Juan 19
19
Jesús a nö yai lä
waiblano wejei tä a̦
1Ö̦jö däjä, cama ebä nija, Biladonö Jesús a öböamaö bufima, a si yafelimabeje. 2¿Ö̦jö tawä? Sodado bänö too totocö ca̦i mösöcöbö fa motoleblalöjenö, Jesús nija totocö yojoquemaje, bada bänö olo bä showadi yojobou lä cuaaö wejeinaja showawä. Ushi wacäjäwä cäcö labe ja, a jole jole ca̦i lucäa mö fedumalemaje. 3Cama nija bä fa icublaanö, abinaja a nowa jole tamaje.
—¡Bada tä! Judio bä nija wa bada lä läle, ¡dodijidawä wa bälödiobä! —a nowa jole tamaje.
Inaja a nowa talajenö, bei bä imicönö, a si bluca baidamaje.
4Bilado a siboa fa co̦lunö, abinaja judio bä nowa tama.
—Bei. Cafä wamacö nija ya nia bälamaö co̦o, ya etä wa̦lidiwä dablaö lä mlai tä ja, wamacö bufi jaducublobä —bä nowa tama.
5Ö̦jö däjä, mösöcö totocö yojobou showale, Jesús a ca̦i falayomaje. Ushi wacäjäwä cäcö ca̦i labe lucäbou showaoma. Biladonö a jömalanö, abinaja judio bä nija a cuma.
—Bei. Fei a waiquiwä. A da dalalöje —a cuma.
6Nofi bäyäalewä blowäjäwä bä lä cuinö, ai bä ca̦i bada lä cuinö, Jesús a fa dalalöjenö bä a̦ shi doa dicolayoma.
—¡Fii balitama defi jamö a shino da basumacö! ¡A da basumacö!
—¡Uo! —Bilado a cudaliyoma—. Cafä wamacö showawänö a da basucuduje, ö̦jö lä. A doblou lä mlai, camiyänö ya etä dablano malä mlai —a cuma.
7Judio bä a̦ juo ja, abinaja Bilado a nowa tamaje.
—Camiyä yamacönö, Moisesi yama etä a̦ tabou. Yama tä a̦ daö. Miji a lä cui, Yai Bada bei tä a̦fa Ijilubö jilou yalo, a nomabä a waiquiwä—a nowa tamaje.
8Yai Bada bei tä a̦fa Ijilubö lä jilou wei, Biladonö tä a̦ fa ji̦lilänö, a yai quilia fe balojolaliyoma. 9Cama etä yafi jamö a lucäa fa co̦lunö, Jesús a wa̦lii co̦oma.
—Cafä ¿wediteli wa dodijiwä? —e cuma ma cui, Jesús e a̦ juonomi.
10E a̦ juonomi yalo, abinaja e cuu nomöjöoma.
—Camiyä nija ¿bei wa wa̦ juo mlaquei? Camiyä ya wa̦nö wa nia lä cushäblamou wei ya. Camiyä ya wa̦ showawänö, fii balitama defi jamö wa nia lä basuo wei ya —e cuma.
11Jesús abinaja e cuma.
—Camiyä wale nia lä taamaö wejei tä ja, wa lä läle wa lä cui, Yai Bada tänö wa lämabou mlao fa cunoja, wa nö läobö mlai. ¿Ö̦jö tawä? Cafänö wale shämaö ja, cafä nija tä nowa nia ma shadio wei ma cui, cafä nija wale lä jöböano wei a lä cui, ö̦jö etä nowa nia shino yai cuo —a cuma.
12Ö̦jö a wa̦ fa ji̦lilänö, Biladonö a cushäblabä a wa̦ ma lojodoano wei ma cui, judio bä a̦ nö wa̦yäama.
—Miji a lä cui wa cushäblamaö dicoo ja, Lomateli bada tä Sesa lä cui, wa nofimaimi waiquiwä. Bä a̦fa bada lä jilou wei bänö, Sesa a nofi malä wa̦libou wejei —bä cuma.
13Ö̦jö bä a̦ fa ji̦lilänö, Jesús a wawäa co̦malema. Wa̦lidiwä talewä bä jömabeje, bada bä döcäobä täcö jamö Bilado a döcäquema. A lä döcäqueno wei tä ulifi lä cui, Maa mabä wei, tä a̦fa ulifi jilabouje. Ebleo bä caficö a̦ ja, Cabada tä a̦fa ulufi jilaö mö feduoje.
14Ö̦jö tä fena ja, Yai Bada a waiteli lä jayuano wei a nofi nia yai co̦camoaö co̦omaje. ¿Ö̦jö tawä? Motoca a yo̦lolodayoma. Judio bä nija abinaja Bilado a cuma.
—Cafä wamacö nija a bada läobä, fei a waiquiwä. ¡A da möje!
15Bä a̦ i̦cali faö ja, abinaja bä cuma.
—¡A befi ca̦i da i̦tamacö! ¡A befi ca̦i da i̦tamacö! ¡Fii balitama defi jamö a da basumacö!
Bilado abinaja a cuma.
—Cafä wamacö nija a bada läobä a lä cui, ¿fii balitama defi jamö, ya basuamabä a daanö?
Nofi bäyäalewä blowäjäwä bä lä cui, bä a̦ juoma.
—Yama a nofi badabobä, Lomateli bada Sesa a lä cui, ö̦jö a waiquiwä —bä cuma.
16Ö̦jö däjä, fii balitama defi jamö a basuamabeje, ö̦jö bä nija Biladonö a noshi ö̦jödadalema.
Fii fi jamö Jesús a lä
basuqueno wejei tä a̦
17Ö̦jö cudeenö, Jesús a ca̦i fa alujenö, a juma. A nia lä basuano wejei defi lä cui, camanö defi yalucua showalefälöma. Fe̦losi blaobä tä a̦fa ulifi lä cule jamö a ca̦i jumaje, ebleo bä caficö a̦ ja, Cocoda a wa̦fa lä jilabou wejei jamö.
18Ö̦jamö lä, fii defi jamö a basuquemaje. Jesús a basua fa möamobalöjenö, ai cäcöbö ca̦i basua lu̦locua mö feduquemaje. Acasi boco mashi jamö ai a, jayu boco mashi jamö ai a, cäcöbö basua taaquemaje. 19Jesús a lä basuono wei defi jamö etä a̦ oni shadiobä, Biladonö etä a̦ oniblamalema. Abinaja etä a̦ cuma. “Judio bä nija a bada cuobä, ei Nasaleteli Jesús a”, etä a̦ cuma.
20Shabono ajede jamö Jesús a basuquemaje yalo, judio bluca bänö tä a̦ doblaö jayuamaje. Judio bä caficö a̦ ja tä a̦ oni cuoma. Lomateli bä caficö a̦ ca̦i ja. Clesiateli bä caficö a̦ ca̦i ja. 21Judio bä nofi lä bäyäbou wejei bä blowäjäwä lä cuinö, ö̦jö tä a̦ oni fa möjenö, abinaja Bilado nija bä cuma.
—“Judio bä nija a bada cuobä a”, tä a̦ oni nofi cuu lä dicoo wei. Inaja mlai. Abinaja tä a̦ oni yai cubä. “Judio bä nija a bada cuobä a wa̦fa lä jilou wei a”, tä a̦ yai oni cubä —bä cuma.
22Bilado abinaja a cuma.
—Ya tä a̦ lä oniblamalöfe, ö̦jö waiquiwä —a cuma.
23Sodado bänö Jesús a fa basucöjenö, a lä didiono wei ebä camishi däalalemaje. Cama sodado 4 bänö bä nia fa tabojenö, bä shelelealalemaje. Labe ecö ca̦i. Ö̦jö ma cui, labe ecö lä cui, comadiwä cäcö diyäblamoa lä showadalayono wei cäcö cuoma. 24Ö̦jö cudeenö, abinaja bä nowa sodado tayoma.
—Bäma cäcö cacaö mlai ja, jömamodima a ja bämacö shino da wabäo, cäcö nia lä tabou wei a jömamobä —bä cuma.
¿Ö̦jö tawä? Yai Bada etä a̦ oni lä cule tä a̦ bejedi cublobä etä cuoma. Abinaja tä a̦ cuu.
Ya lä didio wei cäcö shedequeblaleije. Ecö nia lä däablaö wejei bä nia fa jömamonö, madofi a ja, bä wabäo balöo.
Einaja tä a̦ cuu. 25Inaja bä sodado cuaaö showao däjä, Jesús a lä basuono wei defi cotä jamö, bei bä nöö e ublaoma. Bä nöö ai e ca̦i. Cleofa bä suwäbö María a wa̦fa lä cule a ca̦i. Madalateliyoma a wa̦fa María lä cule a ca̦i. 26Jesúsnö bä nöö e dalalema. A lä nocamabono wei ai e lä cui, e ca̦i ublao ajedeoma, a yai lä nofimano wei e lä cui. Cäcöbö fa dalalönö, abinaja bä nöö e nija a cuu balöoma.
—Nabe, nabemi. Ijilufä wa nofi nö lä tabobö weinaja, miji wa nofi nia tabou —a cuma.
27Ö̦jö däjä, a lä nocamabono wei a lä cui nija abinaja a cuu nomöjöoma.
—Bei. Naafä wa nofi nö lä tabobö weinaja, inaja showawä nayä wa nofi nia ca̦i tabou juo —a cuma.
Inaja cäcöbö nowa fa talönö, a lä nocaono wei e lä cuinö, cama e yafi jamö a bälöobä, a nofi taa showadaalema.
Jesús a lä nomalayono wei tä a̦
28Öjö däjä, tä bluca lä jödödöblaliyono wei tä fa dalalönö, a wa̦ Jesús fama. Yai Bada etä a̦ oni jamö tä a̦ lä cuu weinaja tä a̦ bejedi cublobä, abinaja a cuma.
—Ya amishi —a cuma.
29Ö̦jamö lä showawä, nashiwä toubä befi ca̦i i̦taoma. Inaja a cuu ja, ö̦jö toubä ja tä madofi wai fa ca̦dalöjenö, fii fi ja tä fa ji̦ibajenö, Jesús caficö ja toubä befi ca̦i dodobou ajedeojolayomaje. 30Nashiwä toubä fa uyucanö, a wa̦ Jesús fama.
—Tä jödödöblou waiquilayou lä cufe —a cudaliyoma.
Ö̦jö däjä, a fe fa leidalunö, a möshöa jawäa fa showadaicunö, a nomalayoma.
Jesús leboco lä
diquibalejelayono wei tä a̦
31Ö̦jö tä fena ja, Yai Bada a waiteli lä jayuano wei a nofi nia yai co̦camoaö co̦omaje. Täbä yanöcöobä tä mö nia ca̦i jalu sábado cuo showaoma yalo, tä nofi tabou bolacaomaje. ¿Ö̦jö tawä? Täbä yanöcöobä tä mö jalu ja, bä nomawä basudio showao dicoo mlaobä, Bilado nija judio bä a̦ fama. Fii defi jamö bä lä basuo wei bä lä cui, bä ucu yafequiblamaö bufimaje, bä nomaö showadaobä. Täbä yanöcöobä tä mö jalu sábado cublou showao mlao däjä, bä nomawä nia itomaö showadaomaje.
32Ö̦jö cudeenö, sodado bä fa icuicunö, Jesús nija cäcöbö basua lä lu̦locuono wei, cäcöbö ucu yafequia balölalemaje. 33Ö̦jö ma cui, Jesús nija bä icua fa nomöjöicunö, a nomawä waiquiwä fa dalalöjenö ucu yafequiblanomije. 34Ö̦jö ma cui, sodado ai a lä cuinö, boo shi bada namonö, Jesús leboco diquibalejelayoma. Leboco fa diquibalujulunö, i̦yäbö falayoma, mau ubä ca̦i.
35¿Ö̦jö tawä? Camiyänö ya tä daa fa cadidilalönö ya tä a̦ wäyäö lä cule, cafä wamacö ma cuinö, wama tä a̦ ca̦i bejedi bufii mö feduobä. Ya bejedimou. Yale a̦ nofi mölabobä ya wa̦. 36Ö̦jö tä lä cublaliyono wei tä lä cui, Yai Bada etä a̦ oni lä cuu weinaja tä a̦ bejedi wawäblobä tä li cublaliyoma. Abinaja tä a̦ cuu.
Moli ma cui, u nia cäblamoimi.
Einaja tä a̦ cuu. 37¿Ö̦jö tawä? Abinaja ai tä a̦ ca̦i cuu mö fedua.
A lä diquiano wejei a lä cui nija bä mamo nia showao.
Einaja tä a̦ cuu.
Jesús a nomawä lä
maqueböqueno wei tä a̦
38Ö̦jö tä cublou fa waiquilonö, Alimadeateli a wa̦fa José lä culenö Bilado a wa̦lima, Jesús a nomawä co̦abä. Ö̦jö José a lä cui, Jesús nija a nocaobä a ma cuono wei ma cui, judio bä nija a quilii ja, a wa̦ wawäanomi. Biladonö a wa̦ fa ji̦lilänö, a co̦amaö bufima. Ö̦jö däjä, a aa fa showadaalufälönö, a co̦lejelayoma. 39Nicodemo a ca̦i juma, didi däjä Jesús nija a jaba icua fe lä jaluqueno wei a lä cui. Nö cle̦deli täbä bluca fa co̦cablalönö, täbä besi ca̦i jude waloquema.
40Bei. Jesús a nomawä fa co̦bölönö, camishi acadafu au bä jamö, täbä nö lä cle̦deli wei täbä jädamaböö cuaama, a nomawä ya̦icoloblaböö nomöjöobä. Täbä nomawä lä maqueblaaö wejei jamö, inaja judio bä showadi cuaama.
41Fii balitama defi ja, Jesús a lä basuqueno wejei jamö, ficali täca ajedeo blaoma. Ö̦jamö lä, nomawä bä maqueblaabeje maca lä tablaleno wejei maca dude cuoma, bä nomawä maquebou balöono lä mlajei maca. 42¿Ö̦jö tawä? Täbä yanöcöobä tä mö jalu nia cublou lä fenao wei tä weyade cuo waiquioma cudeenö, bä shi jalimoma, tä nia lä tamou wei tä taö showadaobeje. Ö̦jö maca ajedeo waiquioma cudeenö, ö̦jamö Jesús a nomawä maqueböquema.
Pašlaik izvēlēts:
Juan 19: GUU
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©2012, All Rights Reserved