Mpiin 28
28
1Aisak nan yin Jakob, le ki doon u, le ki bui u, “Taa yoor Kanaann aatiŋ kee ni aapiibo. 2Li cha Mesopotamia aatiŋ ni, aayaaja Betuel do, ki ti yoor nima chee aapiibo, aaweeja Labann aabisatiib ponn ni ubaa. 3Uwumbɔr Mpɔɔnsakpiindaan ŋa tinyoor ŋa aa ni aapuu pu, ki cha ni maa pɔr sakpen, nima kan, aa ga li ye ŋitimbol pam aate. 4Uwumbɔr ŋa tinyoor ŋa aa ni aayaabitiib pu, ke waah ŋa tinyoor ŋa aayaaja Abraham pu pu na, aan ki cha aa gaa kitiŋ ki u nan di tii aayaaja Abraham aan aa bi ki ponn ni na.” 5Kina le Aisak nan cha Jakob buen Mesopotamia aatiŋ ni, uweeja Labann do. Labann nan ye Aram aatiŋ aanii Betuel aajapɔɔn, ki mu ye Jakob ni Esɔ aana Rebeka aaninja la.
Esɔ aah nan ki yoor upii uken pu na aabɔr
6Esɔ nan ŋun ke ute Aisak ŋa tinyoor ŋa Jakob pu, le ki bui u ke u li cha Mesopotamia aatiŋ ni, ki ti ban upii nima chee. U nan ki ŋun ke Aisak aah ŋa tinyoor ŋa u pu na, u nan sur u ke u taa yoor Kanaann aapiibo. 7U nan bee ke Jakob kii ute ni una aamɔb ki buen Mesopotamia aatiŋ ni. 8Esɔ nan bee ke ute Aisak aa gee ke bi yoor Kanaann aapiibim. 9Nima pu na, u nan buen Ismael, u nan ye Abraham aajapɔɔn na chee, le ki ti yoor ubisal Mahalaf u nan ye Nebayof aaninkpan na, ki di kpee upuutiib biken na pu.
Jakob aah nan daŋ tidaŋ pu na aabɔr
10Tɔ, Jakob nan nyan Beerseba le ki nan cha Harann wɔb. 11Nwiin aah nan ti lir na, le u fuu nibaa chee le ki doon nima. U nan doon ke u geen, le ki di uyil kur litakpal libaa. 12U nan doon daŋ ke u kan mpijadɔ si kitiŋ ki ti tuu paacham, le Uwumbɔr aatuuntiib chuun mu pu ki cha paacham ki ki sunni. 13Le u kan ke Uwumbɔr si gbɔk u ki bui u ke, “Min le ye Uwumbɔr, aayaaja Abraham ni aate Aisak Aawumbɔr. M ga di kitiŋ ki aa dɔ ki pu na tii aa ni aayaabitiib. 14Bi ga li wiir ke kitiŋ aatanbol na. Bi ga yaa gbiin dulnyaa wee ni mɔmɔk. Le sin pu, ni aayaabitiib pu, m ga ŋa tinyoor ŋa ŋinibol mɔmɔk pu. 15Taa suln, ki li teer n‑yoonn mɔmɔk ke m ga li bi aa chee, le ki ga li joo si saah ga buen nimɔk na, ki ga ki giin ni si kitiŋ kee pu. Maan di si lii see m ŋa maah puu ke m ga ŋa si pu na.”
16Le Jakob nan finn ngeen pu, ki bui ke, “Uwumbɔr bi do. U bi do chee, le maa nyi kina.” 17U nan san ijawaan le ki bui ke, “Do chee na kpa ijawaan sakpen a. Uwumbɔr do sil sɔ, ni ga sil li ye nin chee bi piir koo paacham na la.”
18Naah chaa woln ni na, le Jakob pue fii kichakpiik ni, le ki yoor litakpal li u nan di uyil kur na, le ki di ŋum nima chee aan li li ye litakpateerkaan. U nan di nkpan kpir litakpal ngbaan pu ki di li tii Uwumbɔr, 19le ki yin nima chee ke Betel.#28.19: Betel aatataa le ye ke “Uwumbɔr do.” Bi nan yin kitiŋ ngbaan n‑yoonn mubaa ke Lus. 20Le u nan puu tipuur nima chee ki tii Uwumbɔr ke, “Sin Uwumbɔr yaa ga li bi m chee, ki joo mi maasachuln ni, ki ga tii mi tijikaar ni tiwanpeenkaan, 21ki cha m gir kun nte do laafee kan, sin le ga li ye Maawumbɔr. 22Litakpal li m di ŋum do ke m li joo teer saabɔr na ga li ye nin chee m ga li dooni si na, le saah ga tii mi tiwan ni na mɔmɔk, m ga nyan nibaabaa kipiik mɔk ponn ni ki giin tii si.”
Voafantina amin'izao fotoana izao:
Mpiin 28: xonB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©1998, 2014 Wycliffe Bible Translators, Inc. All rights reserved.