LUKAS 14
14
Yésus peka'o kelunan sakit
1Tong jah dau Posot Yésus tai kuman tong lamin jah pengeja'au irah éh kivu adet Parisi, pu'un kelunan tong néh sinah kepuh ngan ngedalem Éh. 2Tong lamin inah pu'un jah kelunan éh vahut tuai tavin Yésus. 3La'ah Yésus neteng irah guru éh nebaraa' tong sohoo' lem Surat Musa ngan irah éh kivu adet Parisi péh, ka' ha' Néh, Kineu' ukum tebaraa' lu', kineu', omok lu' peka'o kelunan sioo' dau Posot kei? Kineu', bé' lu' omok maneu' éh kenat kei? Ha' Néh.
4Bang bé' irah mipa ha' Néh kenat, irah mokoo' kelem awah. Boh Yésus alaa' kelunan éh vahut nah ke' Néh peka'o éh, la'o inah boh Éh nyohoo' éh moléé'. 5#Mat. 12:11 Boh Yésus pané ngan kekat kelunan pinaa' nah, ka' ha' Néh, Kineu' hun anak ko' pelohoo' lem luvang tong dau Posot, pu'un keh tai metéé' éh. Kenat péh hun sapé' ko' pelohoo' lem luvang, pu'un keh tai metéé' éh.
6Bang bé' réh jam pané mipa ha' Néh kepéh.
Tong tebaraa' tovoo' kelunan tebai keh kuman
7Hun Yésus kuman tong lamin Parisi nah, inah Yésus pu'un na'at jelua' kelunan éh tuai pelelong kuman nah menyun tong retek éh poléng ta'an kekat kelunan ke' réh omok ngajung réh. 8Uban Yésus pu'un na'at réh kenat, inah Iah maneu' jah ha' tapan ngan réh. Ka' ha' Néh, Hun kelunan tebai keh tai pelelong tong kawin, mai keh tioo tai menyun tong retek kelunan omok ngajung keh. Kelunan éh tebai keh tong kuman nah, barang pu'un péh kelunan éh jah éh ja'au ngaran jin ka'au' éh tenebai néh da'. 9Hun kelunan éh tenebai néh inah pu'un tuai, barang kelunan éh tebai ke' ri' tuai kepéh nyohoo' ke' piso jin nyun ko' inah dokoo' kelunan éh ja'au ngaran nah omok menyun sinah kepéh. Menyaa' ke' hun ko' piso kenat. 10#Ams. 25:6-7 Bang hun réh tebai ke' kuman, jian ke' tai menyun juu' si'ik mena ha' kelunan éh tebai ke' nah, tebai ke' menyun tong retek éh kenajung réh. Hun ko' maneu' kenat boh ke' pu'un kenajung kekat kelunan éh kuman sinah nah. 11#Mat. 23:12, Luk. 18:14 Uban siget kelunan éh ngajung usah néh tengéé', iah tai ra' kepéh. Kelunan éh ngera' usah néh iah éh pu'un kenajung réh kepéh, ha' Yésus ngan réh.
12Boh Yésus bara' kepéh ngan kelunan éh tebai' éh tai kuman iri', ka' ha' Néh, Hun ko' tebai kelunan tuai pelelong kuman, mai ke' tebai irah éh bakéh ko' ngan padéé' ko' ngan panak ko' awah, kenat péh mai ke' tebai irah éh kaya' awah. Hun ko' tebai kelunan éh kaya' awah, adang irah pu'un tebai ke' kuman ngan irah kepéh, hun néh kenat inah ka'au' pu'un alaa' éh jin irah kepéh. 13Bang hun ko' tebai kelunan tuai pelelong kuman, jian ke' tebai kelunan éh kari ngan kelunan éh matai keluhat, ngan kelunan paket ngan kelunan peseu', 14boh ke' jian, uban bé' irah omok maneu' ineu'-ineu' éh ke' réh mena' ngan ko' kepéh. Tovoo' Tuhan metéé' kelunan jian jin patai réh, boh Tuhan pu'un mena' oléé' néh ngan ko' kepéh, ha' Néh.
Ha' tapan tong kelunan éh tenebai kelunan ja'au tai kuman ja'au
(Mat. 22:1-10)
15Tong irah éh pemung kuman ngan Yésus nah, pu'un jah usah jin belah réh hun néh menéng ha' Yésus kenat, inah iah pané ngan néh, ka' ha' Néh, Murung mu'un kelunan éh omok kuman pemung ngan Tuhan hun Allah tuai Pengeja'au, ha' Néh.
16Ka' ha' Yésus ngan néh, Pu'un jah kelunan juk maneu' ka'an ja'au, kelunan inah bara' kenat ngan kuraa'-kuraa' kekat kelunan éh juk nihin néh tong kuman ja'au inah. 17Teka réh juk kuman lah, boh éh nyohoo' jah kelunan sohoo' néh tai tebai irah éh lepah tenebai néh nah. Ka' ha' néh, Hun iteu' kekat ka'an lepah petenup ké' tenéh, tuai tam kuman éh, ha' néh. 18Kekat irah éh tenebai néh inah, pekua' kenin réh bé' keloo' tai. La'ah ha' jah usah ngan kelunan sohoo' nah, Akeu' menyat pika uban ké' pu'un térék, adang tekep ku' tai mavaa' éh, bé' ku' omok tuai tai kuman ja'au inah, ha' néh. 19Ka' ha' kelunan éh tengéé' kepéh, Akeu' menyat pika uban ké' pu'un melih jah poloo' usah kelubau, inah akeu' keloo' tupat mihin éh kereja' ngalei' tana'. Uban néh kenat bé' ku' pu'un tai kuman ja'au inah, ha' néh. 20Ka' ha' kelunan éh tengéé' kepéh, Bé' akeu' pu'un tai kuman ja'au inah uban ké' maréng kawin, akeu' keloo' mokoo' ngan redo ké' awah, ha' néh. 21La'o inah moléé' kelunan sohoo' ri' tai tavin pengeja'au néh ke' néh bara' kekat irah éh tenebai rai bé' keloo' tuai kuman ja'au inah lah. Merek mu'un-mu'un pengeja'au nah lah. Boh éh nyohoo' kelunan sohoo' iri' tai tebai kelunan éh jah kepéh. Ka' ha' néh, Semah-semah lamin kelunan kari, sinah ke' tai ngan tebai réh tuai kuman, kenat péh tong kelunan éh matai keluhat, ngan kelunan éh peseu' maten, ngan kelunan éh paket péh. Rigah ke' da', ha' néh ngan kelunan sohoo' nah. 22Bé' makat lebéé' la'o inah, moléé' kepéh kelunan sohoo' ri' tavin pengeja'au néh. Ka' ha' néh ngan pengeja'au nah, O lakei' ja'au, pu'un akeu' tai pekua' sohoo' ko' rit, ngan pu'un réh tuai, bang ja'au keto giwang éh bé' pu'un kelunan tong néh, ha' néh. 23Boh pengeja'au nah bara' ngan kelunan sohoo' nah kepéh, ka' ha' néh, Jian ke' tai, tai kepéh semah-semah éh bé' sakui tenebai ko' ri, inah ko' tebai kepéh, dokoo' lamin ké' penoo' neu' réh. 24Bé' sapét jah usah péh kelunan éh bu'un tenebai ké' inah éh omok pemung kuman ngan ké', ha' lakei' ja'au nah, ha' Yésus ngan réh.
Kelunan éh seruh juk kivu Tuhan jian iah seruh jian-jian tenah
(Mat. 10:37-38)
25Pu'un kelunan pinaa' kivu Yésus, Yésus pupah ke' Néh bara' ngan réh, ka' ha' Néh, 26Kelunan séé'-séé' éh juk tuai bakéh ké', hun néh bé' leko tong tamen tinen néh, ngan leko tong redo néh, ngan tong anak néh, ngan tong padéé' néh lakei' ngan padéé' néh redo péh, kenat péh tong urip néh, adang néh bé' omok bakéh Ké'. 27#Mat. 10:38, 16:24, Mrk. 8:34, Luk. 9:23 Kelunan séé'-séé' éh bé' alaa' salib néh tengéé' ngan kivu Akeu', adang néh bé' omok bakéh Ké', ha' Néh. 28La'ah ka' ha' Yésus kepéh, Kineu' hun kelunan juk maneu' lamin, bé' éh mokoo' seruh tenah tong rigit néh hun sukup ngan bé' péh. 29Hun néh bé' pu'un seruh éh, na' péh réh lepah mejek kekat jek néh, hun balun néh bé' pu'un adang réh bé' omok petok gelan tong néh. Hun néh kenat boh kekat kelunan éh na'at éh mala' awah. 30Boh kelunan bara', Na'at lamin kelunan inah, irah tupat maneu' lamin bang bé' éh omok pesuai mu'un, ha' réh. 31Jah la'ah, hun néh pu'un jah raja' éh pu'un jah poloo' ibu seradu, hun néh seruh juk tai ngayau irah seradu éh duah poloo' ibu anah jah raja' éh jah kepéh, adang tekep éh mokoo' seruh jian-jian tenah, ke' néh jam hun anah seradu iteu' omok gahang jin seradu éh duah poloo' ibu anah jah raja' nah. 32Hun néh lepah seruh kenat hun seradu néh iteu' bé' omok nyopéé' irah pinaa' inah, to raja' éh jah inah juu', adang néh nyohoo' kelunan tai temeu' ngan raja' nah ke' néh neteng éh tong jalan néh ngepawah pekayau inah. 33Barei' inah péh bé' pu'un séé'-séé' péh omok bakéh Ké' hun néh bé' bet kekat-kekat éh anah nah, ha' Néh.
Tong usen tai mabah
(Mat. 5:13, Mrk. 9:50)
34Ka' ha' Yésus kepéh, Adang usen nah méé éh, bang hun néh mabah, bé' lu' omok pekeméé' éh kepéh. 35#Mat. 5:13, Mrk. 9:50 Hun néh mabah kenat bé' pu'un gunah néh la'ah, bé' lu' omok pakai éh, bé' ke' lu' omok alaa' éh baja' pulah lu', nebet lu' awah éh. Kelunan éh pu'un kelingen tekep éh menéng, ha' Néh ngan réh.
Voafantina amin'izao fotoana izao:
LUKAS 14: PNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
