Mpiin 22
22
Uwumbɔr aah nan tɔŋ Abraham pu na aabɔr
1N‑yoonn mbaa le Uwumbɔr nan tɔŋ Abraham: u nan yin u ke, “Abraham.” Le Abraham kii ke, “M sɔ.”
2Uwumbɔr nan bui u ke, “Di aajapɔɔn, u ye aajapɔnbaal Aisak, aan aa gee u sakpen na, ki di u buen Moria aatiŋ ni. Nima chee m ga mɔk si lijool libaa paab, aa di u toor kitork tii mi nima chee.”
3Naah woln kichakpiik ni na, le Abraham ban idɔ ki di paan waabon pu, le ki yoor Aisak ni waanaagbiib bilee ki di kpee ubaa pu. Le bi piin ki cha Uwumbɔr aah nan mɔk u kitiŋ ki na ni. 4Iwiin itaa daal, le bi nan lik ki waa kitiŋ ngbaan dandar. 5Le Abraham nan bui waanaagbiib na ke, “Li si gbɔk ubon do chee na. M ni njapɔɔn ga buen ti doon Uwumbɔr, aan ki gir ni, ni chee.”
6Abraham nan cha Aisak yoor idɔ i u ga ti di see kitork ngbaan na, le uma tee joo kijuk ni mmii. 7Baah nan chuun cha na, le Aisak bui ke, “Nte.”
Le u kii ke, “Maabo, m sɔ.”
Le Aisak baa u ke, “M kan aa joo mmii ni idɔ, tɔ, upihbo u ti ga di toor kitork na bi la chee?”
8Abraham nan giin bui u ke, “Uwumbɔr le ga tii timi kitork aapihbo.” Le bima bilee ngbaan nan chuun cha.
9Baah nan ti fuu nin chee Uwumbɔr nan mɔk Abraham na, le u maa kitork aabimbiln, le ki koo idɔ paan li pu, le ki chuu ujapɔɔn ki buu u iŋmin, ki di paan idɔ pu, libimbiln na paab, 10le ki yoor kijuk ke u kɔr ujapɔɔn ngbaan. 11Le Uwumbɔr aatuun aaneel nyan ni paacham ki yin ke, “Abraham, Abraham.”
Le u giin kii ke, “M sɔ.”
12Le nneel ngbaan bui ke, “Taa ku ubo ngbaan, ki taa ŋa u nibaa. Dandana wee, m bee ke aa san Uwumbɔr ijawaan, ba pu? saa yii ke saan di aajapɔnbaal na ki di toor kitork tii Uwumbɔr.”
13Abraham nan yaar ki lik, le ki kan upihja si timoor ni, uyiin lɔk busub waatiir bubaa ponn ni. Le u buen ti chuu upihja ngbaan ki nan di toor kitork tii Uwumbɔr, kaa ki di ujapɔɔn toor. 14Abraham nan yin nima chee ke, “Uwumbɔr le tii.” Ki nan saa din binib beenin len ke, “Uwumbɔr aajool paab le u tii.”
15Uwumbɔr aatuun aaneel nan ki nyan ni paacham lelee, ki bui Abraham ke, 16“M ga puu maayimbil pu ke m ga ŋa tinyoor ŋa aa pu pam. Min Uwumbɔr le len kina. Saah ŋa pu, kaa yii ke saan di aajapɔɔn tii mi na, 17nima pu le m puu ke m ga cha aayaabitiib li wiir ke iŋmabi aah bi paacham pu na, ki ga ki li wiir ke limɔɔtanbol li dɔ nnyusakpem aagbaan na. Aayaabitiib le ga li nyaŋni baadim. 18Aayaabitiib pu, le m ga ŋa tinyoor ŋa ŋinibol mɔmɔk pu, ni mu ye le ke aa kii maamɔb la.”#22.18: Lik Lituln 3.25. 19Abraham ni ujapɔɔn nan ki gir buen waanaagbiib bilee, ni ubon na chee, le bi dii buen Beerseba aatiŋ ni, nin chee Abraham nan ti kal na.
Nahor aayaabitiib aabɔr
20N‑yoonn mbaa le Abraham nan ŋun ke Milka nan ma mbim biniin tii unaal Nahor. Bima sɔ: 21Us le nan ye njan aabo, le Bus nan ye unaal, le Milka ki ma Kemuel, Kemuel mu ma Aram, 22le Milka ki ma Kesed, ni Haso, ni Pildas, ni Jidlaf, ni Betuel 23u nan ye Rebeka aate na. Milka le nan ma mbijabim biniin bimina ki tii Nahor, u nan ye Abraham aanaal na. 24Reuma, u nan ye Nahor aapuu uken na mu le nan ma Teba, ni Gaham, ni Tahas, ni Maaka.
Voafantina amin'izao fotoana izao:
Mpiin 22: xonB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©1998, 2014 Wycliffe Bible Translators, Inc. All rights reserved.