Aˇ dahˬ 46
46
Yaˬkoˆ hawˇ-eu aˬ yawꞈ-euˬ miˬ sawˇ zaˬ deuˬ Iˇjiˇtuˆ miˇ kʼahˬ-ahˇ iˇ-euˬ
1Yaˬkoˆ-aˬ, aˬ yawꞈ-euˬ myawˬ dawˬ tawˆ luꞈ laˆ dawˆ-awˇ, Beˬlaˇsheˬba-ahˇ iˇ-awˇ, aˬ yawꞈ-euˬ aˬ da Iˇtsaˆ-euˬ Miˬyehˇ-ahˇ lawˇ nehˬ shehˇ nehˬ-euˬ meh. 2Uˬ ciꞈ keuˆ le ngeh, yaw sahˇ laꞈ kʼoeˇ Miˬyehˇ aˬ yawꞈ-ahˇ pah mehˬ le-awˇ, “Yaˬkoˆ-oˇ, Yaˬkoˆ-oˇ” lehˇ kuˇ le-euˬ meh. Yaˬkoˆ gʼeh, “Ngaˇ heu gaˇ jawˇ ma” lehˇ ehˇ kʼoꞈ nehˬ-euˬ meh.
3Miˬyehˇ ehˇ-eu, “Ngaˇ-aˬ, nawˬ da-euˬ Miˬyehˇ pyeuꞈ-eu Miˬyehˇ ma. Iˇjiˇtuˆ miˇ kʼahˬ-ahˇ maˬ guˆ ni iˇ-awˬ. Miˇ kʼahˬ kʼoeˇ kʼahˬ laꞈ kʼoeˇ, nawˬ-euˬ zaˬ nawˬ-euˬ uˆ deuˬ-ahˇ huiˬ-eu tsawˇ jeuˬ bi pyeuꞈ laˇ ma. 4Iˇjiˇtuˆ miˇ kʼahˬ laꞈ kʼoeˇ nawˬ nehˬ-ehˇ ngaˇ iˇ-awˇ, nawˬ-euˬ zaˬ nawˬ-euˬ uˆ deuˬ-ahˇ miˇ kʼahˬ heu kʼahˬ laꞈ kʼoeˇ paˇ sheuˬ kʼoꞈ laꞈ ma. Nawˇ ziˇ jiˇ leˇ ngeh, Yoˇsehˆ nawˬ-ahˇ myaˆ nuiˆ sawˆ miˆ nehˬ laꞈ tehꞈ-a.”
5Kʼoeˇ naˇ, Beˬlaˇsheˬba-ahˇ neh Yaˬkoˆ doˆ-iˇ-awˇ, Iˇjiˇtuˆ miˇ kʼahˬ paw iˇ ka gʼeh-euˬ meh. Aˬ yawꞈ-euˬ aˬ li kʼoeˇ deuˬ neh, aˬ yawꞈ-euˬ nymˇ kʼahˬ zaˬ deuˬ-ahˇ, Iˇjiˇtuˆ sahˬ paˬ neh bi teh laꞈ-euˬ mahˬ laˆ lawˬ kʼoeˇ taˆ bi dziˬ-euˬ meh. 6Kaˬnaˬ miˇ kʼahˬ-ahˇ jawˇ ngeh jaˆ le-euˬ aˬ yawꞈ maꞈ-euˬ pyuˇ shuiˇ myawˬ gahˬ hawˇ-eu jeˬ zaˬ dawˬ tawˆ luꞈ, aˬ yawꞈ maꞈ nehˬ-ehˇ yuˇ gʼeh-euˬ meh. Yaˬkoˆ-aˬ, aˬ yawꞈ-euˬ o neh jeuˬ le o le-euˬ tsawˇ haˬ dawˬ tawˆ luꞈ-ahˇ sheuˬ ka gʼeh-euˬ meh. 7Aˬ yawꞈ-euˬ aˬ buˇ aˬ li deuˬ hawˇ-eu, oeˬ paˬ oeˬ ma dawˬ tawˆ luꞈ sheuˬ ka gʼeh-euˬ meh.
8Yaˬkoˆ Iˇjiˇtuˆ miˇ kʼahˬ-ahˇ jawˇ-iˇ ngeh, aˬ yawꞈ neh sheuˬ ka gʼeh-euˬ aˬ yawꞈ-euˬ aˬ li deuˬ hawˇ-eu oeˬ paˬ deuˬ-aˬ, heu deuˬ meh. Aˬ yawꞈ-euˬ aˬ li aˬ yuiꞈ yuiꞈ saˬ gʼaˬ Luˇbeˬ hawˇ-eu, 9Luˇbeˬ-euˬ aˬ li deuˬ pyeuꞈ-eu Haˬnoˆ, Paˬloˇ, Heˬzaˬloˬ, Kaˬmiˬ. 10Suˇmoˬ hawˇ-eu aˬ yawꞈ-euˬ aˬ li deuˬ pyeuꞈ-eu Yeˬmoeˬlaˇ, Yaˬmeˬ, Awˇhaˆ, Yaˬciˬ, Zoˇhaˬlaˆ, Shawˇlaˆ. (Shawˇlaˆ-aˬ, Suˇmoˬ-euˬ miˬ zaˬ Kaˬnaˬ ma gʼaˬ-euˬ zaˬ meh.) 11Leˬbiˇ hawˇ-eu aˬ yawꞈ-euˬ aˬ li deuˬ pyeuꞈ-eu Geˬlaˬshoˬ, Kawˇhaˆ, Meˬlaˬliˇ. 12Yuˇdaˆ hawˇ-eu aˬ yawꞈ-euˬ aˬ li deuˬ pyeuꞈ-eu Sheˬlahˬ, Paˬyehˆ, Zeˬlahˬ. (Yuˇdaˆ-euˬ aˬ li deuˬ pyeuꞈ-eu Iˇlehˆ hawˇ-eu Awˇnaˬ aˬ nyaꞈ nmˇ-aˬ, Kaˬnaˬ miˇ kʼahˬ-ahˇ shiˇ yaꞈ-euˬ meh. Paˬyehˆ-euˬ aˬ li deuˬ pyeuꞈ-eu Heˬzaˬloˬ hawˇ-eu Haˬmuˇlaˬ. 13Iˇsaˬkaˬ hawˇ-eu aˬ yawꞈ-euˬ aˬ li deuˬ pyeuꞈ-eu Toˇlaˬ, Puˇhaˬ, Yaˬshuˇbaˬ, Shiˇmyoˬ. 14Zeˬbuˬloˬ hawˇ-eu aˬ yawꞈ-euˬ aˬ li deuˬ pyeuꞈ-eu Seˬyehˆ, Eˇloˬ, Yaˬleˬlaˇ. 15Heu deuˬ-aˬ, Maˬsoˬpoˬtaˬmiˇ miˇ kʼahˬ-ahˇ jawˇ ngeh dehꞈ le-euˬ Diˇnaˆ nehˬ-ehˇ tiˬ uˇ pyehˆ zaˬ deuˬ tehꞈ meh. Aˬ yawꞈ maꞈ-aˬ, Yaˬkoˆ-euˬ miˬ zaˬ Leˇaˬ gʼaˬ o neh dehꞈ le-euˬ deuˬ tehꞈ meh. Leˇaˬ o neh dehꞈ le-euˬ zaˬ deuˬ hawˇ-eu oeˬ paˬ deuˬ dawˬ tawˆ luꞈ, zaˬ yo aˬ li tehꞈ-ehˇ smˬ tseˇ smˇ gʼaˬ byah-eu meh.
16Gaˆ hawˇ-eu aˬ yawꞈ-euˬ aˬ li deuˬ pyeuꞈ-eu Zeˬpoˬ, Haˬgiˇ, Shuˇniˬ, Eˇzaˬboˬ, Eˬliˇ, Aˬyawˇdiˆ, Aˬyeˬliˇ. 17Aˬsaˬ hawˇ-eu aˬ yawꞈ-euˬ aˬ li deuˬ pyeuꞈ-eu Iˇmaˬnahˬ, Iˇshaˬbaˬ, Iˇshaˬbiˇ, Beˬliˇyaˆ hawˇ-eu aˬ yawꞈ ha mehˇ nmˇ-euˬ dmˇ ma Seˬlahˬ. Beˬliˇyaˆ-euˬ aˬ li Heˬbeuˬ hawˇ-eu Maˬlaˬkeˬyaˇ. 18Tsawˇ haˬ heu tseˇ koꞈ gʼaˬ-aˬ, Laˬbaˬ neh aˬ yawꞈ-euˬ aˬ buˇ Leˇaˬ-ahˇ biꞈ caw nehˬ-euˬ zaˬ miˬ zaˬ zaˬ kʼaˆ Ziˇlaˬpaˬ o neh jeuˬ le o le-euˬ Yaˬkoˆ-euˬ zaˬ deuˬ hawˇ-eu oeˬ paˬ oeˬ ma deuˬ pyeuꞈ-eu meh.
19Yaˬkoˆ-euˬ miˬ zaˬ Laˬkeˬlaˇ gʼaˬ neh ciˬ-euˬ aˬ li nyiˬ li-aˬ, Yoˇsehˆ hawˇ-eu Beˬyaˬmiˬ meh. 20Iˇjiˇtuˆ miˇ kʼahˬ laꞈ kʼoeˇ jawˇ luꞈ-eu Yoˇsehˆ hawˇ-eu Aˬseˇnaˆ aˬ nyaꞈ dzeˇ zaˬ-aˬ, Maˬnaˇseˬ hawˇ-eu Eˇpaˬleˬ lehˇ myahˇ-euˬ aˬ li nyiˬ li jawˇ-eu meh. Yoˇsehˆ-euˬ nymˇ dahˬ Aˬseˇnaˆ-aˬ, Heˬliˬpawˇliˆ meuˬ-ahˇ piˇ ma geuꞈ luꞈ-eu Pawˇtiˇpeˬlaˇ-euˬ aˬ buˇ meh. 21Beˬyaˬmiˬ-euˬ aˬ li deuˬ-aˬ, Beˬlaˬ, Beˬkeuˬ, Aˬshaˇbeˬlaˆ, Geˬlaˬ, Neˬmaˬ, Eˇhiˆ, Yoˇshaˆ, Muˇbeˬ, Huˇbeˬ, Aˬlaˬdaˆ, heu deuˬ meh. 22Tsawˇ haˬ heu tseˇ oeˬ gʼaˬ-aˬ, Laˬkeˬlaˇ o neh jeuˬ le o le-euˬ Yaˬkoˆ-euˬ aˬ li deuˬ hawˇ-eu oeˬ paˬ deuˬ meh.
23Daˬ hawˇ-eu aˬ yawꞈ-euˬ aˬ li Huˇshmˬ. 24Naˬtaˬliˇ hawˇ-eu aˬ yawꞈ-euˬ aˬ li deuˬ pyeuꞈ-eu Yaˬzeˬlaˇ, Guˇniˬ, Yeˬzaˬ, Shiˇlmˬ. 25Tsawˇ haˬ heu shiꞈ gʼaˬ-aˬ, Laˬbaˬ neh aˬ yawꞈ-euˬ aˬ buˇ Laˬkeˬlaˇ-ahˇ biꞈ caw nehˬ-euˬ, zaˬ miˬ zaˬ zaˬ kʼaˆ Biˇlaˬhaˬ o neh jeuˬ le o le-euˬ, Yaˬkoˆ-euˬ aˬ li deuˬ hawˇ-eu oeˬ paˬ deuˬ pyeuꞈ-eu meh.
26Yaˬkoˆ-euˬ kuiˬ ma deuˬ maˬ ahˇ leˇ-ehˇ, Iˇjiˇtuˆ miˇ kʼahˬ-ahˇ jawˇ-iˇ-euˬ Yaˬkoˆ-euˬ zaˬ deuˬ hawˇ-eu oeˬ paˬ oeˬ ma deuˬ dawˬ tawˆ luꞈ, koꞈ tseˇ koꞈ gʼaˬ byah-eu meh. 27Iˇjiˇtuˆ miˇ kʼahˬ laꞈ kʼoeˇ jawˇ luꞈ-eu Yaˬkoˆ-euˬ aˬ li Yoˇsehˆ gʼaˬ kʼawꞈ, aˬ li nyiˬ li jawˇ le-euˬ meh. Kʼoeˇ miˇ neh, Iˇjiˇtuˆ miˇ kʼahˬ laꞈ kʼoeˇ jawˇ uˇ-iˇ-euˬ Yaˬkoˆ-euˬ zaˬ deuˬ uˆ deuˬ dawˬ tawˆ luꞈ, shiꞈ tseˇ gʼaˬ byah-eu meh.
Yaˬkoˆ hawˇ-eu aˬ yawꞈ-euˬ miˬ sawˇ zaˬ deuˬ Iˇjiˇtuˆ miˇ kʼahˬ laꞈ kʼoeˇ jawˇ-iˇ-euˬ
28Yaˬkoˆ-aˬ, Yuˇdaˆ-ahˇ mehˬ hu paw pyehˬ gʼeh-awˇ, Goˬsheˬ lehˇ kuˇ-eu jawˇ duˬ-ahˇ aˬ yawꞈ maꞈ-ahˇ tahˬ puˬ laˇ-eu gʼaˇ duˬ, Yoˇsehˆ-ahˇ bi tsaꞈ gaˬ-iˇ-euˬ meh. 29Kʼoeˇ naˇ, Yoˇsehˆ mahˬ laˆ lawˬ dziˬ-awˇ, aˬ yawꞈ-euˬ aˬ da-ahˇ tahˬ puˬ leˇ-euˬ meh. Aˬ nyaꞈ da zaˬ tiˬ gʼaˬ tiˇ gʼaˬ tahˬ puˬ ngeh, aˬ yawꞈ aˬ da-euˬ kawˬ lahˇ-ahˇ Yoˇsehˆ byaˇ cuꞈ-awˇ, gʼawˬ myahˇ ni ngoeˇ-euˬ meh. 30Kʼoeˇ ngeh, Yaˬkoˆ ehˇ-eu, “Nymˬ-mˇ ngaˇ nawˬ-ahˇ ya haw mawˇ gʼaˬ-awˇ, nawˇ yaw dehꞈ dehꞈ luꞈ nga siˬ lehˇ ya siˬ duˬ-euˬ miˇ neh, ngaˇ ya shiˇ law hawˇ kʼawꞈ shiˇ mahˇ tsahˇ miˇ-a.”
31Kʼoeˇ naˇ, aˬ yawꞈ-euˬ mehˇ nmˇ deuˬ hawˇ-eu, aˬ yawꞈ aˬ da-euˬ miˬ sawˇ zaˬ deuˬ dawˬ tawˆ luꞈ-ahˇ, Yoˇsehˆ heu loꞈ-ehˇ ehˇ nehˬ-euˬ meh. “Sahˬ paˬ jawˇ gaˇ le-awˇ, Kaˬnaˬ miˇ kʼahˬ-ahˇ jawˇ-eu ngaˬ-euˬ mehˇ nmˇ deuˬ hawˇ-eu ngaˬ da-euˬ miˬ sawˇ zaˬ dawˬ tawˆ luꞈ, ngaˇ jawˇ gaˇ oe keuˆ gʼaˬ-euˬ gaˇ kawˆ ya ehˇ nehˬ leˇ nga siˬ. 32Naw maꞈ jeˬ zaˬ cu dzaˬ-eu tsawˇ haˬ pyeuꞈ-awˇ, naw maꞈ nehˬ-ehˇ kʼaˇ jawˇ-eu jeˬ zaˬ dawˬ tawˆ luꞈ teh ka leꞈ jiˇ-awˇ, kʼaˇ jaˆ-eu pyuˇ shuiˇ myawˬ gahˬ dawˬ tawˆ luꞈ yuˇ leꞈ jiˇ-euˬ gaˇ kawˆ, sahˬ paˬ-ahˇ ngaˇ dzawˇ nehˬ leˇ ma. 33Sahˬ paˬ naw maꞈ-ahˇ kuˇ-awˇ, ‘Aˬ jeˬ mˇ dzaˬ-eu tsawˇ haˬ te’ lehˇ naˇ haˬ laˇ naˇ, 34‘Nga maꞈ-euˬ aˬ poeˬ aˬ bawˇ deuˬ-euˬ ziˇ-ahˇ neh mˇ ka leꞈ-euˬ loꞈ-ehˇ, jeˬ zaˬ cu dzaˬ-eu tsawˇ haˬ deuˬ pyeuꞈ-eu ma’ lehˇ maˬ ngehˇ ni ehˇ kʼoꞈ nehˬ-awˬ. Kʼoeˇ loꞈ-ehˇ ehˇ naˇ, naw maꞈ-ahˇ Goˬsheˬ miˇ tsaˬ-ahˇ bi jawˇ laꞈ tehꞈ-a.” Jeˬ zaˬ cu dzaˬ-eu tsawˇ haˬ deuˬ-ahˇ, Iˇjiˇtuˆ tsawˇ haˬ deuˬ tsawˇ haˬ maˬ sawˇ-eu miˇ neh, aˬ yawꞈ maꞈ-ahˇ Yoˇsehˆ kʼoeˇ loꞈ-ehˇ ehˇ nehˬ-euˬ meh.
Voafantina amin'izao fotoana izao:
Aˇ dahˬ 46: AHK
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Akha Bible Revision (Latin Script) © Thailand Bible Society, 2011.