LUKAS 18
18
Ha' tapan tong jah redo baleu' ngan kelunan éh petuneng rungen kelunan
1Pu'un Yésus bara' jah ha' tapan ngan réh ke' réh omok jam adang tekep irah mekat sebayang ngan mai putui pengelan. Ka' ha' Néh, 2Tong jah leboo' pu'un jah kelunan éh pu'un kereja' petuneng kekat rungen kelunan, bang bé' éh medai tong Allah ngan bé' éh pegunah kelunan. 3Ngan tong leboo' inah pu'un jah redo baleu' kepéh éh liwet-liwet tavin éh. Redo inah menyat lakei' inah pika ngan nolong éh. Ha' redo inah, Jian ke' nolong akeu' uban pu'un kelunan éh ngebuyuk akeu', ha' néh. 4Avéé' lebéé' péh redo inah menyat kenat, bé' lakei' inah keloo' nolong éh. La'o inah kepéh boh lakei' inah seruh, kelem néh, Na' péh akeu' bé' medai tong Allah ngan bé' pegunah kelunan, 5bang uban redo inah liwet-liwet tuai petusah ku', tekep ku' nolong éh dai éh ngelayau tuai kepéh ngan ngemutau ku', kelem néh.
6Ka' ha' Yésus kepéh, Jian keh seruh jian-jian tong ha' lakei' éh sa'at nah, hun néh betéé' kenat uban néh leko irah éh liwet-liwet tavin éh awah, 7kineu' Tuhan, bé' Tuhan keloo' nolong kelunan éh kivu pengeloo' Néh éh sebayang putung dau ngan putung merem péh. Kineu', leko Éh nolong réh. 8Akeu' bara' mu'un ngan keh, adang Iah nolong réh ngan rigah mu'un. Kineu' hun Anak Kelunan tuai kepéh, pu'un kelunan éh petem dalem pengelan néh, kineu', bé', ha' Yésus ngan réh.
Ha' tapan tong kelunan éh kivu adet Parisi ngan kelunan éh alaa' sukai
9Pu'un Yésus bara' jah ha' tapan kepéh ngan kelunan éh seruh usah néh tengéé' pu'un jian ngan leko kekat irah éh jah. Ka' ha' Néh, 10Pu'un duah usah kelunan tai tong Umaa' Allah ke' roh sebayang, jah kelunan éh kivu adet Parisi, jah usah kepéh kelunan éh alaa' sukai. 11Kelunan éh kivu adet Parisi nekedéng tengéé' ngan sebayang, ka' ha' néh, Akeu' bara' jian kenin ngan Ko' Tuhan, uban akeu' iteu' kelunan éh jian, bé' ku' kuman nyahan, bé' ku' ngebuyuk kelunan, bé' ku' nuyang pekua' kelunan éh pinaa' nah. Kenat péh akeu' bara' jian kenin ngan Ko', uban bé' ku' barei' kelunan éh alaa' sukai inah. 12Siget migu duah koléé' ku' kelaset awah, tong kekat ineu'-ineu' éh nalaa' ké', pu'un ku' ngelayau mena' tulat poloo' ngan ko', ha' kelunan éh kivu adet Parisi nah. 13Kelunan éh alaa' sukai bé' éh tai danii', bé' éh na'at kebau tong seruga, bang néh tepap kebah néh awah. Ka' ha' néh, O Allah, Ko' pika akeu', akeu' iteu' kelunan éh penyala' awah, ha' sebayang néh. 14#Mat. 23:12, Luk. 14:11 Ha' Yésus kepéh, Akeu' bara' ngan ka'ah, hun rawah moléé' la'ah, kelunan éh alaa' sukai nah éh pu'un jian tong ta'an Tuhan, uban Tuhan pika éh ngan bet penyala' néh. Bang séé'-séé' éh ngajung usah néh tengéé', iah tai ra' kepéh, ngan séé'-séé' éh ngediva' kenin néh, iah éh kenajung kepéh, ha' Yésus.
Yésus mapai ojoo' Néh tong irah anak
(Mat. 19:13-15, Mrk. 10:13-16)
15La'ah pu'un kelunan mihin anak réh tavin Yésus, murung kenin réh, irah keloo' Yésus mapai ojoo' Néh tong anak réh. Hun irah bakéh Yésus na'at réh mihin anak réh kenat, pu'un irah meta' réh bé' irah keloo' réh mihin éh kenat. 16Bang Yésus tebai kekat irah anak tavin Éh, ka' ha' Néh, Kejeraa' kekat irah anak tuai tavin Akeu', mai meta' réh, uban Allah éh Pengeja'au kekat kelunan éh pu'un kenin barei' kenin irah anak inah. 17Seruh keh jian-jian, séé'-séé' éh bé' alaa' Allah Pengeja'au néh pekua' barei' irah anak si'ik, kelunan inah bé' omok tai lem nihau néh, ha' Yésus.
Tong jah kelunan éh kaya'
(Mat. 19:16-30, Mrk. 10:17-31)
18Pu'un jah pengeja'au kelunan Yahudi tai neteng Yésus, ka' ha' néh, O Guru éh jian, ineu' éh tekep ké' maneu' dokoo' ké' omok alaa' urip pelinguh, ha' néh.
19Ka' ha' Yésus ngan néh, Kineu' ko' bara' Akeu' jian, kelunan bé' éh pu'un jian, Allah awah éh jian. 20#Kel. 20:12-16, Ula. 5:16-20 Ka'au' jam kekat sohoo' lem surat Allah, Mai keh petuyang, mai keh mematai kelunan, mai keh nekau, mai keh kenyo bara' kelunan pu'un maneu' sa'at hun néh bé' pu'un maneu' éh kenat, ngan jah kepéh, sepah tinen tamen ko', ha' Yésus ngan néh.
21Ha' lakei' inah kepéh, Kekat sohoo' néh inah pu'un ku' kivu éh jin hun ké' si'ik, ha' néh.
22Hun Yésus menéng ha' néh pané kenat, boh éh bara' ngan néh kepéh, Jah awah la'ah éh tekep ke' maneu', jian ke' melih kekat livah éh anah ko' ngan mena' kekat rigit éh nalaa' ko' tong néh ngan kelunan kari, boh ke' pu'un pengekaya' tong seruga, la'o inah jian ke' tuai kivu Akeu', ha' Yésus ngan néh. 23Hun lakei' inah menéng ha' Yésus kenat, bahat kenin néh kepéh uban néh kaya' mu'un.
24Yésus jam éh bahat kenin kenat, inah Iah pané kepéh ngan néh, ka' ha' Néh, Ma'an mu'un ngan kelunan kaya' tavin Allah ke' néh Pengeja'au néh. 25Hun néh lumang jah usah unta masek lem luvang bena boh kelunan kaya' omok alaa' Allah Pengeja'au néh, ha' Yésus.
26Kelunan éh menéng ha' néh kenat neteng éh kepéh, ka' ha' réh, Hun néh kenat ida' séé' omok alaa' urip, ha' réh.
27Ha' Yésus mipa réh, Éh bé' omok neu' kelunan péh, omok éh neu' Allah, ha' Néh.
28Boh Péterus bara' ka', Pu'un améé' modoo' lamin mé' ke' mé' kivu ka'au', ha' néh.
29Ha' Yésus ngan néh, Oo', mu'un, barei' ha' ko' nah, bang Akeu' bara' ngan keh, séé'-séé' éh pokoo' lamin néh ngan pokoo' redo néh ngan padéé' néh ngan tinen tamen néh ngan anak néh uban néh maneu' kereja' Allah éh Pengeja'au néh, 30kelunan inah pu'un alaa' éh pelapah pinaa' jin kekat éh pokoo' néh inah lem urip néh hun iteu', kenat péh iah omok alaa' urip pelinguh kepéh vam, ha' Néh.
Tong keteleu' koléé' Yésus bara' tong pematai Néh
(Mat. 20:17-19, Mrk. 10:32-34)
31Yésus tebai irah bakéh Néh éh jah poloo' duah usah nah, ke' Néh petengéé' réh jin irah éh pinaa' nah dokoo' Néh pané ngan réh. Ka' ha' Néh, Menéng keh, hun iteu' tam juk tai tong leboo' Yérusalem, hun tam avéé' sitai kekat-kekat éh senurat irah nabi sahau, éh bara' tong kekat éh juk neu' kelunan tong Anak Kelunan, adang néh pu'un kenat sitai dat. 32Adang irah pu'un mena' Éh ngan kelunan éh tengéé' pohoo' jin pohoo' Yahudi. Adang kelunan inah pu'un peja' Éh ngan pekenyaa' Éh ngan nyula' Iah. 33Adang réh mipok Iah ngan mematai Iah, bang tong éh keteleu' dau Tuhan pu'un pebetéé' Iah murip kepéh, ha' Néh ngan réh.
34Irah éh bakéh Néh, bé' réh nesen tong ha' Néh kenat nah, sin tong ha' Néh inah bé' éh lenaa' ngan réh, bé' réh jam kineu'-kineu' tok ha' Néh éh kenat nah.
Yésus peka'o jah kelunan peseu'
(Mat. 20:29-34, Mrk. 10:46-52)
35Lakau Yésus kepéh avéé' déhéé' leboo' Yerikho. Pu'un jah kelunan peseu' mokoo' déhéé' jalan inah ke' néh menyat belunan ngan kelunan éh masek jalan inah. 36Hun néh menéng ha' kelunan pinaa' masek jalan inah, inah éh neteng réh, ka' ha' néh, Ha' kelunan kineu' itu', ha' néh.
37Boh réh bara' ngan néh, Yésus kelunan Nasaret rai, Iah éh lapah siteu', ha' réh.
38Boh kelunan peseu' nah ngeradau, ka' ha' néh, O Yésus Anak Daud, Ko' pika akeu', ha' néh.
39Boh kelunan éh lakau tenah jin Yésus meta' kelunan peseu' nah ngeradau kenat, nyohoo' éh kelem awah. Bang bé' kelunan peseu' nah kelem, jaa'-jaa' néh éh ngeradau pelapah ja'au ha'. Ka' ha' néh, O Anak Daud, Ko' pika akeu', ha' néh.
40Boh Yésus nah mokoo' ke' Néh nyohoo' kelunan tai tebai kelunan peseu' nah tavin Éh. Hun kelunan peseu' inah avéé' tong Yésus, Yésus neteng éh, 41Ineu' pengeloo' ko' Ké' maneu' ngan ko', ha' Yésus.
Ha' lakei' peseu' nah, O Guru, ko' maneu' ku' omok na'at, ha' néh.
42Boh Yésus bara' kepéh ngan néh ka', Pengelan ko' éh peka'o ke' nah, ha' Néh.
43Tioo omok éh na'at, la'ah pu'un éh kivu Yésus ngan mejing Allah, kenat péh kekat irah éh na'at éh nah péh, irah péh mejing Allah.
Voafantina amin'izao fotoana izao:
LUKAS 18: PNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
