Mareka 9
9
1Wayilili nindi, Nukuyileja chalala nami amu anemani kunu hiyakafwaku, chiŋa anamoni wanta waNzambi wunenzi dehi naŋovu.
2Chimunahiti mafuku atanu nadimu, Yesu hakutwala aPetulu naYakoba niYowanu, hakuyikandamisha hampidi yayilehi kwakanka wawu; hiyakumumona nabalumuki mwacheŋi. 3Mahinindi hiyakukekema, hiyakubadika kutooka; munu mwishina himudi mukwakutookesha mahina niwumu natweshi kuyitookesha chochochuku. 4Elija naMosi hiyakumwekana kumesu awu; hiyakuhanjika naYesu. 5Petulu hakumwila Yesu nindi, Eyi Rabi, chachiwahi chitudi kunu; tutuŋi yisolu yisatu, chimu cheyeyi, chimu chaMosi, chimu chaElija. 6Helukili nimwakuhoshaku, muloŋa aswejeli kutiya woma nankashi. 7Ivu hidikwinza nakuyizeŋamina; mwivu himukufuma izu dakwila nawu, Diyi mwanami nakeŋa, mutiyililenu yena. 8Chanakasumukuwu nawu atalajali, hiyamweni nawa cheŋi muntuku, chiŋa yowu Yesu nawena hohu.
9Chadiŋi nakukunkumukawu hampidi, hakuyikaanda nindi, Bayi mushimwina muntu yuma yimunamonuku, sampu Mwana kamuntu nasaŋuki dehi mudi afu. 10Ashili mazu owu kunyichima yawu, hiyakudihujola mukachi kawu, nawu kusaŋuka mudi afu chaya mudihi? 11Amwihwili nawu, Ansoneki elaŋa nawu chiŋa Elija asambila kwinza. 12Yena hakuyila nindi, Elija chalala wakasambila kwinza nakupoŋomwena yuma yejima; indi Mwana kamuntu anamusonekelidi nawu chiŋa akakaba yuma yayivulu, akamudiwula? 13Ilaŋa mi nukuyileja nami Elija wenza dehi, anamukoŋi mwejima mwakeŋa eluwu, mwomu mwanamusonekeluwu.
14Chanashikuwu kudi atumbanji, hiyakumona kunayinyeŋumuki izaza deneni, niansoneki adi nakuyihujola. 15Hohenohu antu ejima chanamumonuwu hiyakuhayama nankashi, hiyakuya kudi yena lufuchi nakumwimwisha. 16Hakuyihula nindi, Mudi nakuyihujola chumanyi? 17Muntu wahezaza dawantu wumu hakumwakula nindi, Eyi Nkuluŋaŋa, naleti mwanami weyala kudeyi, wazakukaŋa demoni wawumama. 18Kwejima kwamutwalaŋayi wamunatolaŋa heseki; hakwidisha mafulolu mukanwa, hakudisumona kumaji kelete kelete, hakuzeela. Nahoshi nawatumbanji tweyi nami amufumishi, ilaŋa wena anakaŋanyi. 19Hakuyakula nindi, Enu chisaka chakadi kukuhwelela, nukwi kala nenu nyaka yiŋahi? Nukukabakana nenu nyaka yiŋahi? Muletenu kudami. 20Hiyakumuleta kudi yena; chanamumoniyi, hohenohu demoni hakumukonyesha nankashi, hakudimbuka heseki nakulwisha, hakwidisha mafulolu mukanwa. 21Hakumwihula tata yindi nindi, Hichamuweni munahiti dehi nyaka yiŋahi? Yena nindi, Kufumisha kuwansi. 22Mapampa kakavulu namunati nimukesi nimumeji kulonda kumukisaŋana; Ilaŋa neyi wunatweshi kwila chuma, tutiyili wushona, wutukwashuku. 23Yesu hakumwila nindi, Komana Neyi wunatweshi! Muntu wukukuhwelela wukutwesha yuma yejima. 24Hohenohu tata yanowu mwana hakubilela nindi, Eŋa, nakuhweleli; nkwashuku chinakaŋanyi kukuhwelela chachiwahi. 25Yesu chanamoniyi izaza dawantu hidikupompa lufuchi, hakuhoshola demoni wazonda nindi, Eyi demoni wawumama nikujika matu, ami nakuleji nami fumaku mudi yena, bayi wakamwiŋila cheŋuku. 26Chanakalukiyi nakumukonyesha nankashi, hakufuma mudi yena; owu mwana hakwikala neyi mufu hohu; niantu amavulu elili nawu nafwi dehi. 27Ilaŋa Yesu hakumukwata kuchikasa, hakumunyamuna, yonyamuka nikunyamuka. 28Chanepiliyi mwitala, atumbanji twindi hiyakumwihula kwakanka wawu nawu, Indi etu tunakaŋenyidi kumufumisha? 29Hakuyila nindi, Wudi neyi iwu, hatweshaŋa kufuma tuhuku; kufuma chiŋa nakulomba.
30Afumini kwenoku, hiyakuhita muljaliliya; yena hakeŋeli muntu kuchilukaku. 31Muloŋa wadiŋi nakuleja atumbanji twindi nindi, Mwana kamuntu anamuhani dehi kumakasa awantu, akamujaha; chakamujahawu, mwakahita mafuku asatu wakasaŋuka mudi afu. 32Wena hiyelukili mazu owuku, atiyili woma wakumwihula.
33Ashikili kuKaperinawu; chadiŋiyi mwitala hakuyihula nindi, Mwatadikaŋadi munjila? 34Wena hiyakumwena zo; Muloŋa munjila adiŋi nakutadika nawu wabadika hinyi? 35Hakushakama, hakutambika ikumi nayedi, hakuyila nindi, Muntu wukukeŋa kwikala wakusambila, ekali wakukuminina hadi ejima, ekali mukwakukalakela akwawu ejima. 36Hakutambika mwana wanyana, hakumusha mukachi kawu; hakumwakata mumakasindi; 37hakuyila nindi, Muntu wukutambula mwana wanyanya wumu wudi neyi iwu mwijina dami, nantambulami; wukuntambulami, hanatambuli amuku, natambuli wantemesheli.
38Yowanu hakumwila nindi, Eyi Nkulupaŋa, etu twamona muntu wudi nakufumisha ademoni mwijina deyi; twamulekesha Muloŋa hendaŋa nanetuku. 39Ilaŋa Yesu nindi, Bayi mumulekeshaku, muloŋa muntu wukutwesha kukoŋa mudimu waŋovu mwijina dami hakutwesha kuntuŋiula swayuku. 40Muntu wukubula ntadi nanetu diyi wetu. 41Muloŋa yowu wukuyinka lupasa lwameji akunwa nanochu chimudi aKristu, nukuyileja chalala nami, hakabula wufwetu winduku. 42Yowu wukudimbwisha mwana wanyanya wumu wanawa ankuhwelelami, chikuwaha kumukasila ilola dakuhala deneni kunshiŋu, hikumúumbila mukaluŋalwiji. 43Neyi chikasa cheyi chakudimbwishaŋa chiketuli; 44chinawahi kwijila muwumi nawufwayi, hichinawahi kwijila mukaluŋa kachinana, mukesi kakajimaŋa, namakaseyi ayeduku. 45Neyi mwendu weyi wakudimbwishaŋa wuketuli; 46chinawahi kwijila muwumi nawufwayi, hichinawahi kukunatila mukaluŋa kachinana nanyendu yeyi yiyeduku. 47Neyi disu deyi dakudimbwishaŋa ditubuli; chinawahi kwijila muwanta waNzambi nadisu dimu, hichinawahi kukunatila mukaluŋa kachinana namesu ayeduku. 48Mwenomu himwafwaŋa kabubu kawuku, ni kesi hikajimaŋaku. 49Muloŋa antu ejima akayikwita muŋwa wakesi. 50Muŋwa wawuwahi; Ilaŋa neyi muŋwa wunasamuki, mukuwutoweja nanka? Ikalenu namuŋwa mudenu, shakamenu nakuwunda nawakwenu.
Pašlaik izvēlēts:
Mareka 9: MW62
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
The Bible in Lunda: Ndembu (Lunda of Kalunda) © B. F. B. S. 1962.