LUKAS 15
15
Tong jah domba éh tawang
(Mat. 18:12-14)
1Pu'un kelunan éh alaa' sukai ngan kelunan penyala' péh tuai tavin Yésus ke' réh menéng ha' Néh. 2Uban kelunan inah pu'un tai tavin Yésus kenat, inah kelunan Parisi ngan irah guru éh nebaraa' tong sohoo' lem Surat Musa selem-selem maneu' Yésus. Ka' ha' réh, Kelunan iteu' alaa' irah kelunan éh sa'at pah avéé' Néh pemung kuman ngan réh, ha' réh. 3Uban irah pané kenat, inah Yésus maneu' jah ha' tapan ngan réh, ka' ha' néh.
4Jian keh seruh, hun néh pu'un jah usah jin belah ka'ah éh pu'un jah ato domba, ngan jah éh tawang jin belah irah pinaa' nah, kineu' éh neu' kelunan éh tepun domba inah? Adang tepun néh modoo' domba éh pinaa' nah lem pagin ke' néh tai pitah éh tawang nah. 5Hun néh jam éh kepéh murung mu'un kenin néh, pelapah éh alaa' éh ke' néh nyu'un éh, 6ke' néh mihin éh tai lamin néh. Avéé' tong lamin néh inah iah tebai kekat bakéh néh ngan kekat irah panak néh ke' néh bara' ka' ngan réh, Jian uleu' béé murung kenin, uban domba ké' éh tawang rai, lepah nalaa' ké' tenéh éh, ha' néh. 7Barei' inah kepéh hun pu'un jah usah éh sa'at éh piso jin penyala' néh, murung mu'un réh tong seruga, pelapah ja'au jin kemurung réh tong pien poloo' pien kelunan jian, éh bé' pu'un maneu' éh tekep ke' néh pekoléé' kenin, ha' Yésus ngan réh.
Tong jah rigit pirek éh metat
8Ka' ha' Yésus kepéh, Hun néh pu'un jah redo éh pu'un jah poloo' rigit pirek, boh jah rigit inah metat, kineu' éh neu' redo inah kepéh? Adang néh seket titui néh ngan pa kekat gelan néh ke' néh pitah éh mu'un-mu'un pah avéé' néh pu'un poléng kepéh. 9Hun néh pu'un alaa' éh, boh éh tebai kekat bakéh néh ngan kekat panak néh ke' néh bara' ka' ngan réh, Jian uleu' béé murung kenin, uban rigit pirek ké' éh metat rai, pu'un éh poléng kepéh, ha' néh. 10Kenat péh kekat meliket Allah murung mu'un réh tong jah kelunan penyala' éh pekoléé' kenin, ha' Yésus.
Tong jah lakei' éh tawang
11La'ah ka' ha' Yésus kepéh, Inah jah ha' tapan ké' kepéh. Pu'un jah kelunan éh pu'un duah anak lakei'. 12Anak néh éh tadin menyat livah jin tamen roh. Ka' ha' néh, O amam, jian ke' tulat livah inah ngan ké' hun iteu', mai mena éh vam, ha' néh. Boh tamen néh petulat kekat livah inah ngan rawah anak inah. 13Bé' lebéé' la'o inah anak tadin nah melih kekat livah éh nena' tamen néh ngan néh nah ke' néh alaa' rigit tong néh, ke' néh tioo lakau tai tana' juu'. Avéé' sitai iah bet rigit néh tong barék éh sa'at, 14pah avéé' kekat rigit néh béé. Bé' lebéé' la'o inah pu'un sioo' la'au' tong tana' inah, lakei' inah bé' pu'un ineu'-ineu' néh, uban kekat livah néh lepah béé. 15Boh iah tai pitah kereja' ngan jah kelunan tong tana' inah. Kelunan inah nyohoo' éh tai térék néh ke' néh mihau idok néh. 16Kelebéé' inah juk matai lah éh la'au', inah iah juk kon padek parai éh ka'an idok nah, bé' pu'un séé'-séé' mena' ka'an ngan néh. 17Boh éh seruh ka' lem kenin néh, Kuraa' kekat kelunan sohoo' éh kereja' ngan tamen ké' rai, adang kekat irah béé pu'un kuman beso siget dau, bang akeu' siteu' juk matai la'au' awah ku'. 18Tekep akeu' moléé' tai tavin tamen ké' ngan bara' ka' ngan néh, O amam, pu'un akeu' maneu' penyala' tong Tuhan kenat péh tong ka'au' péh, 19mai ke' seruh akeu' anak ko' kepéh, jian ke' maneu' akeu' barei' kelunan sohoo' ko' ngan kereja' awah ngan ko', ha' néh lem kenin néh. 20Boh éh betéé' moléé' tai tavin tamen néh.
Hun néh juu' keto jin lamin tamen néh, tamen néh na'at anak inah tuai, iah pika anak néh mu'un-mu'un, tioo nekedeu' éh tavin éh, hun néh avéé' tong néh iah mikop éh ngan siluu' éh. 21Boh anak néh pané ngan néh, ka' ha' néh, Pu'un akeu' lepah maneu' penyala' tong Tuhan ngan tong ka'au' péh, mai ke' seruh akeu' anak ko' kepéh, ha' néh. 22Bang tamen néh tebai kelunan sohoo' néh ke' néh nyohoo' réh alaa' kerayung. Ka' ha' néh, Jian keh tai alaa' kerayung éh jian ke' keh pekerayung éh, kenat péh alaa' tising maneu' éh tong buaa' ojoo' néh ngan maneu' kasut tong gem néh, rigah ke' da'. 23La'o inah jian keh tai alaa' anak sapé' éh lemek rai, ngan mematai éh maneu' ka'an dokoo' uleu' béé omok kuman éh, 24uban anak ké' iteu' lepah matai rai, bang hun iteu' pu'un éh murip kepéh, inah iah lepah tawang rai, hun iteu' inah iah pu'un moléé' kepéh, ha' néh. La'o inah boh réh kuman ngan jian kenin.
25Hun inah padéé' tuken anak tadin nah pu'un tong térék. Hun néh juk moléé' danii' déhéé' lamin, inah éh menéng ha' réh metit sapé' ngan ha' kelunan sayau, 26boh éh tebai jah kelunan sohoo' ke' néh neteng éh, ka' ha' néh, Uban ineu' réh maneu' kenat, ha' néh. 27Ha' kelunan sohoo' nah, Uban padéé' tadin ko' rai, pu'un éh lepah moléé' rit, ha' néh. Tamen ko' nyohoo' réh mematai sapé' éh lemek rai uban néh jian kenin na'at anak néh lepah moléé' ngan jian, ha' kelunan sohoo' ngan néh. 28Merek mu'un-mu'un padéé' tuken néh nah, bé' iah taket tai lamin. Tuhun tamen néh jin lamin ke' néh tebai éh. 29Bang ka' ha' néh ngan tamen néh, Seruh ke', Kuraa' ta'un jin lepah rai akeu' maneu' kereja' ngan ko' pekua' barei' kelunan sohoo' awah, ngan jah-jah koléé' péh bé' ku' ngelapah tong sohoo' ko', bang bé' ka'au' mena' ineu'-ineu' péh ngan ké', jah mék péh bé' ka'au' mena' éh ngan ké' dokoo' ké' maneu' ka'an ngan jian kenin pemung ngan bakéh ké'. 30Bang anak ko' inah, iah bet kekat livah ko' tong barék néh sa'at ngan petuyang péh. Hun néh moléé' pu'un ke' mematai anak sapé' éh lemek dokoo' ko' maneu' ka'an ngan néh, ha' anak tuken inah ngan tamen néh. 31Boh tamen néh bara' ka' ngan néh, O anak ké', ngelayau tuah pu'un pemung, kekat livah ké' siteu' livah ko' ke' éh. 32Adang éh tekep lu' maneu' ka'an ja'au ngan murung kenin, uban padéé' ko' inah lepah matai rai, bang hun iteu' pu'un éh murip kepéh, inah iah lepah tawang rai, ngan hun iteu' pu'un éh lepah moléé' kepéh, ha' tamen néh, ha' Yésus.
Voafantina amin'izao fotoana izao:
LUKAS 15: PNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
