nyɛ la za'anɔta'ariga n‑ti peesi maa. 8Sɔkam zaa ŋɔn pun daŋŋi ma na muna - na'ayigsi n daa nyɛ ba, ni fafaariba, amaa peesi maa daa bu wum n‑ti ba. 9Mani n nyɛ za'anɔri maa. Sɔkam yi dɔli man saani na n‑kpɛ nin nya tiliginsim. U nin kpeeri ka laa n‑yiiri na n‑nya moori n‑ŋɔbra. 10Na'ayiga maa muna - ŋɔn yi kpeeri ni na ni u ti zu peesi maa, ka kɔri ba ka sa'am. Man mun kyɛnni na ni ya ti nya nyɔvuri - nyɔvuri din gaari zaa. 11Mani n nyɛ pɛgurisuŋŋu maa, ka nin zaŋŋi n nyɔvuri n‑takki m peesi maa dina. 12Ba yi ti yɔ tuntumnisɔ ni u tum pɛgura tuma, amaa u pa la pɛgurisɔ ŋɔn su peesi maa la, di daama yi nya ka kunduŋŋu kyɛnni na, u nin kyɛ peesi maa ka zɔa. Ka kunduŋŋu maa nin gbaai bunkɔbsɔ, ka kyɛ ka ban kpalim maa zɔ n‑wurigi. 13Doo wa tumni la tuma maa ligri zugu, ka u ba'a ka peesi maa yɛla ni, di zugu ka u nin zɔ ka kyɛ ba. 14-15Mani n nyɛ pɛgurisuŋŋu maa. M mi man su seeba maa, ka ba gba mi ma; hoo m Ba Naawunni ŋɔn mi ma suŋŋa, ka man mun mi u gba. Ka man nin zaŋŋi n nyɔvuri n‑takki m peesi dina. 16Halli pɛseeba m bɛ ni n‑nyɛ n dina, amaa ka ba ka zampakka wa puuni. Faasee ka m mari ba na m‑paasi, ka ba nin ti wumni n kukɔri maa, ka ba zaa la'am m‑bɛ luginyinni ka ba pɛgura yinni kɔkɔ n su ba. 17Lala zugu ka m Ba wuri ma, dama n sakki ni n zaŋŋi n nyɔvuri n‑dooli, ni n ti deaai di yaasa. 18Sɔ bu faari n nyɔvuri n saani: man zaŋŋi ka n‑tisi, ka man nin laa n‑toaai n‑deaai ka yaasa. Nŋɔ ka m Ba pun zaali ma ni n niŋi.”

19Tɔ; ka nangbanwala daa laa m‑bɛ niriba maa sunsukkuni yaasa, Yisa yɛligu wa zugu. 20Baseeba n daa yɛtti, ni, u mari la arizimbeoo ka yinyaari gbaai u, ni, “Wula zugu ka ya laa n‑wumni u yɛligu?” 21Baseeba mun daa yɛtti, ni, “Arizimbeoo daana ku toaai n‑tɔ'asiri nŋɔa! Arizimbeoo ya niŋi la wula n‑kyɛ ka zoomma nini laa n‑neaara?”

22Di daa nyɛ la Gyɛrusalɛm Gyeeŋŋu Yiri Piiligu Kyuu, ka ba puusi ka waari saha maa. 23Di saha ka Yisa daa bɛ la Gyeeŋŋu Yiri la ni, n‑gyinni NaaSulɛmaana Leeŋŋa la puuni. 24Di saha maa ka niriba maa daa gyiligi u ka boosi u, ni, “Bɔn saha ka i nin yiisi ti birisigu ni? Kur yɛlim ti paalu ni, nyin nyɛ la Naawunni ŋɔn ya tum sɔ na ni u ti di Masiiya naam ka fa ti m‑basi, bee?” 25Ka Yisa daa labsi n‑yɛli ba, ni, “M pun yɛli ya, amaa ya ku sakki n‑niŋi ma yɛdda. Halli tunseesi man zaŋŋni m Ba yuuri n‑tumni maa, ana n wulisiri n yɛla. 26Amaa ya ku sakki n‑niŋi ma yɛdda, dama ya pa la n peesi maa. 27M peesi la n wumni n kukɔri maa; m mi ba, ka ba yi dɔli ma. 28N tiri ba nyɔvuri kan ka naari, ka ba ku baasi yɔri halli saha kan ka tariga, ka sɔsɔ ku toaai n‑fa ba man saani. 29M Ba maa pun zaŋŋi ba n‑ti ma, ka ŋɔna n galisi n‑gaari seelikam, ka sɔsɔ ku toaai n‑fa ba m Ba saani. 30Man ni m Ba maa - ti nyɛ la yimmu.”

31Lala saha ka niriba maa daa laa m‑piisi kuga ni ba lɔbi Yisa. 32Ka u daa yɛli ba, ni, “N daa niŋi alahazibu tunsuma pam, ka ya nini nya, tunseesi ka m Ba Naawunni daa zaŋŋi n‑ti ma ni n tumni a ni. Tunsuma wa muna - kani zugu ka ya boori ni ya lɔbi ma kuga?” 33Ka ba daa labsi n‑yɛli u, “Pa bunsunseaa zugu ka ti ya lɔbi i, amaa nyin ŋɔn tu Naawunni zugu. Ninsaala n kur nyɛ i, ka i boori la i zaŋŋi i maŋŋa n‑labgi Naawunni!” 34Ka Yisa labsi ba n‑yɛli, ni, “Di sɔbi n‑dooli ya mammaŋŋa zaaligu sɔppu ni, ni, Naawunni yɛliya, ni, ya nyɛ la Naawuna; bee, m ma'ari ni? 35Tɔ; ti mi halli, ni, kariŋŋu maa yi yɛli seelli, di siri nyɛ la yɛlimaŋni zaŋŋi n‑kyɛnna: ka Naawunni daa tɔ'asi n‑ti baseeba ban daa deaai u yɛligu la, ni, Naawuna n nyɛ ba. 36Ka man ŋɔna - m Ba maa n yiisi ma ka tum ma ni n kyɛ duniya wa ni na: ka man ŋɔn yɛtti, ni, Naawunni Bii n nyɛ ma, wula ka ya nin toaai n‑yɛli, ni, n tuuri la Naawunni? 37N yi bu tumni tunseesi m Ba ŋɔn boori ni n tumna - tɔ, dinŋɔna yan di niŋi ma yɛdda. 38Amaa n yi tumni a ni, halli ya bu niŋni ma yɛdda, ya nin toaai n‑niŋi tuma maa yɛdda, ka lala zugu ka ya nin mi ka baŋŋi di gbinni, ni, m Ba maa bɛ la n saani, ka man gba bɛ u saani.” 39Ka dizugu ba daa laa m‑boori ni ba gbaai u, amaa u daa liisi n‑yi ba nuusi ni yaasa.

40Yisa daa laa n‑labi n‑yakki Gyɔdin mɔ'ari la yaasa, nti paai ya'aseaa Gyɔni ŋɔn daa yi daŋŋi m‑bɛ ni n‑suuri niriba Naawunni koom la. Bɛni ka Yisa daa kpalim n‑gbɛa. 41Ka niriba pam daa kyɛ u saani na ka yɛli, ni, “Gyɔni daa bu tum alahazibu tunseelli, amaa ŋɔn daa pun yɛli yɛliseesi zaŋŋi n‑kyaŋŋi doo wa yɛla daa nyɛ la yɛlimaŋni!” 42Ka niriba pam daa niŋi u yɛdda bɛni.

Voafantina amin'izao fotoana izao:

GYƆNI 10: maw

Asongadina

Hizara

Dika mitovy