La'isasikhe 14
14
Paulus Barnabas ipisak o Ikonium dogolik hagakhe lagoukha wene
1It Paulus Barnabas ipisak o Ikonium etoma dogolik o akhuni Yahudi meke sembayan ekhe lagoukhama ukisukhasik nen, wene itithogonat yogeisasukhama, inebe doalegat, Yahudi meke dek, Yunani meke dek, wene iti eberogonat iluk waganhukha. 2Waganhukhama, it akhuni Yahudi meke ebetlake nen, wene iti inasuk holiluk, eberogonat iluk inakla apigidek meke nen, it akhuni itikmanke meke Allah a'buri ina'it asuagaluk inakla kagalhe lagoukha. 3Inakla itithogon kagalhe korlegat, at Paulus Barnabas ipisak iniki doalegat o etoma inayuk dekhogon dogolik, wene ninoe Etagapogot hagakhe lageikhe wene iti yogeisekhe lagoukha. Yogeisekhe dogolik, Allah obabut hano nen woknisekherek wene iti,
“Eberogonat,” iluk hutduagaluk yogeisugunem, it nen hagasusak dek meke elalinat hagarinakhe dogoagaluk, Allah nen inobatnerinakhe lageikhe. 4Itithogon hagakhe lagoukha mekeat, it akhuni o kota etoma meke inebe doalegat mikirlogo, it ebetlake Yahudi meke werekmake ageik, it ebetlake it ap Yesus nen inayoko 'biluk la'isasikhe meke emenogo werekmake ageik, mikikhukha. 5Itithogon inebe mikikhukhasik nen, it akhuni itikmanke meke dek, Yahudi meke inougi koktek dek, inom dapukhogon atluk,
“Paulus lak yi aik ti aik hagarinabiluk, inebe helekit oba motok inasuok,” iluk inabok palhukha. 6Inabok palhukhama, it inilu agoukhasik nen, lo thirlik-pirlikhogon, o Likaonia eloke etoma o Listra inom, Derbe inom, o aliluke etoma aperek inom, usasukha. 7Usasukhasik nen, wene hano wene yakulisekhe lagoukhaat.
Paulus Barnabas ipisak o Listra dogolik hagakhukha wene
8O Listra etoma ap ageikhe agosa akla nen itaklaga dogolik isok weak itaklageikhesik isok obatne dek nen holak lageidek hurek motogat welageikhe. 9Hurek dogolik Paulus nen wene yogeisugunem asuk holek werekma, at Paulus nen ileken oba tek-tek 'birogo dogolik, akla nen,
“Ap ithi etaiken nenat,
Eberogonat hagatnabigin, iluk apekhesik werek higi,” iluk akla apasikhe. 10Itithogon apasikhesik, ane kokhogonat yogokhe dogolik,
“Hebe metokhogon melasin o,” iluk yogokhikhemo, metokhogon melageikhesik nen, holal lageik, wageik, hagakhikhe. 11At Paulus nen itithogon hagakhikhemo, it akhuni doalegat emenogo inileken hasukhasik nen, it akhuni o Likaonia meke inane baga men isukha,
“Ap yi inebe walhenak mekeat, inebe akhuni hakene hagatlageikhasik nen, ninoba usa'ageikha yi,” iluk inane amitmit sup isukha. 12Inane itithogon isukhasik nen, Barnabas etaga Zeus thalhik, nen, wene Paulus nen ekhe lageikhe iti nen, at etaga Hermes thalhik, isukha. Itithogon thalinakhukha iti, it nen,
“Nit meke walhenak,” iluk oba hakotdiluk dogolik hogorakhe lagoukha meke inetaga meke thalinakhukha iti. 13Itithogon thalinakhukhasik nen, ap Zeus iteerek akaneke ai o kota etoma hurlakola halek welageikhe meke nen, sapi kulok meke men, oken elokhoken hano meke men, wolok, o kota etoma ukegarekma holagape palekma wageikhe. Wageikhesik akhuni doalegat emenogo inom nen, Paulus Barnabas ipisak warisauwogoluk hagakhukha. 14Warisauwogoluk hagakhunem, it Paulus Barnabas ipisak Yesus nen inayoko 'biluk la'isasikhe meke emenogo inasuk holhukhasik nen, huk asuagaluk, inekaerek nen inasu itikmanke meke li'bik-la'bakhogon la'isalok nen, akhuni doalegat natogorlek werekma inakla pirlirli lagoukha. Lagoukhasik nen, inane kokhogonat yogeisekhe dogolik,
15“Ap yirani. Hit nikithogon hagakhe lagap. Nagarlak lak nerugi. Nit ninebe hit hakene akhuni mekeat. Meke re, hit nen yi meke ti meke weat meke hagakhe lagap iti here'isalok nen, hinobabut hebelatluk, hinelokhe Allah iluk motok welagarek meke iti wogosubageik nen iluk wene yokhisa ago meke o. At Allah iti, pogot men, agat men, i laut kok yekelek men, yi meke ti meke pogot oba, agat oba, ima welagarek meke men, walhasikhe meke o. 16Haganeat ninopa lak nen logat ninopase lak itaklarik waga lagoukha etaat, Allah nen,
Yi akhuni ti akhuni inukuloak etaga tomok hagakhe lagoukha meke hasik,
Hagakhe dogonek o, iluk here'isekhe lageikhe. 17Itithogon meke re, it akhuni nen, at ebe hutduagaluk, yi meke ti meke ageikhe walhigidek obarlikmatdisikhemo welagarek 'buk. At hano anek hagakhe dogolik, ninapiri nina'ithogon nikik, ninakla arleken akhigik, hagakhe dogoagaluk, at nen miso pogot oba nen usa'i ageik, nokorek meke iti nausak erlok asi agunem kokhogonat woknisigik, hagakherek iti,” iluk inasuk wakhikhe. 18Inasuk itithogon wakhikhe mekeat, it akhuni doalegat emenogo nen sapi arat warisauwogoluk hagakhukhasikmo etnogo nen, inetaiken nikithogon thebelu heat hagalageikhe mekeat, wene Paulus lak nen itithogon isukhama nen, warisigidek here'isasukha.
19Itithogon hagakhukhama, it akhuni Yahudi meke o Antiokhia nen, Ikonium nen, lagoukhasik akhuni doalegat emenogo wene iti here'isalok it werekmake asuagaluk inakla kagalhukha. Inakla kagalhukhama, it werekmake agoukhasik, Paulus etnogo ebe helekit oba wakhukhasik nen, ebe motogat wakhe thalek, lisogo o kota leget abel thikmanke ula'isukha. 20Itithogon ula'isukha mekeat, it akhuni aperek Yesus ane waganhukhasik welagoukha meke wagoukhasik nen, alilu dagakhogon melasi agoukhama, ebe melatluk nen, o kota ukisikhe. Ukisikhesik noge iluk, hubuluke Barnabas ipisak o Derbe usa lagoukha.
Paulus Barnabas ipisak inapuke o kota Antiokhia lagoukha wene
21O Derbe etoma hano wene yakulisekhoat dogolik, akhuni inebe doalegat woginakhukhama Yesus ane waganhukha. Waganhukhama 'bisalok, it Paulus Barnabas ipisak yabokane inapuke o Listra nen, Ikonium nen, piokhogon o Pisidia eloke o kota Antiokhia dukhi agoukha. 22Alep laga dogolik, akhuni Yesus ane yakulisilik lagoukhama waganhukha meke yabokane inoba haklarik dukhi aga dogolik, inetaiken ago warinakhik, inasuk wakhik, ilik dukhi aga dogolik, men yogeisasukha,
“Wene eberogonat iluk hinetaiken Yesus oba hakotdisigip meke iti, hinobatnerogon hakotdiluk dogono. Nit yabokane Allah apma motok dogouogoluk ninoba yi aik ti aik hekhe dogoluk nenat ukugun o,” iluk yogeisilik dukhi agoukha. 23Itithogon yogeisilik dukhi aga dogolik, o yi ai ti ai, Allah a'buri natogokhe lagoukha dopok, inougi therisik dogoagaluk meldisilik iniki ageikhe sembayan uogoluk hipiri nikidek werlegat dogolik sembayan men ekhe lagoukha,
“Yesus ninoe. Ha'buri inetaiken hoba hakotdiluk werek meke yi, hagasik dogonok nen iluk hat hikimo 'bogo o,” iluk sembayan ilik dukhi agoukha. 24Dukhi aga dogolik, o Pisidia eloke nen piokthek, o propinsi Pamfilia usagoukha. 25Usagoukhasik, o Pamfilia etoma o kota Perga wene yogeisalok nen, o kota Atalia usa lagoukha. 26O Atalia nen, imake ku warogo o Antiokhia inapuke lagoukha. Etoma nen, itithogon hagarik nekhe dogoagaluk haganeat it Allah a'buri nen la'isa aga dogolik,
“Allah obabut hano etnogo nen wokhisik loak o,” iluk la'isa agoukhama itithogon hagarik nekhe lagoukhasik nen, arat hagatluk inapuke yabokane lagoukha iti. 27O Antiokhia lalok, Allah a'buri natogorinakhikhesik nen, men yogeisasukha,
“Nit Allah ninom nen yigithogon hagakho, tigithogon hagakho,” iluk wene pilinogo yogeisekhe dogolik men yogeisasukha,
“It akhuni itikmanke meke wene iti eberogonat iluk waganuagaluk, Allah nen thu hualdekhemo erlok waganusak werek o,” iluk yogeisasukha. 28Itithogon yogeisasukhasik, akhuni Yesus ane waganhukha meke emenogo inom iniki doalegat welagoukha.
Pašlaik izvēlēts:
La'isasikhe 14: LAIDNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties