LUKAS 10
10
Yésus nyohoo' tujuu' poloo' duah usah bakéh Néh tai lakau
1La'o inah Tuhan ngevéléé' tujuu' poloo' duah usah kepéh ke' Néh nyohoo' réh lakau peduah-duah usah tai tenah tong siget leboo' ngan tana' éh juk tenavin Nah ke' kepéh. 2#Mat. 9:37-38 Ka' ha' Néh ngan réh, Pinaa' mu'un parai éh lepah mesak, bang kerat awah kelunan éh tai majau éh, uban néh kenat jian keh sebayang ngan Iah éh pu'un térék inah, menyat Éh nyohoo' kelunan pinaa' tai majau éh kepéh. 3#Mat. 10:16 Jian keh tai. Akeu' nyohoo' keh tai barei' anak domba belah bekuleu'. 4Hun keh lakau mai keh mihin rigit, ngan mai keh mihin gaweng jalan keh menyat belunan, ngan mai keh mihin kasut. Hun kelunan pu'un petemeu' ngan keh vevilang jalan, mai keh bubuu' neu' réh. 5Hun keh taket tong lamin kelunan, jian keh bara' ka' tenah, Pawah kenin kekat kelunan tong lamin iteu'. 6Hun pu'un kelunan sinah éh pawah kenin, jian ha' keh éh bara' pawah nah pu'un ngelayau kenat tong irah. Hun kelunan sinah bé' pu'un pawah kenin, ha' keh éh bara' pawah nah, seleket néh bé' pu'un awah. 7#1 Kor. 9:14, 1 Tim. 5:18 Semah kelunan éh alaa' keh ngan jian kenin, tong lamin kelunan inah keh mokoo' ngan kuman ngan mesep ineu'-ineu' éh nena' réh ngan keh. Mai keh menyaa', uban kelunan éh kereja' tekep éh alaa' oléé' néh kepéh, ngan mai keh piso tai lamin irah éh jah kepéh. 8Tong leboo' semah-semah keh tai, hun réh alaa' keh ngan jian kenin, jian keh kuman ineu'-ineu' éh nena' réh ngan keh. 9Kelunan éh sakit tong leboo' inah, jian keh peka'o réh ngan jian keh bara' ngan réh, Danii' jaka' Allah Pengeja'au keh, ha' keh ngan réh. 10Bang tong leboo' semah-semah keh tai hun réh leko alaa' keh, jian keh musit jin lamin réh tai tong jalan totoo' ngan bara' ka', 11#Mat. 10:7-14, Mrk. 6:8-11, Luk. 9:3-5 #Peng. 13:51 Agaa' tana' jin leboo' keh éh nyalit tong gem mé', inah améé' nepaga' éh, dokoo' keh jam ka'ah tengéé' ke' tagong penyala' keh. Bang nesen keh, dau iteu' pu'un Allah tavin keh ke' Néh juk Pengeja'au keh, bang pu'un ka'ah bet Éh awah, kenat ha' keh ngan réh. 12La'ah Akeu' bara' mu'un ngan keh, tong Dau Allah pu'un ngukum kelunan, pelapah ja'au penika Néh ngan irah jin tana' Sodom, jin penika Néh ngan kelunan éh leko alaa' keh nah, ha' Néh.
Tong leboo' éh bé' ngelan tong Tuhan
(Mat. 11:20-24)
13 #
Yes. 23:1-18, Yeh. 26:1—28:26, Yol. 3:4-8, Amo. 1:9-10, Sak. 9:2-4 Ka' ha' Yésus kepéh, Tusah mu'un ka'ah tong leboo' Kurasin, kenat péh ka'ah éh tong leboo' Betsaida. Pinaa' arong telana' éh ja'au éh ngebéé kenin keh rai, hun Ké' pu'un maneu' kekat telana' kenat tong leboo' Tirus ngan Sidon, adang irah pu'un piso jin penyala' réh ngan mokoo' petem pakai réh talun ngan mena' aveu' bau ulun réh, dokoo' réh pepoléng réh pu'un piso jin penyala' réh tenéh. 14Tong Dau Tuhan ngukum kelunan, pelapah ja'au penika Néh ngan irah tong leboo' Tirus ngan Sidon, jin penika Néh ngan ka'ah. 15#Yes. 14:13-15 Jah la'ah ka'ah tong leboo' Kapernaum, ka'ah pu'un seruh keh omok kenajung avéé' tong seruga, bang bé' keh omok kenat, adang keh nebet réh tong luten meraka awah, ha' Néh.
16 #
Mat. 10:40, Mrk. 9:37, Luk. 9:48, Yoh. 13:20 Ka' ha' Yésus kepéh ngan irah éh bakéh Néh, séé'-séé' éh mihau ha' keh, inah irah mihau ha' Ké' kepéh. Séé'-séé' éh bet ka'ah inah irah bet Akeu' kepéh, séé'-séé' éh bet Akeu' inah irah bet Iah éh nyohoo' Akeu' tuai, ha' Néh ngan réh.
Tong irah tujuu' poloo' duah usah rai moléé' kepéh
17La'ah irah éh tujuu' poloo' duah usah éh senohoo' Néh lakau rai moléé' kepéh réh ngan murung kenin. Ka' ha' réh ngan Tuhan, O Tuhan, hun améé' nyohoo' kekat balei' pega' jin kelunan neu' ngaran Ko', pu'un éh pega', ha' réh.
18Ka' ha' Yésus mipa ha' réh, Mu'un éh pu'un pega' uban Tuhan lepah nyopéé' Sitan. Pu'un Tuhan bet éh jin seruga. Akeu' pu'un na'at éh kenat mu'un, barei' lu' na'at kela'ap rai. 19#Msm. 91:13 Seruh keh jian-jian, Akeu' nyohoo' keh nyaga' torok ngan duyung péh, kenat péh Akeu' nyohoo' keh nyopéé' ayau keh, inah éh Sitan. Jah ineu' péh bé' éh omok maneu' keh. 20Na' péh balei' omok pega' neu' ha' keh, mai keh murung kenin tong inah awah, bang jian keh murung kenin uban ngaran keh pu'un lem surat Tuhan tong seruga, ha' Yésus.
Yésus murung kenin
(Mat. 11:25-27, 13:16-17)
21Sioo' inah Yésus penoo' neu' kemurung jin Sahéé' Ni'ai, inah Éh sebayang, ka' ha' Néh, O Tamen Ké' éh Tuhan tong langit ngan tong tana' péh, Akeu' bara' jian kenin ngan Ko' uban kekat éh nelim Ko' jin irah éh pu'un ngaran tong tana' éh pu'un pekalai tong kuraa'-kuraa' arong, pu'un Ke' pepoléng éh ngan irah éh bé' pu'un ngaran tong tana', ngan éh bé' pu'un pekalai tong ineu'-ineu' péh. O Tamen Ké', pu'un Ke' maneu' éh kenat kivu pengeloo' Ko' ngan éh seneruh Ko' tengéé'.
22 #
Yoh. 3:35, 10:15 Pu'un Tamen Ké' lepah mena' kekat ineu'-ineu' ngan Ké', bé' pu'un séé'-séé' éh jam Akeu' iteu' éh Anak ko', bang ka'au' éh Tamen ké' awah éh jam Akeu'. Kenat péh bé' pu'un séé'-séé' éh jam ka'au' éh Tamen Ké', bang Akeu' éh Anak ko' awah éh jam ka'au', ngan irah éh jah hun Ké' keloo' pepoléng Ke' ngan réh boh réh omok jam ka'au' kepéh, ha' Néh.
23Boh Yésus pupah ke' Néh pané selim awah ngan irah éh bakéh Néh, ka' ha' Néh, Murung kenin keh uban kekat éh ta'an keh nah. 24Uban pinaa' nabi Tuhan sahau ngan irah raja' sahau rai éh keloo' mu'un na'at éh ta'an keh inah, ngan keloo' mu'un réh menéng kekat éh nenéng keh inah, bang bé' réh omok, ha' Néh.
Ha' tapan tong kelunan Samaria éh jam pika
25Pu'un jah guru éh nebaraa' tong sohoo' lem Surat Musa tuai tavin Yésus ke' néh jam hun ha' tebaraa' Yésus inah pu'un teneng ngan hun néh bé' péh. Boh éh neteng Yésus, ka' ha' néh, O Guru, ineu' tekep ké' maneu' dokoo' ké' omok alaa' urip pelinguh, ha' néh.
26Ka' ha' Yésus mipa éh, Kineu' ha' lem surat Allah, ineu' sin néh, ha' Néh.
27 #
Ima. 19:18, Ula. 6:5 Ha' lakei' inah mipa éh kepéh, Ka' ha' lem surat Allah rai de', Tekep ke' murung Tuhan Allah ngan kekat kenin ko', ngan kekat usah ko' ngan kekat pengegahang ko', ngan kemekat penyeruh ko'. Tekep ke' murung padéé' ko' pekua' ke' murung usah ko' tengéé', kenat ha' lem surat Allah rai, ha' lakei' inah ngan Yésus.
28 #
Ima. 18:5
Ha' Yésus ngan néh kepéh, Oo', teneng néh ha' ko' bara' éh kenat, hun ko' maneu' éh kenat boh ke' omok murip, ha' Yésus ngan néh.
29Uban lakei' inah seruh iah pu'un kivu kekat sohoo' inah, inah éh neteng Yésus kepéh. Ka' ha' néh, séé' éh padéé' ké' kepéh, ha' néh.
30La'ah Yésus mipa éh kepéh palaa' ha' tapan. Ka' ha' Néh, Pu'un jah kelunan lakau jin leboo' Yérusalem tai Yerikho. Belu'an jalan néh lakau nah, inah pejamun maneu' éh. Pejamun nah alaa' kekat pakai néh ngan mipok kelunan inah ngan irah bet éh danii' néh juk matai. 31Sioo' inah péh jah imam tai masek jalan inah kepéh. Hun néh avéé' tong lakei' éh neu' pejamun nah, iah na'at éh awah, tioo éh lapah tong néh awah. 32Kenat péh pu'un jah kelunan Lewi masek jalan inah kepéh. Hun néh jam lakei' éh neu' pejamun inah, tai éh na'at éh awah, boh éh pelapah lakau kepéh. 33La'o inah pu'un kelunan Samaria masek jalan inah kepéh. Hun néh jam lakei' éh neu' pejamun nah, penika néh mu'un-mu'un éh. 34#2 Taw. 28:15 Tioo tai éh tavin éh ke' néh mujek nyak-tawan ngan baa' agun tong suhat lakei' inah, ngan ke' néh ngejeret suhat néh. Boh éh metéé' éh bau keledai éh jalan néh lakau ri' ke' néh mihin éh tai lamin sakai ngan petubo éh sinah. 35Barei' sagam iah mena' duah rigit pirek ngan lakei' éh mihau lamin sakai nah, ngan nyohoo' éh petubo lakei' éh neu' pejamun nah jian-jian. Ka' ha' néh ngan lakei' ja'au inah, Jian ke' petubo éh jian-jian, hun ké' moléé' kepéh temurei', kekat éh penakai ko' petubo éh nah boh ku' mena' éh ngan ko' kepéh, ha' néh.
36Boh Yésus pané ngan guru iri' kepéh, ha' Néh, séé' jin belah réh teleu' inah éh padéé' lakei' éh neu' pejamun nah seneruh ko', ha' Néh.
37Boh guru inah mipa éh, Kelunan éh pika éh nah, ha' néh. Ha' Yésus kepéh, Hun néh kenat tai ke' maneu' pekua' kelunan éh jam pika nah kepéh, ha' Néh.
Yésus tai nepah Marta ngan Meriam
38Lakau Yésus kepéh ngan irah éh bakéh Néh ke' néh tai jah leboo'. Tong leboo' inah pu'un jah redo ngaran néh Marta. Marta nah alaa' Yésus tong lamin néh ngan jian kenin. 39#Yoh. 11:1 La'ah Marta pu'un jah padéé' néh éh redo, ngaran néh Meriam. Meriam mokoo' déhéé' gem Tuhan ke' néh menéng ha' tebaraa' Néh. 40Bang tusah kenin Marta uban pinaa' kereja' néh, inah éh tai tavin Tuhan ke' néh bara' kenat ngan Néh. Ha' néh, O Tuhan, bé' Ke' jam akeu' kereja' tengéé' éh ke' ko' bé' nyohoo' padéé' ké' nah tuai nya'ap ku'. Jian Ke' nyohoo' éh tuai nya'ap ku', ha' néh.
41Ha' Tuhan mipa éh, Marta, Marta, tusah mu'un kenin ko' ngan mutau ke' neu' kereja' ko' pinaa' nah, 42bang pu'un jah éh pelapah jian jin kekat inah, uban Meriam nah pu'un éh ngevéléé' éh jian, éh jian inah bé' éh omok nalaa' réh jin iah kepéh, ha' Yésus ngan néh.
Voafantina amin'izao fotoana izao:
LUKAS 10: PNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
