Mpiin 26
26
Aisak aah nan bi Gerar aatiŋ ni pu na aabɔr
1Abraham aah nan bi Kanaann aatiŋ ni buyoonn na, le nkon mbaa nan lir nima, le Aisak aayoonn mu nkon nan ki lir kitiŋ ngbaan ni lelee. Aisak nan buen Abimelek, u nan ye Filistia yaab aabɔr na chee, Gerar aatiŋ ni. 2Buyoonn waa nan kee buen Gerar aatiŋ ni na, le Uwumbɔr nan dan u chee ki nan bui u ke, “Taa buen Ijipt aatiŋ ni. Li bi kitiŋ kee ni, nin chee m bui si ke aa li bi na. 3Li koo do, le m ga li bi aa chee, ki ŋa tinyoor ŋa aa pu. M ban ke m di kitiŋ kee mɔmɔk tii sin ni aayaabitiib la. Maah nan puu tipuur ti tii aate Abraham na, m ga li joo ti. 4M ga cha aa maa ki li kpa yaabitiib bi li wiir ke iŋmabi na, le m ga di kitiŋ kee mɔmɔk tii bi. Aayaabitiib pu le m ga ŋa tinyoor ŋa ŋinibol mɔmɔk pu.#26.4: Lik Lituln 3.25. 5M ga ŋa tinyoor ŋa aa pu; ba pu? aate Abraham nan kii maamɔboln ki joo maakaal ni maakoobil mɔmɔk mbamɔm.”
6Nima pu le Aisak nan bi Gerar aatiŋ ni. 7Bijab bi nan bi Gerar aatiŋ ni na aah nan baa u upuu aabɔr na, le u nan bui bi ke u ye uninkpan la. Waa kii ke u bui bi ke upuu le na; ba pu? u nan san ijawaan ki dak ke bi yaa bee ke upuu ye kan, bi ga ku u, ki yoor upuu Rebeka, waanyaan pu. 8Aisak aah nan bi nima ki yunn siib na, le ubɔr Abimelek nan bi waadiik ni, ki lik takolu ni, le ki kan Aisak ŋani Rebeka ke upuu na. 9Le Abimelek tun bi ti yin ni Aisak, le ki nan baa u ke, “Rebeka ye aapuu la aa? Ba ŋa aa bui ke u ye aaninkpan la?”
U nan giin bui ubɔr ngbaan ke, “M nan dak ke m yaa bui ke u ye mpuu kan, ni ga ku mi ki yoor u la.”
10Le Abimelek baa ke, “Ba ŋa aa ŋa timi kina? Saah nan len pu na, maanib ponn ni ubaa yaa ba doon u chee kan, titunwanbir ngbaan ba ga li ye saataani la.” 11Nima pu na, Abimelek nan sur waanib ke, “Ubaa taa ŋa Aisak ni upuu bakaa ubaa. Unii yaa ŋa bi bakaa kan, see bi ku udaan ngbaan.”
12Aisak nan kon ki bun njikaabim kitiŋ ngbaan ni, le u nan chee tijikaar libiln ngbaan ni, nfum nkub ki jer waah bun pu na, ba pu? Uwumbɔr nan ŋa tinyoor ŋa u pu. 13Waawan mɔmɔk nan too pɔr kpae, le u ŋa uwankpadaan. 14U nan kpa ipiih, ni iŋoob, ni inaa, ni binaagbiib sakpen, le Filistia yaab nan kpa u pu lipiipoln. 15Nima pu le bi nan faa titan gbiin inyunbun imɔk ute Abraham aanaagbiib nan gbii buyoonn u nan bi na.
16Le Abimelek bui Aisak ke, “Nya timi aatiŋ ponn ni. Aa kan liwankpal jer timi sakpen a.” 17Le Aisak nyan ti kal Gerar aafataŋ kibaa ni, le ki laa kal nima chee ki yunn siib. 18Ute Abraham aayoonn le bi nan gbii inyunbun. Abraham aakun aapuwɔb, le Filistia yaab nan faa titan gbiin i mɔmɔk, le Aisak ki lukr inyunbun ngbaan, ki yin i mɔmɔk ute aah nan yin i pu na.
19Le Aisak aanaagbiib nan gbii nnyunbun mubaa kifataŋ ngbaan ni, le ki kan nnyun. 20Gerar aatiŋ aapihkpaab nan tak Aisak aapihkpaab, nnyunbun ngbaan pu, le ki bui ke, “Timi le yeh nnyunbun ngbaan.” Nima le cha Aisak nan yin nnyunbun ngbaan ke, “Kijaak.”
21Le Aisak aapihkpaab nan ki gbii nnyunbun muken, le bi nan ki ban bi kijaak mu pu, nima le u nan yin mu ke, “Kinanaŋ.” 22Le u fii nima chee ki buen ti ki gbii muken. Ubaa aa nan ki dan nan ban u kijaak mue pu, nima le u nan yin mu ke, “Lifuur.” U nan bui ke, “Dandana, Uwumbɔr tii timi lifuur ti li bi kitiŋ kee pu, ki kan tinyoor.”
23Aisak nan nyan nima le ki buen Beerseba aatiŋ ni. 24Kinyeek ngbaan le Uwumbɔr nan bui u tidaŋ ponn ni ke, “Min le ye aate Abraham Aawumbɔr. Taa li san ijawaan; m bi aa chee. M ga ŋa tinyoor ŋa aa pu, ki cha aa maa pɔr, ki li kpa yaabitiib sakpen, ke maah nan puu tii maatutunn Abraham pu na.” 25Aisak nan maa libimbiln nima chee, le ki toor kitork ki doon Uwumbɔr. Nima chee le u nan kal, le waanaagbiib nan ki gbii nnyunbun muken.
Aisak ni Abimelek aah nan ŋa kimɔbaan pu na
26Le Abimelek nyan ni Gerar aatiŋ ni ki dan Aisak chee. Ahusaf u nan ye ujɔ na, ni Fikol u ye waajab aaninkpel na, nan dii ni u. 27Le Aisak nan baa bi ke, “Ba ŋa ni dan m chee dandana wee? Maah nan bi nimi aatiŋ ni na, naa nan gee maabɔr, le ki bui mi ke m nya nimi aatiŋ ni.”
28Bi nan giin bui u ke, “Dandana wee ti bee ke Uwumbɔr bi aa chee, le ti ban ke ti ni si ŋa kimɔbaan. Ti ban ke aa puu ke 29saan ŋa timi bakaa ubaa, ke taah kaa nan ŋa si bakaa pu na. Ti nan ŋa si tibulchinn, le ki cha aa nyan tido nsuudoon ponn ni. Dandana wee, ni kpiir mɔk timi ke Uwumbɔr bi aa chee ki ŋa si tinyoor sakpen.” 30Aisak nan ŋa njim le ki chann bi tichann, le bi jin ki nyun. 31Naah woln kichakpiik ni na, u ni Aisak nan puu tipuur tii tɔb. Le Aisak nan chɔi bi, le bi gir kun kijɔtiik ni.
32Liyaadaal ngbaan le Aisak aanaagbiib dan nan tuk u baah gbii nnyunbun mubaa pu na aabɔr. Bi nan bui u ke, “Nnyunbun ngbaan kpa nnyun sakpen a.” 33Le u nan yin nnyunbun ngbaan ke, “Tipuur aanyunbun.” Nima chee le Beerseba aatiŋ kan kaayimbil.#26.33: Beerseba aatataa le ye ke “tipuur aanyunbun.”
Esɔ aapuutiib aabɔr
34N‑yoonn mu Esɔ nan saa ŋibin imonko ilee na, le u nan yoor Hef yaab aasapɔm bilee. Bi nan yin ubaa ke Judif, u nan ye Beeri aabisal la, ki yin uken ke Basemaf u nan ye Elonn aabisal na. 35Baabɔr nan bii Aisak ni upuu Rebeka aasui pam.
Voafantina amin'izao fotoana izao:
Mpiin 26: xonB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©1998, 2014 Wycliffe Bible Translators, Inc. All rights reserved.