LUKAS 11
11
Yésus nebaraa' irah sebayang
(Mat. 6:9-13, 7:7-11)
1Jah koléé' tovoo' Yésus sebayang tong jah jalan, la'o Néh sebayang nah, inah jah bakéh Néh nyohoo' Éh nebaraa' réh sebayang. Ka' ha' néh, O Tuhan, jian Ke' nebaraa' améé' sebayang barei' Yohanes nebaraa' irah éh bakéh néh rai, ha' néh. 2Ha' Yésus ngan réh, Hun keh sebayang, ka' ha' sebayang keh,
O Tamen mé',
Jian éh ngaran Ko' pu'un peparen.
Ka'au' éh Raja' améé'.
3Mena' sukup penguman ngan améé' dau iteu'.
4Jian ke' mega' kekat kesa'at améé' barei'-okoo' améé' mega' kesa'at irah éh ngesa'at améé'.
Mai kejeraa' améé' teneng tong tenupat. Barei' inah ha' keh sebayang, ha' Néh.
5Ha' Yésus ngan irah éh bakéh Néh, Akeu' maneu' jah ha' tapan. Barang pu'un jah usah jin belah ka'ah tai lamin jah bakéh néh belu'an merem ke' néh menyat ka'an. Ha' néh ngan bakéh néh éh tong lamin nah, O kéh, kineu' ke' pu'un roti? Hun néh pu'un akeu' juk menyat teleu' roti jin ka'au'. 6Uban pu'un jah bakéh ké' éh tuai jin juu' avéé' tong lamin ké', bang bé' pu'un ineu'-ineu' ké' mena' ngan néh, ha' néh. 7Boh bakéh ko' éh lem lamin nah mipa ha' ko' ka', Mai ke' petusah akeu', usit tapé ké' iteu' lepah kenusi ké' éh, ngan kekat irah anak ké' péh pu'un réh pegen ngan ké' siteu', bé' akeu' omok betéé' mena' ineu'-ineu' ngan ko', ha' néh. 8Ha' Yésus kepéh, Kineu' hun néh pu'un ha' kenat? Akeu' bara' ngan keh, na' péh ke' bakéh néh mu'un, bé' iah keloo' betéé' mena' éh ngan ko', bang uban ka'au' menyat ngan ngusii' éh mu'un-mu'un, pu'un éh betéé' ngan mena' éh nenyat ko' nah. 9Kenat péh ha' Ké' ngan keh, jian keh menyat boh keh omok alaa' éh, jian keh pitah boh keh pu'un éh, jian keh ngatong usit tapé, boh éh omok pukap ngan keh. 10Uban siget-siget kelunan éh menyat jin Allah, pu'un éh alaa' éh kepéh, ngan siget-siget kelunan éh pitah, pu'un éh alaa' éh penitah néh nah, ngan siget-siget kelunan éh ngatong usit tapé, Allah mukap usit tapé ngan néh. 11Ka'ah éh tamen hun anak ko' menyat seluang, kineu', pu'un ke' mena' torok ngan néh? 12Ngan hun anak ko' menyat jah ilo, kineu', duyung nena' ko' ngan néh? Adang néh bé' kenat. 13Hun ka'ah kelunan éh sa'at awah jam mena' kekat éh jian ngan anak keh, makin péh Tamen keh éh tong seruga, adang Iah omok mena' Sahéé' Ni'ai ngan kelunan éh menyat ngan Néh, ha' Néh ngan irah éh bakéh Néh.
Tong Yésus ngan balei' Beelsebul
(Mat. 12:22-30, Mrk. 3:20-27)
14Pu'un Yésus mega' jah balei' mameng jin jah kelunan. La'o balei' inah pega', boh kelunan inah omok pané. Hun kelunan pinaa' nah na'at éh kenat, béé kenin réh. 15#Mat. 9:34, 10:25 Bang ha' jelua' réh, Pu'un iah mega' balei' neu' kerenget Beelsebul éh pengoloo' balei', ha' jelua'.
16 #
Mat. 12:38, 16:1, Mrk. 8:11 Pu'un jelua' kepéh éh juk jam hun néh jin Allah ngan hun néh bé' péh, inah irah nyohoo' Yésus maneu' telana' éh omok pepoléng iah maneu' éh kenat neu' penyukat Allah. 17Yésus jam kekat éh seneruh réh kenat, boh Éh bara' ngan réh, Ka' ha' Néh, Hun néh pu'un kelunan éh pekelawan tong jah tana', adang irah éh pekelawan inah pata matai béé, kenat péh hun néh pu'un irah tong jah leboo' pekelawan kenat, adang leboo' inah laho béé. 18Hun néh kenat kineu' Sitan, hun Sitan pu'un irah éh pekelawan kenat, kineu' Sitan, omok éh kelevit réh? Ha' ka'ah bara' Akeu' pu'un mega' balei' neu' kerenget Beelsebul. 19Hun ké' pu'un mega' balei' kenat, kineu' jalan irah éh kivu ka'ah nah mega' balei' nah, irah éh kivu ka'ah, irah péh pekelenaa' ha' keh inah pu'un sala'. 20Neu' penyukat Allah inah Akeu' mega' balei', inah éh nelana' Allah pu'un belah keh ke' Néh Pengeja'au, ha' Néh.
21Ha' Yésus kepéh, Hun néh pu'un jah kelunan éh gahang usah mavaa' lamin néh ngan kekat lajam néh pu'un éh petenup néh tenéh, boh kekat anah nah pu'un petem. 22Bang hun néh pu'un jah kelunan éh pelapah gahang kepéh jin iah, maneu' ngan nyopéé' éh, boh kelunan éh nyopéé' éh nah alaa' kekat lajam néh éh juk kenelan néh inah ri', ngan petulat kekat livah éh tenekau néh inah ngan réh.
23 #
Mrk. 9:40
La'ah kelunan éh bé' ngebakéh akeu' seleket néh ayau ké'. Kelunan éh bé' pu'un nolong Akeu' pitah kelunan éh tawang, seleket néh pepurat réh awah, ha' Yésus ngan réh.
Tong jah balei' éh moléé' tong lamin néh bu'un
(Mat. 12:43-45)
24Ha' Yésus kepéh, La'o balei' pega' jin kelunan, lakau éh tong tana' ke' néh pitah jalan néh mokoo'. Hun néh bé' pu'un jalan mokoo', boh éh seruh lem kenin néh, Jian ku' moléé' tai lamin ké' bu'un ri', kelem néh.
25Boh éh moléé' kepéh. Iah jam lamin néh inah lepah jian ngan lepah petenup réh tenéh. 26Boh éh mihin tujuu' balei' éh jah kepéh éh pelapah sa'at jin iah ke' néh alaa' réh mokoo' ngan néh tong lamin inah. La'ah kelunan éh jalan balei' inah, ga' néh pelapah sa'at jin hun bu'un néh ri', ha' Néh.
Tong murung kenin
27La'o Yésus pané kenat pu'un jah redo jin belah kelunan pinaa' nah bara' ngan Néh. Ka' ha' néh, Murung kenin redo éh nganak ke' ngan éh petubo ke', ha' néh.
28Ha' Yésus mipa éh, Oo', mu'un éh kenat, bang pelapah murung kepéh irah éh menéng ha' Allah ngan kivu éh, ha' Néh.
Irah nyohoo' Yésus maneu' telana'
(Mat. 12:38-42)
29 #
Mat. 16:4, Mrk. 8:12 Tovoo' kelunan pinaa' nyikeu' Yésus, inah Yésus pané kepéh ngan réh, ka' ha' Néh, Kekat kelunan éh pu'un murip keto hun iteu', sa'at mu'un réh. Pu'un réh nyohoo' Akeu' maneu' jah telana' éh pepoléng Akeu' éh Anak Allah, bang bé' Akeu' maneu' éh kenat, inah awah jalan réh omok jam Akeu' éh Anak Allah, pekua' telana' tong Yunus sahau rai. 30#Yun. 3:4 Yunus iah jah telana' ngan kelunan tong leboo' kapan Niniwé, kenat péh Anak Kelunan kepéh jah telana' ngan kelunan éh pu'un murip hun iteu'. 31#1 Raj. 10:1-10, 2 Taw. 9:1-12 Tong Dau Tuhan juk ngukum kekat kelunan, redo éh Raja' irah tong jah tana' éh juu' mu'un, iah pu'un nekedéng ngan bara' keh sala'. Redo inah nah lakau jin tana' éh juu' mu'un ke' néh menéng ha' tebaraa' éh benara' Raja' Salomo sahau rai, uban Salomo nah jam seruh. La'ah Akeu' bara' ngan ka'ah, Akeu' éh pelapah ja'au jin Salomo kepéh. 32#Yun. 3:5 La'ah tong Dau Tuhan ngukum kelunan, irah kelunan jin Niniwé pu'un nekedéng bara' sala' keh, uban hun irah inah menéng ha' tebaraa' Tuhan éh benara' Yunus ngan réh, pu'un réh piso jin penyala' réh. Akeu' bara' ngan keh, Akeu' pelapah ja'au jin Yunus kepéh.
Tong maten kenin
(Mat. 5:15, 6:22-23)
33 #
Mat. 5:15, Mrk. 4:21, Luk. 8:16 Hun kelunan seket titui néh, bé' éh melim éh ngan modoo' éh ra' tekup, pu'un éh mejing éh dokoo' kelunan omok na'at nawa néh. 34La'ah maten keh inah, inah éh barei' jah titui tong usah keh. Hun maten ko' pu'un jian, boh ketem lo'ong usah ko' pu'un tong rema, bang hun maten ko' pu'un sa'at, boh ketem lo'ong usah ko' pu'un tong merem awah. 35#Mat. 6:22-23 Jian ke' mavaa' jian-jian dai maten kenin ko' tai merem awah. 36Hun ketem lo'ong usah ko' pu'un tong rema, ngan si'ik-si'ik ke' péh bé' éh pu'un tong merem, boh ke' pu'un nawa ta'an barei' hun titui éh pu'un perema lem lamin.
Yésus maneu' kelunan Parisi ngan irah guru éh nebaraa' tong sohoo' lem Surat Musa
(Mat. 23:1-36, Mrk. 12:38-40)
37La'o Tuhan Yésus pané kenat ngan réh, boh jah kelunan Parisi tebai Éh tai pelelong kuman ngan néh, inah Yésus pu'un tai kuman pekua' tenebai néh inah. 38Béé kenin kelunan Parisi nah na'at Yésus kuman bé' jak mohéé' ojoo' Néh pekua' adet irah Parisi. 39Inah Tuhan pané ngan Néh, ka' ha' Néh, Pinaa' adet ka'ah kelunan Parisi pohéé' likot sawan ngan pigan, bang lem kenin keh pu'un buyuk ngan pinaa' arong kesa'at. 40Palui ka'ah, hun Allah maneu' likot néh, kineu' bé' éh maneu' lem néh kepéh? 41Jian keh mena' kekat éh pu'un lem sawan ngan pigan keh ngan kelunan kari, boh kekat inah pu'un mebéng, ha' Néh ngan réh.
42 #
Ima. 27:30
Tusah mu'un ka'ah kelunan Parisi, uban malai keh petulat kekat éh tong pulah keh, avéé' buaa' éh si'ik barei' buaa' selasih ngan buaa' inggu ngan kekat tong éh si'ik kenat. Malai keh petulat éh ngan mena' éh ngan Allah, bang tong keh maneu' kekat éh pejek ngan kelunan ngan tong penika Allah bé' keh maneu' éh. Hun keh maneu' éh pejek ngan éh teneng tong penika Allah tenah, inah éh pelapah jian. Jian keh maneu' kenat, bang mai keh ngelapah tong éh jah nah.
43Tusah mu'un ngan ka'ah kelunan Parisi, uban hun keh tai tong lamin sebayang, pu'un keh menyun retek keh omok poléng ta'an kekat kelunan uban keh keloo' réh ngajung keh, kenat péh keh keloo' réh ngajung keh tong jalan pebelih. 44Tusah mu'un ngan ka'ah, uban keh barei' tanem éh bé' pu'un telana' ineu' ke' réh jam éh jalan patai kelunan boh kelunan lakau bau néh uban réh bé' jam éh, ha' Néh.
45Pu'un jah guru éh nebaraa' tong sohoo' lem Surat Musa pané ngan Tuhan, ka' ha' néh, O Guru, hun ko' pané kenat, inah ka'au' maneu' pah avéé' améé' péh, ha' néh.
46Ka' ha' Yésus mipa éh, Oo', mu'un ha' ké' kenat maneu' pah avéé' ka'ah guru nah, uban neu' kekat sohoo' keh tong dau posot éh bara', mai maneu' iteu' ngan mai maneu' barei' inah, neu' ha' keh kenat, inah keh seleket pebii' irah éh jah tong livah éh bahat, bang bé' sapét si'ik ke' ka'ah nolong réh bii' éh. 47Pu'un ka'ah maneu' kuraa'-kuraa' beték éh jian retek tanem irah nabi Tuhan, éh penatai irah tepun keh. 48Neu' kuraa'-kuraa' beték keh inah, inah éh pepoléng kenin keh pekua' kenin tepun keh éh mematai kelunan inah. Tepun keh nah mematai irah nabi, ka'ah éh maneu' lamin éh jian layan bau retek tanem réh. 49Uban keh pu'un maneu' éh kenat, inah Allah neu' Sahéé' Ni'ai pu'un bara', Akeu' nyohoo' kuraa' nabi ngan irah lawah péh tai nebaraa' réh, jelua' réh pu'un éh penatai réh, ngan jelua' pu'un réh peketa éh, kenat ha' Allah. 50Neu' keh maneu' kenat, inah ukum éh tekep teneng tong kekat kelunan éh mematai kelunan éh bara' ha' Tuhan éh penatai réh jin bu'un-bu'un tana', 51#Kej. 4:8, 2 Taw. 24:20-21 inah éh jin Habel éh bu'un penatai réh, pah avéé' Sakaria éh penatai réh tong Umaa' Allah belah retek réh motong ka'an ngan retek éh ni'ai. Ha' ké' mu'un, ukum éh tekep teneng tong kekat irah éh mematai réh inah, ukum inah juk teneng tong kekat ka'ah éh murip hun iteu' kepéh, ha' Yésus ngan réh.
52Tusah mu'un ngan ka'ah guru éh nebaraa' tong Surat Musa, uban ka'ah mapat jalan éh mihin kelunan jam Allah, ka'ah tengéé' bé' keloo' kivu éh, kelunan éh jah éh juk kivu éh, ka'ah maneu' réh kepéh. Kenat ha' Tuhan Yésus pané ngan irah Parisi pah avéé' ngan irah guru nah.
53Hun Yésus piso jin sinah, irah guru éh nebaraa' tong Surat Musa ngan kelunan Parisi, pu'un réh maneu' éh mu'un-mu'un. 54Pinaa' arong éh teneteng réh ngan Néh, pu'un réh neteng Éh kenat ke' réh juk pesala' Éh hun néh pu'un ineu'-ineu' ha' bé' teneng.
Voafantina amin'izao fotoana izao:
LUKAS 11: PNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
