Mpiin 23
23
Abraham aah nan daa kitiŋ u sub upuu Sara pu na aabɔr
1Sara nan bi ki ti saa ŋibin nkub ni moninko ni ŋilole le ki nin kpo. 2U nan kpo Hebronn aatiŋ ki bi Kanaann aatiŋ ni na la, le Abraham nan wii u pu pam.
3U nan siir upuu aah dɔ nin chee na, le ki buen Hef yaab chee, le ki ti bui bi ke, 4“M ye uwɔwɔnja, le ki nan bi ni chee; kooh nimi aatiŋ ngbaan nibaa chee tii mi aan m di mpuu sub nima.”
5Bi nan bui u ke, 6“Uninkpel, li pel taah len pu na, ti lik si ke aa ye uninyuun la; di aapuu ti sub likaakul li ŋan aa gee li na ponn ni. Ti mɔmɔk ga li gee ke ti tii si likaakul li aa ban na, aan aa di aapuu sub li ni.”
7Le Abraham nan gbaan binimbiin ni, 8ki bui bi ke, “Njɔtiib, ni yaa gee ke m di mpuu sub nimi aatiŋ pu kan, mee Sohar aajapɔɔn Efronn, 9ke u di Makpela aatakpaluŋ ki bi gbɔk waakpagbaan na ki di kooh tii mi. Cha u tuk mi kitakpaluŋ ngbaan aadaak mbamɔm, ninimbil ni do, nima kan, m yaa pan u kan, kitiŋ ngbaan ga li ye maatiŋ ki m ga li sui maanib nima chee na.”
10Efronn mu nan ka gbɔk Hef yaab biken aah kuuni kaa nin chee kitiŋ ngbaan aabisamɔb chee na; Efronn nan bui Abraham, binib ngbaan mɔmɔk aanimbil ni ke, 11“Li pel, uninkpel, m ga di bukpaab ngbaan mɔmɔk, ni kitakpaluŋ ki bi bu ponn ni na mu ki di tii si. M ga di ki tii si, ndo yaab aanimbil ni, nima kan, aa ga ŋmaa di aapuu sub.”
12Tɔ, Abraham nan gbaan Hef yaab ngbaan aanimbiin ni, 13le ki bui Efronn, binib ngbaan mɔmɔk aatafal ni ke, “M gaŋ si, li pel, m ga li gee ke m daa kitiŋ ngbaan mɔmɔk. M ga pa saah ban pu na, aan ki di mpuu sub nima chee.”
14Efronn nan bui ke, 15“Uninkpel, kitiŋ ngbaan ŋeer timi aamombil ikui inaa la. Timi chee kan, naa ba ye nibaa. Ti di aapuu sub kitakpaluŋ ngbaan ponn ni.” 16Abraham nan kii tii u, le ki kahn ŋimombil ngbaan pan u, waah nan tuk u waanib aatafal ni pu na. Ŋimombil ngbaan nan ye baah joo pu tiir kitiir na la.
17Kina le Efronn aakpaakon mu nan bi Makpela aatiŋ, ki dɔ gbɔk Mamre aatiŋ liwipuul wɔb na, nan kpaln Abraham aatiŋ. U nan kpaan yeh kitiŋ, ni kitakpaluŋ, ni isui imɔk nan bi kitiŋ ngbaan ponn ni na. 18Hef yaab bi nan bi nima na nan nyi ke kitiŋ ngbaan nan gur ye Abraham yaan la.
19Le Abraham nan di upuu Sara sub kitakpaluŋ ngbaan ponn ni, Kanaann aatiŋ ni. 20Nima pu na, Hef yaab aakpaab ngbaan, ni kitakpaluŋ na mɔmɔk nan kpaln Abraham aacheek la.
Voafantina amin'izao fotoana izao:
Mpiin 23: xonB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©1998, 2014 Wycliffe Bible Translators, Inc. All rights reserved.