Magə 14
14
Pə́ Tyáŋə Mənaŋə́ Atû Yeso
(Mat 26.1-5; Luk 22.1, 2; Jɔn 11.45-53)
1Lə́ nə ḿbɛ́d tsɔʼə əlě pɛ̌ záʼ, alě Ndzáʼkə pó alě jîə apéenə məkálə́ tə mbê á pɔŋə́ koʼə̂. Pətə́kɔʼ pə́ ngaŋə́pêsê pópə ngaŋə́zéʼkə Pənoŋkə ə́ kə́ tə ńnáŋ ndúmə á mə́ pánə nə́ waamə̂ Yeso á ndzəmə á ndzəm ə́ jwítə yə́. 2Ńtíʼ ə́sóŋ ńgə́, “Lə́ kɔ pɛn waamə̂ yə́ pə́ nə́ alě akɔŋtə tə ḿbə́ pɨ pə́ yǐ yɛ́ɛlə.”
Pə́ Zɔ́ʼə Yeso nə́ Məghɔ́lə á Bɛtaniə
(Mat 26.6-13; Jɔn 12.1-8)
3Əghâ ándó Yeso a nə ńchî nə́ á Bɛtani á ndɛ̂ ŋwu tsə̌ pə́ nə̈ ə́fóŋ nə́ nə́ Saamun ngaŋnkaʼ ńtə́ ńjîə məjî lə́. Məngyě yitsə̌ a yǐəə á mbô yí nə́ ntsə́ŋ məghɔ́d mə́ zɔ́ʼə akwub mimə́ azagə́ yə əshîʼnə páʼ pə́ nə̈ ńtsoŋkə̂ nə́ chigə nə́ nad páʼ ndɛn nkáb əyí nə ńnɨ́ nə́. A yǐ ə́sá ntsə́ŋ zə̂ ńkwɛd məghɔ́d mimə wə̂ á atû Yeso. 4Pɨ pətsə́ pə́ nə ńchî nə́ aliʼ yi wɨ́ pə́ nə ńdzáŋ ndě ńtíʼə ńtséebə á tətɨ pó ə́sóŋə ńgə́, “Pə́ chígə́ ńtə́mə́sɛ́ nə́ məghɔ́d mə́ azagə́ yə əshîʼnə mɨ lə́ ńgə́ akə̂? 5Mbɔʼ pə́ pěʼ ə́fi ńdaŋ nkáb əpa teelə́ ə́fɛ̂ á mbô pəpóŋə!” Pó tíʼ ə́sáʼə məngyě yi wə́.#14.5 Nkáb əlě mbi afaʼ pɛ́n teelə́.
6Lə́ Yeso a pə́ ə́sóŋ ńgə́, “Mɛdtə̂ nə́ yə́, nə́ lánə ńjwaʼə̂ yí lə́ ńgə́ akə̂? A ghɛd lə́ anu yə əshîʼnə á mbô maŋə. 7Pɨ̌pə pəpóŋ ə́ yǒ zá ə́ chîə, əghâ ətsəm nə́ kɔŋ nə́ á mə́ kwá nə́ ághɔ́b, nə́ kwáalə. Lə́ maŋ yǒ kě pɛn əghâ ətsəm zá chîə pô. 8A faʼ lə́ anu páʼ təmbɔʼ a faʼə̂; A zaŋkə̂ ńkwɛd məghɔ́d mə́ azagə́ yə əshîʼnə á mbɨ maŋ lə́ ńjî ńgə́ a tsoŋkə̂ mə záʼ pə́ pɔŋə́ twə́ŋə. 9Mäŋ fiʼtə̂ áwɨ́ nə́ ndə̌ŋdəŋ ńgə́ aliʼə́ atsəm pə́ yǒ nə́ ə́sóŋə Anǔəsê ə́wə́ á mə́m mbî ntsəm, anu páʼə a ghɛd nə́ lə́ pə́ yǒ kə́ sóŋə ájɨ́d lɔgə̂ kwúmtə yí ə́wə́.”
Juda a Pímə á mə́ Fi nə́ Yeso
(Mat 26.14-16; Luk 22.3-6)
10Juda Iskaliɔt, táʼə á mə́m ngaŋə́zoŋə́ndzəm Yeso zə̂ ntsɔb pɛ̌ a tíʼ ńgɛnə̂ á mbô pətə́kɔʼ pə́ ngaŋə́pêsê á mə́ fi nə́ Yeso á mbô pó. 11Mbɨ əzɔb ə́ nə ńchígə́ ḿbɔŋ ndzaŋ pó nə ńdzóʼ nə anu yə wɨ́ ńtíʼ ńdaʼnə̂ yí ńgə́ pó yǐ fɛ̂ nkáb nə́ yə́. Juda a tíʼ ńchúʼə á mə́ náŋ nə́ alaŋə́sêndú yə əshîʼnə á mə́ fi nə́ Yeso.
Yeso a jî Məjî mə́ Ndzáʼkə pópə Ngaŋə́zoŋə́ndzəm əjíə
(Mat 26.17-25; Luk 22.7-14, 21-23; Jɔn 13.21-30)
12A nə ḿbə́ á ntsɛɛmbiə alě akɔ́lə́péenə məkálə́ yə tə́ mbê lə́, alě páʼ pə́ nə̈ ńgwad nə́ pɔ́ pə́ mbéŋ pə́ ndzɛd pə́ Ndzáʼkə lə́, ngaŋə́zoŋə́ndzəm Yeso pó pítə yí ńgə́, “Gho kwaŋ ńgə́ mbɔʼ pəg ghɛn ńtsoŋkə̂ aliʼ mbɔʼ gho jî məjî mə́ Ndzáʼkə ə́wɨ́ lə́ ə́fó?”
13Yeso a tíʼ ńtú ngaŋə́zoŋə́ndzəm əjí zɛ́n pɛ̌ ə́sóŋ nə́ pó ńgə́, “Ghɛn nə́ á mə́mə aláʼə, ŋwu tsə̌ páʼə a pěʼ nə́ nkǐə á mə́mə ambáŋə́ a yǐ tégə áwə́ənə́, zoŋ nə́ yí 14ńgɛn ńkwúnə á ndɛ̂ páʼə a kwú nə́ ə́wɨ́ ńtíʼ ə́sóŋ nə́ ngaŋndɛ̂ ńgə́: Ndzéʼkə a pítə ńgə́ atɔ́gə ndɛ̂ páʼ pópə ngaŋə́zoŋə́ndzəm əjí ə́ yǐ nə́ jî məjî mə́ Ndzáʼkə ə́wɨ́ lə́ á ə́fó lə́? 15A yǐ tíʼ ńnəələ̂ áwɨ́ nə́ tə́kɔʼ atɔ́gə ndɛ̂ yitsə̌ atǐ páʼ pə́ tsoŋkə̂ nə́ áwɨ́d tə á koʼə̂. Tyáŋtə nə́ əliʼ ə́wə́ á mbô pɛnə̂.”
16Ngaŋə́zoŋə́ndzəm əjí zə̂ ə́ ghɛn ńkwúnə á mə́mə aláʼ ńkə́ ńdzə́ənə anuə atsəm tsɔʼə ndzaŋ páʼ Yeso a pěʼ nə́ ə́sóŋ nə́ pó lə̂. Ńtíʼ ńtsoŋkə̂ məjî mə́ Ndzáʼkə mə̂ ə́wə́.
17Á yǐ ḿbə́ ndɛd nkwanə́ Yeso pópə ngaŋə́zoŋə́ndzəm əjí ə́ yǐəə. 18Əghâ pó nə ńnáanə nə́ á ndu təpɛlə ńtə́ ńjîə məjî lə́, Yeso a sóŋ ńgə́, “Mäŋ fiʼtə̂ áwɨ́ nə́ ndə̌ŋdəŋ ńgə́ táʼ ŋwu əwɨ yitsə̌ a yǐ finə̂ mə, yi pəg yí tə́ nə́ ńjîə məjîə.”
19Anu yəwə́ á nə ńjwaʼ ngaŋə́zoŋə́ndzəm əjí lɛ tə, pó tíʼə ḿbítə yí táʼ táʼ ńgə́, “Maŋ kwaŋ ńgə́ gho kě lə́ mə sóŋə pô, kɨ lə́ maŋ lóo?”
20Yeso a kwěe ńgə́, “Lə́ yǐ pə́ táʼ ŋwunə á mə́m pɨ ghɛn ntsɔb pɛ̌, ŋwu pəg yí tə́ nə́ ńtsɛnə̂ apéenə məkálə́ á mə́m táʼə akáŋə. 21Mɔ́ Ŋwunə a yǐ kwû tsɔʼə ndzaŋ páʼə aŋwaʼlə Əsê á sóŋ nə́ ńté yə́, lə́ ndɔ ə́ pə́ ńchîə atû ŋwu wə̂ páʼə a fi nə́ Mɔ́ Ŋwu lə̂. A kə pěʼ ḿbɔŋə̂ á mbô yí ńgə́ kɔ pə́ pěʼ ńkwéʼnə mbîə yí pî nə́!”
Ntéelə
(Mat 26.26-30; Luk 22.14-20; 1Kɔ 11.23-25)
22Əghâ ándó pó nə́ ńtə́ nə́ ńjîə məjî lə́, Yeso a pyáanə apá, əfɛ̂ ndǎ á mbô Əsê, ḿbagtə̂ zɨ́d ńtíʼ ə́fɛ̂ á mbô ngaŋə́zoŋə́ndzəm əjí ə́sóŋ ńgə́, “Ko nə́ zə́ələ́! Lɛ̌ na mbəəmə mə.”
23Ńtíʼ ńtwám ndɔ́ŋ, ə́fɛ̂ ndǎ á mbô Əsê ə́fɛ̂ á mbô pó, pó pətsəm tíʼ ńnô. 24A sóŋ ńgə́, “Lɛ̌ lə́ achǐə mə páʼ zə́ələ́ á wad nə́ əkeenə. #14.24 Pətsə́ əŋwaʼlə ə́ peg ńgə́ yi fîə. Páʼ pə́ kwɛd nə́ ájɨ́d ńté pɨ pi nɨ́ nə́. 25Mäŋ fiʼtə̂ áwɨ́ nə́ ndə̌ŋdəŋ ńgə́ maŋ láʼ kě məloʼ mɨ pɨ nô pô, tə ə́ koʼə̂ alě páʼ maŋ láʼ nə́ ḿbɨ ńnô məloʼ mimə wɨ́ əfîfîə á mə́mə Anuə Nəfoonə Əsê.” 26Pó tíʼ ńdzɔb nkǐ ə́fɛ́d ńgɛnə̂ á nkwəənə Olifə.
Yeso a Fiʼtə̂ Ndzaŋ páʼ Pita a yǐ nə́ ə́ Kǐəə Yə́
(Mat 26.31-35; Luk 22.31-34; Jɔn 13.36-38)
27Yeso a sóŋə á mbô pó ńgə́, “Pɨ pətsəm ə́ yǐ kə́ mɛdtə̂ mə, ńté ńgə́ aŋwaʼlə Əsê á sóŋ ńgə́, ‘Maŋ yǐ jwítə ntseŋnə, məmbéŋ mə́ shamnə̂.’ #14.27Zak 13.7 28Lə́ əghâ maŋ yǐ nə́ ńjúmnə á nəwû, maŋ yǐ kwá mbi əzɨ ə́ ghɛnə̂ Galiliə.”
29Pita a sóŋ ńgə́, “Mbɔʼ ŋwu ntsəmə a kɔŋə̂ a kəələ̂, maŋ yǐ kě fiʼ pô.”
30Yeso a kwěe ńgə́, “Mäŋ fiʼtə̂ gho nə́ ndə̌ŋdəŋ ńgə́ aŋkəʼə́ á yǐ jǐ tə́ tɔ́ŋə á nətúʼ ə́sɛ̂n ngǎ pɛ̌ lə́ gho sóŋ ngǎ teelə́ ńgə́ gho kě mə jî pô.”
31Pita a pə́ ḿbɨ ńněe ə́sóŋ ńgə́, “Mbɔʼ a pə́ pə́ ńgə́ pɔ̌ kwû, maŋ láʼ ńkě gho kǐ pô.” Ngaŋə́zoŋə́ndzəm əjí tsɔʼə ətsəm pó kə́ sóŋ tsɔʼə ə́lə́ələ́.
Yeso a Chaʼtə̂ Əsê á Gɛtsɛmaniə
(Mat 26.36-46; Luk 22.39-46)
32Pó yǐ ńkoʼə̂ aliʼ yitsə̌ pə́ fóŋ nə́ nə́ Gɛtsɛmani, Yeso a sóŋə á mbô ngaŋə́zoŋə́ndzəm əjí ńgə́, “Náanə nə́ aliʼə́ nə́ ńtíʼ maŋ chaʼtə́sê.” 33Ńtíʼ ńdɔgə̂ Pita pó Jɛmsə nə́ Jɔn pó po ghɛnə̂, a chúʼə á mə́ tə́ nə́ fɨnə̂, á tûə ńjwaʼə̂ yə́. 34A tíʼ ə́sóŋə á mbô pó ńgə́, “Afɨnə páʼə á chî nə́ á ntɨ́ maŋ á chaanə̂, nə́ ndu páʼ təmbɔʼ á jwítə mə. ‘Náanə nə́ aliʼə́ nə́ ńtə́ ḿbyáb əliʼə́.’
35Ńtíʼ ńnyáʼ ńkwádtə ńgɛn ńnoŋnə̂ á ndəsê ńchaʼtə́sê ńgə́, mbɔʼ ndú ə́ chî ə́wɨ́ ndɛd ngə́ʼ jɨ ə́ laŋə̂ yi tsɔʼə tə ghə́ maŋ zə́ənə zə́ələ́. 36Ə́sóŋə ńgə́, Aba!, Tǎ mə, Anuə atsəmə á pwɔ́dnə á mbô gho. Kwá ndɔ́ŋ ngə́ʼ zəənə́ á mbô maŋə. Lə́ kɔ á pə́ pə́ ndzaŋ maŋ kɔŋ nə́. Tíʼə a pə́ pə́ ndzaŋ páʼ gho kɔŋ nə́.”
37A pɨ ńtíʼ ḿbəənə̂ á mbô ngaŋə́zoŋə́ndzəm əjí ńdzə́ənə ághɔ́b pó tə́ ńdê. A sóŋə á mbô Pita ńgə́, “Saamun, gho tə́ ńdê? Mbɔʼ gho kě chî tə lê nə́ mɔ́ akəmə ndɛd ńtə́ ḿbyáb əliʼ?”#14.37 Pətsə́ əŋwaʼlə ə́ sóŋ ńgə́ ńchîə atǐə. 38A tíʼ ə́sóŋə á mbô pó ńgə́, “Tə́ nə́ ḿbyáb əliʼ ńkə́ ńchaʼtə́sê ńgə́ kɔ nə́ yǐ ńgwǔəə á mə́mə akwaʼlə. Ajwiə á tə́ ńkɔŋə̂ lə́ na mbɨ ə́ pə́ ḿbóolə.”
39Ngǎ yitsə̌, a kə́ ḿbɨ ńgɛn ńchaʼtə́sê ə́sóŋ tsɔʼə anu páʼə a pěʼ nə ə́sóŋ lə̂. 40Ńtíʼ ḿbɨ ḿbəənə̂ á mbô ngaŋə́zoŋə́ndzəm əjí ńdzə́ənə ághɔ́b pó pɨ ńkə́ ńtə́ ńdê ńté ńgə́ pəlê á nə ńchîə á əmə́g pó. Pó tíʼ ńkě jîə anu mbɔʼ pó sóŋ nə́ yí pô.
41A nə ḿbɨ ńtə́ ḿbəənə̂ á mbô pó tə́ ńkoʼ ngǎ teelə́, ə́sóŋə á mbô pó ńgə́, “Nə tə́ ḿbɛ́lə ńdê ńtûə ńjwitə̂? Á koʼə̂. Ndɛd ə́ koʼə̂. Jɨ́ nə́, pə́ finə̂ Mɔ́ Ŋwunə á mbô ngaŋə́ghɛlə təpɔŋə. 42Lǒo nə́ á əsê pɛn ghɛnə̂. Jɨ́ nə́, ŋwu páʼə a fi nə́ mə lə́, a ghɛnə́ a yǐ nə́ lɛ̌.”
Pə́ Waamə̂ Yeso
(Mat 26.47-56; Luk 22.47-53; Jɔn 18.3-12)
43Tsɔʼə ndzaŋ páʼ Yeso a nə ńtə́ nə́ ḿbɛ́lə ńtséebə lə́, Juda táʼ ŋwunə á mə́m ngaŋə́zoŋə́ndzəm əjí zə̂ ntsɔb pɛ̌ a jáʼ nə́ mboŋ pɨ páʼ pətə́kɔʼ pə́ ngaŋə́pêsê pópə ngaŋə́zéʼkə pənoŋkə nə́ mətû mə́ aláʼ mə́ nə ńtú nə́, pó túg məŋwíŋ pópə məmbaŋə. 44Ŋwu páʼə a nə ə́fi nə́ Yeso lə́ a nə ə́fiʼtə̂ ághɔ́b nə́ akyeʼə́nu ńgə́, “Ŋwu maŋ yǐ nə́ ńchweg, nə́ jî ńgə́ lə́ ŋwu yi wə́; Wam nə́ yə́, ńtə́ ńgɛnə̂ nə́ yí, nə́ pyáabə yə́.”
45Ndzaŋə ándó Juda a nə ńgyǐ nə́ lə́ ńtɔ́g ńgɛnə̂ á mbô Yeso ə́sóŋ ńgə́, “Ndzéʼkə!” ńchwegə̂ yə́. 46Pɨ pə̂ pə́ tíʼ ńtɔ́g ńgɛn ńgwaamə̂ yə́. 47Táʼ ŋwu tsə̌ páʼə a nə ńtɨ́ nə́ ḿbáatə aliʼ yəwə́ a sɔŋ ŋwíŋ əjǐ ńkə́ʼə ngaŋəfaʼ mbêsê yi ngweŋ ńdə́g nətôglə yə́. 48Yeso a pítə ághɔ́b ńgə́, “Nə́ fɛ́lə á mə́ wam nə́ mə nə́ məŋwíŋ pópə məmbaŋə ándó nə́ fɛ́lə á mə́ wam nə́ pə́ ndzə̌? 49Pɛn nə̈ ńchîə tsɔʼə əlě ətsəm maŋ zéʼkə á tə́kɔʼndɛ̂sê nə́ pə́ ńkě mə wam pô. Lə́ anu páʼə Aŋwaʼlə Əsê ä sóŋ nə́ á shib ńdɔgə̂ aliʼə́.”
50Ngaŋə́zoŋə́ndzəm əjí tsɔʼə ətsəm ə́ tíʼ ḿmɛdtə̂ yí ńkəələ̂ ághóobə́. 51Mɔ̂nkə̂ nkaŋŋwu yitsə̌ páʼə a nə ńkě nə́ ajûtsə́ wê pô tə ńdéʼtə mɔ́ apagə atsəʼ yə əshîʼnə yətsə́ páʼə a nə ńgwáatə nə́ a nə ńtə́ ńdzoŋə̂ Yeso. Pə́ tə́ ńdoonə̂ á mə́ wam nə́ yə́, 52lə́ a pə́ myaʼə̂ apagə atsəʼə́ ají zə̂ ńkə ntə̌blə.
Yeso á Mbi Ngaŋə́sáʼə́məsáʼə
(Mat 26.57-68; Luk 22.54, 55, 63-71; Jɔn 18.13, 14, 19-24)
53Pó tíʼ ńdɔgə̂ Yeso ńgɛn nə́ yə á mbô Mbêsê yi Ngweŋə́. Pətə́kɔʼ pə́ ngaŋə́pêsê tsɔʼə pətsəm, ḿbá mətû mə́ aláʼ pópə ngaŋə́zéʼkə pənoŋkə ə́ tsɛntə̂ á aliʼə́ mɔʼə́. 54Pita a zoŋə̂ yí ḿbə́ ńtə́əmə á pə́ á ndiə á ndiə tə́ ńgyǐ ńkwúnə á ntɔ́ʼ Mbêsê yi Ngweŋ, ńnáanə á nkaŋ móg pópə pɨ páʼ pə́ nə ńtə́ nə́ ḿbyáabə Tə́kɔʼndɛ̂sê ńtə́ ńdzɔ́gə mógə́. 55Pətə́kɔʼ pə́ ngaŋə́pêsê pópə ngaŋə́sáʼə́məsáʼ tsɔʼə pətsəm tíʼə ńdɔ ndú ətsəm ńgə́ ŋwu tsə́ a sóŋə anu ńté Yeso mbɔʼ pó laŋ ə́wɨ́ ńjwítə yə́, ḿbə́ ńkě anu yətsə́ jɨ́ pô. 56Pɨ pi nɨ́ nə́ pó nə ńnéŋ ntsəələ atû Yeso. Lə́ ətsáb əpɔ́b ə́ pə́ ńkě pímnə pô.
57Pɨ pətsə́ pə́ tíʼ ńdǒ á əsê ńnéŋ ntsɨd zəənə́ atû yí ńgə́: 58“Pəg nə ńdzóʼə a sóŋ ńgə́ a yǐ shaʼtə̂ Tə́kɔʼndɛ̂sê ghɛn páʼ pə́ nə ḿbɔ́ nə́ nə́ mbô lə́ á mə́m əlě teelə́ a pɨ ńkɔ́ʼkə yi ndaʼ páʼ pə́ kě nə́ lə́ nə́ mbô yǐ pɔ́ pô.” 59Alǒ jɨ́d zəənə́ anu pó nə ə́sóŋ nə́ lə́, atséebə azóobə́ á pə́ ńkě kə́ ḿbɛ́d ḿbímnə pô.
60Mbêsê yi Ngweŋə́ a tíʼ ńdǒo á əsê á mbi pó ḿbítə Yeso ńgə́, “Gho kě akwe yə ndaʼ túg nə́ anu jɨ pɨ pɨ pə̈ sóŋ nə́ ńté gho lɛ?” 61Lə́ Yeso a pə́ ńkə́ ńnaʼə̂ yí tsɔʼə naʼ nə́ ńkě anu yətsə́ kwěe pô.
Mbêsê yi Ngweŋə́ a kə́ ḿbɨ ḿbítə yí ngǎ yitsə̌ ńgə́, “Gho lə́ Klisto, Mɔ́ Əsê páʼ pə́ ghóʼkə nə́ lə́?”
62Yeso a kwěe ńgə́, “Maŋ lə́ yə́, Pɨ yǒ kə́ zə́ənə Mɔ́ Ŋwunə a náanə á əlá apô Əsê yə tɨ, Əsê páʼə a Tsɛ nə́ Ajúmə atsəm, ə́ tíʼə yǐəə á mə́mə alə́mə á nəpóolə.”
63Mbêsê yi Ngweŋə́ a sɛɛtə̂ ətsəʼ əpí ńtíʼ ə́sóŋ ńgə́, “Pɛn pɨ ńtə́ ńdoonə̂ ńgə́ ŋwu tsə̌ a yǐ ńtɨ́ ə́sóŋə anu yətsə́? 64Nə́ zóʼ ndzaŋ a zɔ nə́ Əsê. Nə́ kwaŋə̂ ajɨ́ ńgə́ akə̂?”
Pó pətsəm lə́g əsáʼ əyí ńgə́ á koʼnə̂ ńgə́ pə jwítə yə́.
65Pɨ pətsə́ pə́ tíʼ ńchúʼə á mə́ twǐ nə́ mətwê nə́ yə́, ńkwúd əshî əyí ńtíʼə ńkɔnə̂ yí ə́sóŋə nə́ yí ńgə́, “Sɛ̌ɛ ńgə́ á gho lə́ kɔn əwə lə́?” Ngaŋə́pyáabə Tə́kɔʼndɛ̂sê pó tíʼ ńdɔgə̂ yí ńgɛn ḿbóʼə yə́.
Pita a Kǐəə Yeso
(Mat 26.69-75; Luk 22.56-62; Jɔn 18.15-18, 25-27)
66Pita a nə ḿbɛ́d ńnáanə á atətá á əlá mətoŋə́, táʼ ngaŋəfaʼ Mbêsê yi Ngweŋə́ yi məngyě yitsə̌ a tə́ ńdaŋə̂, 67ńdzə́ənə Pita a náanə ńtə́ ńdzɔ́gə mógə́, a tsoŋkə̂ ńnáŋə yí ńtíʼ ə́sóŋ ńgə́:
“Gho pěʼ ńkə́ ńchîə azô pɨ Yeso mɔ́ Nazalɛd wə̂.”
68A pə́ ńkǐəə yə anu yə wɨ́ ə́sóŋ ńgə́, “Maŋ kě jî pô, atûə mə á kě kə́ ńdá nə́ anu páʼ gho sóŋ nə́ lə́ pô.” Ńtíʼ ńkɔ́ʼ ńgɛnə̂ yə́ á ntsoolə́poʼə.#14.68 Pətsə́ əŋwaʼlə ə́ peg ńgə́ aŋkəʼə́ a tíʼ ńtɔ́ŋə.
69Mɔ̂ məngyě wə̂ a zə́ənə yí ńkə́ ḿbɨ ḿbégnə ə́sóŋə á mbô pɨ pə́ tɨ́ nə́ aliʼ yi wɨ́ ńgə́, “Lɛ̌ táʼ ŋwu əghɔ́b yitsə̌.” 70A kə́ ḿbɨ ńkǐəə yí ngǎ yitsə̌.
Tsɔʼə ngǎ pɛ̌, pɨ pó tɨ́ nə́ aliʼ yi wɨ́ pó sóŋə á mbô Pita ńgə́, “Gho shib ḿbə́ lə́ táʼ ŋwu əghɔb yitsə̌ ńté ńgə́ gho lə́ ŋwu Galiliə.”
71Pita a chúʼə á mə́ sóŋ nə́ ńgə́, “Maŋ kě ŋwu páʼ nə̈ sóŋ nə́ lə́ jî pô! Mbɔʼ á pə́ yǐ maŋ tsɨd nə́ lə́ ntsɨd, Əsê a néŋ ndoonə á atû maŋə.”
72Tsɔʼə əghâ yi wɨ́, aŋkəʼə́ á kə́ ḿbɨ ńtɔ́ŋ ngǎ yitsə̌. Pita a tíʼ ńkwúmtə atsáb páʼ Yeso a pěʼ nə́ ə́sóŋə á mbô yí ńgə́, “Aŋkəʼə́ á yǐ jǐ tə́ tɔ́ŋ ngǎ pɛ̌ lə́ gho kǐəə mə ngǎ teelə́.” A wə́ʼtə ə́lɨ́d lə́ ńchúʼə nəkyéŋə.
Pašlaik izvēlēts:
Magə 14: azo
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties