LUKAS 7
7
Tuhan Yésus peka'o kesakit jah kelunan sohoo'
(Mat. 8:5-13)
1La'o Yésus bara' kekat ha' tebaraa' Néh inah ngan kelunan pinaa', lakau Éh kepéh tai leboo' Kapernaum. 2Tong leboo' inah pu'un jah pengeja'au seradu éh mihau jah ato seradu Rum. Lakei' pengeja'au inah pu'un jah kelunan sohoo' néh éh kemurung néh mu'un. Kelunan sohoo' néh inah sakit mu'un éh danii' éh matai. 3Hun lakei' ja'au inah menéng rengah Yésus, iah nyohoo' irah ja'au jin belah kelunan pengeja'au kelunan Yahudi tai menyat pika ngan Yésus, menyat Éh tai peka'o kelunan sohoo' éh sakit nah. 4Tai réh tavin Yésus nyohoo' éh mu'un-mu'un tai peka'o kelunan sakit nah. Ha' réh, Tekep ke' tai peka'o kelunan inah 5uban iah pekua' kenin ngan améé', inah kepéh iah éh maneu' lamin sebayang mé' rai, ha' réh.
6Tai Yésus kivu réh. Teka Yésus juk avéé' tong lamin lakei' ja'au nah, inah lakei' ja'au nah nyohoo' irah bakéh néh tai pané ngan Yésus kepéh. Ha' néh, O lakei' ja'au, mai ke' tusah tuai da', bé' tekep akeu' tebai ke' tong lamin ké', 7kenat péh bé' tekep ku' tuai tavin ka'au' uban akeu' kelunan éh sa'at mu'un. Jian ke' pané awah, neu' ha' ko' awah péh omok kelunan sohoo' ké' inah ma'o. 8Akeu' kenat ha' uban akeu' péh kivu sohoo' irah éh ja'au jin akeu', kenat péh pu'un irah seradu éh jah éh lem nihau ké'. Hun ké' bara' ngan jah usah, Tai ke', tai ke' éh kenat. Hun ké' bara' ngan jah usah kepéh, Tuai ke', tuai ke' éh. Ngan hun ké' bara' ngan irah éh ripen ké', Ko' maneu' inah, iah péh maneu' éh kenat. Kenat ha' lakei' ja'au inah nyohoo' réh bara' éh ngan Yésus.
9Béé kenin Yésus menéng ha' néh kenat, pupah Éh ke' Néh pané ngan kelunan éh kivu Éh, ha' Néh, Bé' jak Akeu' jam kelunan éh pu'un pengelan kenat. Jin belah irah Yahudi mu'un péh bé' éh pu'un kenat ke ja'au pengelan, ha' Néh.
10Kelunan éh senohoo' pengeja'au seradu nah, moléé' réh tong lamin lakei' ja'au nah, boh réh jam kelunan sohoo' nah pu'un ma'o jin kesakit néh.
Yésus purip anak redo baleu'
11Bé' makat lebéé' la'o inah Yésus lakau kepéh tai jah leboo', ngaran leboo' inah Nain. La'ah irah bakéh Néh pu'un réh kivu Éh tai, kenat péh kelunan éh jah, pinaa' réh kivu Éh. 12Hun réh avéé' tong leboo' inah, selalang réh ngan kelunan jin leboo' inah éh mihin patai lakei' lemanai ke' réh juk nanem éh. Lakei' lemanai' inah jah awah éh ngan tinen néh baleu'. La'ah pinaa' kelunan jin leboo' inah tai kivu redo baleu' nah tai tanem néh. 13Hun Yésus na'at redo inah, Iah pika éh mu'un-mu'un boh Éh pané ngan néh, Ka' ha' Néh, Jian, mai ke' mangaa', ha' Néh. 14Boh Yésus tai tepih tong patai inah ke' Néh ngamit éh. Kelunan éh mihin éh nah mokoo' pekena éh, boh Yésus pané kepéh. Ka' ha' Néh, O lakei' lemanai, Akeu' nyohoo' ke' betéé', betéé' ke', ha' Néh. 15Kelunan éh matai nah menyun éh ngan pu'un éh pané, boh Yésus mena' éh moléé' ngan tinen néh ri' kepéh.
16Kekat kelunan pinaa' nah medai, irah pu'un mejing Allah. Ha' réh, Pu'un jah nabi belah tam siteu', ja'au mu'un penyukat Néh, ngan inah kepéh, Allah pu'un tuai ngan pepoléng penika Néh ngan kelunan éh anah nah, ha' réh.
17La'ah rengah Yésus avéé' pah tipo tana' Yudea.
Kelunan éh sohoo' Yohanes Batis
(Mat. 11:2-19)
18Kekat irah éh kivu Yohanes Batis, pu'un réh bara' tong kekat penganeu' Yésus nah ngan Yohanes kepéh. 19Inah Yohanes tebai duah usah jin belah irah éh kivu éh ke' néh nyohoo' réh tai neteng Tuhan hun néh mu'un Iah éh pejajii' Allah juk tuai rai, ngan hun néh tekep réh mena kelunan éh jah kepéh.
20La'ah rawah inah tai avéé' tong Yésus ke' roh neteng Éh pekua' ha' Yohanes nah. Ha' roh, Amo tuai sohoo' Yohanes Batis, iah nyohoo' amo neteng ke' ka', séé' ke', ka'au' néh éh pejajii' Allah juk tuai rai? Kineu', tekep mé' mena kelunan éh jah kepéh? Kenat ha' Yohanes Batis nyohoo' mo neteng ke' rit, ha' roh ngan Néh.
21Sioo' inah Yésus pu'un peka'o kelunan pinaa' jin kesakit réh, tong kelunan éh nasek balei' pu'un Éh mega' balei' nah. Tong kelunan éh bé' pu'un ta'an Iah maneu' réh omok na'at kepéh. 22#Yes. 35:5-6, 61:1 La'ah ha' Yésus mipa ha' rawah éh senohoo' Yohanes ri', ka' ha' Néh, Jian koh moléé' tai bara' ngan Yohanes tong kekat éh ta'an koh ngan éh nenéng koh siteu' ri', inah éh, kelunan éh bé' pu'un ta'an omok réh na'at kepéh, irah éh paket omok réh lakau kepéh, irah éh kapéé' pu'un réh ma'o ngan lanyah kulit réh kepéh, irah éh rengen omok réh menéng kepéh. Irah éh matai omok réh murip kepéh, ngan Rengah Jian benara' Néh ngan kelunan kari. 23Inah kepéh, jian mu'un ngan kelunan éh bé' kurang pengelan tong Akeu', ha' Yésus ngan roh.
24La'o rawah éh sohoo' Yohanes nah moléé', boh Yésus pané ngan kelunan pinaa' bara' tong Yohanes. Ka' ha' Néh, Hun keh tai tavin Yohanes tong ahang tana' rai, kineu' éh seneruh keh éh juk ta'an keh sitai. Kineu', jah inan bahang éh liyung neu' kepu éh kei. 25Kineu' éh juk ta'an keh, jah kelunan éh memakai pakai éh jian mu'un. Kelunan éh memakai pakai kenat, pu'un réh mokoo' awah tong umaa' raja'. 26Bang ineu' éh juk ta'an keh mu'un, nabi Tuhan kei. Oo', mu'un, bang inah Akeu' bara' ngan keh, pu'un keh lepah na'at jah usah éh pelapah ja'au jin kekat nabi. 27Uban Yohanes nah, iah néh éh benara' kelunan lem surat Allah ka', Ha' Allah, Inah éh lawah Ké', Akeu' juk nyohoo' éh tai saa' tenah Ko' ke' néh petenup jalan Ko', ha' Néh. 28La'ah ha' Yésus, Akeu' bara' ngan keh, bé' pu'un kelunan séé'-séé' tong tana' éh pelapah ja'au ngaran jin Yohanes Batis, bang na' péh kenat, belah kelunan éh lem nihau Allah, kelunan éh ra' mu'un inah éh pelapah ja'au jin Yohanes nah, ha' Yésus ngan réh.
29La'ah kelunan pinaa' ngan kelunan éh alaa' sukai, pu'un réh menéng ha' Yésus ngan jian kenin. Irah bara' teneng ha' Allah tong kekat éh benara' néh tong penyala' ngan kesa'at réh ngan pu'un réh benatis Yohanes. 30#Mat. 21:32, Luk. 3:12 Bang irah éh kivu adet Parisi ngan irah guru éh nebaraa' tong sohoo' lem Surat Musa, nebet réh awah kekat ha' Allah ngan éh pengeloo' Néh ngan réh, bé' réh keloo' benatis Yohanes.
31Ha' Yésus kepéh, Ineu' jalan éh ke' Ké' pepata tong pohoo' urip kelunan, ineu' éh ké' tapan tong réh da'? 32Irah barei' anak éh seminga' tong jalan pebelih, ha' jelua' irah anak pané ngan bakéh réh, ka' ha' réh, Améé' lepah ngeloréé barei' irah tong kawin bang bé' keh sayau, améé' pu'un ngeradau barei' hun kelunan matai bang bé' keh mangaa', bé' ka'ah keloo' pemung seminga' ngan améé', ha' jelua' irah anak nah. 33Barei'-okoo' irah anak kenat nah ka'ah, uban hun Yohanes Batis tuai rai, ngelayau éh kelaset awah, ngan bé' éh mesep baa' agun, boh ka'ah bara' iah kelunan palui awah. 34La'ah Anak Kelunan, pu'un kuman ngan pu'un mesep, boh ka'ah bara', Na'at kelunan inah, iah kuman nyahan ngan mesep baa' agun, ngan pebakéh ngan kelunan éh alaa' sukai ngan kelunan penyala' péh, ha' keh. 35La'ah kekat irah éh alaa' pengejam éh jin Allah adang réh pepoléng pengejam inah pu'un teneng, ha' Yésus ngan réh.
Yésus pu'un tong lamin Simon
36La'ah pu'un jah kelunan Parisi tebai Yésus tai kuman tong lamin néh, inah Yésus tai kuman tong lamin néh. 37Tong leboo' inah pu'un jah redo éh sa'at barék. Hun redo inah menéng ha' réh bara' Yésus pu'un tong lamin kelunan Parisi inah, tai éh tavin Yésus sinah. Pu'un éh mihin jah tajau si'ik éh penoo' neu' tawan éh jian ba'oo' éh barei' anyuu'. 38#Mat. 26:7, Mrk. 14:3, Yoh. 12:3 La'ah redo inah nekedéng tong likot Yésus ngan mangaa' mu'un, palaa' baa' maten néh iah memasa' gem Yésus. Boh éh mitit éh palaa' bok néh ngan marek gem Néh, boh éh mujek tawan éh jian ba'oo' nah tong gem Néh kepéh. 39Hun kelunan Parisi éh tebai Yésus kuman nah na'at redo inah maneu' kenat iah ngedalem éh, ka' kelem néh, Eii, kineu' Yésus kejeraa' redo inah maneu' éh kenat, hun Néh mu'un iah nabi Tuhan adang Néh jam redo inah sa'at barék, kelem néh.
40Boh Yésus pané ngan néh kepéh, ha' Néh, Simon, pu'un jah ha' si'ik éh juk benara' Ké' ngan ko', ha' Néh.
Ha' Simon, O Guru, hun néh kenat ko' bara' éh, ha' Simon.
41Boh Yésus pané kepéh, ha' Néh, Pu'un duah kelunan éh pu'un utang ngan jah kelunan éh mena' rigit ngan rawah lepah. Utang jah usah inah, lemah ato rigit pirek. Utang bakéh néh, lemah poloo' rigit pirek. Bang rawah inah bé' pu'un ineu'-ineu' éh palaa' roh mematai kekat utang roh inah. 42Boh lakei' ja'au éh jalan roh pu'un utang nah mega' utang roh awah. Hun néh kenat séé' jin belah rawah inah éh pu'un murung mu'un tong lakei' ja'au inah seneruh ko', ha' Yésus ngan Simon nah.
43Ha' Simon mipa éh, Akeu' seruh iah éh pu'un utang éh pelapah pinaa' nah, ha' Néh.
Ha' Yésus kepéh, Oo', mu'un, teneng ha' ko' inah, ha' néh. 44Boh Yésus pupah na'at redo inah ngan bara' ngan Simon, Ta'an ko' redo inah. Pu'un Akeu' tuai tong lamin ko' bang bé' ke' mena' baa' jalan Ké' pohéé' gem Ké', bang redo inah pu'un éh pohéé' gem Ké' palaa' baa' maten néh ngan mitit éh kepéh palaa' bok néh. 45Bé' ka'au' marek Akeu' bara' jian kenin na'at savéé' Ké', bang jin bu'un savéé' Ké' pah avéé' hun iteu', redo inah pu'un marek gem Ké'. 46Bé' ke' mena' anyuu' tong ulun Ké', bang redo inah pekanyuu' gem Ké' palaa' tawan éh jian ba'oo'. 47Akeu' bara' ngan ko', ja'au mu'un penika redo iteu', neu' penika néh kenat inah éh nojoo' na' péh penyala' néh pu'un ja'au pu'un éh lepah pega'. Bang kelunan éh si'ik awah penika néh, inah éh nojoo' si'ik awah ke' penyala' néh pega', ha' Yésus.
48Boh Yésus bara' ngan redo inah, Kekat penyala' ko' lepah pega' tenéh, ha' Néh.
49La'ah kelunan éh mokoo' pelelong ngan Yésus nah, pané belah irah ke', ha' réh, séé' kelunan inah éh ke' Néh omok mega' penyala', ha' réh.
50Ha' Yésus pané ngan redo inah, ka' ha' Néh, Pengelan ko' éh pepurip ke', moléé' ke' ngan jian kenin, ha' Néh.
Voafantina amin'izao fotoana izao:
LUKAS 7: PNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
