Magə 13
13
Yeso a Fiʼtə̂ Ndzaŋ pə́ yǒ nə́ Shaʼtə̂ Tə́kɔʼndɛ̂sê
(Mat 24.1, 2; Luk 21.5, 6)
1Əghâ ándó Yeso a nə ńtə́ nə́ ə́fɛ́lə á mə́m Tə́kɔʼndɛ̂sê lə́, táʼ ndzoŋdzəm əyǐ yitsə̌ a sóŋ nə́ yí ńgə́, “Ndzéʼkə, zə́ənə! Jɨ́ əshwi məngɔʼ mətsə́! Jɨ́ əshwi məláʼ mətsə́!”
2Yeso a kwěe ńgə́, “Gho jɨ́ pəmɛ́ pə́ məláʼ mɨ tsɔʼə mətsəm? Tsɔʼə táʼ ngɔʼə á láʼ kě á ndu yitsə̌ noŋnə̂ pô. Pə́ yǒ kwɛlə̂ ajúmə atsəmə á əsê.”
Məngə́ʼ pópə mə Tsaŋkə̂ nə́
(Mat 24.3-14; Luk 21.7-19)
3Ndzaŋə ándó Yeso a nə ńnáanə nə́ á ndu Nkwəənə Olifə páʼ wɨ́d ə́ nə ńtə́ nə́ ńnáŋə Tə́kɔʼndɛ̂sê lə́, Pita pó Jɛmsə nə́ Jɔn ḿbéenə Andəlu pó yǐ ḿbítə yə á ndzəmə á ndzəm ńgə́, 4“Fiʼtə̂ áwə́g nə́ ndɛd páʼ ndɛn mənu ghɛn ətsəm ə́ yǒ nə́ lɔgə̂ aliʼə́, ńkə́ fiʼtə̂ áwə́g nə́ akyeʼə́nu á yǒ nə́ nɨd ńgə́ ndɛd ə́ koʼ nə́ mənu məənə́ á mə́ lɔg nə́ aliʼə́.” 5Yeso a kwěe ághɔ́b ńgə́, “Lɔg nə́ ndɛd ńgə́ kɔ ŋwu tsə̌ a fɨgə̂ áwə́ənə́. 6Pɨ pi nɨ́ nə́ pə́ yǒ yǐ nə́ əlɛ́nə mə ə́sóŋə ńgə́, ‘Maŋ lə́ yə́,’ ə́ tíʼ fɨg pɨ pi nɨ́ nə́. 7Mbɔʼ nə́ zóʼə anu ńté məntso ḿbɨ ḿbə́ nə́ ndzaŋə ándó pɨ pə̈ tsáb nə́ ńté məntso, kɔ nə́ pɔ́gə. Ndɛn mənu wɨ́d ghɛn ə́ chîə á mə́ lɔg nə́ aliʼə́, lə́ ndwegtə ə́ pə́ ḿbɛ́d pɔŋə̂ yǐəə. 8Aláʼə á yǒ lǒo á əsê sɔb məsɔŋə́ á ndzəm yətsə́, aláʼ páʼ əfo ä sáʼ nə́ á lǒo á əsê ə́sɔb məsɔŋə́ á ndzəm yətsə́: Ndəsê ə́ chiʼnə̂ aliʼə́ aliʼə́, nji ə́ gháʼə. Ndɛn mənu ghɛn ətsəm ə́ ghɛd chî lə́ tsɔʼə ándó məngyě nəpəmə a zóʼə móonə.”
9Nə́ shib ńdɔg ndɛlə. Pə́ yǒ waamə̂ áwɨ́ ə́fɛ̂ á mbô ngaŋə́sáʼə́məsáʼ pə́ ə́shúmə áwə́ənə́ á mə́m məláʼ mə́ Əsê mə́ Pəjusə. Nə́ yǒ tə́əmə á mbi pəgɔ́bnɔ pópə Pəfo ə́ té mə á mə́ náŋkə nə́ nkɨ yi əshîʼnə á mbô pó. 10Pə pə́ ə́shib ḿbeg ə́sóŋə anǔəsê á mbô əláʼ ətsəmə. 11Mbɔʼ pə́ ghɛd ńgwaamə̂ áwɨ́ ńgɛn nə́ pəənə́ á mbô ngaŋə́sáʼə́məsáʼ, kɔ nə jwaʼ mbɨ əjɨ záʼ ndɛd ə́ pɔŋə̂ koʼ nə́ anu pɨ yǐ nə́ ghɛn sóŋə. Mbɔʼ ndɛd yi wɨ́ ə́ ghɛd ńkoʼ, nə sóŋə anuə atsəm páʼ Əsê a fiʼtə̂ nə́ áwə́ənə́. Ńté ńgə́ lə́ yǒ kě pɨ tséebə pô, lə́ yǒ tséebə Ajwǐəsê. 12Pɨ pə́ yǒ fi pəlim pɔ́b ńgə́ pə jwítə, tǎ a kə́ ə́fɛ̂ mɔ́ əyǐ ńgə́ pə jwítə. Pɔ́ pə́ yǒ sɔb məsɔŋə́ á ndzəm pətǎ pɔ́b pópə pəmǎ pɔ́b ə́ ghɛd pə jwítə ághóobə́. 13Ŋwu ntsəmə a yǒ peenə̂ áwɨ́ ə́ té mə. Lə́ ŋwu ntsəm páʼə a tɨ́ nə́ ńtyantə̂ tə ńkoʼə̂ á ndwegtə, a yǒ chwáalə.
Ajúmə Təpɔŋ páʼ Əsê a Pa nə́
(Mat 24.15-28; Luk 21.20-24)
14Mbɔʼ nə́ yǒ ńdzə́ənə ajúmə təpɔŋ páʼ Əsê a pa nə́ a tə́əmə aliʼ páʼ a pěʼ nə́ ńkě chîə á mə́ tɨ́ nə́ ə́wɨ́ pô, (tíʼ ŋwu ntsəm páʼə a tə́ nə́ ə́fóŋə, atûə ajíə á léenə), pɨ pó chî nə́ á Judya pó tíʼ ńkə ndə̌ ńgɛnə̂ məŋnkwəənə. 15Ŋwunə a chî nə́ atûndɛ̂ kɔ a tsóolə á ndəsê kɨ ńkwúnə á ndɛ̂ yə́ á mə́ lɔg nə́ ajûtsə́ 16Ŋwunə a chî nə́ afoonə, kɔ a pɨ ḿbəənə̂ á mə́ lɔg nə́ kód əyǐə. 17Əlě pə wɨ́ ə́ yǒ tyantə̂ á mbô pəngyě pə́ nəpəm pópə pəngyě pə́ tə́ nə́ ńnɔ́ŋkə! 18Tə́ nə́ ńchaʼtə́sê ńgə́ kɔ mənu mɨ́d mɨ mə́ yǐ ńtégə áwə́ənə́ á əghâ əfə́gə. 19Ńté ńgə́ ngə́ʼ əlě pə wɨ́ ə́ yǒ chaanə̂ tə tsɛ ngə́ʼ ntsəm páʼ ə́ nə ḿbɛ́d nə́ tə ńchîə á mbîə ə́fɛ́lə nəchwaakənə́ Əsê a nə ńtsoŋkə̂ nə́ mbî tə ńkoʼə̂ əghâ nə́. Yitsə̌ ngə́ʼ ə́ láʼ kě ándó yi wɨ́ kə́ pɨ chî pô. 20Mbɔʼ Əsê a nə ńchî əlě pə wɨ́ lə́g pô tə ḿbə́ ŋwu tsə̌ a ghɛd ńkě chwád pô. A pɛn ńdə́g əlě pə wɨ́ ńté pɨ pí páʼə a tsɔ́ʼ nə́.
21A yǒ ḿbə́ nə́ ndɛd yi wɨ́ ŋwu tsə̌ a yǐ ə́sóŋə á mbô pɨ ńgə́, “Náŋ nə́, Nchwádkə yi wə́ a ghɛnə́ kɨ ńgə́ a yǐəə, kɔ nə pímə atséebə ajíə. 22Ńté ńgə́ pənchwádkə pə́ məfɨg pópə məntúmə́sê mə́ məfɨg, mə́ yǒ yǐ ghɛd əkyeʼmə́nu pópə əkɨʼnəmə́nu á mə́ fɨg nə́ pɨ páʼ Əsê a tsɔ́ʼ nə páʼ təmbɔʼ ndu ə́ chî ə́wə́. 23Lə́ələ́ pə́ ńgə́ nə́ lɔg ndɛlə́! Maŋ fiʼtə̂ áwɨ́ nə́ anuə atsəm záʼ ndɛd ə́ pɔŋə̂ koʼə̂.”
Mə yǐ nə́ mə́ Mɔ́ Ŋwunə
(Mat 24.29-31; Luk 21.25-28)
24Nə́ əlě pə wɨ́ páʼ ngə́ʼ yi wɨ́ ə́ laŋ nə́ lə́, mə́numə á yǒ sɛ́nə, sáŋə á kě nkyaʼ pɨ fɛ̂ pô, 25pɔ́ pə́ sáŋ pə lǒo á nəpó ńgwukə̂ ndəsê, pə́ kə́ ńchiʼ mətɨ mə́ nəpóolə. 26Əghâ yi wɨ́ lə́, pɨ pə́ zə́ənə Mɔ́ Ŋwunə a tə́ ńgyǐəə á mə́mə alə́m nə́ mətɨ mə weŋ pó nəgháʼə. 27A yǒ tú pətseŋpə́ndɛ̂ pí á mə́m məlá mə́ mbî mə̂ nəkwa, pó ghɛn nkyeetə pɨ páʼ Əsê a tsɔ́ʼ nə́ ə́fɛ́d nə́ táʼ əlá mbî ńgɛn ńkoʼ nə́ yitsə̌.
Anu mbɔʼ pə́ Zéʼ nə́ Atǐə Figə
(Mat 24.32-35; Luk 21.29-33)
28Əghâ nə́, zéʼ nə́ anu zəənə́ á mbô atǐə figə. Mbɔʼ nə́ jɨ́ məntá mí mə́ tə́ ńtô ə́fógə məfǔ mimə fî, nə́ jî ńgə́ məgheemə́ a tə́ ńkwə̂. 29Mbɔʼ nə́ kə́ ńjɨ́ ndɛn mənu wɨ́d ghɛn ə́ tə́ ńdɔgə̂ aliʼ, nə́ jî ńgə́ ndɛd ə́ páatə tə ńtə́əmə á ntsoolə́poʼə. 30Mäŋ fiʼtə̂ áwɨ́ nə́ ndə̌ŋdəŋ ńgə́ pɨ pə́ ngoʼ pɨ pə́ yǒ kě pətsəm kwû záʼ ndɛn mənu ghɛn ə́ pɔŋə̂ lɔgə̂ aliʼ pô. 31Nəpó pó ndəsê ə́ yǒ laŋə̂, lə́ atséebə mə á pə́ ńkě laŋ pô.
Ŋwu Tsə̌ a kě Alě yi wɨ́ kɨ Ndɛd yi wɨ́ Jî pô
(Mat 24.36-44)
32“Ŋwu tsə̌ a kě alě yə wɨ́ kɨ ndɛd yi wɨ́ jî pô. Alǒ pətseŋpə́ndɛ́pə́sê á nəpó kɨ Mɔ́ Əsê, pó kě jî pô, tə ńdéʼtə Tǎ páʼə a jî nə́. 33Lɔg nə́ ndɛlə́! Chî nə́ atǐ ńtə́ ḿbyáabə!.#13.33 Pətsə́ əŋwaʼlə ə́ sóŋ ńgə́ pə tə́ ḿbyáabə ńtûə ńchaʼtə́sê. Ńté ńgə́ nə́ kě jî əghâ páʼ ndɛd yi wɨ́ ə́ yǐ nə́ yǐ pô. 34Á chî lə́ ándó ŋwunə a tə́ ńgɛnə̂ nənyi ḿmɛdtə̂ ndɛ̂ əjǐə á mbô ngaŋə́faʼ əjí ə́fiʼtə̂ ŋwu ntsəm nə́ anuə a tə́ faʼə̂. Ńtíʼ ə́sóŋ nə́ mbyáb nchîndɛ̂ ńgə́ a tə́ ḿbyáb əliʼə́. 35Lə́ələ́ pə́ ńgə́, tə́ nə́ ḿbyáabə, ńté ńgə́ nə́ kě jî ndɛd páʼ ngaŋnchîndɛ̂ a yǐ nə́ kwə̂ pô, kəənə á ndɛd nkwanə́, kəənə á ntɨ̌túʼ, kəənə á ndú mbî, kəənə á məsânə. 36Mbɔʼ a ghabkə̂ ńkwə̂, kɔ a yǐ ńtégə gho gho tə́ ńdê. 37Anu maŋ sóŋ nə́ á mbô pɨ, mäŋ sóŋə lə́ á mbô ŋwu ntsəm ńgə́: pyáb nə́.”
Pašlaik izvēlēts:
Magə 13: azo
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties