Juan 13
13
Jesúsnö cama ebä
mamicö lä yaluno wei tä a̦
1Yai Bada a waiteli lä jayuano wei tä nofi nia co̦camoaö jaödao co̦omaje. Bä Fö̦ö e nijamö a nia co̦o lä jaödaono wei, Jesúsnö tä daö waiquioma. Ei tä bita tabi nia feiaö co̦oma. Cama ebä bita jamö lä cule, bä showadi lä nofimadino wei, bä nofimaö mladonomi. A waicobä jamö ma cui bä nofimaö fe yadio showaoma.
2Bei. Simón bä ijilubö Juda Icaliode a lä cui, fecula bada anö a bufi taamaö waiquioma, bä weyade lä iyano wei däjä. Jesús a nia nomojoliama.
3Jesús a lä cuinö, jödödöwä täbä lojodobobä, bä Fö̦ö enö Bada a yai tablamaö lä waiquilayono wei tä daö waiquioma. Yai Bada nija a cuo lä balöono wei tä ca̦i daö showaoma. Ö̦jö nijamö a nia lä co̦o wei tä ca̦i. 4Ö̦jö tä daö waiquioma yalo, bä weyade iyabä jamö a fa ublalonö, cäcö lä feyacabono wei cäcö fa jayublalönö, cäcö casömalema. Ö̦jö däjä, täbä lä wejemamou wei cäcö a̦yoa majölema. 5Madofi a jobocowä jamö ubä fa lölänö, cama ebä lä nocamabono wei bä mamicö yaluu ja, bä nabä jaba quequema. Bä mamicö fa yaludanö, cäcö lä a̦yobono wei cäcönö, bä mamicö ya̦jödaö nocamou showadaoma.
6Simón Pedro nija a icua fa majöicunö, Pedro a wa̦ lämoma.
—Bada tä. Camiyä wale mamicö yalubä yami —a cuma.
7Jesús a wa̦ juoma.
—Ei ya tä lä tale tä ja, fei däjä wa bufi jaducua ma mlale ma cui, wale nia lä taamaö wejei tä cublou balölayono wei ja, ö̦jö däjä wa bufi nia jaducublou nomöjöo —e cuma.
8—Ma. Camiyä wale mamicö nia yaluimi —Pedro a cuu co̦oma.
Jesús abinaja e cuma.
—Bäfä yaluimi ja, camiyä nija wa nia yädäomi —e cuma.
9Ö̦jö däjä, abinaja Simón Pedro a cuma.
—Bada tä. Inaja wa cuu ja, bei ya mamicö bädawä mlai, bei ya imicö ca̦i da yalulu, bei ya fe ca̦i —a cuu nomöjöoma.
10Abinaja Jesús e cuma.
—A ya̦lömou lä waiquilayono wei a jödödöwä au waiquiwä. Bei mamicö nia shino ya̦lömou co̦o. ¿Ö̦jö tawä? Cafä wamacö au waiquiwä ma cui, moli ai wamacö lä cui a shino aumi —e cuma.
11A nia lä nomojoliano wei a malä dano wei. Ö̦jö cudeenö, “Moli ai wamacö lä cui a shino aumi”, a cuma. 12Bä mamicö yalua fa jödödöblalönö, cäcö lä feyacabono wei cäcö co̦a fa co̦lunö, bä lä iyano wei jamö a loa co̦quema. Abinaja bä nowa tama.
—Fei bämacö lä taamafe tä ja, ¿wamacö bufi jaducua culawä? 13Wamale a̦fa jayumaö ja, “Tä a̦ wäyäle”, wamacö cudou. “Bada tä”, wamacö ca̦i cudou, ¿ö̦jö tawä? Wamacö bejedimou. Ö̦jö ya malä cui. 14Wamale nofi lä Badabou wei ya ja lä, ya tä a̦ ca̦i lä wäyäö wei ya ja lä, wamale nia owäbou. Cafä bämacö mamicö yaluu lä cuaafenaja, cafä wamacö ma cui, wamacö taamayou mö feduobä wamacö. 15Wamale owämabä ya tä malä tafe, cafä bämacö taamaö lä cuaafenaja wamacö taamayou mö feduobä.
16’Cafä wamacö nija ei ya wa̦ lä cui, bejedi lä ya wa̦ —bä nowa tama—. Bada a lä cui a nofi tabou mlaoje däjä, cama ebä nofi nia tabou ayaomi. Inaja showawä, bä lä shömaö wei a lä cui a nofi tabou mlaoje däjä, bä lä shömamou wei bä nofi tabou ayao mlajeicätä. 17¿Ö̦jö tawä? Bämacö lä yömölale tä ja, wamacö bufi fa jaducuicunö wamale a̦ juaö ja, wamacö bufi nia yai doblalou.
18’Cafä bluca bämacö a̦fa wayoaimi —Jesús a cuu co̦oma—. Iba ya bä lä yaileno wei, ya bä daö. Tä nia lä cublou wei tä lä cui, Yai Bada etä a̦ bejedi wawäblou bufio yalo, tä nia li cublou. Abinaja tä a̦ oni cuu.
Camiyä nija a showadi lä iyano wei a lä cuinö wale nomojoliaö nomöjöa lä cule.
’Einaja tä a̦ cuu. ¿Ö̦jö tawä? 19Tä cublou showaa mlai ja, bämacö yömölaö balöa lä cule, tä bejedi cublou däjä wamacö bufi yai möblobä. Ya wa̦fa showadi lä wäyämamou wei, wamale a̦ bejedi bufibä.
20’Cafä wamacö nija ei ya wa̦ lä cui, bejedi lä ya wa̦. Ya bä lä shömaö wei bä lä cui, dodijidawä bä co̦blamaöje ja, camiyä ma cui wale dodijidawä co̦blamaö mö feduoje. Inaja showawä, camiyä dodijidawä wale lä co̦blamaö wejei bä lä cuinö, wale lä shömöleno wei a ma cui, ö̦jö a dodijidawä co̦blamaö mö feduoje —a cuma.
Jesús a nia lä
nomojoliano wei tä a̦
21Einaja Jesús a fa culunö, a bufi nofi fa jushublaonö, cama a wa̦fa wäyämou shalilioma.
—Cafä wamacö nija ei ya wa̦ lä cui, bejedi lä ya wa̦. Ya jolemoimi. Cafä wamacö ai a lä cuinö wale nia nomojoliaö—a cuma.
22Jesúsnö bä lä nocamabono wei bä lä cui, “Ö̦jö a wa̦fa yai wayoaö daanö”, bä bufi cunomi yalo, bä wäyäcu möyou cuaama. 23¿Ö̦jö tawä? Jesúsnö bä lä nocamabono wei ai e lä cui sho cäcöbö jö̦cöjöoma, a yai lä nofimano wei e lä cui sho. 24Jesús nija ö̦jö a ajedeoma yalo, bei imicönö Simón Pedronö a wa̦limaö bufima. Abinaja e cublaloma.
—Wa wa̦ fa ji̦lilänö yamalecö da yömöla. ¿Wedi jamö a lä cui, bei a wa̦fa yai li taö? —a cuma.
25Ö̦jö cudeenö, Jesús nija a loo lä jö̦cöjöono wei a lä cui, abinaja e cuma.
—Bada tä. ¿Wedi jamö a lä cuinö bei wa nia jömaö dodijio?
26Abinaja Jesús e cuma.
—Ei nii ya fa ödäblalönö, ya e nia lä jöböaö wei, ö̦jö lä a waiquiwä —e cuma.
Ö̦jö däjä, nii a fa ödäblalönö, Juda nija a jöböquema, Simón Icaliode bä ijilubö e lä cui nija. 27Nii a fa dälänö, cama nija Sadanasi a lucäa showadalayoma. Abinaja Jesús e cudaliyoma.
—Wa tä nia lä taö wei, fei däjä tä taö da showadao —e cudaliyoma.
28¿Ö̦jö tawä? Bä iyabä jamö bä lä loono wei bä lä cui, Jesús a lä cuno wei tä ja, bä bufi jaducuonomi. 29Judanö blada bä talö yefiboma yalo, abinaja ai bä bufi cuma. “Bämacö iyabä, nii bä luluamaö bufii”, bä bufi cuma. Abinaja ca̦i. “Bä lä jo̦li wei bä dobäbä, a shömaö lä cule”, ebä bufi ca̦i cuu yacläoma. 30¿Ö̦jö tawä? Nii a fa dälänö, Juda a siboa showadalayoma.
Tä mö dödöoma.
Tä tamaö lä bufii wei
dude tä a̦ lä wäyäno wei tä a̦
31Juda a siboa waiquilayofälöno wei ja, abinaja Jesúsnö bä nowa taa jelema.
—Fei däjä ya lä yanowamöblaleyoluno wei ya lä cui, ya nia doblao dablamou. Ya lä cuaaö wei tänö Yai Bada ya nia ca̦i doblao dablamaö. 32¿Ö̦jö tawä? Yai Bada ya doblao dablamaö ja, cama Yai Bada tänö camiyä ya lä yanowamöblaleyoluno wei ya lä cui, wale nö nia ca̦i doblao ö̦jöböamaö showadao.
33’Ijiluyä wamacö —a cuu co̦oma—. Cafä wamacö nija lobe ya cublaa lä cule. Wamale nia dayäö. Judio bä nija ya lä cuno weinaja, cafä wamacö ma cui, bämacö nowa taö co̦a lä cule. Ya nia lä cuo wei jamö, wamacö juu daomi. 34Cafä wamacö nija ya tä tamaö lä bufii wei, ya tä a̦ dude wäaö lä cule. Bä da nofimayo. Cafä bämacö nofimaö lä waiquilenaja, inaja showawä, bä nofimayou da cuo. 35Wamacö yai lä nofimayou wei tänö, camiyä nija wamacö lä nocao wei, bluca täbä nija wamacö nö nia yai ö̦jöböamou —a cuma
Pedronö a nofi nia jole
lä mojodudano wei tä a̦
36Abinaja Simón Pedro e cuma.
—Bada tä. ¿Wedi jamö wa nia yai juu?
Jesús abinaja a cuma.
—Ya nia lä juu wei jamö, fei däjä wa yauo daomi. Ö̦jö ma cui, obi wa nia shino juu nomöjöo —e cuma.
37Pedro abinaja e cuma.
—Tä a̦ wäyäle. ¿Wedi tabä wale li yaumabou showadaomi? Cafä bäfä bayeliblabä, ya shämobä tä ma cui ja, ya ojodaa lä cule —e cuma.
38Abinaja Jesús e cuma.
—¿Bei wa shämou ojode daanö? Cafä nija ei ya wa̦ lä cui, bejedi lä ya wa̦. Cadala a wa̦ faö showao mlao däjä, 3 wale nofi nia jole jole mojodubou cuo —e cuma.
Pašlaik izvēlēts:
Juan 13: GUU
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©2012, All Rights Reserved