Kuxh 10
10
Uvaʼs itxhusun quBʼaal Jesuus, tiʼ uvaʼ yeʼ laʼ isaʼa laʼ ituki el u vinaq u tixqel
Tio 19.1-12; Luk 16.18
1Eletz vet bʼen Jesuus t-vitenam Kapernauum, tul yekich vet tuulbʼal Judeea. Tul bʼen vet el tinpaqʼit el u aʼ Jordaan. Tul motx imol vet tibʼ mam tenam kʼatz Jesuus inpaqte. Tul xeʼt vet Jesuus tiʼ itxhusux inqʼa xaol, eche uvaʼ nikichxh ibʼaneʼ.
2Yaʼne aqʼbʼ jolol inqʼa fariseeo tiʼ tabʼil val u yol te Jesuus. Tan aʼaq kuxh nikich itxʼebʼ tel Jesuus t-bʼey tiʼ inimal u bʼekʼbʼal. Tul ech motx tabʼi te Jesuus s-eche: —¿Nik kol ikuy u qubʼekʼbʼal uvaʼ laʼ ituki el vaʼq u vinaq tixqel? —xeʼtaq te Jesuus.
3Tul ech tal Jesuus s-eche: —¿Kam ibʼekʼ ka Moisees te inqʼa kʼuy emam? —xeʼt Jesuus.
4Yaʼne ech tal inqʼa fariseeo te Jesuus s-eche: —Bʼantan ikuy Moisees te u vinaq uvaʼ laʼ utxhi laʼ ituki el u tixqel, oq laʼ taqʼ u vinaq vaʼq uʼ te u tixqel tal uvaʼ laʼ talvat kam s-tiʼil qat ijatxvat tibʼ s-tuchʼ, —xeʼt inqʼa fariseeo.#Deuteronoomio 24.1-4
5Yaʼne ech tal Jesuus s-eche: —Poro tiʼ kuxh toksat inqʼa kʼuy emam u tatxhaʼv s-junalil ikuyvat Moisees itzʼibʼal vaʼt u bʼekʼbʼal uvaʼ nik etaleʼ. 6Pet jit ech uvaʼe bʼanel ka taʼn quBʼaal Tiuxh sixeʼt tzaan u qʼij saq. Tan vaʼl vinaq, atz vaʼt ixoq iviinqixsa ka quBʼaal Tiuxh vatz u txʼavaʼ, tiʼ uvaʼ ikʼulel tibʼ s-vatzaq laʼ ibʼana.#Jeenesis 1.27; 5.2 7Tan tal ka quBʼaal Tiuxh uvaʼ: «Echetz s-tiʼile laʼ taqʼ ka u vinaq itxutx ibʼaal, [tul laʼ ikʼul vet tibʼ tuchʼ u tixqel].#Jeenesis 2.24 8Tul vaʼl kuxh vet tatin u vinaq tuchʼ u tixqel laʼ ibʼana,» xeʼt quBʼaal Tiuxh. Jitetz vet kaʼvaʼl vatz quBʼaal Tiuxh laʼ ibʼana, pet vaʼl kuxh veteʼ. 9Echetz nik valte sete, jabʼiste uvaʼ quBʼaal Tiuxh nik aqʼon ikʼul tibʼ, tul yeʼxhabʼil vet vaʼq laʼ jatxon ixoʼl, —xeʼt Jesuus.
10Aqʼbʼetz vet Jesuus t-val u otzotz, tul motx tabʼi vet inqʼa nikich itxhus tibʼ kʼatz Jesuus inuqul u yol s-te. 11Tul ech tal Jesuus s-eche: —Jaʼl invaʼq vinaq uvaʼ laʼ ituki el u tixqel, tul oq laʼ tiqʼo invaʼtoʼq ixoq, tul yansa ibʼetz vete laʼ ibʼana. 12Atz oq aʼ u ixoq laʼ tukin el vitzumel, tul laʼ tiqʼo invaʼt vinaq, tul yansa ibʼetz vete laʼ ibʼan u ixoq, —xeʼt Jesuus.
Uvaʼs taqʼt quBʼaal Jesuus bʼaʼnil tiibʼa inqʼa nitxaʼ
Tio 19.13-15; Luk 18.15-17
13Yaʼne motx iqʼol tzaan jolol nitxaʼ vatz Jesuus, tiʼ uvaʼ laʼich taqʼ jaʼ Jesuus iqʼabʼ tiviʼ tiʼ taqʼt bʼaʼnil s-tiibʼa. Poro aʼetz inqʼa nikich itxhus tibʼ kʼatz Jesuus nikich maqon ipaloʼk inqʼa xaol tuchʼ inqʼa nitxaʼ vatz Jesuus.
14Tiletz vet Jesuus uvaʼ nikich imaqax ipaloʼk inqʼa nitxaʼ s-vatz, tul yeʼ ibʼan te Jesuus. Atz ech tal Jesuus s-eche: —Yeʼ kuxh emaq tukuʼl inqʼa nitxaʼ sinvatz. Pet ukoqn ul. Tan jaʼl uvaʼ ech vitxumbʼal, eche inqʼa nitxaʼ, tul aʼetz uvaʼe, laʼ ibʼan quBʼaal Tiuxh iqʼesalil s-kʼatza. 15Toqetz val sete: Jaʼl uvaʼ yeʼ laʼ kuyun ibʼant quBʼaal Tiuxh iqʼesalil s-kʼatza, eche ikʼuqbʼat u nitxaʼ ikʼuul tiʼ itxutx ibʼaal, tul aʼetz uvaʼe, yeʼ laʼ bʼen ilon u qʼij saq tal uvaʼ nik ibʼanvat quBʼaal Tiuxh iqʼesalil, —xeʼt Jesuus.
16Yaʼne junun ijelet Jesuus inqʼa nitxaʼ. Tul taqʼ jaʼ Jesuus iqʼabʼ tiviʼ tiʼ taqʼt bʼaʼnil s-tiibʼa.
Uvaʼs iyolon quBʼaal Jesuus tuchʼ val u vinaq uvaʼ txʼiolich iqʼij
Tio 19.16-30; Luk 18.18-30
17Kʼaqichetz vet tibʼ Jesuus tiʼ bʼey inpaqte, tul qʼex taqʼbʼ val u vinaq. Tul ex iqajbʼa tibʼ vatz Jesuus. Tul ech tal te Jesuus s-eche: —Bʼaʼnla Txhusul qetz, ¿kam laʼ inbʼana, tul laʼ bʼen vil u qʼij saq uvaʼ yeʼl iyaʼebʼal? —xeʼt te Jesuus.
18Yaʼne ech tal Jesuus te u vinaq s-eche: —¿Kam s-tiʼil nik aal in s-bʼaʼn? Tan taʼn kuxh quBʼaal Tiuxhe bʼaʼn. 19Aloq ootzaql inqʼa bʼekʼbʼal abʼa, uvaʼ alel ka taʼn quBʼaal Tiuxh, uvaʼ ech nik tal s-eche: «Yeʼ laʼ yatzʼon axh. Yeʼ laʼ ayansa eebʼ tiʼ ajalput akʼulel. Yeʼ laʼ elqʼ axh. Yeʼ laʼ atzʼeq tzij tiʼ amol. Yeʼ laʼ subʼun axh. Tul laʼ ooksa iqʼij atxutx abʼaal,» chich inqʼa bʼekʼbʼal, —xeʼt Jesuus.#Eeksodo 20.12-16
20Tul ech tal u vinaq s-eche: —Txhusul qetz, jankʼalxh inqʼa yol uvaʼ nik aaleʼ, tan ayaʼx tzaan inxeʼt tiʼ inimaleʼ uvaʼs txulich in, —xeʼte.
21Tul yekichxh chiibʼ taanima Jesuus taʼn u vinaq. Atz isaqi Jesuus u vinaq. Tul ech tal Jesuus s-te s-eche: —Vaʼt kuxh u yol yeʼx animataʼ. Pet quxh kʼayi ka jankʼal inqʼa kamaq eetz. Tul aqʼ vijaʼmil te inqʼa meebʼaʼ. Echetz bʼen eelte u txʼijbʼal qʼij tu amlikaʼ. Tul txhʼuyeʼvenetz vet s-viʼ, [kʼuxh laʼ pal axh tu mam kʼaxkʼo, eche tiqat invaʼq u pereexho vikurus,] —xeʼt Jesuus.
22Tabʼietz vet u vinaq viyol Jesuus, tul yekichxh txhoʼn taanima taʼn. Atz yekich txumun vet s-tiʼ sibʼenaʼ, tan mamalaichxh kamaq tetz atiche.
23Yaʼne isaqi Jesuus inqʼa xaol, inqʼa atich s-kʼatza. Tul ech tal Jesuus te inqʼa nikich itxhus tibʼ s-kʼatza s-eche: —Poro oqxh itzaʼlal laʼ ikuyt inqʼa xaol ibʼant quBʼaal Tiuxh iqʼesalil t-taanima, inqʼa at txʼijbʼal iqʼij, —xeʼt Jesuus.
24Tabʼietz vet inqʼa nikich itxhus tibʼ kʼatz Jesuus u yol, tul yekich kuxh kaj vet taanima s-tiʼ. Tul tal vet Jesuus u yol inpaqte s-xoʼl.
Tul ech tal Jesuus s-eche: —Ex inqʼa kʼaola, poro oqxh itzaʼlal laʼ ikuyt inqʼa xaol ibʼant quBʼaal Tiuxh iqʼesalil t-taanima, [inqʼa nik ikʼuqeʼv ikʼuul tiʼ inqʼa txʼijbʼal qʼij.] 25Tan jankʼal eche invaʼq kameeyo, tan yeʼ laʼ utxh ipal paʼl tuul ixotel invaʼq tzʼisbʼal bʼaq. Echatetz kuxh invaʼq u txʼiol iqʼije, tan tzaʼlxh laʼ ikuyt ibʼant quBʼaal Tiuxh iqʼesalil t-taanima, —xeʼt Jesuus.
26Tul tira aʼl ikaj taanima inqʼa nikich itxhus tibʼ kʼatz Jesuus uvaʼs tabʼit u yol inpaqte. Tul ech nikich motx tal vet s-vatzaq s-eche: —¡Jabʼiletzxh vet invaʼq bʼa laʼ txʼolon ichitp t-inqʼa paʼv! —chichichaq veteʼ.
27Yaʼne itiila saqi Jesuus inqʼa nikich itxhus tibʼ s-kʼatza. Tul ech tal Jesuus s-eche: —Yeʼ laʼ oleʼv inqʼa xaol tiʼ ichitt tibʼ t-inqʼa ipaʼv. Pet vatz quBʼaal Tiuxh, tan tira yeʼxhkam invaʼq tzaʼl, —xeʼt Jesuus.
28Tul ech tal Luʼ te Jesuus s-eche: —¿Keʼchetz oʼ bʼa? Tan qat motx qaqʼl ka inqʼa kamaq qetz s-kaqaayil. Tul il oʼ, txhʼuyel oʼ seʼe, —xeʼt Luʼ.
29-30Tul ech tal Jesuus s-eche: —Toq val sete: At itxʼaqaʼm jaʼl uvaʼ qat taqʼ ka kamaq tetz s-viʼ. Kʼuxh qat taqʼ ka totzotz; qat taqʼ ka titzʼin tatzik; qat taqʼ ka itxutx, ibʼaal; qat taqʼ ka tixqel, initxaʼa; atz qat taqʼ ka itxʼavaʼ s-viʼ, atz tiʼ inqʼa bʼaʼnla txhaq yol uvaʼ nik val sete, tul tetxhal laʼ ikʼul ichʼexel tzitza vatz txʼavaʼ tiʼ inqʼa laʼ motx taqʼ ka. Echetz kʼuxh laʼ taqʼ ka inqʼa kam tetz tiʼ vikʼaxbʼisal tiʼ innimaleʼ, tul laʼ ikʼul qʼij isaq sinkʼatza, uvaʼ yeʼl iyaʼebʼal imotxebʼal tinjattanulxh yaʼbʼ uvaʼ laʼ uli. 31Pet mamala xaol uvaʼ sibʼxh vet tiqleʼm vatz quBʼaal Tiuxh nik inatxheʼ, tul aʼetz uvaʼe, yeʼl tiqleʼm vatz quBʼaal Tiuxh laʼ ibʼana. Pet jabʼisteetz inqʼa xaol uvaʼ yeʼl tiqleʼm vatz quBʼaal Tiuxh nik inatxheʼ, tul aʼetz inqʼae, niimxh tiqleʼm vatz quBʼaal Tiuxh laʼ ibʼana, —xeʼt Jesuus.{*}#10.31 ¿Jabʼiletze inqʼa xaol uvaʼ sibʼ tiqleʼm nik inatxheʼ uvaʼ nik tal tzitza? Aʼ inqʼa xaole, inqʼa fariseeo, atz inqʼa saduseeo. Tan aʼaq inqʼae, uvaʼ sibʼaq vet tiqleʼm vatz quBʼaal Tiuxh nikich motx inatxheʼ. Tan mamala iyolbʼal quBʼaal Tiuxh tootzaqlaqiche, atz txhabʼamalaqich kuxh taʼn. Pet yeʼ nikich motx inima. Tul aʼetz inqʼae, yeʼlich tiqleʼm vatz quBʼaal Tiuxh, atz aj paʼvomich vatz quBʼaal Tiuxh, kʼuxh sibʼichaq tiqleʼm s-vatz. Atz ¿jabʼiletze inqʼa xaol uvaʼ yeʼl tiqleʼm nik inatxheʼ? Aʼe inqʼa apoostol, atz inqʼa niman tetz Jesuus. Tan aʼ inqʼae, yeʼlich tiqleʼm vatz quBʼaal Tiuxh nikich inatxheʼ. Tan bʼane ataqich koq itxhusbʼal, eche tetz inqʼa fariseeo. Tan tira yeʼlich tiqleʼm inqʼa apoostol vatz inqʼa fariseeo. Pet vatz quBʼaal Tiuxh, tan sibʼichaq tiqleʼm, kʼuxh yeʼlichaq tiqleʼm s-vatz. Tio 20.1-16
Uvaʼs talt quBʼaal Jesuus inpaqte uvaʼ tetxhal laʼich yatzʼax el quBʼaal Jesuus, atz laʼich itzʼeʼv inpaqte
Tio 20.17-19; Luk 18.31-34
32Atichetz ok Jesuus tiʼ bʼey, atz aalich ibʼen vet jaʼ Jesuus tu tenam Jerusaleen. Tul bʼaxich Jesuus vatz inqʼa nikich itxhus tibʼ s-kʼatza. Poro xoʼvalomich kuxh vet itxhʼuyeʼvaq bʼen tiʼ Jesuus, tan ech kolebʼ kam laʼich ulbʼel Jesuus s-vatz. Atz kaayaqichxh vet taanima. Tul taʼn kuxh tiqʼo el Jesuus kabʼlaval inqʼa nikich itxhus tibʼ s-kʼatza tziʼeʼl bʼey, tul xeʼt vet Jesuus tiʼ talax inqʼa yol s-te, kame uvaʼ saʼich ulbʼel Jesuus.
33Tul ech tal Jesuus s-eche: —Etootzaqle, uvaʼ il oʼ, qujaʼp vet tu tenam Jerusaleen. Pet toq vaqʼ etootzaqi kam uvaʼ toq uleloq in, in, u Kʼaola uvaʼ bʼen s-alam aanima. Tan toq aqʼaxoq ok in tiqʼabʼ inqʼa iqʼesal oksan yol vatz Tiuxh. Atz toq aqʼaxoq ok in tiqʼabʼ inqʼa nik txhusun ibʼekʼbʼal inqʼa tij mam Israeel. Tan aʼ inqʼae, toq motx alon inyatzʼax el. Tul toq motx toksa in tiqʼabʼ inqʼa jit tij imam Israeel. 34Tul toq kuxh motx itzeʼle in inqʼa jit tij imam Israeel. Atz toq motx tzubʼaloq in. Atz toq motx itzʼuʼma in. Atz toq yatzʼaxoq el in. Pet titoxv vet qʼij, tul laʼ itzʼeʼv in inpaqte, —xeʼt Jesuus.
Uvaʼs tabʼit Jakoovo tuchʼ Xhun val u bʼaʼnil te quBʼaal Jesuus
Tio 20.20-28
35Yaʼne ijetxhoʼk tibʼ Jakoovo tuchʼ Xhun kʼatz Jesuus, inqʼa ikʼaol Sevedeeo. Tul echaq motx tal te Jesuus s-eche: —Txhusul qetz, nik qusaʼeʼ laʼ aabʼi vatz quyol. Tul nik qusaʼeʼ laʼ aaqʼ s-qe kam vatziʼ toq qabʼi see, —xeʼtaqe.
36Tul ech tal Jesuus s-eche: —¿Kametz vaʼq nik esaʼeʼ laʼ vaqʼ sete? —xeʼt Jesuus.
37Tul echaq tal te Jesuus s-eche: —Bʼan bʼaʼnil s-qe, tul vaʼl koq oʼ, laʼ kʼuqeʼv oʼ tasebʼal nik qaleʼ. Atz vaʼt koq oʼ tamax, uvaʼs laʼ akʼult vaviqleʼm tiʼ avok siqʼesalil, —xeʼtaqe.
38Tul ech tal Jesuus s-eche: —Tira yeʼ etootzaq kam talax uvaʼ nik etabʼi. ¿Laʼetz kol etxʼol epal tu mam kʼaxkʼo uvaʼ toq palk in? Atz ¿laʼ kol etxʼol etok tu mam txumlebʼal uvaʼ toq okk in? —xeʼt Jesuus.{*}#10.38 ¿Kam nik elkaʼpun u yol ‹podéis beber del vaso?› chich tu kastiiya. Aʼetz nik elkaʼpun vitxʼolt inqʼa niman tetz Jesuus ipal tu mam kʼaxkʼo, eche uvaʼ palk quBʼaal Jesuus. Tan ‹kʼaxkʼo,› chich teluʼl u yol ‹beber del vaso trago amargo.› Tul kamxh uvaʼ nik tal tu versiikulo uvaʼa, tul echatxh nik tale tu versiikulo vinaq bʼelelaval. Aʼetz tzajnaʼql u yol uvaʼe xoʼl inqʼa aqʼol kuʼ yol tinuqul s-naʼya. Tan ech nikich ibʼanaxe te inqʼa xaol uvaʼ atichaq kuʼ t-tzeʼ, inqʼa niimichaqxh ipaʼv. Tan nikich taqʼax kʼayla aʼ tetz yatzʼbʼal aanima s-te tuul invaʼq koopa tiʼ ikamsalaq el. Aʼetz nik elkaʼpun uvaʼ bʼeeno kuxh laʼ ipal vaʼq xaol tuul mam itzaʼlal. ¿Kametz nik elkaʼpun u yol ‹bautisado con el bautismo?› chich tu kastiiya. Aʼetz nik elkaʼpun vipal invaʼq xaol titzaʼlal. Pet jit aʼ nik tal tiʼ taqʼax kuʼ xaol xeʼ aʼ.
39Tul ech tal Jakoovo tuchʼ Xhun s-eche: —Laʼ qutxʼola, —xeʼtaqe.
Tul ech tal Jesuus s-eche: —Bʼantan, toq etxʼol epale qʼaoq tu kʼaxkʼo uvaʼ toq palk in, atz vetok tu mam txumlebʼal, eche uvaʼ toq okk in. 40Pet eche vekʼuqeʼv tinsebʼal, atz tinmax nik etaleʼ, tan yeʼl vokebʼal s-tiʼ. Pet taʼn kuxh vinBʼaal at tokebʼal tiʼ taqʼax te u xaol uvaʼ chʼexel vet taʼn. Tan il u bʼaʼnil, bʼanel vet tutxh taʼn vinBʼaal, —xeʼt Jesuus.
41Taʼnetzxh tabʼi vet lavat inqʼa nikich itxhus tibʼ kʼatz Jesuus kam u yol uvaʼ tal Jakoovo tuchʼ Xhun, tul motx lakpaq vet iviʼ s-tiʼ.
42Yaʼne isaʼ tzaan Jesuus inqʼa nikich itxhus tibʼ s-kʼatza. Tul ech tal Jesuus s-eche: —Etootzaqle kam uvaʼ nik ibʼan inqʼa iqʼesal, inqʼa jit tij imam Israeel. Tan chiibʼiyaq kuxh s-tiʼ, uvaʼ aʼ nik motx toksa u tetz tiʼ ibʼekʼon tiibʼa inqʼa tenam. Tul josqʼilaq kuxh s-vatz uvaʼ sibʼaq tiqleʼm tiʼ ibʼant iqʼesalil tiibʼa inqʼa xaol. 43Poro yeʼ laʼ utxhi uvaʼ ech laʼ motx ebʼane. Pet jaʼl invaʼq ex uvaʼ nik saʼon ebʼen s-nim vatz quBʼaal Tiuxh, tul aʼ, ex, laʼ bʼen ex s-kʼuulan tetz emol. 44Atz jabʼiste ex uvaʼ laʼ saʼon tiqʼol iviʼ xoʼl inqʼa emol s-niman vetz, tul aʼetz exe, uvaʼ laʼ bʼen ex s-kʼuulan tetz s-kaqaayil. 45Tan aʼ ulk in tiʼ ikʼuulal inqʼa xaol, in, u Kʼaola uvaʼ bʼen s-alam aanima. Pet jit aʼ ulk in, tiʼ uvaʼ laʼ kʼuulal in. Atz aʼat ulk in tiʼ vaqʼt vibʼ kamoq setiʼ, atz tiʼ itxhoox vipaʼv mamala xaol, —xeʼt Jesuus.
Uvaʼs ibʼant quBʼaal Jesuus bʼaʼn val u tzot, varTimeeoich ibʼij
Tio 20.29-34; Luk 18.35-43
46Aqʼbʼetz vet Jesuus tu tenam Jerikoo tuchʼ inqʼa nikich itxhus tibʼ s-kʼatza. Yaʼne el vet bʼen Jesuus inpaqte tu tenam Jerikoo tuchʼ inqʼa nikich itxhus tibʼ s-kʼatza, atz tuchʼ mamala xaol. Tul kʼuqlich val u tzot tziʼ bʼey, uvaʼ varTimeeoich ibʼij, ikʼaolich Timeeo.{*}#10.46 U bʼij ‹varTimeeo,› tan kaʼvalen nik elkaʼpun. Tan ‹ikʼaol,› chich telaʼp u yol ‹var.› Pet ‹Timeeo,› tan ibʼij u bʼaala. Tiraetz kuxh vet aqʼel ikʼul tibʼ u yol ikʼaol tuchʼ vibʼij u bʼaala. Xaʼtetze nimla tzʼibʼ u ‹T› itzʼibʼaleʼ. Pet txhʼojla tzʼibʼ u ‹v› qat ok tixeʼtebʼal, tan een bʼij u Timeeo tiyaʼtebʼal. Tan ech uvaʼe chianaʼqich vet tzaan te inqʼa tij imam Israeel tiʼ talt ibʼij inqʼa xaol. Tan txhʼuy kuxh vet ibʼij u bʼaala tiʼ inqʼa kʼaola. Tul nikich ijaq ipuaq te xaol. 47Tabʼietz vet varTimeeo uvaʼ Jesuusich uvaʼ nikich ipal paʼl, u aj Nasareet, tul xeʼt vet sichʼin. Tul ech tal varTimeeo s-eche: —¡Jesuus, axh u Tij Imam Daviid, txum invatz!{*}#10.47 ¿Kam nik elkaʼp u yol ‹Tij Imam Daviid› nik tal tzitza? Eela nik elkaʼp tuchʼ u yol ‹Kriisto› vatz inqʼa tij imam Israeel, atz echat kuxh nik elkaʼpe vatz varTimeeo inpaqte. Tan aʼ u Kriisto laʼich ul tzoqpisan u yol uvaʼ tal quBʼaal Tiuxh te Daviid, nik tal tu 2 Samueel 7.13-14. Echetz vatz varTimeeo, tan echat kuxh viqʼesalil ul ibʼan u Kriisto, eche viqʼesalil uvaʼ ibʼan Daviid s-naʼya. 2 Samueel 5.1-5. Tul ¡bʼan bʼaʼnil s-ve! —chichich varTimeeo.
48Tul mamala xaol maqon isichʼin varTimeeo. Poro aalxh taqʼt varTimeeo yakʼil tiʼ isichʼineʼ. Tul ech tal s-eche: —Jesuus, ¡axh u Tij Imam Daviid, txum invatz! Tul ¡bʼan bʼaʼnil s-ve! —chichich varTimeeo.
49Txakeʼvetz vet Jesuus, tul ibʼekʼ Jesuus isikʼlel tzaan varTimeeo.
Tul ech alax vet s-te s-eche: —Kʼuqbʼa akʼuul, tul txakpen. Tan il axh, nik isaʼ axh Jesuus, —xeʼt eʼl varTimeeo.
50Tul nal kuxh ikʼoni ka viqinkin oksaʼm, uvaʼ txhasich ok s-tiʼ, tul yuqel ijaʼ varTimeeo. Tul aqʼbʼ vatz Jesuus.
51Yaʼne ech tal Jesuus te varTimeeo s-eche: —¿Kam bʼaʼnil nik asaʼeʼ laʼ inbʼan see? —xeʼt Jesuus.
Tul ech tal varTimeeo s-eche: —Txhusul qetz, aʼ nik insaʼeʼ uvaʼ laʼ ilon in inpaqte, —xeʼt varTimeeo.
52Yaʼne ech tal Jesuus s-eche: —Tiʼ uvaʼ qat akʼuqbʼa akʼuul s-viʼ, tul bʼaʼn vet axh. Pet quxh veteʼ, —xeʼt Jesuus.
Tul yekich saqin vet varTimeeo. Atz txhʼuyeʼv vet bʼen tiʼ Jesuus tiʼ bʼey.
Voafantina amin'izao fotoana izao:
Kuxh 10: ixlC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2016, Wycliffe Bible Translators, Inc. All rights reserved.
