LUKAS 8
8
Irah redo éh kivu Yésus
1Lebéé' si'ik la'o inah Yésus lakau tai kuraa' leboo' ja'au ngan leboo' éh jah kepéh, ke' néh bara' Rengah Jian tong jalan Allah pu'un Pengeja'au. Irah éh bakéh Néh éh jah poloo' duah usah nah, irah péh pu'un kivu Éh, 2pemung ngan irah redo éh lepah nega' Néh balei' jin lem réh rai, ngan irah redo éh jah éh lepah peka'o Néh jin kesakit réh. Jin belah irah redo inah pu'un Meriam, keruwah ngaran néh Magdalena, éh nega' Néh tujuu' balei' jin lem néh lepah nah. 3#Mat. 27:55-56, Mrk. 15:40-41, Luk. 23:49 Pu'un kepéh Yohana, do Kusa, Kusa nah jah kelunan ja'au éh kereja' tong lamin Herodis, inah kepéh, Susana ngan pinaa' redo éh jah kepéh éh nolong Yésus ngan bakéh Néh, éh mena' livah ngan irah Yésus nah.
Ha' tapan tong kelunan mulah parai
(Mat. 13:1-9, Mrk. 4:1-9)
4Pinaa' kelunan tuai jin siget leboo', hun réh petipun pinaa' kepéh, inah Yésus bara' jah ha' tapan ngan réh, ka' ha' Néh, 5Pu'un kelunan murat mulah parai, hun kelunan inah tai murat nah, pu'un tulin éh nurat néh pelohoo' tong dirin jalan, éh tong dirin jalan nah, kelakau kelunan, kenat péh pu'un juhit tai kon éh pah béé, bé' éh omok nyekaa'. 6Pu'un kepéh tulin éh nurat néh pelohoo' tong bateu' ja'au éh pu'un tana' si'ik awah tong néh. Éh tong bateu' nah pu'un éh nyekaa' bang lakat néh bé' omok masek lem bateu', ngan sekaa' inah melayeu' awah éh uban néh bé' pu'un tana' dilem ngan melai éh tai mapeu'. 7Pu'un jelua' tulin éh nurat néh pelohoo' tong suha', éh tong suha' nah, pu'un éh nyekaa' pesilang ngan suha' nah, sekaa' inah bé' omok jian, murip ngerising awah éh. 8La'ah pu'un jelua' tulin pelohoo' tong tana' jian, éh tong tana' jian nah, nyekaa' éh pah avéé' néh ngebuaa', hun néh ngebuaa' kebit pungun parai nah ngan pinaa' buaa' néh kepéh. Kelunan éh pu'un kelingen, jian éh menéng éh mu'un, ha' Yésus ngan réh.
Yésus bara' tong jalan Néh nebaraa' kelunan palaa' ha' tapan
(Mat. 13:10-17, Mrk. 4:10-12)
9Irah éh bakéh Yésus nah neteng Éh, ka' ha' réh, Ineu' sin lem ha' tapan ko' iteu', ha' réh. 10#Yes. 6:9-10 Ka' ha' Néh mipa réh, Ka'ah iteu' pu'un keh jam tong kekat éh lepah pelim rai, inah éh tong jalan Allah éh Pengeja'au, uban Tuhan mena' pengejam Néh ngan keh. Bang tong kelunan pinaa' éh bé' ngelan mu'un, inah Akeu' nebaraa' réh palaa' ha' tapan, dokoo' irah éh pu'un na'at bé' pu'un ineu' éh ta'an réh, ngan irah éh ngenéné', bé' réh nesen ineu' éh nenéng réh, ha' Néh.
Yésus bara' sin lem ha' tapan tong kelunan éh tai murat parai
(Mat. 13:18-23, Mrk. 4:13-20)
11Ha' Yésus kepéh, Inah éh sin lem ha' tapan iteu'. Sin tong tulin éh nurat inah, inah éh ha' tebaraa' Tuhan. 12Tulin éh pelohoo' tong dirin jalan nah, inah éh kelunan éh lepah menéng ha' tebaraa' Allah bang tuai Sitan alaa' ha' tebaraa' inah jin dalem kenin réh, dai réh omok ngelan ngan alaa' urip. 13Tulin éh pelohoo' tong bateu' ja'au éh pu'un tana' si'ik awah tong néh nah, inah éh kelunan éh lepah menéng ha' tebaraa' Tuhan, laho réh alaa' éh ngan jian kenin, bang bé' iteu' masek lem lepok kenin réh. Pu'un réh ngelan bang metok awah éh, hun tenupat ngan sioo' penusah, pu'un réh moléé' murin kepéh jin pengelan réh. 14Tulin éh pelohoo' tong suha' nah, inah kepéh kelunan éh lepah menéng ha' tebaraa' Tuhan, neu' kekat penusah réh, neu' réh pitah pengekaya' ngan urip éh jian tong tana' awah, inah éh maneu' ha' tebaraa' inah ngerising lem kenin réh, bé' buaa' réh omok pinaa'. 15Tulin éh pelohoo' tong tana' jian nah, inah éh kelunan éh lepah menéng ha' tebaraa' Tuhan ngan mihau éh mu'un lem kenin réh ngan kivu éh kepéh, pah avéé' réh ngebuaa' kepéh, ha' Yésus ngan réh.
Tong titui éh tenekup réh palaa' kawa
(Mat. 4:21-25)
16 #
Mat. 5:15, Luk. 11:33 Ha' Yésus kepéh, Kelunan éh seket titui néh bé' éh pei' éh pekep ra' gelan ngan tekup éh palaa' kawa péh. Kelunan éh pu'un titui adang néh pei' éh tong pejing, dokoo' ada titui inah omok ta'an kekat kelunan kepéh.
17 #
Mat. 10:26, Luk. 12:2 Kenat péh ineu'-ineu' éh pelim, bé' éh omok pelim pelinguh, adang néh poléng kepéh, ngan ineu'-ineu' éh petavun kelunan, adang néh pu'un kejam réh ke' kepéh.
18 #
Mat. 25:29, Luk. 19:26 La'ah uban néh kenat jian keh menéng ngan seruh mu'un, kelunan éh pu'un, inah ke' éh juk pepit kepéh, ngan kelunan éh bé' pu'un ineu'-ineu' bang iah ngioo' awah pu'un éh, éh kenioo' néh pu'un inah juk pega' kepéh jin iah, ha' Néh.
Tong tinen ngan padéé' Yésus
(Mat. 12:46-50, Mrk. 3:31-35)
19La'ah tinen ngan padéé' Yésus tuai ke' réh juk tavin Éh, bang peseng réh tai danii' uban neu' kelunan pinaa'. 20Boh kelunan bara' ngan Yésus, ha' réh, Pu'un tinen ngan padéé' Ko' tong usit sinah ne' juk pané ngan Ko', ha' réh ngan Néh.
21Ha' Yésus mipa réh, Inah éh tinen ngan padéé' ké' mu'un, kelunan éh menéng ha' tebaraa' Allah ngan kivu éh kepéh, ha' néh.
Yésus ngepawah kepu ngan lipak ja'au
(Mat. 8:23-27, Mrk. 4:35-41)
22Jah dau Yésus ngan irah bakéh Néh tai lem alut. Ha' Yésus ngan réh, Jian tam papit saa' dipa baa' banget nah, ha' Néh. 23Boh réh peleka tai papit baa' nah. Lem réh lakau nah inah Yésus pegen lem alut nah. Lem Yésus nah pegen, tuai kepu gahang ngan lipak ja'au pa'ung lem alut réh nah, danii' réh juk kaham lah. 24Boh bakéh Yésus nah tioo tai peto'ot Yésus. Ha' réh ngan Néh, Eii Guru, kaham lu' tu' dat, ha' réh.
Boh Yésus betéé' meta' kepu ngan lipak nah, nyohoo' éh pawah ngan ma'o. Bé' pu'un kepu gahang kepéh ngan bé' pu'un lipak ja'au kepéh, kekat inah lepah pawah béé. 25Ha' Yésus ngan irah éh bakéh Néh nah kepéh, Kineu' keh kenat bé' ngelan, ha' Néh. Hun irah bakéh Néh na'at kepu ngan lipak nah lepah ma'o, béé kenin réh medai réh. Boh réh pané belah irah ke', ha' réh, Kineu' kelunan iteu' ke' néh omok pané ngan kepu ngan lipak ke' néh pu'un kivu sohoo' néh kenat, ha' réh.
Jah kelunan éh nasek balei' pinaa'
(Mat. 8:28-34, Mrk. 5:1-20)
26La'o Yésus ngepawah kepu ngan lipak nah, lakau réh kepéh avéé' saa' dipa banget nah tai tana' irah Gerasa saa' dipa tana' Galilia. 27Hun réh avéé' sinah Yésus taket jin alut, peselalang Éh ngan jah kelunan jin tana' inah. Kelunan inah kelunan éh nasek balei'. Lebéé' tenéh kelunan inah mokoo' ugai awah, kenat péh bé' éh omok mokoo' tong lamin néh mu'un, iah mokoo' lem luvang bateu' keluhung awah, éh jalan kelunan modoo' patai kelunan. 28Hun kelunan éh nasek balei' nah na'at Yésus, ngeradau éh, tioo kuba' éh tong jumen Yésus, ja'au ha' ané néh ngan Yésus, ha' néh, O Yésus, Anak Allah éh Matek Bau, ineu' juk neu' Ko' tong akeu'? Akeu' menyat ke' pika akeu', mai ke' ngukum akeu', ha' néh. 29Iah pané kenat ha' uban Yésus lepah nyohoo' balei' nah pega' jin iah. Pinaa' koléé' balei' nah mikai éh, na' péh kelunan mavaa' éh mu'un-mu'un, ngan ngejeret ojoo' ngan gem néh palaa' ratai, neu' pengegahang balei' nah, bekat kekat ratai nah, pelapah balei' nah mihin éh tai mokoo' tengéé' tong tana' awah.
30La'ah Yésus neteng ngaran néh, ha' néh, Ineu' ngaran ko', ha' néh.
Ha' néh mipa éh, Ngaran ké' Panyen, ha' néh. Uban pinaa' balei' éh masek lem néh. 31Boh kekat balei' nah menyat Yésus mai éh bet réh tong sawang awah.
32Pu'un idok panyen sinah pitah kinan néh tong tokong, boh balei' nah menyat Yésus kejeraa' kekat irah masek tong kekat idok panyen inah. La'ah Yésus kejeraa' réh masek lem idok nah. 33Boh kekat balei' nah pega' jin lakei' iri' ke' réh tai masek lem idok pinaa' nah. Tioo nekedeu' idok pinaa' nah kelap nerurut tong apé ihang keluwat ketai avéé' tong tapak tana' bau dirin baa', tioo pejeu kekat néh béé pelohoo' lem baa', tioo matai menyet.
34Hun kelunan éh mihau idok nah na'at éh kelap ngan matai menyet kenat, pelapah kelunan inah kelap tai leboo' ngan bara' kekat inah ngan réh, boh réh tai kepéh bara' ngan irah tong térék. 35Boh kekat kelunan pinaa' tai kepéh tavin Yésus ke' réh jam éh hun néh pu'un kenat mu'un. Hun réh avéé' tong Yésus, inah irah na'at Yésus ngan lakei' éh nasek balei' nah pu'un menyun déhéé' gem Yésus. Kelunan éh nasek balei' nah pu'un pakai néh ngan pu'un kenin néh lepah teneng, medai mu'un réh na'at éh kenat. 36Boh irah kelunan éh na'at idok matai ngan na'at kineu' jalan lakei' éh nasek balei' nah pu'un ma'o, boh réh bara' éh ngan kelunan pinaa' nah kepéh, pekua' éh ta'an réh nah. 37Medai mu'un-mu'un kelunan pinaa' nah, inah irah nyohoo' Yésus piso jin leboo' inah. Boh Yésus taket lem alut ke' Néh piso pekua' sohoo' réh nah. 38Boh lakei' éh nasek balei' nah menyat Yésus mihin iah ngan Néh.
Bang ha' Yésus ngan néh, 39Moléé' ke' tai lamin ko' tengéé' ngan bara' ngan réh tong kekat jalan Tuhan pu'un masi ngan pika ke', ha' Néh.
Boh lakei' inah moléé' tai siget leboo' bara' tong jalan Yésus pika ngan peka'o éh nah.
Tong anak Yérus ngan redo éh ngamit tapak seput Yésus
(Mat. 9:18-26, Mrk. 5:21-43)
40Hun Yésus piso jin leboo' inah, Iah papit baa' banget kepéh ke' Néh moléé'. Hun Néh avéé' saa' dipa, pinaa' kelunan alaa' Éh ngan jian kenin uban lebéé' tenéh irah mena Éh moléé'. 41La'ah pu'un jah lakei' sinah ngaran néh Yérus, lakei' inah pengeja'au tong lamin sebayang Yahudi. Tai éh ngejekuu' lep néh déhéé' gem Yésus ke' néh menyat Yésus tai lamin néh. Iah menyat Yésus tai kenat uban anak néh. 42Jah awah anak néh, anak redo, kelebéé' urip néh jah poloo' duah ta'un, sakit éh danii' juk matai.
Lem Yésus lakau tavin anak inah, pinaa' kelunan nyikeu' éh. 43Pemung ngan kelunan pinaa' nah pu'un jah redo éh sakit éh kasi dahaa' pega', avéé' jah poloo' duah ta'un éh kenat tenéh, bé' éh omok ma'o. Inah kepéh kekat livah néh péh béé lah, neu' néh tavin kelunan éh nawan ke' réh juk peka'o éh, bang bé' pu'un jah usah péh éh omok peka'o éh. 44La'ah inah iah tai jin likot Yésus ke' néh ngamit tapak seput Yésus. Hun néh ngamit seput Yésus nah, tioo dahaa' néh ma'o pega'. 45Boh Yésus pané ngan kelunan pinaa' nah, Séé' éh ngamit Ku' ri'? Ha' Néh.
Ha' réh, Bé' améé' pu'un ngamit ka'au' ri', ha' réh. Boh Péterus pané kepéh, O Guru, pinaa' kelunan ne', neu' kelunan pesikeu' nah ine', ha' néh.
46Ha' Yésus kepéh, Pu'un jah kelunan ngamit ku' ri' de'. Akeu' jam éh pu'un kenat mu'un uban penyukat Ké' kejam Ké' éh pu'un peka'o kelunan éh ngamit Ku' nah, ha' Néh. 47Hun redo inah jam Yésus jam éh, tuai éh ngejekuu' lep néh déhéé' gem Yésus ngan riet éh medai, inah iah bara' tong kesakit néh ngan tong néh pu'un ma'o kepéh. 48La'ah ha' Yésus ngan néh, Uban ko' ngelan Akeu' inah ko' pu'un ma'o, moléé' ke' ngan pawah kenin ko', ha' Néh ngan redo inah.
49Lem Yésus to pané ngan réh, inah savéé' jah lakei' tuai jin lamin Yérus bara' ngan Yérus, ha' néh, Anak ko' ri', matai tenéh, mai ke' petusah Guru teu' la'ah, ha' néh.
50Hun Yésus menéng ha' néh kenat, inah Yésus pané ngan Yérus, Mai ke' medai, hun ko' ngelan Akeu' boh anak ko' omok ma'o, ha' Néh.
51Inah irah lakau tai lamin Yérus nah, hun réh avéé' sitai, bé' Yésus kejeraa' kelunan pinaa' nah tai ngan Néh, bang Iah mihin Péterus ngan Yohanes ngan Yakub ngan tamen tinen anak inah awah tai ngan Néh. 52Kekat kelunan tong lamin éh jalan anak inah, mangaa' ngan ngelumo péh. Boh Yésus pané ngan réh, Mai keh mangaa', bé' anak inah matai ne', pegen awah ine', ha' Néh ngan réh.
53Boh irah kelunan pinaa' nah mala' muau éh, uban irah jam anak inah lepah matai tenéh. 54Inah Yésus tai ngamit ojoo' anak inah ngan pané ngan néh, ha' Néh, O anak, betéé' ke', ha' Néh. 55Pelapah anak inah murip kepéh ngan tioo betéé' éh. La'ah Yésus nyohoo' irah mena' penguman ngan néh. 56Béé kenin tamen tinen anak inah, la'ah Yésus meta' réh bara' kekat penganeu' Néh iteu' ngan irah éh jah kepéh.
Voafantina amin'izao fotoana izao:
LUKAS 8: PNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
