Juan 14
14
Jesús bei yoca a̦fa lä
wäyämono wei tä a̦
1Jesúsnö abinaja bä nowa tama.
—Bä bufi nofi jushublao dijä. Yai Bada tä a̦ shino bejedi da bufije. Camiyä wamale a̦ bejedi ca̦i da bufi. 2Fayä e yafi jamö, täbä nia lä bälöo wei bä yano bluca. Inaja tä cuo mlao fa cunoja, ya tä a̦ nö wäyäbö mlai. Ö̦jamö lä wamacö bälödiobä, bämacö yanobö nia dodijidabladayou. 3Cafä wamacö bälöobä, ya tä dodijidablaö fa balölonö, bämacö nabä nia juimaö. Camiyä ya cuobä jamö wamacö cuo mö feduobä, bämacö nia co̦ablaö. 4Ya nia lä juu wei jamö, wama yo daö waiquia —a cuma.
5Tomás abinaja e cuma.
—Bada tä. Wa nia lä juu wei jamö yama tä daimi. ¿Wedinaja yama yo li daö cuobä?
6Abinaja Jesús a cuma.
—Camiyä ö̦jö ya yoca waiquiwä. Bejedi tä lä cui, ö̦jö ya ca̦i. Täbä ba̦limi cuobä, ö̦jö ya showawä. Camiyä nija bä juu lä mlai, Fayä nija bä waloo daomi. 7Camiyä wamale daö ja, Fayä wama a ca̦i daö waiquiwä. ¿Ö̦jö tawä? Fei däjä wama a yai daö. Wama a möö waiquiwä —a cuma.
8Felipe abinaja e cuma.
—Bada tä. Faafä a da jömöba, “Inaja lä waiquiwä”, yamacö cubä.
9Abinaja Jesús e cuma.
—Felipe. Cafä wamacö nija ya nö ma dedeale ma cui, ¿wale daimi showawä tawä? Camiyä wale lä möö wejei bä lä cuinö, Fayä a möö waiquiweje. ¿Wedinaja wa bufi li fa cunö, “Faafä a da jömöba”, bei wa li cuu cule? 10Fayä nija ya lä cule, camiyä nija Fayä a ca̦i lä cule, ¿wama tä a̦ bejedi bufii yailawä? Cafä wamacö nija ya tä a̦ lä wäyäö wei, camiyä ya wa̦ bädawämi. Fayä ya wa̦no wäyäö. Ya ma cuaaö wei ma cui, camiyä nija Fayä a yai culanö, ö̦jönö tä taö. 11Fayä nija ya lä cule, camiyä nija Fayä a ca̦i lä cule, tä a̦ bejedi da bufije. Ö̦jö lä yafäcö. ¿Ö̦jö tawä? Camiyä wamale a̦ bejedi bufii ma mlai ma cui, ya tä bluca lä taö wei tänö, bä bufi jaducua fe da yadiicu, wamale a̦ bejedi bufii fe yadiobä.
12’Cafä wamacö nija ei ya wa̦ lä cui, bejedi lä ya wa̦ —a cuu co̦oma—. Wale a̦ bejedi lä bufii wejei bä lä cuinö, Yai Bada ya mayo wawämaö lä cuaaö weinaja bä nia cuaaö mö feduo. ¿Ö̦jö tawä? Fayä nija ya co̦o yalo, bä nia yai cuaaö. 13Camiyä ya wa̦nö, wamacö nö bayeli nacao ja, wama tä nacaö lä bädao wei tä ma cui ja, bämacö a̦ nia juaö, Fayä ya doblao dablamabä. 14¿Ö̦jö tawä? Camiyä ya wa̦nö, wamacö nö bayeli nacao lä bädao wei tä ma cui ja, ya tä nia taö —Jesús e cuma.
Bayeliawä a nia
lä shömano wei tä a̦
15Jesús a wa̦ faö co̦oma.
—Wamale nofimaö ja, ya tä tamaö lä bufii wei wama tä nofi nia cadidibou. 16Fayä nija cafä bämacö nö bayeli fa nacalänö, cafä wamacö nija Bayeliawä ai a nia shömaö. Ö̦jönö wamacö ca̦i nia cuo shi wa̦lii. 17Yai Bada tä Bufi lä cui, ö̦jö lä ya tä a̦fa taö, tä a̦ bejedi lä wäyäö wei. Yanowamö täbä lä cuinö, tä nö ö̦jöböaimije yalo, tä ca̦i daö fa mlacujenö, tä a̦ waibouje. Ö̦jö ma cui, cafä wamacönö wama tä li daö. Wamacö ca̦i malä cule. Cafä wamacö nija tä nia yai cuo cadidio.
18’Bämacö ma daquei wei ma cui, bämacö nö nia beblalamaimi —a cuma—. Bämacö nabä nia juu co̦imaö. 19Tä nö dedeblou mlai ja, yanowamö täbänö wale nia dablaö co̦o ma mlajei ma cui, cafä wamacönö wamale nia shino yai dablaö. Camiyä ba̦limi ya cua waiquia yalo, inaja showawä wamacö nia ba̦limi cuo mö feduo. 20Ö̦jö däjä, wamacö bufi nia yai jaducublou. Fayä nija camiyä ya lä cule, wama tä nia daö wawädoo. Camiyä nija cafä wamacö lä cule, wama tä ca̦i nia daö. Cafä wamacö nija camiyä ya cua mö lä fedule tä ca̦i.
21’¿Ö̦jö tawä? Ya tä tamaö lä bufii wei tä nofi lä cadidibou wejei bä lä cuinö, ö̦jö bä lä cuinö wale yai nofimaöje. Wale lä nofimaö wejei bä lä cui, Fayänö bä nia nofimaö mö feduo. Camiyä ya ma cuinö ya bä nia ca̦i nofimaö. Ö̦jö bä nija ya nia dablamou —a cuma.
22Jesús nija Juda ai a lä cui a wa̦ fama, Juda Icaliode mlai. Abinaja e cuma.
—Bada tä. ¿Wedi tabä afä yamacö lä cui nija wa nia shino li dablamou ayao? ¿Wedi tabä yanowamö täbä nija wa nia dablamoimi? —e cuma.
23Abinaja Jesús e cuma.
—Wale lä nofimaö wejei bänö, wale a̦ nofi nia cadidibouje. Fayänö bä nia nofimaö. Ö̦jö bä nija yafäcö nia walooyoluu, yafäcö bälödiobä. 24Wale nofimaö lä mlajei bänö wale a̦ nofi cadidiboimije. ¿Ö̦jö tawä? Cafä wamacö nija ya tä a̦ lä wäyäle, camiyä ya wa̦ bädawämi, Fayänö wale lä shömöleno wei ya wa̦no taö.
25’Cafä wamacö nija ya cua showalanö, ei ya tä a̦ bluca wäyäö waiquia —a cuma—. 26Ö̦jö ma cui camiyä ya wa̦nö, Fayänö Bayeliawä a nia shömaö, cama a Bufi showawä lä cui. Ö̦jö a lä cuinö, bluca tä lä cule tä ja wamacö nia yömölabodii juo. Cafä wamacö nija ya tä a̦ bluca lä wäyäno wei tä a̦ ja, wamacö bufi nia jaducuamaö juo.
27’Dodijidawä wamacö cuo juobä, bufi yanöcöwä tä ja bämacö dobäö lä cule. Camiyä ya bufi yanöcöwä lä culenaja wamacö bufi cuo mö feduobä. ¿Ö̦jö tawä? Yanowamö täbänö täbä bufi yanöcömabou daomije.
’Tä nia lä cublou wei tä ja, bä bufi nofi jushublao dijä —a cuma—. Bä quili dijä. 28Ya nia lä co̦o wei, ya nia obi ca̦i juu lä co̦o wei, cafä wamacö nija ya wa̦fa wäyämou waiquia. Wamale yai nofimaö fa cunoja, Fayä nija ya nia lä co̦o wei tä ja, wamacö bufi nö yai doblalobö wei. Ö̦jö a shino yai Bada malä cui. 29¿Ö̦jö tawä? Tä cublou showao mlao däjä, fei bämacö nowa taö balöa lä cule. Tä yai cublou däjä wamale a̦ bejedi bufibä.
30’Bei —a cuma—. Fei däjä bämacö a̦ wayomadibä tä cuami waiquiwä. Fecula bada a ajeo lä cule, ei tä ulifi jamö a lä nosiemou wei a lä cui. Cama nija camiyä ya nosiemamoimi. 31Fayänö wale lä nosiemaö wei tä ja ya li yai cadidou, yanowamö täbä bufi jaducublobä. Fayänö wale lä nofimaö wei tä dablabeje. ¿Ö̦jö tawä? Bei. Bämacö da jufälö —a cuma.
Pašlaik izvēlēts:
Juan 14: GUU
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©2012, All Rights Reserved