Aˇ dahˬ 45
45
Ngaˇ Yoˇsehˆ ma lehˇ Yoˇsehˆ ehˇ doˆ-euˬ
1Yoˇsehˆ-aˬ, aˬ yawꞈ-euˬ zaˬ kʼaˆ deuˬ mehˬ shi aˬ yawꞈ-euˬ nui ma laꞈ kʼoeˇ maˬ dzahˬ tehˬ coeˇ ni pyeuꞈ laˇ-euˬ miˇ neh, zaˬ kʼaˆ kʼoeˇ deuˬ-ahˇ laꞈ nyiˇ bi doˆ-iˇ-euˬ meh. Aˬ yawꞈ aˬ suˇ gʼaˬ pyeuꞈ-eu gaˇ kawˆ aˬ yawꞈ-euˬ mehˇ nmˇ deuˬ-ahˇ aˬ yawꞈ ehˇ doˆ nehˬ ngeh, aˬ cawˬ tiˬ gʼaˬ-iˬ maˬ jawˇ-a. 2Aˬ yawꞈ yaw kʼaˆ-ehˇ guˇ-awˇ ngoeˇ-eu miˇ neh, Iˇjiˇtuˆ tsawˇ haˬ deuˬ-ahˇ gaˬ leˇ-awˇ, gaˇ kawˆ kʼoeˇ sahˬpaˬ jawˇ gaˇ keuˆ ni gaˬ keuˆ leˇ-euˬ meh. 3“Ngaˇ Yoˇsehˆ ma. Ngaˬ da yaw dehꞈ dehꞈ luꞈ-a siˬ loˇ” lehˇ, aˬ ha mehˇ nmˇ-ahˇ Yoˇsehˆ ehˇ nehˬ-euˬ meh. Ehˇ kʼawꞈ, dawˬ kʼoeˇ dawˬ-ahˇ aˬ ha mehˇ nmˇ ya gaˬ ngeh, guˆ dui dui-eu laꞈ kʼoeˇ tsoˆ leˇ jiˇ-awˇ, tiˬ gʼaˬ-iˬ dawˬ maˬ ngehˬ doˆ nya-a. 4Kʼoeˇ ngeh, “Ngaˬ-euˬ dawˬ peh jiˆ laˇ-awˬ” lehˇ, aˬ ha mehˇ nmˇ-ahˇ Yoˇsehˆ ehˇ nehˬ-euˬ meh. Aˬ yawꞈ maꞈ jiˆ peh leˇ ngeh, Yoˇsehˆ heu loꞈ-ehˇ ehˇ-eu meh. “Ngaˇ-aˬ, naw maꞈ neh Iˇjiˇtuˆ miˇ kʼahˬ laꞈ kʼoeˇ ahˬ dzaˬ byoˆ-euˬ naw maꞈ-euˬ aˬ nyiˇ Yoˇsehˆ ma. 5Naw maꞈ ngaˬ-ahˇ ahˬ dzaˬ-euˬ miˇ neh, noeˬ shaˬ-awˇ yawˬ haˇ yawˬ ha iˬ baˇ taˬ-eu maˬ loˬ-aˇ. Aˬ jeˬ miˇ neh ehˇ naˇ, tsawˇ haˬ zaˬ-ahˇ ka kʼoꞈ-eu gʼaˇ duˬ naw maꞈ-euˬ mehˬ hu ngaˬ-ahˇ heu gaˇ bi oe-euˬ gʼaˬ-aˬ, Miˬyehˇ meh. 6Miˇ kʼahˬ heu kʼahˬ-ahˇ mehꞈ-eu shuꞈ-eu jeˬ keuˆ le-euˬ tsuiꞈ nui kʼoꞈ nyiˬ kʼoꞈ tehꞈ-a siˬ. Heu taꞈ naˇ, deh yaˇ maˬ tsehˬ dzaˬ nya-eu miˇ neh, cehˇ maˬ ya yehˬ dzaˬ-ehˇ ya mehꞈ ya shuꞈ-eu aˇ kʼoꞈ ngaˬ kʼoꞈ jaˆ-a siˬ. 7Naw maꞈ hawˇ-eu naw maꞈ-euˬ zaˬ deuˬ mehꞈ-eu shuꞈ-eu baˬ da neh maˬ ya shiˇ jiˇ ni, Miˬyehˇ ngaˬ-ahˇ heu gaˇ kʼehˇ gʼeh leꞈ-euˬ heu, zahˬ leˇ paˬ-ehˇ gʼeh dui dui meh. 8Teu baˬ da neh, ngaˬ-ahˇ heu gaˇ bi oe-euˬ gʼaˬ-aˬ, naw maꞈ maˬ ngeuˇ-a. Miˬyehˇ meh. Sahˬ paˬ-euˬ gaˇ mˇ-eu yaw huiˬ yaw mahˇ deuˬ kʼoeˇ taˆ, Miˬyehˇ neh ngaˬ-ahˇ aˬ cawˬ naˆ maˬ tseˇ huiˬ dzehˬ-eu gʼaˬ bi geuꞈ laꞈ-euˬ meh. Ngaˇ-aˬ, miˇ kʼahˬ heu kʼahˬ kʼahˬ lah ni-ahˇ ya haw ya pyaˆ-awˇ, Iˇjiˇtuˆ miˇ kʼahˬ-ahˇ ya uˆ lahˇ-eu gʼaˬ pyeuꞈ-eu ma.
9“Nymˬ-mˇ, ngaˬ da jawˇ gaˇ naw maꞈ yaw kawˇ-ehˇ gʼoꞈ leˇ-awˬ. Nawˬ li Yoˇsehˆ heu loꞈ-ehˇ tsaꞈ ahˇ laꞈ-euˬ meh lehˇ ehˇ nehˬ leˇ-awˬ. Aˬ da-oˇ, Miˬyehˇ ngaˬ-ahˇ Iˇjiˇtuˆ miˇ kʼahˬ kʼahˬ lah ni kʼoeˇ taˆ uˆ lahˇ-eu gʼaˬ bi pyeuꞈ laˇ-euˬ meh. Nyi naˬ nyi naˬ-ehˇ maˬ jawˇ ni, ngaˇ jawˇ gaˇ yaw kawˇ ma-ehˇ oe-awˬ. 10Ngaˇ jawˇ-eu dawˬ peh jaˆ-eu Goˬsheˬ lehˇ kuˇ-eu jawˇ duˬ-ahˇ nawˇ jawˇ le nya tehꞈ-a. Nawˇ hawˇ-eu nawˬ-euˬ zaˬ deuˬ, nawˬ-euˬ oeˬ paˬ oeˬ ma deuˬ, nawˬ-euˬ jeˬ zaˬ deuˬ hawˇ-eu, nawˇ kʼaˇ jaˆ-eu jeˬ dawˬ tawˆ luꞈ gʼaˇ duˬ, taˬ kʼaˇ jawˇ kʼaˇ za ma. 11Goˬsheˬ miˇ tsaˬ-ahˇ nawˇ jawˇ le naˇ, nawˬ-ahˇ ngaˇ haw piˇ nehˬ nya ma. Mehꞈ-eu shuꞈ-eu aˇ kʼoꞈ ngaˬ kʼoꞈ dzeˇ-a siˬ. Nawˇ hawˇ-eu nawˬ-euˬ miˬ sawˇ zaˬ deuˬ maˬ ehˇ, nawˬ-euˬ jeˬ zaˬ deuˬ maˬ ehˇ, mehꞈ-eu shuꞈ-eu jeˬ-ahˇ maˬ bi daˬ mawꞈ nya lehˇ tsaꞈ ahˇ laꞈ-euˬ meh lehˇ ehˇ nehˬ-awˬ.”
12Kʼoeˇ naˇ, Yoˇsehˆ paˇ ehˇ-eu, “Nymˬ-mˇ naw maꞈ dawˬ tawˆ luꞈ maˬ ehˇ, Beˬyaˬmiˬ maˬ ehˇ, ngaˇ aˬ diˇ aˬ maˇ Yoˇsehˆ pyeuꞈ-eu ya siˬ ya mawˇ duˬ yaꞈ-euˬ meh. 13Iˇjiˇtuˆ miˇ kʼahˬ laꞈ kʼoeˇ ngaˇ aˇ naˆ ni baoˬ jaˆ-eu gaˇ kawˆ hawˇ-eu, naw maꞈ kʼaˇ ya siˬ kʼaˇ ya mawˇ-euˬ gaˇ kawˆ deuˬ ngaˬ da-ahˇ dzawˇ nehˬ leˇ-awˬ. Kʼoeˇ naˇ, aˬ yawꞈ-ahˇ yaw kawˇ-ehˇ sheuˬ ka leꞈ-awˬ.”
14Kʼoeˇ loꞈ-ehˇ ehˇ gʼaˬ ngeh, Beˬyaˬmiˬ-ahˇ Yoˇsehˆ byaˇ cuꞈ-awˇ ngoeˇ-euˬ meh. Beˬyaˬmiˬ kʼawꞈ, Yoˇsehˆ-euˬ kʼahˬ-ahˇ kʼawˬ daˇ-awˇ ngoeˇ-euˬ meh. 15Yoˇsehˆ ngoeˇ ngoeˇ-ehˇ, aˬ ha mehˇ nmˇ tiˬ gʼaˬ saˇ-iˬ tiˬ gʼaˬ-ahˇ byaˇ cuꞈ-awˇ, mehˬ cuˇ cuˇ nehˬ-euˬ meh. Kʼoeˇ naˇ, aˬ ha mehˇ nmˇ aˬ yawꞈ nehˬ-ehˇ dawˬ ja ja cawˬ-euˬ meh.
16Yoˇsehˆ-euˬ mehˇ nmˇ deuˬ oe-euˬ gaˇ kawˆ sahˬpaˬ-ahˇ gaˬ keuˆ leˇ ngeh, sahˬ paˬ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ laˬ kʼaˬ cehˇ-eu meh. 17Sahˬ paˬ kʼoeˇ gʼaˬ Yoˇsehˆ-ahˇ ehˇ-eu, “Cehˇ tawˬ-awˇ Kaˬnaˬ miˇ kʼahˬ-ahˇ gʼoꞈ leˇ-awˬ lehˇ nawˬ-euˬ mehˇ nmˇ deuˬ-ahˇ ehˇ nehˬ-awˬ. 18Aˬ yawꞈ maꞈ-euˬ aˬ da hawˇ-eu aˬ yawꞈ maꞈ-euˬ miˬ sawˇ zaˬ deuˬ-ahˇ sheuˬ-awˇ, heu gaˇ paˇ bi oe-awˬ. Iˇjiˇtuˆ miˇ kʼahˬ laꞈ kʼoeˇ miˇ tsaˬ kʼaˇ muiˬ-eu tsahˇ, aˬ yawꞈ maꞈ-ahˇ ngaˇ biꞈ ma. Aˬ yawꞈ maꞈ maˬ dzaˬ maˬ dawˇ jiˇ coeˇ gaˇ keuˆ ni baw le za le tehꞈ-a. 19Aˬ yawꞈ maꞈ-euˬ aˬ da hawˇ-eu aˬ yawꞈ maꞈ-euˬ miˬ sawˇ zaˬ deuˬ sheuˬ laˬ leˇ-eu gʼaˇ duˬ, Iˇjiˇtuˆ miˇ kʼahˬ laꞈ kʼoeˇ jaˆ-eu mahˬ laˆ lawˬ deuˬ teh-awˇ gʼoꞈ leˇ-awˬ lehˇ, aˬ yawꞈ maꞈ-ahˇ ehˇ nehˬ-awˬ. 20Aˬ yawꞈ maꞈ-euˬ myawˬ gahˬ deuˬ-ahˇ ya byehˇ dzeh yaꞈ-eu miˇ neh, nui kʼahˇ maˬ shiˇ maˇ shiˇ-ehˇ gʼeh-eu maˬ loˬ-aˇ. Aˬ jeˬ miˇ neh ehˇ naˇ, Iˇjiˇtuˆ miˇ kʼahˬ laꞈ kʼoeˇ jaˆ-eu kʼaˇ muiˬ-eu myawˬ gahˬ deuˬ-ahˇ aˬ yawꞈ maꞈ za tehꞈ-a.”
21Yaˬkoˆ-euˬ aˬ li kʼoeˇ deuˬ-aˬ, aˬ yawꞈ maꞈ-ahˇ kʼaˇ ehˇ nehˬ-euˬ loꞈ-ehˇ jahˇ-euˬ meh. Sahˬ paˬ neh dawˬ biꞈ taˬ-euˬ loꞈ-ehˇ, mahˬ laˆ lawˬ deuˬ hawˇ-eu gaˇ pehˇ dzaˬ-eu dzaˬ dzaˬ dawˇ dawˇ deuˬ, Yoˇsehˆ neh aˬ yawꞈ maꞈ-ahˇ biꞈ nehˬ-euˬ meh. 22Yoˇsehˆ neh aˬ yawꞈ maꞈ-ahˇ tiˬ gʼaˬ-ahˇ mehˬ tsoeˬ tiˬ shehˆ biꞈ nehˬ-euˬ meh. Ehˇ kʼawꞈ, Beˬyaˬmiˬ gʼaˬ-ahˇ-aˬ, pyuˇ maˇ byaˆ smˬ yaˇ byaˆ hawˇ-eu, mehˬ tsoeˬ ngaˬ shehˆ biꞈ nehˬ-euˬ meh. 23Aˬ yawꞈ aˬ da gʼaˇ duˬ kʼawꞈ, Iˇjiˇtuˆ miˇ kʼahˬ laꞈ kʼoeˇ jaˆ-eu muiˬ dui dui-eu myawˬ deuˬ tawˬ luꞈ-eu mahˬ tahˬ laˆ tseˇ mawˇ hawˇ-eu, cehˇ hawˇ-eu dzaˬ dzaˬ dawˇ dawˇ tawˬ luꞈ-eu mahˬ tahˬ laˆ tseˇ mawˇ bi teh gʼeh-euˬ meh. 24Aˬ yawꞈ-euˬ mehˇ nmˇ kʼoeˇ deuˬ-ahˇ Yoˇsehˆ bi gʼoꞈ leˇ-awˇ, aˬ yawꞈ maꞈ luˆ-iˇ ngeh, gaˇ pehˇ-ahˇ maˬ ya ja dzaˬ ni mehˬ nehˬ tsoˆ nehˬ-euˬ meh.
25Aˬ ha mehˇ nmˇ-aˬ, Iˇjiˇtuˆ miˇ kʼahˬ-ahˇ neh, aˬ da Yaˬkoˆ jawˇ-eu Kaˬnaˬ miˇ kʼahˬ-ahˇ gʼoꞈ daˆ leˇ-euˬ meh. 26Yoˇsehˆ maˬ shiˇ-ehˇ, Iˇjiˇtuˆ miˇ kʼahˬ-ahˇ uˆ lahˇ-eu gʼaˬ geuꞈ luꞈ-eu gaˇ kawˆ, aˬ yawꞈ maꞈ-euˬ aˬ da-ahˇ tsaꞈ nehˬ-euˬ meh. Kʼoeˇ ngeh, Yaˬkoˆ zahˬ leˇ-awˇ, aˬ yawꞈ maꞈ ehˇ gaˇ maˬ jah-a. 27Ehˇ kʼawꞈ, Yoˇsehˆ neh kʼaˇ ehˇ-euˬ gaˇ kawˆ deuˬ aˬ ha mehˇ nmˇ aˬ yawꞈ-ahˇ dzawˇ nehˬ jiˇ-awˇ, aˬ yawꞈ-ahˇ Iˇjiˇtuˆ miˇ kʼahˬ-ahˇ bi sheuˬ gʼeh-eu gʼaˇ duˬ, Yoˇsehˆ neh bi teh laꞈ-euˬ mahˬ laˆ lawˬ deuˬ-ahˇ aˬ yawꞈ ya mawˇ ngeh, zahˬ leˇ taˬ-euˬ paˇ noeˬ gahˇ laˇ-euˬ meh. 28Kʼoeˇ ngeh hawˇ-eu, “Ehˬ nga ehˬ. Ngaˬ li Yoˇsehˆ yaw dehꞈ dehꞈ luꞈ law hawˇ ngaˬ siˬ laˬ. Ngaˇ ziˇ maˬ jiˇ mi naˆ-ehˇ aˬ yawꞈ jawˇ gaˇ iˇ-awˇ, aˬ yawꞈ-ahˇ ya haw mawˇ-iˇ law hawˇ ngaˬ siˬ laˬ.”
Voafantina amin'izao fotoana izao:
Aˇ dahˬ 45: AHK
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Akha Bible Revision (Latin Script) © Thailand Bible Society, 2011.