Kuxh 9

1Tul echat tal Jesuus s-eche: —Nuqxh nik val sete: At jolol ex, inqʼa at ex sinkʼatza s-txheel, uvaʼ tetxhal laʼ etil ibʼant quBʼaal Tiuxh iqʼesalil tuchʼ u tiqleʼm, uvaʼs yeʼnaq kamoq ex, —xeʼt Jesuus te inqʼa nikich itxhus tibʼ s-kʼatza.

Uvaʼs ijalp tilix quBʼaal Jesuus, uvaʼs tul Moisees tuchʼ Eliias kʼatz quBʼaal Jesuus viʼ u vitz

Tio 17.1-13; Luk 9.28-36

2Vajqilichetz vet qʼij talt Jesuus u yol uvaʼe, tul tiqʼo Jesuus Luʼ s-tiʼ tuchʼ Jakoovo tuchʼ Xhun. Tul taʼnxh s-oxvaʼl yekichaq vet jaʼ viʼ val u nimla vitz. Jaʼpaqetz vet viʼ u vitz, tul ajtxh motx til ijalp ikaʼy Jesuus. 3Tul oqxhich vet ilitzʼkabʼin u toksaʼm Jesuus. Atz oqxhich vet isaqale. Tul palnaʼqich vet isaqal viʼ isaqal invaʼq bʼuʼq, uvaʼ kʼuxh jatpaqul kuxh laʼ txaqʼpi. 4Tul ajtxh motx til atich vet Eliias tuchʼ Moisees kʼatz Jesuus. Tul sebʼtichaq iyolon vet tuchʼ Jesuus.{*}#9.4 ¿Kam nik elkaʼpun u tul Moisees tuchʼ Eliias kʼatz quBʼaal Jesuus? Aʼetz nik elkaʼpun uvaʼ kaʼvaʼl versiikulo nik alon tiʼ u tulebʼal u Kriisto. Aʼ u bʼaxa versiikulo nik ex tal tu Malakiias 4.5. Aʼ nik ex tal uvaʼ bʼaxa laʼ tul Eliias vatz u Kriisto. Atz vikaʼv nik ex tal tu Deuteronoomio 18.15. Tul antxh Moisees tzʼibʼan ka uvaʼs yeʼnaqich uloq quBʼaal Jesuus vatz txʼavaʼ. Echetz aʼ vet u tul Eliias tuchʼ Moisees kʼatz quBʼaal Jesuus, bʼen s-kʼutxhbʼal tetz uvaʼ, at vibʼaʼnil quBʼaal Tiuxh kʼatz quBʼaal Jesuus, atz aʼich quBʼaal Jesuuse u Kriisto. Tan mam yol tatinich Eliias tuchʼ Moisees vatz inqʼa tij imam Israeel s-naʼya, tan qʼexsanichaq tetz viyol quBʼaal Tiuxh. Tul jitetz kuxh taʼn inqʼa versiikulo inqʼae nik alon tiʼ u tul Moisees tuchʼ Eliias. Pet nikat tal paqte tu Apokaliipsis 11.1-14, tiʼ uvaʼ laʼat ul kaʼvaʼl qʼexsan tetz iyol quBʼaal Tiuxh s-bʼaxa, yaʼne laʼ ul quBʼaal Jesuus inpaqte. Tul echatxh u tiqleʼm kaʼvaʼl inqʼa qʼexsan tetz viyol quBʼaal Tiuxh eche Eliias tuchʼ Moisees laʼ ibʼana.

5Tul ech tal Luʼ te Jesuus s-eche: —¡Txhusul qetz, bʼaʼn uvaʼ laʼ atin oʼ tzitza! Tul toq qubʼit oxvaʼl tal patxh. Vaʼl eetz; vaʼt tetz Moisees; atz vaʼt tetz Eliias, —xeʼt Luʼ. 6Echetz kuxh vet u yole tal Luʼ, tan yeʼ nikich ibʼen te Luʼ kam uvaʼ nikich tal veteʼ. Tan oqxhichaq vet ixoʼv s-toxil.

7Ajtetzxh motx til ikuʼl val u suʼtzʼ s-tiibʼa. Tul tira motx okaq vet ok jaqʼ imual u suʼtzʼ.

Tul ajtxh motx tabʼi iyolon tzaan quBʼaal Tiuxh xoʼl u suʼtzʼ. Tul ech tal s-eche: —Aʼetz naqe vinKʼaol uvaʼe. Kamxh in tiʼ naq. Aʼetz naq laʼ enima, —xeʼt quBʼaal Tiuxh.

8Saqinaqetz vet oxvaʼl inqʼa nikich itxhus tibʼ kʼatz Jesuus, tul ajtxh til yeʼxhabʼil atich veteʼ. Pet taʼn kuxh Jesuus atich vet s-junal.

9Aalichetz vet ikuʼl Jesuus viʼ u vitz tuchʼ oxvaʼl inqʼa nikich itxhus tibʼ s-kʼatza, tul itiila bʼekʼu Jesuus val u yol s-te. Tul ech tal Jesuus s-eche: —Atoq kuxh sekʼuul kamxh uvaʼ qat etila. Atz yeʼxhabʼil invaʼq laʼ etal s-te. Pet laʼ nal itzʼeʼv in inpaqte, in, u Kʼaola uvaʼ bʼen s-alam aanima, yaʼne laʼ utxh etalt u yol, —xeʼt Jesuus.

10Tul atich kuxh vet u yol s-kʼuul inqʼa nikich itxhus tibʼ kʼatz Jesuus. Atz nikichaq iyol vet s-vatzaq kam talaxich u yol uvaʼ: —Tetxhal laʼ itzʼeʼv in inpaqte, —chichich Jesuus.

Uvaʼs talt quBʼaal Jesuus inuqul uvaʼ tzʼibʼamal ka t-viyolbʼal quBʼaal Tiuxh tiʼ u tulebʼal Eliias tuchʼ u tulebʼal u Kriisto

11Yaʼne ech tabʼi oxvaʼl inqʼa nikich itxhus tibʼ kʼatz Jesuus s-te s-eche: —¿Kametz s-tiʼil, aʼ nik tal inqʼa nik txhusun ibʼekʼbʼal inqʼa qumol s-tijaq imam Israeel uvaʼ, aʼ Eliias bʼaxa laʼ tul vatz u Kriisto? —xeʼtaq te Jesuus.#Malakiias 4.5{*}#9.11 ¿Kam yol tal quBʼaal Jesuus uvaʼ tzʼibʼamal ka t-viyolbʼal quBʼaal Tiuxh tiʼ Eliias? Aʼ inqʼa yol tal quBʼaal Jesuus, inqʼa tzʼibʼamal ka tu uʼ Malakiias 4.5. Tan aʼ nik tal, tiʼ uvaʼ, aʼ Eliias laʼich bʼen qʼexsan inqʼa yol tiʼ u tulebʼal u Kriisto. Pet aʼ Xhune alax s-Eliias, Xhun u aqʼol kuʼ xaol xeʼ aʼ. Tan ech nik tale tu Tio 17.10-13. Tan txhaqax Xhun tiʼ ipaxsal viyolbʼal quBʼaal Tiuxh xoʼl inqʼa tij imam Israeel, eche itxhaqt quBʼaal Tiuxh Eliias xoʼl inqʼa tij imam Israeel s-naʼya. Ile nik tal tu uʼ Luk 1.17. Tul aʼ u yol ipaxsa Xhun uvaʼ, aʼ vet Kriistoe u Jesuus, eche uvaʼ nik tal Tio 3.1-17. Pet nikich tal Xhun uvaʼ jankʼal xaol laʼ titzʼa tibʼ t-inqʼa ipaʼv vatz quBʼaal Tiuxh, kʼuxh inqʼa qʼesal uqʼeʼybʼal, inqʼa antichxh tij imam Israeel. Pet yeʼ nikich titzʼa inqʼa iqʼesal uqʼeʼybʼal, oq atich ipaʼv vatz quBʼaal Tiuxh. Echetz itxhoʼn taanima inqʼa iqʼesal uqʼeʼybʼale tiʼ viyol Xhun. Tul txhoʼnatetz taanima Erodiiaas tiʼ Xhun. Tan inatxh Erodiias uvaʼ atich ipaʼv vatz quBʼaal Tiuxh. Echetz motx ibʼant inqʼa iqʼesal uqʼeʼybʼal eela iyole tuchʼ inqʼa imol Eroodes tiʼ iyatzʼax el Xhun, ech uvaʼe nik tal tu Kuxh 3.6.

12-13Tul ech tal Jesuus s-eche: —Nuqxhte qʼaoq uvaʼ, aʼ Eliias laʼich ul s-bʼaxa tiʼ ibʼanax tutxh jankʼal inqʼa kam s-kaqaayil. Pet ulnaʼqetz vet Eliias, tul kam kuxh motx ibʼan inqʼa iqʼesal tij imam Israeel te Eliias. Tan ech uvaʼe tzʼibʼamal ka s-tiʼ.

Pet bʼenoqetz sete kam inqʼa yol tzʼibʼamal ka t-viyolbʼal quBʼaal Tiuxh s-viʼ, in, u Kʼaola uvaʼ bʼen s-alam aanima. Tan tetxhal toq paloq in tu mam kʼaxkʼo, tul toq ixvaloq in, —xeʼt Jesuus.

Uvaʼs ibʼant quBʼaal Jesuus bʼaʼn val u xaak uvaʼ atich ok demoonio t-taanima

Tio 17.14-21; Luk 9.37-43

14Kuʼetz vet ul Jesuus viʼ u vitz, tul yekich vet Jesuus xoʼl jolt inqʼa nikich itxhus tibʼ s-kʼatza. Tul til Jesuus uvaʼ mamala xaol molich vet ok tibʼ s-tiʼ. Tul ant jolol inqʼa nikich txhusun ibʼekʼbʼal inqʼa qumol s-tijaq imam Israeel, nikich yaon inqʼa nikich itxhus tibʼ kʼatz Jesuus. 15Taʼnetzxh ilix vet Jesuus taʼn inqʼa xaol, tul yekichaqxh chiibʼ vet tiʼ Jesuus. Tul qʼexaq ibʼen vet tiʼ taqʼax bʼaʼnil ikʼuul Jesuus.

16Yaʼne ech tal Jesuus te inqʼa nikich itxhus tibʼ s-kʼatza s-eche: —¿Kam vaʼq yol nik eyaj etibʼ s-tiʼ tuchʼ txhaqnaq inqʼae? —xeʼt Jesuus.

17Atichetz val u vinaq xoʼl inqʼa xaol, tul ech tal s-eche: —Txhusul qetz, il naq val vinkʼaol, qat viqʼo tzaan savatz, uvaʼ tira mem vet naq taʼn val u demoonio. Tul yeʼ vet naq nik iyolon taʼn. 18Tul yeʼ kuxh taqla nik itzetpul kuʼ naq t-txʼavaʼ taʼn u demoonio. Tul nik kuxh tel vet pulubʼ itziʼ naq. Atz nik kuxh ikʼuxi vet tibʼ tej naq. Tul tira nik itzeʼ tibʼ itxhiʼoʼl naq taʼn. Qatetz vall te txhaqnaq, inqʼa nik itxhus tibʼ sakʼatza, uvaʼ laʼ ituki el txhaqnaq u demoonio t-taanima naq vinkʼaol, poro yeʼl txhaqnaq nik toleʼv tiʼ ibʼant bʼaʼn vinkʼaol, —xeʼt u vinaq te Jesuus.

19Yaʼne ech tal Jesuus te inqʼa xaol s-eche: —¡Ex, inqʼa xaol, inqʼa itzʼlel ex s-txheel, ex, inqʼa yeʼ nik qeon viyolbʼal quBʼaal Tiuxh!, ¿echetz kol kuxh laʼ vatine sexoʼl nik enatxheʼ? Atz ¿echetz kol kuxh laʼ intxʼebʼt ibʼen inuqul u yole sete? Pet aqʼvaq tzaan naq u xaak sinvatz, —xeʼt Jesuus.

20Tul iqʼol vet ok u xaak vatz Jesuus. Taʼnetz kuxh ilix Jesuus taʼn u demoonio, tul yekich taqʼ vet u demoonio yakʼil kʼatz u xaak tiʼ itzetpul kuʼ t-txʼavaʼ. Kuʼetz vet u xaak vatz txʼavaʼ, atz xeʼt vet tiʼ isilqʼut tibʼ. Tul mamala vet pulubʼ itziʼ u xaak nikich telaʼ.

21Yaʼne ech tal Jesuus te u bʼaala s-eche: —¿Jatqʼix ixeʼt u yaabʼil kʼatz naq u xaak? —xeʼt Jesuus.

Tul ech tal u bʼaala s-eche: —Neʼich kuxh naq, tul xeʼt u yaabʼil kʼatz naq. 22Tul nima paqx kuxh tetxhxh ipalsal ok naq t-xamal taʼn. Atz at nik ibʼen naq t-aʼ. Tan aʼ isaʼ u demoonio iyatzʼax el naq. Pet oqetz laʼ oleʼv axh tiʼ ibʼant naq bʼaʼn, tul oybʼa quvatz. Atz bʼan bʼaʼnil s-qe, —xeʼt te Jesuus.

23Yaʼne ech tal Jesuus s-eche: —Laʼ utxh qʼaoq, oq laʼ akʼuqbʼa akʼuul s-viʼ. Tan jaʼl uvaʼ laʼ kʼuqbʼan ikʼuul s-viʼ, tul tira yeʼl itzaʼlal laʼ tiqʼot tibʼ s-vatz, —xeʼt Jesuus.

24Tul nal kuxh isichʼin vibʼaal u xaak. Tul ech tal s-eche: —¡Nik inqejeʼ! Pet ¡lotxh in, tul laʼ kʼuqeʼv tel inkʼuul seʼe! —xeʼt u bʼaala.

25Tiletz vet Jesuus uvaʼ oqxhich vet ikʼoʼpit tibʼ inqʼa xaol, tul ech tal Jesuus tiʼ itukil el u demoonio s-eche: —¡Axh, demoonio, uvaʼ nik memtisan u xaak, atz axh, uvaʼ nik txhaknabʼtisan, nik inbʼekʼ axh!: ¡Nal apaleʼl s-txheel kʼatz naq u xaak! Tul ¡yeʼl inpaqt laʼ qʼaʼv axh! —xeʼt Jesuus.

26Yaʼne sichʼin u xaak taʼn u demoonio. Tul taqʼ u demoonio yakʼil tiʼ itzetpul u xaak. Yaʼne el vet el u demoonio t-taanima u xaak. Tul tira numlich kuxh vet u xaak, eche kamchil ibʼan veteʼ. Tul mamala xaol ech nikich alon vet s-eche: —Kamy vet u xaak, —chichich vet inqʼa xaol.

27Yaʼne itxey Jesuus iqʼabʼ u xaak. Tul ilak jaʼ Jesuus. Tul yekich txakeʼv veteʼ. Atz ibʼan vet bʼaʼn.

28Yaʼne paloʼk Jesuus t-val u otzotz. Ijunalich kuxh vet Jesuus tuchʼ inqʼa nikich itxhus tibʼ s-kʼatza, tul ech motx tal te Jesuus s-eche: —¿Kametz s-tiʼil yeʼ qat oleʼv oʼ tiʼ itukil el u demoonio t-taanima naq u xaak? —xeʼtaqe.

29Tul ech tal Jesuus s-eche: —Eche u demoonio uvaʼe, tan taʼn kuxh laʼ oleʼvik ex tiʼ itukil el uvaʼ laʼ [emaq etxʼaʼon tiʼ] inatxhax Tiuxh, —xeʼt Jesuus.

Uvaʼs talt quBʼaal Jesuus inpaqte, uvaʼ tetxhal laʼich yatzʼax el quBʼaal Jesuus, atz laʼich itzʼeʼv inpaqte

Tio 17.22-23; Luk 9.43-45

30Eletz vet bʼen Jesuus tuchʼ inqʼa nikich itxhus tibʼ s-kʼatza t-inqʼa vitz uvaʼ jeqlich inqʼa xaol, tuulbʼal u tenam Sesareea, tul ech ipal Jesuus tuulbʼal Galileea. Tul yeʼich isaʼ Jesuus uvaʼ laʼich abʼil itziulal vipal paʼl tzitzi, 31tan nikich itxhus Jesuus inqʼa nikich itxhus tibʼ s-kʼatza. Tul ech nikich tal Jesuus s-eche: —Tetxhal kuxh toq aqʼaxoq ok in tiqʼabʼ inqʼa iqʼesal, in, u Kʼaola uvaʼ bʼen s-alam aanima. Tul toq motx iyatzʼeʼl in. Maʼtetz vet iyatzʼteʼl in, tul laʼ itzʼeʼv in inpaqte titoxv qʼij, —xeʼt Jesuus. 32Poro yeʼaq nikich ibʼen s-te kam uvaʼ nikich tal Jesuus. Tul aʼl nikich motx ixoʼv tiʼ tabʼil inuqul u yol te Jesuus.

Uvaʼs itxhust quBʼaal Jesuus inqʼa iapoostol, tiʼ uvaʼ jabʼil laʼ iqʼon iviʼ, tul aʼ uvaʼe, laʼ lotxhon imol

Tio 18.1-5; Luk 9.46-48

33Aqʼbʼetz vet Jesuus tu tenam Kapernauum tuchʼ inqʼa nikich itxhus tibʼ s-kʼatza, tul pal vet ok Jesuus t-val u otzotz. Tul ech tal Jesuus s-xoʼl s-eche: —¿Kam s-tiʼil nik motx eyaj etibʼ tiʼ bʼey? —xeʼt Jesuus.

34Tul tira yeʼ motx tzaqʼbʼ vet taʼn chʼixaʼv. Tan maʼtich iyojt tibʼ s-vatzaq tiʼ bʼey tuchʼaq yol. Tul ech motx tal s-eche: —¿Jabʼisteetzebʼ oʼ palnaʼql qiqleʼm laʼ ibʼana? —chichichaq s-vatzaq.

35Yaʼne kʼuqeʼv Jesuus. Tul isaʼ tzaan Jesuus kabʼlaval inqʼa nikich itxhus tibʼ s-kʼatza. Tul ech tal Jesuus s-eche: —Jabʼiste ex, uvaʼ laʼ saʼon tiqʼol iviʼ, tul aʼetz exe, uvaʼ laʼ etiqʼo kuʼl etibʼ xoʼl inqʼa emol. Atz aʼ exe, uvaʼ laʼ ekʼayi ekʼuul tiʼ ilotxhox emol, —xeʼt Jesuus.

36Yaʼne tiqʼo tzaan Jesuus val u nitxaʼ. Tul ikʼutxh Jesuus s-xoʼl. Atz itxey Jesuus iqʼabʼ u nitxaʼ. Tul ech tal Jesuus s-eche: 37—Jaʼl u niman vetz, uvaʼ ayaʼlxh taanima tiʼ ikʼulux invaʼq u nitxaʼ eche uvaʼa, tul inetze, nik ikʼul in. Tan jaʼl, uvaʼ laʼ kʼulun in tuchʼ bʼaʼnil, tul jitetz kuxh taʼn ine nik ikʼul in, pet antetz vinBʼaale, uvaʼ txhaqon tzaan in, nik ikʼuleʼ, —xeʼt Jesuus.

Uvaʼs talt quBʼaal Jesuus tiʼ jaʼl u xaol uvaʼ eela iyol quBʼaal Jesuus s-tuchʼ

Luk 9.49-50

38Yaʼne ech tal Xhun s-eche: —Txhusul qetz, qat qil naq, val u vinaq uvaʼ tuchʼ vabʼij nik itukivat el demoonio t-taanima inqʼa xaol. Tul jit ant koq naq qumol tiʼ qutxhʼuyeʼv seʼe. Pet qatetz qumaq naq s-tiʼ, —xeʼt Xhun te Jesuus.

39Tul ech tal Jesuus s-eche: —Yeʼ laʼ emaq vet naq s-tiʼ. Tan jabʼilxh naq uvaʼ laʼ kʼutxhun invaʼq kaebʼal aanima tuchʼ u viqleʼm, tul xamtel koq saʼ teesa txha vet naq inqʼij inpaqte. 40Tan jaʼl uvaʼ yeʼxhkam nik tal qumaqaxeʼ, tul vaʼletz kuxhte uvaʼ kʼaqel qaʼn s-tuchʼ. 41Tan jabʼilxh invaʼq xaol laʼ lotxhon ex, kʼuxh vaʼq kuxh vaaso aʼ laʼ taqʼ sete tuchʼ vinbʼij, tiʼ uvaʼ, ex vet niman vetz, in, u Kriisto, tul nuqxh nik val sete uvaʼ, aʼetz u xaole uvaʼ tetxhalxh laʼ ikʼul vitxʼaqaʼm taʼn quBʼaal Tiuxh.

Uvaʼs itxhusun quBʼaal Jesuus tiʼ yeʼ ibʼanax u paʼv

Tio 18.6-9; Luk 17.1-2

42Jaʼletz uvaʼ nik txhokon ikuʼ invaʼq inqʼa niman vetz t-paʼv, inqʼa txulul tatin tiʼ vinnimaleʼ, tul aʼl bʼaʼn uvaʼ laʼ qitzix ok invaʼq nimla kaʼ tiqul. Tul laʼ kʼonil bʼen tuul u maar tiʼ ijiqʼbʼeʼ, viʼ u mam kʼaxkʼo uvaʼ laʼ taqʼ quBʼaal Tiuxh s-tiʼ.

43-44Echetz jaʼl ex, uvaʼ, aʼ kuxh tetz veqʼabʼ ibʼanax u paʼv, tul aʼl bʼaʼn uvaʼ laʼ etanbʼa ibʼanaxeʼ. Echetz laʼ ebʼan veteʼe eche itzokʼox el veqʼabʼ. Tan aʼl bʼaʼn uvaʼ laʼ opoon ex tu qʼij saq uvaʼ yeʼl iyaʼebʼal, kʼuxh kut vet ex s-laʼ etaqʼbʼeʼ, tiʼ uvaʼ kʼuxh tzʼeqel inqʼa eqʼabʼ s-kaʼbʼil, tul oq een laʼ aqʼbʼik ex t-xamal s-tuchʼ. [Atz laʼ aqʼbʼ ex tu xamal uvaʼ yeʼl inpaqul laʼ tzaji, atz tal uvaʼ yeʼl ikamebʼal inqʼa tzoqnoʼy tiʼ inqʼa xaol toq ibʼaneʼ.]

45-46Oqetz aʼ kuxh tetz vetoq etiqʼol tu paʼv, tul aʼl bʼaʼn uvaʼ laʼ etanbʼa ibʼanaxeʼ. Echetz laʼ ebʼan veteʼe eche itzokʼox el vetoq. Tan aʼl bʼaʼn, uvaʼ laʼ opoon ex tu qʼij saq uvaʼ yeʼl iyaʼebʼal, kuxh kutel vet ex s-laʼ etaqʼbʼeʼ, tiʼ uvaʼ kʼuxh tzʼeqel inqʼa etoq s-kaʼbʼil, tul oq een laʼ bʼaqaxik bʼen ex t-xamal s-tuchʼ. [Atz laʼ aqʼbʼ ex tu xamal uvaʼ yeʼl inpaqul laʼ tzaji, atz tal uvaʼ yeʼl ikamebʼal inqʼa tzoqnoʼy tiʼ inqʼa xaol toq ibʼaneʼ.]

47Oqetz nik iyan vetitzʼabʼal tu paʼv taʼn uvaʼ nik esaqi, tul aʼl bʼaʼn uvaʼ tiraetz yeʼ esaqi veteʼ. Echetz laʼ ebʼan vete, eche teesal el bʼaqʼ evatz. Tan aʼl bʼaʼn uvaʼ laʼ opoon ex tu qʼij saq tal uvaʼ nik ibʼanvat quBʼaal Tiuxh viqʼesalil, kʼuxh tzot vet ex s-laʼ etaqʼbʼeʼ, tiʼ uvaʼ kʼuxh tzʼeqel inqʼa bʼaqʼ evatz s-kaʼbʼil, tul oq een laʼ bʼaqaxik bʼen ex t-xamal s-tuchʼ, 48atz tal uvaʼ:

«yeʼl ikamebʼal inqʼa tzoqnoʼy

tiʼ inqʼa xaol,

atz tale uvaʼ yeʼl inpaqul

laʼ tzaj u xamal.»#Isaiias 66.24

49Tan jankʼalxh inqʼa niman tetz Jesuus, laʼ ikuy ipalsal t-vitzaʼlal uvaʼ eche xamal, tiʼ tilixeʼ oq at itxumbʼal inqʼa niman tetz, atz maq yeʼle; eche vaʼq xaol uvaʼ, aʼ nik saʼon itxajteʼl jaʼl uvaʼ laʼ isikʼle tzaan tiʼ invaʼq txʼaʼoʼm laʼ ibʼana, tul at tatzʼmil uvaʼ laʼ motx tetxhbʼu s-vatzaq. 50Bʼaʼn inqʼa niman tetz Jesuus, uvaʼ at koqxh vet itxumbʼal tiʼ itxhabʼat tiqʼot tibʼ tibʼaʼnil s-vatzaq, eche u atzʼam uvaʼ atxh vichiʼl s-bʼaʼn. Pet oq yeʼl itxumbʼal inqʼa niman tetz Jesuus tiʼ tiqʼot tibʼ s-vatzaq, echetz vet eche u atzʼam uvaʼ yeʼl vet vichiʼl. Echetz atoqxh bʼaʼnla txumbʼal sekʼatza tiʼ tatin bʼaʼnil sexoʼl sevatzaq, —xeʼt Jesuus.

Voafantina amin'izao fotoana izao:

Kuxh 9: ixlC

Asongadina

Hizara

Dika mitovy