Mpiin 24
24
Abraham aah nan ban upii tii waabo Aisak pu na aabɔr
1N‑yoonn mue, Abraham nan por pam, le Uwumbɔr nan ŋa tinyoor ŋa waatuln mɔmɔk pu. 2U nan bui waanaagbiijapol u lik waatuln mɔmɔk na, ke u di uŋaal ŋa uma Abraham aataapaln taab,#24.2: Bi yaa ŋa kina ki puu tipuur kan, ubaa aan ŋmaa kpeln tipuur ngbaan. ki puu tipuur ke, 3“M ban ke aa puu Uwumbɔr u ye paacham ni taab aadindaan na aayimbil pu, ke saan ban Kanaann aatiŋ kee pu aapiibo tii njapɔɔn. 4See aa buen baah nan ma mi kitiŋ ki ni na, ndo yaab ni, ki ti ban upii tii njapɔɔn Aisak.”
5Tɔ, unaagbiija ngbaan nan baa u ke, “Nibaakan, aado aapiibo ngbaan yaa ti bui ke waan nya udo aatiŋ ni ki dan Kanaann aatiŋ ni kan, m giin aajapɔɔn buen saah nyan ni nin chee na aa?”
6Abraham nan bui u ke, “Lik suuna, ki taa di njapɔɔn gir buen ndo aatiŋ ni. 7Uwumbɔr u ye paacham aadindaan na, uma le nyan ni mi nte do, ni ndo yaab aatiŋ ni, le ki puu ke u ga di kitiŋ kimina tii m ni n‑yaabitiib. Uma le ga cha waatuun loln aa pu nsan, nima kan, aa ga ti kan upii ki nan tii njapɔɔn. 8Ni yaa ye ke upiibo ngbaan yii ke waan dii ni si kan, naa ki ye saataani, aa nyan tipuur ngbaan ni a. Tɔ, ni yaa ye pu na kan, aa taa di njapɔɔn buen ndo aatiŋ ni.” 9Nima le unaagbiija ngbaan nan di uŋaal paan udindaan Abraham aataapan pu, le ki puu tipuur ke u ga ŋa waah len pu na mɔmɔk.
10Unaagbiijapol u nan joo Abraham aawan mɔmɔk na nan nyan waaninkpel Abraham aalaakumii kipiik, ni tiwan pam, le ki buen Abraham aanaal Nahor aah bi kitiŋ ki na ni, ki bi Mesopotamia aatiŋ aaŋangan wɔb la. 11Waah ti fuu nima na, le u nan cha laakumii tiib ngbaan doon kitiŋ, nnyunbun mubaa chee, kitiŋ ngbaan aagbaan. Ni nan ye kijook wɔb, buyoonn bipiib chaa ikpen bi ti lu nnyun na. 12Unaagbiija ngbaan nan bi mee Uwumbɔr ke, “Uwumbɔr, u ye maaninkpel Abraham Aawumbɔr na, cha m kan maah ban pu na, ki gbiin saah puu ke aa ga ŋa pu ki tii maaninkpel na. 13M bi nnyunbun mu chee kitiŋ kee aasapɔm ga dan, ke bi nan lu nnyun na. 14M ga bui bi ponn ni ubaa ke, ‘Mbisal, tii mi nnyun m nyu.’ U yaa bui mi ke, ‘Nyum, le m ga ki lu nnyun tii laakumii tiib bee mu aan bi nyu’ kan, nima le ga cha m bee ke uma le aa nyan ke u li ye Aisak aapuu. Ni yaa ŋa kina kan, m ga bee ke aa sil gbiin tipuur ti aa nan puu tii maaninkpel na.”
15Waahr aan u ti mee Uwumbɔr doo na, le Rebeka fuu ni nnyunbun ngbaan taab ki tu libuul. U nan ye Betuel aabisal la, Betuel mu nan ye Abraham aanaal Nahor aajapɔɔn, le Milka nan ye Nahor aapuu. 16U nan ye upiibo u ŋan sakpen na la, le ki mu aa kee nyi uja. U nan lun nnyun le ki gir cha. 17Le unaagbiija ngbaan san buen u chee ki ti bui ke, “Mbisal, tii mi nnyun m nyu.”
18U nan bui unaagbiija ngbaan ke, “Nyum, uninkpel,” le ki ŋa mala le ki bar nnyun tii u, le u nyun. 19Waah ti nyun doo na, le upiibo ngbaan bui ke, “M ga lu nnyun tii saalaakumii tiib mu, bi nyu bab.” 20U yaa lun ni bi nan nyun doo kan, le u ki san mala buen ki ti ki lu ni nan tii bi, le bi mɔmɔk ti nyun bab. 21Unaagbiija na nan si lik upiibo ngbaan suuna, u nan ban u bee ke ni ye Uwumbɔr aageehn aan naa ye.
22Waah nan lun nnyun tii laakumii tiib ngbaan mɔmɔk doo na, le uja ngbaan nyan salmaa aakur aabɔmbik ki kpa kidaak na, ni salmaa aakur aabuen ilee, ki di tii upiibo ngbaan, 23le ki nan baa u ke, “Mbisal, aate ye ŋma? Mpaan ga li bi aate do aan m ni maanib bee ga doon kinyeek kimina aa?”
24Upiibo ngbaan nan bui ke, “Nte le ye Betuel, u ye Nahor ni upuu Milka aajapɔɔn na. 25Laakumii aajikaar bi nte do, le mpaan mu bi, ni ga kan ki doon.”
26Le uja ngbaan gbaan kitiŋ ki doon Uwumbɔr. 27U nan bui ke, “M pak Uwumbɔr u ye maaninkpel Abraham Aawumbɔr, ki gbiin waah nan puu tipuur ti tii u na. U cha m nan tuur maaninkpel Abraham aamaal aachiln ni aanii le pu.”
28Le upiibo na san buen ti tuk una waah kan pu na mɔmɔk. 29Rebeka nan kpa uninja ubaa, bi yin u ke Labann, le u nan san buen nnyunbun mu Abraham aanaagbiija ngbaan nan si mu chee na. 30Labann nan kan kibɔmbik ni ibuen i nan bi uninkpan aaŋaal pu na, ki ŋun uja ngbaan aah tuk uninkpan pu na. Labann nan buen Abraham aanaagbiija ni waalaakumii tiib aah si nnyunbun mu taab na chee, 31le ki ti bui u ke, “Dan ti buen ndo, aa ye unii u Uwumbɔr ŋa tinyoor ŋa aa pu na la. Ba ŋa aa nan si do kina? Mpaan bi ndo aa ga ti kan ki doon, le mpaan bi, saalaakumii tiib mu ga koo.”
32Nima pu na, uja ngbaan nan dii u buen udo, le Labann nan nyan ŋitun mɔmɔk waalaakumii tiib pu, le ki tii bi timoor ke bi ŋmɔ, le ki ban nnyun tii uja ngbaan ni waanib bi finn bitaa. 33Baah nan di tijikaar siin u na, uja ngbaan nan bui ke, “Maan ji tijikaar see m bui nimi maah joo tibɔr ti na mɔmɔk.”
Labann nan bui u ke, “Len saah joo pu na.”
34Le u bui Labann ke, “M ye Abraham aanaagbiija la. 35Uwumbɔr ŋa tinyoor sakpen ki ŋa u pu, le u ŋa uwankpadaan. Uwumbɔr tii u ipiih, ni iŋoob, ni inaa, ni tikunabr, ni salmaa aamombil, ni binaagbiib, ni laakumii tiib, ni ibon. 36Le maaninkpel aapuu Sara por pam, tɔ, Uwumbɔr tii u ubijabo, le maaninkpel di waawangol mɔmɔk di tii waabo ngbaan. 37Maaninkpel cha m puu ke m taa ban Kanaann aatiŋ ni aapiibo tii ujapɔɔn ngbaan, 38ke m dan ute do, waamaal aanib chee, ki nan ban upii tii waabo ngbaan. 39Le m baa u ke, ‘Nibaakan, upiibo ngbaan yaa ti yii ke waan buen Kanaann aatiŋ ni kan, m ga ŋa kinye?’ 40Le u bui mi ke Uwumbɔr, u uma Abraham kii waamɔb na le ga cha waatuun dii mi buen ki ter mi, ke m ga kan upii u nyan ni waamaal ni na, ki nan tii ujapɔɔn. 41U nan ki bui ke maah ga ŋa pu ki nya tipuur ngbaan ni na le ye ke m yaa buen udo yaab chee aan bi yaa yii mi kan, maa ki kpa taani ubaa.
42“N‑yoonn mu m fuu ni nnyunbun chee din wee na, le m mee Uwumbɔr u ye maaninkpel Abraham Aawumbɔr na ke u ter mi, 43ki len ke, ‘Maah si gbɔk nnyunbun mu na, usapɔɔn ubaa yaa fuu ni ke u lu nnyun kan, m ga bui u ke u tii mi nnyun m nyu. 44U yaa kii, ki mu yaa bui ke u ga tii maalaakumii tiib mu nnyun kan, nima le ga cha m bee ke uma le aa nyan tii maaninkpel aajapɔɔn.’ 45Waahr aan m mee Uwumbɔr nsui ni ti doo na, le Rebeka fuu ni nnyunbun ngbaan chee ki joo libuul u nan lu nnyun. Le m bui u ke, ‘Mbisal, tii mi nnyun m nyu.’ 46U ŋa mala le ki bar nnyun tii mi le ki bui ke, ‘Nyum, le m ga lu nnyun tii saalaakumii tiib mu.’ Le m nyun, le u lun nnyun tii laakumii tiib mu. 47Le m baa u ke, ‘Aate ye ŋma?’ Le u bui ke, ‘Nte le ye Betuel, u ye Nahor ni Milka aajapɔɔn na.’ Nima pu le m di kibɔmbik ni ibuen di ŋmaan uŋaal, 48le ki gbaan kitiŋ nima chee, ki pak Uwumbɔr u ye maaninkpel Abraham Aawumbɔr na, ba pu? uma le ter mi, le m di nan tuur waamaal aanib do, le ki kan bibisal tii ujapɔɔn. 49Tɔ, ni yaa kii ke ni ga ŋa maaninkpel aah ban pu na kan, tuk mi; ni yaa kaa ti ki kii kan, tuk mi, aan m mu dakl lik maah ga ŋa pu na.”
50Le Labann ni Betuel bui ke, “Tibɔr ngbaan nyan ni Uwumbɔr chee la. Taan ŋmaa len tibaa. 51Uwumbɔr le yaa ban kina kan, Rebeka sɔ, li joo u cha, ki ti di u tii saaninkpel aajapɔɔn.” 52Abraham aanaagbiija ngbaan aah nan ŋun kina na, le u gbaan kitiŋ ki doon Uwumbɔr. 53Le u nyan ŋikeken, ni tikunabr, ni salmaa aatakpanyaan tii Rebeka. U nan ki tii upiibo ngbaan aana ni uninja tiwan ni kpa kidaak na.
54N‑yoonn ngbaan le unaagbiija na, ni waanib nin jin tijikaar ki nyun mu, le ki doon woln kitaak. Naah woln na, le bi fii, le u bui ke, “M ga gir kun maaninkpel chee la.”
55Le Rebeka aaninja ni una nan bui u ke, “Cha upiibo ngbaan ŋa likpaakool, bee iwiin kipiik ti chee, aan aa li joo u chaa kun.”
56U mu nan giin bui bi ke, “Taa cha ti gaar do. Uwumbɔr ter mi pam, cha m gir kun maaninkpel chee.”
57Le Rebeka aana ni uninja bui ke, “Cha ti yin Rebeka ki nan baa u lik.” 58Nima pu na, bi nan yin u le ki nan baa u ke, “Aa ga dii uja ngbaan buen aa?”
Le u nan kii ke u ga dii u buen la.
59Nima na, bi nan cha Rebeka ni waanaagbiipii u nan lik u tibir ni na dii Abraham aanaagbiija na, ni waanib buen. 60Baah nan len tinyoor aaliin i ki ŋa Rebeka pu na sɔ:
“Tininkpan, Uwumbɔr pee aa pu mmɔɔnyunsɔm
aan aa maa pam;
ki cha aayaabitiib nyaŋ baadim mɔmɔk.”
61N‑yoonn ngbaan le Rebeka ni waanaagbiisapɔmbim mɔmɔk gor, le ki diŋ laakumii tiib pu, ki dii Abraham aanaagbiija ngbaan buen.
62Tɔ, Aisak nan buen kipɔɔk ni, nin chee bi yin ke, “U bi ki waa mi na aanyunbun na” chee, ki nan bi Kanaann aatiŋ ngbaan aaŋangii wɔb la. 63U nan nyan kijook wɔb ke u chuun mann waakpaab, le ki kan laakumii tiib chɔr choo. 64Buyoonn Rebeka mu yaar kan Aisak na, le u sunn laakumii pu, 65le ki baa Abraham aanaagbiija na ke, “Ŋma ye unachipɔɔn u chuun ikpaakon ni ki choo na?”
U nan bui ke, “Maaninkpel ye.” Nima pu na, Rebeka nan di kikekengeŋ biin unimbil wɔb.
66Unaagbiija ngbaan nan tuk Aisak waah ŋa pu na mɔmɔk. 67Le Aisak di Rebeka di koon una Sara aadiik ni, le ki di u ŋa upuu. Aisak nan gee Rebeka pam, le usui nan sɔŋ ki cha u suln una aakun bɔr.
Voafantina amin'izao fotoana izao:
Mpiin 24: xonB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©1998, 2014 Wycliffe Bible Translators, Inc. All rights reserved.