Mareka 10
10
1Wanyamukili kwenoku, hakuya mwituŋa daYudeya nimwishinadi daYodana. Mazaza awantu hiyakumupompela cheŋi, hakuyileja cheŋi neyi ochu chelilaŋayi. 2AFwarisi hiyakwinza kudi yena nakumwihula mazu akumweseka nawu, Chaloŋa iyala kuseŋa Iŋodindi, tahindi? 3Yena hakuyakula nindi, Mosi wayilejeli nindidi? 4Wena nawu, Mosi wetejeli kusoneka mukanda wakuseŋa nachu, hikumuseŋa mumbanda. 5Yesu hakuyila nindi, Chayilejeliyi chumichi chafumini hakuchinchika kwanyichima yenu. 6Kwinza kufuma kutachi kwaleŋeluwu yuma, wayileŋeli niiyala nimumbanda. 7Dichi muntu ashiyi tata yindi namama yindi, akakeli Iŋodindi; 8niwena ayedi akekali mujimba wumu; hiyadi cheŋi ayeduku, adi mujimba wumu. 9Dichi anabombuwu kudi Nzambi, bayi ayambula kudi muntuku. 10Atumbanji hiyakumwihula cheŋi nsaŋu iyi mwitala. 11Hakuyila nindi, Muntu wukuseŋa Iŋodindi hakusumbula wacheŋi, namwili Iŋodindi chatama, neli dehi wuvumbi. 12Mumbanda wukuleka nfumwindi hakusumbuka nawacheŋi, neli dehi wuvumbi.
13Amuleteleli anyana anyanya kulonda ayikunki, atumbanji hiyakuyihoshola. 14Ilaŋa Yesu chanachimoniyi hakutiya kutama nankashi, hakuyila nindi, Itejenu anyana anyanya kwinza kudami, bayi muyilekeshaku, muloŋa wanta waNzambi wawena adi chochichi. 15Nukuyileja chalala nami, muntu wukubula kutambula wanta waNzambi neyi mwana wanyanya, hakwijila mu nihantuku. 16Hakuyakata mumakasindi, hakuyikiswila nkisu, hakuyinaŋika.
17Cheliliyi nindi aholokeli munjila, muntu hakwinza kudi yena lufuchi; hakumufukamina nakumwihula nindi, Eyi Nkuluŋaŋa wamuwahi, nukwila ŋahi kulonda nakaswani wumi wahaya nyaka? 18Yesu hakumwila nindi, Wukuntenenadi neyi muwahi? Hosi muwahuku, chiŋa Nzambi hohu. 19Nshimbi wajiluka dehi nawu, Kujaha muntu chinjila. Kwila wuvumbi chinjila. Kwiya chinjila. Kushimuna wunsahu wakutwamba chinjila. Kudiila mukwenu yawukombi chinjila. Lemeshaku tata yeyi namama yeyi. 20Yena hakumwila nindi, Eyi Nkuluŋaŋa, yuma yejimiyi nayihembi dehi kufumisha kuwansi. 21Yesu hakumushinshika, hakumukeŋa, hakumwila nindi, Kunashali chuma chimu hohu; yaloŋa wakalandishi yuma yeyi yejima winki atuzweŋi, eyi wakaheta maheta mwiwulu; winzi wunlondaŋa. 22Ilaŋa yena hakudihomba kumesu nezu odu, hakudiyila kwindi nakuneŋa; muloŋa wadiŋi muntu waheta maheta amavulu nankashi.
23Yesu hakuyitala kwi-ndo; hakuyila atumbanji twindi nindi, Akwamaheta, o chamonaŋawu kukala kwijila muwanta waNzambi! 24Atumbanji hiyakuhayama nankashi mazu indi. Ilaŋa Yesu hakuyila cheŋi nindi, Anyikenu, akuhwelelaŋa maheta, o chamonaŋawu kukala kwijila muwanta waNzambi! 25Nŋameli kuhanuka mudisu dandoŋu chaswayi, kwinza mukwamaheta kwijila muwanta waNzambi chakala. 26Wena hiyakusweja kuhayama nankashi nawu, Indi dinu wukutwesha kwamwinewa hinyi? 27Yesu hakuyitala nindi, Chuma chikukaŋanya muntu, Nzambi wukuchitwesha, muloŋa yuma yejima yinatwesheki kudi Nzambi. 28Petulu hakutachika kumwila nindi, Tala, etu tunashiyi yuma yejima, tunakulondi.
29Yesu nindi, Nukuyileja chalala nami hikudi muntu nashiyi hela itala, hela ana kwindi, hela ahelindi, hela mama yindi, hela tata yindi, hela anyana, hela maha, kukoola ami ninsaŋu yayiwahi, 30wukubula kutambwilamu nkulakaji katataka makonu, nimatala, niana kwindi, niahelindi, niamama, nianyana, nimaha, kubombelaku nikuyikabisha; hanyaka yakenzaku wumi wahaya nyaka. 31Ilaŋa mavulu akusambila akekala akukuminina; niakukuminina akekala akusambila.
32Adiŋi munjila yakukanduka kuYerusalema; Yesu hakutwamina kumbidi. Hiyakuhayama, ninowu alondelelaŋa munyima hiyakutiya woma. Hakupompesha cheŋi owu ikumi nayedi, nakutachika kuyileja yuma yakamonayi. 33Nindi, Tiyenu, hitukukanduka kuYerusalema, Mwana kamuntu akamuhana kudi awakulumpi jawatupristu nikudi ansoneki; akamuhisha nawu afwi, akamuhana kudi ajentili; 34akamuseha, akamufwŋila mazeŋi, akamuvupola, akamujaha; chimwakahita mafuku asatu wakasaŋuka mudi afu. 35Anyana kaZebedewu aYakoba naYowanu hiyakuswila kwakwihi nayena, hiyakumwila nawu, Eyi Nkulupaŋa, tunakeŋi wutwililuku chuma chitukukulomba. 36Yena hakuyila nindi, Alunakeŋi niyilili chumanyi? 37Wena hiyakumwila nawu, Twiteji twakashakami mukulema kweyi, iwu kuchikasa cheyi chachidiilu, iwu kuchikasa cheyi chachimunswa. 38Yesu hakuyila nindi, Chuma chimunalombi himunachilukuku. Enu mutweshi kunwa mulupasa lunukunwami? Mukutwesha kupapatishewa nachipapatishu chakupapatishawu nachu ami? 39Wena hiyakumwila nawu, Tukutwesha. Yesu hakuyila nindi, Lupasa lunukunwami, mwakanwamu; nichipapatishu chakumpapatishawu nachu ami, ninenu nawa akayipapatisha nachu; 40kwinza kushakama kuchikasa chami chachidiilu, hela kuchikasa chachimunswa, hichuma chami mwaka nichihanuku; chambala chanawa aloŋeshelewa dehi. 41Owu ikumi chanachitiyuwu, hiyakutachika kutiya kutama nankashi nawaYakoba naYowanu. 42Yesu hakuyitambika, hakuyila nindi, Mweluka dehi anyanta jawajentili chayiyulaŋawu, niantu awu alema chekalaŋawu nawanta hadi wena; 43ilaŋa mukachi kenu bayi mwakekala chochochuku. Yowu wukukeŋa kwikala muneni mukachi kenu ekali mukwakuyikalakela. 44Yowu wukukeŋa kwikala mukwakubadika mukachi kenu ekali nduŋu yenu. 45Muloŋa chalala chenjiliyi Mwana kamuntu, halondeli nindi akamukalakeluku; nindi akakalakeli akwawu, akahani wumi windi wakukuula nachu antu amavulu.
46Hiyakushika kuYeriku. Chadiŋi nakufumayi kuYeriku nawatumbanji twindi niizaza deneni, mwana kaTimewu Baratimewu, mputamesu, mukwakulomba, wadiŋi washakama kunsa yanjila. 47Chanatiyiyi nawu diyi Yesu wakuNazareta, hakutachika kubilela nindi, Eyi Yesu mwana kaDavidi, ntiyili luwi. 48Antu amavulu hiyakumuhoshola nawu, Mwenaku. Ilaŋa yena hakusweja nikubilela nankashi nindi, Eyi mwana kaDavidi, ntiyili luwi. 49Yesu hakwimana ku-ka, nindi, Mutambi kenu. Hiyakumutambika owu mputamesu, hiyakumwila nawu, Tiyaku kuwaha, nyamukaku, hakukutambika. 50Yena hakunata chi kovwelu chindi, hakutakumuka, hakwinza kudi Yesu. 51Yesu hakumwihula nindi, Wunakeŋi nikwilili chumanyi? Mputamesu nindi, Eyi Mwanta, nakeŋi nimoni. 52Yesu hakumwila nindi, Yaŋa kweyi, kukuhwelela kweyi kunakukoleshi dehi. Hohenohu amona nikumona, hakumulondela Yesu munjila.
Pašlaik izvēlēts:
Mareka 10: MW62
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
The Bible in Lunda: Ndembu (Lunda of Kalunda) © B. F. B. S. 1962.