Mpiin 27
27
Aisak aah nan ŋa tinyoor ŋa Jakob pu pu na aabɔr
1N‑yoonn mue Aisak nan por pam, ki jɔb, kaa ki waa. U nan yin ujapɔpol Esɔ, le ki bui u ke, “Maabo.”
Le Esɔ kii ke, “Nte, m sɔ.”
2Aisak nan bui u ke, “Aa kan ke m por sakpen a, naan ki yunn, nibaakan m ga kpo. 3Ti yoor saatɔm ni ipiin, ki buen timoor ni ki ti ku ni upeel, 4ki nan ŋa tijikaar nyaan ti m gee sakpen na tii mi, m ji. M yaa jin doo kan, m ga ŋa maakookoo aanyoor ŋa aa pu, aan ki nin kpo.”
5N‑yoonn mu Aisak nan bi len Esɔ chee tibɔr ngbaan na, Rebeka nan si pel ti. Nima pu na, Esɔ aah nan nyan buen kikpaŋ buyoonn na, 6le Rebeka buen ti bui Jakob ke, “M ŋun aate bui Esɔ ke 7u buen kikpaŋ ki ti ku ni tinann ki nan ŋa tijikaar nyaan tii u, aan u yaa jin doo kan, u ŋa waakookoo aanyoor ŋa u pu, Uwumbɔr aanimbiin ni, aan ki nin kpo. 8Maabo, li pel maah ga tuk si pu na, ki ŋa kina. 9Li cha ki ti chuu iŋoja i filk na ilee, ki ku tii mi mala, nima kan, m ga ŋa tijikaar nyaan ti aate gee sakpen na. 10Aa di buen ti tii u aan u ji, le u ga ŋa tinyoor ŋa aa pu, aan ki nin kpo.”
11Jakob nan bui una ke, “Aa nyi ke nkpel Esɔ kpa tikor uwon pu pam, maawon joon la. 12Nibaakan nte ga meeh mi ki bee ke Esɔ aa ye, m ŋmann u la; m yaa ŋa kina kan, nte ga puun lii m pu, kaan ŋa tinyoor ŋa m pu.”
13Una nan bui u ke, “Maabo, taa cha kina li muk si, aate yaa puun aa pu kan, cha tipuur ngbaan gir ni m pu; mbamɔn, ŋa maah bui si pu na, li cha ki ti ku ni iŋoob ilee ngbaan tii ni mi.” 14Le Jakob buen le ki ti joo ni tiŋonann ngbaan, le una ŋa tijikaar nyaan ti ute gee sakpen na. 15Le Rebeka yoor Esɔ aawanpeenkaan nyaan, ni bi linampal na, le ki di peen Jakob, 16le ki di iŋogban na paan Jakob aaŋaal, ni usil pu, 17ki di tijikaar nyaan ngbaan, ni waah ŋa boroboro u na, tii Jakob.
18Le Jakob di buen ute chee, ki ti yin u ke, “Nte.”
Le ute kii ki baa ke, “Njapɔɔn ulau ye?”
19Le Jakob bui u ke, “Min, aajapɔpol Esɔ ye. Saah bui ke m ŋa pu na, m doo a. Fii kal ki ŋmɔ tinann ngbaan, aan ki ŋa tinyoor ŋa m pu.”
20Aisak nan baa u ke, “Maabo, aa ŋa kinye ki kan tinann ngbaan mala kina?”
Jakob nan bui u ke, “Aadindaan Uwumbɔr le ter mi.”
21Le Aisak bui Jakob ke, “Njapɔɔn, foor dan m chee, aan m di ŋŋaal baan aa pu. Mbamɔn, Esɔ sil ye ee?” 22Le Jakob foor buen ute chee, le ute baan u pu le ki bui ke, “Nneel ngbaan naahn Jakob aaneel la, le ŋŋaal ma tee ye Esɔ aaŋaal.” 23Waa nan ŋmaa bee ke Jakob ye, ba pu? uŋaal nan kpa tikor ke Esɔ aaŋaal na la. U nan gor ke u ŋa tinyoor ŋa u pu, 24le ki ki baa lelee ke, “Mbamɔn, Esɔ sil ye ee?”
Le Jakob bui ke, “Min Esɔ ye.”
25Le Aisak bui ke, “Njapɔɔn, li joo ni tinann ngbaan, m ŋmɔ. M yaa ŋman doo kan, m ga ŋa tinyoor ŋa aa pu.” Le Jakob di tinann ngbaan tii u, ki kpee ŋisubil aadaan, le u jin ki nyun. 26Waah jin doo na, le u bui ke, “Maabo, foor dan m chee ki nan moor ntakpiln.#27.26, 27: Israel yaab nan dooni tɔb kina le ki mɔk ngeehn.” 27Waah fuu ute chee buyoonn ki ban u moor utakpiln na, le Aisak ŋun waawanpeenkaan aabaan, ki ŋa tinyoor ŋa Jakob pu. U nan bui ke, “Maabo aabaan naahn kisaak ki Uwumbɔr ŋa tinyoor ŋa ki pu na la. 28Uwumbɔr ga tii si limaln li nyan ni paacham na, ki cha saasaak ngbaan ŋa tijikaar sakpen. U cha aa li chee tijikaar ki li kpa ŋisubil aadaan sakpen. 29U cha ŋitimbol mɔmɔk aanib li ye saanaagbiib ki gbaan aanimbiin ni. U cha aa li ye aado yaab, ni aana aabim mɔmɔk aayidaan, aan bi li gbaani aanimbiin ni. Uwumbɔr puun lii unii umɔk puun lii aa pu na pu, aan ki ŋa tinyoor ŋa unii umɔk ŋa si tiŋann na pu.”
Esɔ aah nan gaŋ Aisak pu na aabɔr
30Kina le Aisak nan ŋa tinyoor ŋa Jakob pu. Waah ti doo buyoonn, aan Jakob nyan buen na, le ukpel Esɔ mu nyan ni kikpaŋ kun ni. 31U mu nan ŋa tijikaar nyaan ti ute gee na, le ki di buen ute chee, ki nan bui u ke, “Tɔ, nte, fii kal ki ŋmɔ tinann ngbaan, nima kan, aa ga ŋa tinyoor ŋa m pu.”
32Aisak nan baa ke, “Ŋma ye?”
Le u bui ke, “Min, aajapɔpol Esɔ ye.”
33Le Aisak aah ŋun kina na, le uwon faa tɔtɔk, le u baa ke, “Ŋma ba ku ni upeel ki joo ni m chee na? M laa jin tima le doo le aa nin koo ni na. M di maakookoo aanyoor tii u a, nima pu na, udaan le yeh tinyoor ngbaan ki cha n‑yoonn mu kaa kpa ndoon na.”
34Esɔ aah ŋun kina na, le usui bii, le u wii ki kaani sakpen ki bui ke, “Nte, ŋa tinyoor ŋa m mu pu.”
35Ute Aisak nan bui u ke, “Aanaal Jakob dan nan ŋmann mi ki gaa saanyoor a.”
36Le Esɔ bui ke, “U jin mi nfum mulee le na. Mbamɔn, ni ŋeer bi yin u ke Jakob.#27.36: Baaliin ni, “Jakob” ni “ŋmann” naan la. Njan u nan ŋmann mi ki gaa tininkpir, le ki ki ŋmann tite mu ki gaa maanyoor. Nte, saa gur tinyoor tibaa ki ŋa m pu uu?”
37Le Aisak bui u ke, “M di tininkpir tii uma la, le u ga li ye aa pu usaloln, le udo yaab mɔmɔk ga li ye waanaagbiib. Le u ga li kpa tijikaar ki kpa ŋisubil aadaan mu sakpen. Maabo, tinyoor tibaa aa ki bi m ga ki ŋa aa pu.”
38Le Esɔ nan bi ki gaŋni ute ki bui u ke, “Nte, tinyoor tibaa aa gur aa? Nte, ŋa tinyoor ŋa m mu pu.” Usui aah bii sakpen pu na, le u wii ki kaani.
39Le ute Aisak bui u ke,
“Limaln aan nyan ni paacham ki lir ni aa pu.
Kitiŋ aan li kpa tinyoor tii sin.
40Saajawan pu le aa ga li bi.
Aa ga li ye aanaal aanaagbiija la.
Le aa yaa yii kan, aa ga nyan uŋaal ni.”
41Esɔ nan nann Jakob, ba pu? ute nan ŋa tinyoor ŋa Jakob pu ki cha u. U nan dakl ke, “Nte aakpotoor aa ki daa, waakpuul yaa jer kan, le m ga ku Jakob.”
42Tɔ, bina Rebeka aah nan ŋun Esɔ aah dak ki len pu na, le u yin Jakob, ki bui u ke, “Li pel, aakpel Esɔ bi dakl waah ga ŋa pu ki ku si na. 43Maabo, ŋa maah ban m bui si pu na. Siir mala ki san buen nninja Labann do, Harann aatiŋ ni, 44ki ti li bi nima, ki kii buyoonn aakpel Esɔ aaŋuul ga ti sɔŋ na, 45aan u yaa suln saah ŋa pu na kan, le m ga tun ni bi nan yin sin. Naa ŋan ke m kpaan lann njapɔtiib bilee kina liwinbaal.”
Aisak aah nan cha Jakob san buen Labann do pu na aabɔr
46Le Rebeka bui uchal Aisak ke, “Esɔ aapuutiib aabimbin aah bi pu na muk mi sakpen, ki cha naa mɔ mi n‑yoonn mɔmɔk. Jakob mu yaa ki yoor Hef yaab aapiibo ubaa kan, naan ki li mɔ kpala.”
Voafantina amin'izao fotoana izao:
Mpiin 27: xonB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©1998, 2014 Wycliffe Bible Translators, Inc. All rights reserved.