La'isasikhe 15
15
O Yerusalem nen wene kogat palhukha wene
1Ap aperek o Yudea nen o Antiokhia wagoukhasik nen, Allah a'buri etoma meke wene men iluk yakulisasukha,
“It he, wene Musa nen,
Yigithogon, tigithogon hagakhe dogosak iluk yoknisasikhe wene iti mothogon, hinoado aperlagap meke palhinakhidek halok he, hinebe Allah nen tilhinabusak dek o,” iluk yakulisasukha. 2Wene itithogon yakulisasukhama, at Paulus Barnabas ipisak nen, it ap iti men yogeisasukha,
“Hit nen egep iti motok korlo egep o,” iluk inom wene palhik, wene yakhik, kogat yakhe lagoukha. Wene itithogon yakhe lagoukhama, it etoma meke nen, Paulus Barnabas ipisak, it aperek inomat o Yerusalem lalok it ap Yesus nen inebe inayoko 'biluk la'isasikhe meke emenogo men, it ap Allah a'buri therisik welagoukha meke men, inom nen wene iti hasik morerasuagaluk la'isauwogoluk hagakhukha. 3It Allah a'buri nen itithogon hagakhukhasik la'isasukhama, o etoma nen, Fenisia nen, Samaria nen, etoma laga dogolik, men yogeisilik lagoukha,
“It akhuni itikmanke meke inobabut hebelogo inelokhe Allah wogokhama o,” iluk yogeisilik lagunem, it Allah a'buri etoma meke inakla arleken kogat akhasukha. 4It etnogo o Yerusalem lagoukhama, it ap Yesus nen inebe inayoko 'biluk la'isasikhe meke emenogo men, it ap Allah a'buri therisik welagoukha meke men, it Allah a'buri aperek etoma inebe natogokhe lagoukha meke men, heagei warogo woginakhukha. Woginakhukhama, it nen,
“Nit Allah ninom nen yigithogon hagakho, tigithogon hagakho,” iluk wene pilinogo yogeisasukha. 5Yogeisugunem, it ap Farisi meke Yesus ane eberogonat iluk waganhukha meke inebe aperek melagoukhasik nen, men yogeisasukha,
“Akhuni thikman meke Yesus ane waganha meke iti, inoado aperlagap itithogon palinakhik, wene Allah nen Musa ayoko 'biluk ninasuk wakhikhe wene etnogo hago welageik, hagakhe dogosak o,” iluk yogeisasukha. 6Yogeisasukhama, it ap Yesus nen inebe inayoko 'biluk la'isasikhe meke emenogo men, it ap Allah a'buri therisik welagoukha meke emenogo men, wene iti morerasuogoluk natogokhukha. 7Itithogon natogokhukhasik, wene kogat ageikhe nen igik, ageikhe nen igik, ekhe lagoukhasik, at Petrus melageikhesik nen, men yogeisasikhe,
“Ap yirani. Nagarlak lak. It akhuni itikmanke meke nen hano wene inasuk holhik, inakla nen eberogonat iluk waganhik, hagasuagaluk, an haganeat hit ninom werekma, it iti yogeisa loagaluk Allah nen wenaknakhikhesik nayoko 'bisikhe iti, hinilu o. 8At Allah akhuni ninetaiken ilu meke etnogo nenat,
Yi an na'buri o, iluk Agoreke nit woknisasikhe iti hagat, it iti wogeisasikheat. 9It ninat hagarinakhik, nit ninat hagatninakhik, hagakhidek o. It nen Yesus ane eberogonat iluk waganhukhama, at nen inaklake horinakhikhe iti. 10Allah nen itithogon hagakhe korlegat he, hit nen Allah obabut paluogoluk hagakhe lagap iti nenaluk. Wene iti akin weak nen, ninopa lak waganusak erlok dek welagoukha. Nen, nit nen waganusak erlok dek dogoligat, yabokane it Yesus ane waganha meke iti waganuagaluk ekhe lagap iti nenaluk. 11At ninoe Etagapogot Yesus obabut hano nen, ninetaiken at oba hakotdisinem, nit tilninakhik, it tilinakhik, nit ninom tak-tagat tilninakherek iti,” iluk yogeisasikhe.
12Itithogon yogeisasikhemo, it akhuni doalegat emenogo inane igidegat huk agoukha. Itithogon huk agoukhama, Barnabas Paulus ipisak nen wene yogeisekhe dogolik,
“It akhuni itikmanke meke wene yogeisugunem, hutduagaluk, nit nen elalinat hagarinabik nekhe lagosik wago iti, ebe re, Allah nenat hagarinakhe laga o,” iluk wene pilinogo yogeisekhe korlek, inasuk holek welagoukha. 13Wene arat 'bogokhogon yogeisasukhama, at Yakobus nen men yogeisasikhe,
“Ap yirani. Nagarlak lak. An wene igin yi hinasuk holini. 14Allah nen it akhuni itikmanke meke inoba ebetluk nen, men isikhe,
It aperek an na'buri asuagaluk woginabigin o, iluk woginakhikhe meke hasik, at Simon nen yoknisekhe iti. 15Itithogon yoknisekhe iti, it ap Allah ane yogeisekhe lagoukha meke emenogo nen isukha tak-tagat yoknisekhe o. It nen men iluk holal waganhukha,
16-17Ninopase Etagapogot nen,
Akhuni ato iti tha'bokhogonat men,
it akhuni itikmanke meke,
an na'buri iluk nekaerek netaga palogo wenageinakhigi meke iti tha'bokhogonat men,
inom dapukhogon inopase Netagapogot an nebeat heraknabuagaluk,
an nekaerek yabokane wisigin o.
Witluk nen, o thagalagunem yabokane ket halharek iti hak,
Daud lak inetaga dek aga iti,
inetaga weregetdigin o.
Misalaga meke iti, an nen yabokane aborlok dek motok halogo 'bigik, keretdigik, hagasigin o, iluk,
at ninopase Etagapogot itithogon tha'bokhogonat hagakherek meke nen
18 #
Amos 9:11-12
itithogon ninilu asuagaluk haganeat yoknisasikhemo,
holal waganogo 'bisukha iti. 19Iti nen, an nakla nen, it akhuni itikmanke meke inobabut hebelogo inelokhe Allah wogoriogei meke iti, inakla weagatdusak dek apekhe lagei. 20Nit nen, wene men iluk holal waganogo inoba la'usak. Kaneke oba inetaiken hakotdiluk dogolik ako warekharek meke palek nukunem inebe weagarageikharek meke iti nausak dek. Param hagarinabusak dek. Nen, yi meke ti meke arlokop pethelogo warek meke nikik, mep nikik, nausak degat, iluk inasuk warogo inoba la'uok o. 21Wene Allah nen at Musa yogokhikhemo, at nen ninasuk wakhikhe wene etnogo, hurli ninopa lak haganeat etoma nen o yi ai ti ai o akhuni Yahudi meke sembayan egarekmake, iniki Allah hasik werlegat dogolik hibiku-yogoku wene iti etaga thalogo yogeisegarek meke weregat o,” iluk at Yakobus nen yogeisasikhe.
Wene holal waganogo it Allah a'buri o Antiokhia meke inoba la'i agoukha wene
22Wene itithogon isukhasik nen, it ap Yesus nen inayoko 'biluk la'isasikhe meke emenogo men, it ap Allah a'buri therisik welagoukha meke emenogo men, Allah a'buri tha'bokhogonat natogorlek welagoukha meke men, inom nen wene men iluk palhukha,
“Ap nit meke aperek wenago inayoko 'biluk, Paulus Barnabas ipisak inom o Antiokhia loak nen, la'isauwok o,” iluk isukha. Itithogon isukhasik nen, it Allah a'buri meke nen, at Yudas etaga ageikhe Barsabas iti inom, Silas iti inom,
“Inobabut hano,” iluk apekhe lagoukha meke nen, holal waganek iti inikimo wolok loagaluk inayoko 'bisukha. 23Wene iti baga holal waganogo 'bekhe dogolik, men isukha,
“Nit hinagarlak lak Yesus nen ninayoko 'biluk la'inani ageikhe meke men, Allah a'buri therisik welagorek meke men, ninom nen, hit hinebe o Antiokhia meke, Siria meke, Kilikia meke, hinebe itikmanke mekeat, Allah a'buri meke ninagarlak lak ninerugi, iluk heagei wathinakho iti o.
24Ap nit meke aperek hinoba wageikhasik nen, nit nen,
Wene itithogon yogeisa lani, iluk la'i ageidek mekeat he, it nen hit yokhisekhe dogolik, hinakla weagathinakhik, korlothinakhik, hagakha o, iluk akhuni nen egama ninasuk holho o. 25-27Ninasuk holhosik nen, ninebe natogorlogo nen wene palho. Wene itithogon palhosik, Barnabas Paulus ipisak inebe ninakmu lak meke iti, inebe ninoe Etagapogot Yesus Kristus hasik 'bisalok, inasuogoluk hagakhe korlegat he, at hasik hagarik liliogei meke inom hinoba wisuagaluk ap aperek Yudas Silas ipisak inayoko 'bogoma wisugun iti. It witluk nen, wene holal waganogo 'bogo iti inape baga nen pilinogo yokhisoak. 28Nit Allah Agoreke ninom dogolik, wene men iluk palho iti. Wene akin meke iti yokhisausak dek. Wene yiat hinasuk holusak ogo. 29Kaneke oba hakotdiluk dogolik ako warekharek meke iti palek nausak dek o. Mep iti nausak degat. Yi meke ti meke arlokop pethelogo warek meke iti nausak degat. Param hagarinabusak degat o, iluk wene palho. Itithogon hagakhidek thogotdegep halok he, hit hano hagakhe lagap iluk ugun iti. Wene iti baga arat yokhisogo. Nagarlak lak nerugi,” iluk holal waganogo la'isa agoukha.
30Itithogon holal waganogo la'isa agoukhama, o Antiokhia arat wagoukhasik nen, Allah a'buri inebe tha'bokhogonat natogorinabiluk, wene holal waganek etnogo wogeisasukha. 31Wogeisasukhama, etaga thalhukhasik nen,
“Wene iti baga ninakla hano aga,” iluk inakla arleken apik akhasukha. 32Inakla arleken akhasukhama nen, at Yudas Silas ipisak Allah ane yogeisekhe lagoukha meke nogo nen, Allah a'buri emenogo inetaiken thebelhik, ago warinakhik, hagasuogoluk, wene kogat yogeisekhe lagoukha. 33Itithogon yogeisekho welagoukhasikmo nen, it Allah a'buri o Antiokhia meke nen, it Yudas Silas ipisak heagei warogo, it inebe la'isa agoukha meke emenogo inoba inapuke yabokane la'isasukha. [ 34Meke re, at Silas akla nen,
“An huk asigin,” iluk o Antiokhia huk ageikhe.] 35It Paulus Barnabas ipisak meneke, o Antiokhia etoma huk agoukhasik nen, it akhuni aperek doalegat inom etoma dogolik, wene ninoe Etagapogot ane hano wene iti yogeisigik, yakulisigik, hagakhe lagoukha.
Paulus Barnabas ipisak wene yakhe lagoukhasik, inasokhotek lagoukha wene
36O etoma iniki aperek inom welagoukhasik nenat, Paulus nen Barnabas yogokhe dogolik,
“O yi ai ti ai ninoe Etagapogot ane yogeisilik lagoma emenogo yabokane luok o. Laga dogolik, Allah a'buri ninagarlak lak ninerugi emenogo nikithogon werek iluk, o ukul tomok ninileken 'birisilik luok o,” iluk yogokhikhe. 37Itithogon yogokhikhemo, at Barnabas nen, at ap etaga Yohanes Markus etnogo wolok lagaluk hagakhikhe. 38Itithogon hagakhunem, at Paulus nen,
“Dek o. Nit Allah hasik ninom hagarik luogoluk lagosik nen, o Pamfilia nen ninom lageidek suguluk waga etnogo, yabokane wolok lausak dek o,” iluk yogokhikhe. 39Itithogon yogokhikhemo, ipisak wene a'bereak yakhukhasik nen, inasokhotegat lagoukha. At Barnabas nen, Markus wolok imake ku warogo o Siprus wageikhe. 40Wageikhemo, at Paulus nen Silas ayoko 'bisikhesik wisuogoluk hagakhunem, it Allah a'buri o Antiokhia meke nen,
“Ninoe Etagapogot obabut hano etnogo nen wokhisik loak o,” iluk heagei warogo la'isa agoukhama wagoukha. 41It etnogo waga dogolik, o propinsi Siria etoma nen piokhogon o propinsi Kilikia Allah a'buri yi ai ti ai natogokhe lagoukha meke emenogo inetaiken ago warinakhik wagoukha.
Pašlaik izvēlēts:
La'isasikhe 15: LAIDNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties