LUKAS 20
20
Tong irah ja'au neteng Yésus séé' éh nyohoo' Iah maneu' kereja' Néh
(Mat. 21:23-27, Mrk. 11:27-33)
1Jah koléé' hun Yésus nebaraa' irah lem Umaa' Allah ngan bara' Rengah Jian ngan réh, irah pengeja'au imam, ngan irah guru éh nebaraa' tong sohoo' lem Surat Musa, pemung ngan kuraa' kekat pengeja'au kelunan Yahudi, 2ke' réh bara' ngan Néh. Ka' ha' réh, Jian ke' bara' ngan améé' tong éh penganeu' Ko', séé' éh nyohoo' Ke' maneu' kenat, ha' réh.
3Ha' Yésus ngan réh, Jian keh mipa ha' Ké' tenah da', 4La'ah Yohanes Batis rai, séé' nyohoo' éh ngebatis kelunan, kineu', Allah éh, kineu', sohoo' kelunan awah éh, ha' Néh ngan réh.
5Boh irah pinaa' paneu' belah irah ke', ka' ha' réh, Kineu' tam omok mipa ha' Néh kenat nah. Hun tam bara', Allah éh nyohoo' éh, adang Iah pu'un bara' kepéh, Hun néh kenat kineu' keh bé' ngelan tong Yohanes nah, ha' Néh dat. 6Bang hun tam bara', Kelunan éh nyohoo' éh, adang kekat kelunan pinaa' nah memateu' tam kepéh, uban irah seruh adang Yohanes Batis nah jah nabi Tuhan, ha' réh. 7Kenat péh irah mipa ha' Yésus, ka' ha' réh kepéh, Bé' mé' jam séé' nyohoo' éh, ha' réh.
8Ha' Yésus ngan réh kepéh, Hun Néh kenat bé' Akeu' omok bara' séé' nyohoo' Akeu' maneu' kekat penganeu' Ké' iteu', ha' Néh.
Ha' tapan tong kelunan éh mihau pulah agun
(Mat. 21:33-46, Mrk. 12:1-12)
9 #
Yes. 5:1
La'o inah Yésus bara' jah ha' tapan ngan réh, ka' ha' Néh, Pu'un jah kelunan éh mulah pulah agun, la'o inah iah nyohoo' kelunan éh jah mihau pulah inah. La'o inah lakau éh tai tana' juu'. 10Tovoo' pulah inah bu'an, iah nyohoo' jah kelunan tai tavin irah éh sohoo' néh mihau pulah inah rai ke' néh omok alaa' buaa' néh. Bang sa'at kenin irah éh mihau pulah nah, irah mipok kelunan sohoo' néh nah ngan nyohoo' éh moléé' awah ngan bé' pu'un mena' ineu'-ineu' ngan néh. 11Boh éh nyohoo' jah kelunan éh jah kepéh tai, kenat péh irah sitai maneu' kelunan inah kepéh, irah mipok éh ngan pekenyaa' éh ngan nyohoo' éh moléé' awah, bé' irah pu'un mena' ineu'-ineu' ngan néh. 12Jah koléé' kepéh iah nyohoo' kelunan éh jah kepéh tai, inah éh keteleu' koléé' néh nyohoo' kelunan tai. Tong kelunan éh tai nah, pinaa' suhat néh neu' réh, boh réh bet éh awah. 13Boh kelunan éh pu'un pulah inah bara' ka', Kineu' lah ku' da'. Akeu' juk nyohoo' anak usah ké' éh penika ké' mu'un iteu' tai, adang irah omok ngerera' tong anak ké' iteu' da', ha' néh. 14Bang hun irah éh mihau pulah nah na'at éh tuai, boh irah bara' ka', Inah savéé' anak lakei' ja'au, jian tam mematai éh boh pulah iteu' omok anah tam mu'un, ha' réh. 15Inah irah alaa' éh ke' réh bet éh jin pulah inah ngan mematai éh, ha' Yésus ngan réh.
Ka' ha' Yésus kepéh, Hun réh maneu' éh kenat, kineu' kenin lakei' éh pu'un pulah inah tong irah éh mihau pulah nah. 16Adang néh mematai réh uban réh sa'at, ngan tebai kelunan éh jah kepéh mihau pulah inah, ha' Yésus.
Hun réh menéng ha' Yésus pané kenat, pu'un réh bara' ka', mai pu'un éh kenat da' ha' réh.
17 #
Msm. 118:22
Boh Yésus kepuh réh ngan neteng réh, ka' ha' Néh, Ineu' sin tong ha' surat Allah éh bara' ka'?
Bateu' éh nebet tukeng lamin uban réh seruh éh bé' jian, bateu' inah éh jian mu'un ha' nah.
18Siget-siget kelunan éh tekaleu' tong bateu' inah, suhat ja'au éh ngan bekat usah néh, bang hun bateu' inah pelohoo' tong néh, adang néh pepa' banya', ha' Yésus.
Tong irah neteng tong sukai
(Mat. 22:15-22, Mrk. 12:13-17)
19La'ah irah guru éh nebaraa' tong sohoo' lem Surat Musa ngan irah pengeja'au imam, tioo pelapah réh juk ngamit Yésus uban réh jam ha' tapan Néh tong lakei' éh pu'un pulah agun nah, ha' Néh maneu' irah ke' éh. Bang bé' réh omok ngamit Éh uban réh medai kelunan pinaa' nah. 20Boh irah mena ngan pitah jalan kepéh hun mah lah réh omok maneu' Éh kenat. Pu'un irah mena' rigit ngan kelunan ke' réh nyohoo' réh tai kivu Yésus pekua' kelunan éh ngelan mu'un, bang réh ngelayoo' awah. Boh réh nyohoo' kelunan inah tai tavin Yésus ngan neteng Éh tong kuraa' arong rungen dokoo' réh pitah ha' néh sala'. Irah maneu' Éh kenat hun Néh sala' ha' ke' réh omok pesala' Éh tong peritah. 21Tai lah kelunan éh alaa' rigit nah tavin Yésus, ka' ha' réh, O Guru, améé' jam kekat ha' Ko' ngan kekat ha' tebaraa' Ko' pu'un éh teneng, bé' ka'au' seruh tong penganeu' kelunan awah, bang pu'un ke' bara' mu'un tong kekat ha' Allah ngan kekat pengeloo' Allah ngan kelunan. 22Uban néh kenat jian ke' bara' ngan mé', kineu' mé', tekep mé' mena' sukai mé' ngan raja' Rum? Kineu' da', bé' makat mé' mena' éh, ha' réh.
23Bang kejam Yésus irah pané kenat uban réh pitah jalan ke' réh pesala' Éh. Boh Éh bara' ka' ngan réh, 24Tuai jah rigit pirek keh nah Ké' na'at éh, ha' Néh. Hun Néh alaa' rigit inah, inah Iah na'at éh, ka' ha' Néh, Gaben kelunan ineu' éh ka'. Séé' éh ka' ngaran, ha' Néh.
Ha' irah mipa éh, Raja' Rum, ha' réh.
25Ha' Yésus ngan réh kepéh, Hun néh kenat kekat éh anah peritah jian keh mena' éh ngan irah ke'. Kekat éh anah Allah, jian ke' mena' éh ngan Allah ke', ha' Néh ngan réh.
26Na' péh irah pitah jalan juk pesala' Éh tong ta'an kekat kelunan, bé' réh omok pesala' Éh kenat, boh réh mokoo' kelem awah kepéh, béé kenin réh menéng ha' Néh kenat.
Kelunan Saduki neteng tong pengebetéé' kelunan matai
(Mat. 22:23-33, Mrk. 12:18-27)
27 #
Peng. 23:8
La'ah pu'un kuraa'-kuraa' kelunan éh kivu adet Saduki tai tavin Yésus. Irah Saduki bé' irah ngelan kelunan éh matai omok betéé' murip kepéh. Inah irah bara' ngan Yésus, ka' ha' réh, 28#Ula. 25:5 O Guru, pu'un ha' lem Surat Musa éh bara' ka', Hun néh pu'un jah lakei' matai do néh murip keto bang rawah bé' pu'un anak, jian padéé' lakei' éh matai nah alaa' redo baleu' inah dokoo' rawah omok pu'un anak da', dokoo' anak inah seleket anak lakei' éh matai nah. Kenat ha' lem Surat Musa rai de', ha' réh. 29Ha' réh kepéh, Pu'un tujuu' usah éh pepadéé', éh tuken jin irah alaa' redo, bé' lebéé' matai lakei' inah ngan bé' pu'un anak. 30Boh padéé' néh éh tadin jin lakei' éh matai nah alaa' langoo' néh baleu' nah kepéh, kenat péh lakei' inah matai kepéh bé' mena rawah pu'un anak. 31Kenat péh avéé' tong teleu' usah irah éh pepadéé' tujuu' usah nah, pah avéé' irah béé éh tujuu' nah matai béé, bé' pu'un anak. 32La'o inah boh redo baleu' inah matai. 33Hun néh kenat tong dau Tuhan pebetéé' ngan purip kelunan vam, séé' jin belah irah tujuu' usah inah éh omok alaa' redo inah kepéh uban kekat irah tujuu' usah nah pu'un réh lepah pemung ngan redo inah, ha' réh.
34Ha' Yésus mipa réh kepéh, ka' ha' Néh, Kelebéé' kelunan pu'un murip tong tana' iteu' pu'un réh alaa' redo, 35La'ah lakei' ngan redo péh, hun mah Tuhan pebetéé' réh jin patai réh ngan alaa' urip éh pelinguh, bé' réh alaa' lakei' ngan redo kepéh. 36Irah barei'-okoo' meliket, bé' irah omok matai la'ah, irah lepah anak Tuhan ngan lepah betéé' jin pematai réh. 37#Kel. 3:6 La'ah Musa rai péh pu'un éh bara' lenaa' mu'un adang kelunan éh matai omok betéé' murip kepéh. Iah bara' éh lenaa' mu'un kenat hun néh bara' lem surat retek ha' éh bara' tong telo kayeu' mahang bang bé' éh potong. Uban tovoo' inah Musa bara' tong Tuhan, Iah éh Allah éh kenelan Abraham ngan Allah éh kenelan Ishak ngan Allah éh kenelan Yakub, ha' Néh. 38Sin ha' inah, réh teleu' inah, mu'un péh réh lepah matai, bang pu'un réh lepah betéé' murip kepéh, Tuhan éh Allah réh. Bé' Tuhan pengeja'au kelunan hun kelunan petem matai awah, ha' Yésus ngan réh.
39Boh irah guru éh nebaraa' tong Surat Musa bara' ka' ngan Yésus, O Guru, jam mu'un ka'au' pané ngan seruh, ha' réh. 40Bang bé' pu'un séé'-séé' éh makang neteng éh tong ineu'-ineu' kepéh.
Tong ha' peneteng, séé' éh Kristus, Anak séé' éh
(Mat. 22:41-46, Mrk. 12:35-37)
41La'ah ka' ha' Yésus ngan réh, Kineu' kelunan omok bara' Kristus tuai jin pohoo' Daud, kineu' réh omok bara' éh kenat? 42Uban dalem surat Masmur Daud pu'un bara' ka',
Tuhan pu'un bara' ngan Tuhan ké', Ka' ha' néh, Jian ke' menyun saa' na'au' ké' siteu',
43 #
Msm. 110:1
avéé' ké' maneu' kekat ayau Ko' inah barei' lun gem Ko' awah, ha' Néh.
44Hun néh kenat, hun Daud mateng Éh Tuhan, kineu' okoo' kelunan éh pejajii' Allah nah omok tuai jin pohoo' Daud nah, ha' Yésus ngan réh.
Yésus nyohoo' réh mavaa' dai réh lavo' neu' irah guru éh nebaraa' tong sohoo' lem Surat Musa
(Mat. 23:1-36, Mrk. 12:38-40)
45Tovoo' kekat kelunan pinaa' nah menéng ha' Yésus, inah Yésus bara' ngan irah éh bakéh Néh. Ka' ha' Néh, 46#Luk. 11:43 Mavaa' keh jian-jian dai keh lavo' neu' irah guru éh nebaraa' tong Surat Musa. Bau kenin réh keloo' réh lakau pakai kerayung éh kebit, dokoo' kelunan omok na'at ngan sepah réh. Hun réh tai jalan pebelih keloo' mu'un réh menéng ha' kelunan ngajung réh. Kenat péh réh tong lamin sebayang, keloo' réh menyun retek poléng ta'an kelunan pinaa', kenat péh hun réh tai tong penguman ja'au. 47Pu'un réh ngebuyuk irah redo baleu' ngan alaa' livah réh awah, la'o inah kenat péh réh ngelayoo' awah maneu' jian neu' réh kebit ha' sebayang. Ukum irah inah pelapah bahat jin ukum irah éh jah, ha' Yésus nah.
Voafantina amin'izao fotoana izao:
LUKAS 20: PNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
