LUKAS 21
21
Tong pengena' jah redo baleu'
(Mrk. 12:41-44)
1La'ah ngejuwak Yésus ngan na'at kelunan kaya' mena' pengena' néh ngan Allah tong umaa' Allah, 2boh Éh na'at jah redo baleu' éh kari mu'un. Redo baleu' nah pu'un éh mena' duah tasap sin, 3boh Yésus bara' ka', Redo baleu' inah mena' éh pelapah ja'au mu'un jin kekat éh nena' irah pinaa' nah. 4Uban kelunan kaya' nah irah éh mena' jin utaa' néh awah, bang redo baleu' inah iah kari mu'un, iah éh mena' kekat anah nah béé, ha' Yésus.
Yésus bara' tong pengebéé Umaa' Allah
(Mat. 24:1-2, Mrk. 13:1-2)
5La'ah pu'un jelua' kelunan bara' tong kekat kejian Umaa' Allah, Jian mu'un layan umaa' inah, ha' réh. Kekat bateu' péh éh palaa' réh suai lamin inah, jian éh, ha' réh, ngan pu'un réh bara' kepéh tong kekat pengena' kelunan inah ngan Allah. Umaa' Allah inah ngan pengena' réh inah, jian mu'un-mu'un éh, seneruh réh. La'ah ha' Yésus ngan réh, 6Tong kekat éh ta'an keh inah, pu'un jah dau kepéh temurei' bé' pu'un jah bateu' petevan kenat la'ah, adang kekat bateu' nah guram awah, ha' Néh.
Tong penusah ngan pengeketa
(Mat. 24:3-14, Mrk. 13:3-13)
7Boh irah neteng éh kepéh, ka' ha' réh, Kineu' kelebéé' la'ah ke' néh kenat da'? Kineu' éh telana' néh hun néh lepah danii' da', ha' réh.
8Ka' ha' Yésus kepéh, Jian keh seruh jian-jian dai kelunan petawang keh, uban pinaa' kelunan éh pu'un tuai dalem ngaran Ké' éh bara' ka', Akeu' néh Tuhan, ngan ka' ha' réh kepéh, Jaka' néh lepah avéé', ha' réh. Bang hun réh pu'un pané kenat, mai keh kivu réh. 9La'ah hun keh menéng rengah kelunan pekayau, ngan rengah kelunan pesakat ngan maneu' irah éh pohoo' nah ke', jian keh nesen, adang kekat éh inah avéé' tenah, bang bé' jak éh inah éh ga' néh, ha' Néh.
10Ha' Néh kepéh, Adang jah arong kelunan juk betéé' tai ngayau jah arong kelunan kepéh, ngan irah éh pu'un lem nihau jah peritah, juk tai pekayau ngan irah éh lem nihau peritah éh jah kepéh. 11La'ah tovoo' inah pu'un tegen tana' éh ja'au mu'un, ngan pu'un la'au' éh ja'au mu'un kepéh, ngan pinaa' arong kesakit éh ja'au, ngan pinaa' arong éh pu'un ngedai kenin kelunan, kenat péh tong langit péh pinaa' arong-arong éh tejeu' ta'an réh éh omok telana' ngan réh, ha' Néh. 12Ka' ha' Yésus kepéh, Teka kekat inah juk avéé', adang pu'un kelunan ngamit ngan peketa keh, adang réh mihin keh besara' lem lamin sebayang ngan irah mena' keh lem lamin tutup, adang réh mihin keh tai besara' tong jumen raja' ngan irah pengeja'au, irah maneu' keh kenat uban pengelan keh tong Akeu'. 13Bang hun réh maneu' keh kenat, inah jalan keh omok bara' Rengah Jian ngan réh. 14Mai keh medai ngan seruh, hun néh pu'un kenat kineu' jalan ké' omok mipa kekat ha' réh da'. 15#Luk. 12:11-12 Uban tovoo' réh ngamit keh da', adang Ké' pu'un mena' pengejam Ké' ngan keh ke' néh nolong keh pané, pah avéé' irah éh maneu' keh nah, bé' omok ngelawan ngan bé' omok bet ha' keh kepéh da', ha' Néh. 16Ha' Néh kepéh, La'ah avéé' tinen tamen keh ngan padéé' keh ngan panak keh ngan bakéh keh, pu'un réh mena' keh ngan irah. Adang pu'un jelua' keh penatai réh. 17Adang kekat kelunan pu'un leko mu'un-mu'un tong keh. Irah pu'un maneu' keh kenat uban pengelan keh tong Akeu', 18bang na' péh kenat, bé' sapét jah ihat bok keh péh pega'. 19Jian keh ngereken kenin keh, boh keh omok alaa' urip pelinguh, ha' Néh.
Yésus bara' tong pengebéé leboo' Yérusalem
(Mat. 24:15-21, Mrk. 13:14-19)
20Ka' ha' Yésus kepéh, Hun keh na'at ayau tuai nyeririt leboo' Yérusalem, boh keh jam adang réh juk ngebéé Yérusalem. 21Hun néh pu'un kenat kelunan éh pu'un tong tana' Yudea, jian réh kelap tai tokong, kelunan éh pu'un tong leboo' inah mu'un, jian réh kelap jin sinah, kelunan éh pu'un tong tana' déhéé' Yérusalem, mai réh tai tong leboo' Yérusalem kepéh. 22#Hos. 9:7 Uban sioo' inah, inah sioo Tuhan ngukum réh, dokoo' néh pesukup ha' lem surat Tuhan. 23Hun kekat penusah inah pu'un avéé', pika mu'un irah redo éh nemaléé', ngan irah éh pu'un anak si'ik. Ja'au mu'un penusah tong tana' iteu'. Rek Tuhan adang éh teneng tong leboo' Yérusalem nah. 24Jelua' kelunan inah penatai réh palaa' po'é, jelua' kepéh narau réh tai tana' éh juu' mu'un. Kelunan éh tengéé' pohoo' jin Yahudi, pu'un irah lakau semah-semah péh tong leboo' Yérusalem kenat, avéé' lebéé' mu'un, pah avéé' pengega' tana', ha' Néh.
Tong savéé' Yésus kepéh
(Mat. 24:29-31, Mrk. 13:24-27)
25 #
Yes. 13:10, Yeh. 32:7, Yol. 2:31, Pol. 6:12-13 Ka' ha' Yésus kepéh, Tai pengega' tana' pu'un kuraa'-kuraa' telana' éh tong maten dau ngan tong laséh, kenat péh tong kenyuhai, kenat péh éh tong tana', pah avéé' kuraa'-kuraa' arong kelunan besau kenin ngan medai mu'un-mu'un menéng barei' ha' savéé' baa' éh pejek atong. 26Pu'un kelunan pelapah tayen medai uban réh seruh tong kekat éh juk avéé' tong tana', uban maten dau ngan laséh ngan kenyuhai ngan kekat inah béé, pu'un piso jin retek néh bu'un. 27#Dan. 7:13, Pol. 1:7 La'o inah Anak Kelunan pu'un avéé' lah lem jah avun ngan kekat penyukat ngan pengejian Néh kepéh. 28Hun kekat penusah inah pu'un, jian keh nekedéng ngan nerepan uban savéé' Tuhan danii' mu'un, ha' Yésus.
Ha' tapan tong jah inan buaa' ara
(Mat. 24:32-35, Mrk. 13:28-31)
29Boh Yésus bara' jah ha' tapan ngan réh, ka' ha' Néh, Seruh keh tong ha' tapan tong inan ara ngan kekat arong inan buaa' éh jah kepéh. 30Hun keh na'at éh ngelerong adang keh nesen bé' lebéé' la'ah da', adang néh bu'an. 31Barei' inah péh hun keh na'at kekat penusah inah, nesen keh jaka' Allah juk tuai Pengeja'au, danii' mu'un lah éh, ha' Néh.
32Ka' ha' Yésus kepéh, Seruh keh jian-jian, kekat éh benara' ké' iteu', adang néh pu'un kenat sioo' urip kelunan Yahudi éh murip hun iteu'. 33Langit ngan tana' juk salai béé, bang kekat ha' tebaraa' ké', adang néh pu'un petem kenat mu'un, ha' Yésus nah.
Ha' tebaraa' tong seruh jian-jian mai telalau awah
34Ka' ha' Yésus kepéh, Seruh keh jian-jian, mai keh telalau kuman nyahan mesep pah avéé' keh mavuk, ngan mai keh taleu neu' penusah éh pu'un tong tana', dai Tuhan beleka' avéé' lem keh bé' nerepan éh. 35Uban dau savéé' Tuhan pu'un éh pekua' ka'an éh teneng tong viheu'. 36Seruh keh jian-jian ngan ngelayau sebayang, dokoo' keh omok gahang ngan omok ngeretep, dokoo' keh omok nekedéng tong jumen Anak Kelunan hun Néh tuai kepéh, ha' Yésus ngan réh.
37 #
Luk. 19:47
Sioo' inah péh Yésus nebaraa' réh lem Umaa' Allah ngan siget merem pu'un éh tai tokong Saitun. 38Siget ngivun ngioo' éh dau peka', inah kelunan pinaa' tai Umaa' Allah ke' réh omok menéng ha' Néh.
Voafantina amin'izao fotoana izao:
LUKAS 21: PNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
