Yohanes 8
8
Akoni nen, kwe omanggi il arurlu kagakonem kasukasik, Yesus oba wolok waguka wene
1It akoni yomenogo lago nggorlek, at Yesus ndom Zaitun oba dagasike. 2Dagisikesik, kubulukngge kuben kak siyakogo wusa wagikesik, Allah ago palekma unggisikemo, akoni dogalegat at oba wagukama, at ebe korek lagikesik nen, wene yanggul isasike. 3Wene yanggul isasinem, it ap Allah wene indewerek mende inom, Farisi mende inom, kwe omanggil il arurlu kagakonem inilenggen kasukasik, Yesus oba wolok wagukasik, kwe etnogo ebe ndurlem mendiluk nen, 4Yesus men yogokuka,
“Ninewe. Kwe yi il arurlu kagakonem pakogosik nen koba wolok wago o. 5Nen, Allah nen ninasuk wakike wene etnogo paga, Musa nen kolal mbalko dogolik, it kumi nen, at kwe yi kagake eti kak kagako kalok, nggit oba inebe mondok inasusak o, yiluk yoknisasikemo wene mbalek werek eti kat nen ninggit diluk yoknisagin,” yiluk yogokuka. (Im. 20:10; UI. 22:22-24) 6Wene esigit diluk yogokuka mende, Yesus ambe paga wene onggo yisinem enggarli warogo wene oba ʼbuwogoluk yisuka mende, at ut soma yiluk inggi siksik paga agat oba kolal mbalkike. 7Esigit diluk inane togot diyalok kolal mbalko nggorlek, it nen,
“Yoknisan o,” yiluk yogoko mondok kagako lagukama, at urowak lek yisikesik, men yogisasike,
“Kit werek ya mende, ap omanggi weyak kagakidek dogoligogo mende kalok, at nen ndak kwe yi nggit oba nduntogo wasuwak o,” yiluk 8yogisasikesik yabunggane suguluk ut soma yiluk inggi siksik paga, agat oba kolal mbalko lagikeat. 9Esigit diluk kolal mbalko nggorlek, it yomenogo wene yogisasike mende etnogo inasuk kolkukasik, it inarluwendek ndak duki lagukama, yabunggane inebe taʼbokogonat omanggi mbolok duki lagukama, at Yesus kwe etnogo imbisak inarligat dogolik, 10at Yesus etnogo urowak lek yisikesik, at kwe etnogo men yogokike,
“Kwe yira. Niru o. Ap yomenogo re? It nen wene koba ʼbega etnogo, ap omanggi nen kake a? Dek a,” yiluk yogosigin ambasike, 11at kwe etnogo nen,
“Newe. Mondok dek o,” yiluk yogokikemo, Yesus nen, men yogokike,
“An nen wene koba ʼbiluk kasigin degat o. Kaguma lan o. Lalok nen, kurli yogondak yi paga nen yabunggane weyak omanggi kagako dogogup o,” yiluk yogokikesik aguma laʼbisike.]
Yesus nen, “Akoni liyarinabigogo, anat o,” yiluk yogisasike wene
12Yabunggane, at Yesus nen it akoni yomenogo wene omanggi men yogisasike,
“Akoni agat oba mende liyarinabigogo eti anat o. Ta nen an nomborlik noko dogogin kalok, an nebe liya dogolik inilugurinabigogo mende etnogoat woknabigin eti paga, at eti o amummo noko dogogin dek o,” yiluk yisi lagikemo, 13it ap Farisi mende yomenogo nen,
“Kat, kabok inilu asuwagaluk, kenggaerek nenat yogisaligogon eti kenggalat yiligogon o,” yiluk yogokukama, 14at Yesus nen, men yogisasike,
“An wagagi mende inom, ligin mene inom, kit kinonggodek mende, anat nebe o etoma nen wagagi, nen yabunggane o etoma ligin, yiluk nilu eti paga, an nabok inilu asuwagaluk nenggaerek nenat yokisiligogo eti, wene eti eberogonat yokisiligogo o. 15Kit nen wene noba ʼbiligogi eti kit akoni-akoni wene inoba ʼbigik, nggokik yiligogi kagat, wene noba ʼbiligogi mendeat, anat wene akoni inoba ʼbiligogo mondok dek o. 16Mende, an nen wene inoba ʼbilepma, eti an narligat nen dek o. Nombae laʼbani wagike mende etnogo nimbisagat dogolik kagako lagi eti paga, wene motogo akoni inoba ʼbilep o. 17Wene, Allah nen ninasuk wakike mende eti paga men yisike,
Akoni wene inoba ʼbisi dogusak kalok, ap wene erlo kagaka inilu mende inebe mbere nen inane imbisak ndak-ndagat yisi kalok, wene eti eberogonat yusak o, (Ul. 17:6; 19:15)
yiluk yisikemo kolal mbalogo ʼbisuka. 18Eti kak, an nabok, nenggaerek nen yigik, nombae laʼbani wagike mende nen yigik, yokisaligogi o.” yiluk yisikemo, 19it nen,
“Kat kombae eti nggoma werek o?” yiluk yogokukama, at Yesus nen,
“An nebe yi kinonggodegat mende, nombae inom kinonggodegat o. An nebe kinilu dogolepma, nombae eti kinilu dogolebat o,” yiluk yogisasike. 20Wene esigit diluk yogisasike eti at ebe Allah ago palekma peti uang Allah ake ʼbiligogoma eragalilu dogolik yisike. Esigit diluk yisinem, at ebe pakausak paga awan asi wagidek werek nggorlek nogo nen, akoni yomenogo omanggi nen pakigidek taʼbokogonat togot disuka.
Yesus nen, “O an liginmo etoma, kit lausak erlok dek o,” yiluk yogisasike wene
21Esigit diluk togot disukama, at Yesus wene yabunggane omanggi it yomenogo men yogisasike,
“An nebe yabunggane liginat o. Lalok etoma werekma, kit an kweyak nabugun mende, o an liginmo etoma kit lausak erlok dek eti paga, kit weyak kagarigogi mende wene kinoba werek nggorlegat kinebe watlasugun o,” yiluk yogisasikemo, 22it ap nggokndek Yahudi mende nen, men yisuka,
“Ap yi nen yoknisasi dogolik,
O an liginmo etoma kit lausak erlok dek o, yiluk yokniseke eti at enggaerek nen waragaluk yiligogo a?” yiluk yisukama, 23at Yesus nen men yogisasike,
“An nebe, mbogot abel ombongge mende wagagisik werek o. Mende, kit abel wemangge yoma mende. Kinago erlo agat oba yomaat o. Mende, an nago erlo agat oba yoma dek o. 24Eti paga, an nen wene alep yokisasi dogolik,
Weyak kagarigogi mende wene kinoba werek nggorlek watlasugun o, yiluk yokisigi etnogo, men pasik yigi. Kit nen an pasik,
At ebe ikok mondok dogoligogo mendeat o, yiluk kinendainggen noba panggot dugun dek kalok, wene kinoba werek nggorlegat watlasugun eti paga yigi o,” yiluk yogisasike. 25Esigit diluk yogisasikemo, it nen,
“Kat kebe ta nogo?” yiluk oba kinok waganggukama, at Yesus nen, men yogisasike,
“Yabunggane eti wirlikogonat nenaluk yokisagin. 26An nen yi wene ndi wene dogalegat yokisigik, wene kinoba ʼbigik, nggokik, kagasusak erlok mende, at laʼbani wagike mende etnogo ane eberogonat yiligogo eti paga, at nen yisinem nasuk kolko lagi mende etiat kit akoni agat oba mende yoma yokisiligogo o,” yiluk yogisasike. 27Esigit diluk yogisasike mendeat, it nen,
“At ombae Allah pasik abok yoknisiligogo o,” yiluk wene eti didigidek welaguka. 28Esigit diluk didigidek werek nggorlek, at nen, men yogisasike,
“An abat endak lasi wagagi etnogo, an nebe o paga mendanugun etinem, kit nen,
Ikok mondok dogoligogo mende etnogo ebe yiat o. At nen wene yoknisasi dogolik, akla nen nggagalogo yigidek. At ombae nen yanggul irigogo mendeat yoknisasi lagama, yiluk, kinilu asugun o. 29At laʼbani wagike mende etnogo, akla ambasi ndak-ndak kagarigogo eti paga, at nen an nebe nggolelogo togot danggidek nimbisak kunik mondok werek o,” yiluk yogisasike. 30Yesus nen wene esigit diluk yogisasikemo, akoni inebe dogalegat inendainggen at oba panggot disuka.
Yesus nen, “Ebe wene paga kinebe kerle piyalogo kinasokne ʼbinagagin,” yiluk yogisasike wene
31Inendainggen esigit diluk panggot disukama, at Yesus nen, it ap Yahudi mende inendainggen at oba panggot disuka mende men yogisasike,
“Kit an nane kologo kagako dogogun kalok, kinebe an nagoromi ebe mende napma dogolik, 32wene ebe wene kinilu asigin o. Kinilu asumo, wene ebe wene eti pagaat kinebe kerle piyalogo kinasokneat ʼbinagagin o,” yiluk yogisasinem, 33it nen, men yogokuka,
“Nit, ap Abraham nen endago mende yoma, ninebe akoni amberek nen sebelogo ʼbinaniluk inanduwanengge agidek mendeat werek mende, kat nen yisi dogolik,
Kinebe kerle piyalogo kinasokne ʼbinagagin o, yiluk yegen eti kakla ninggit diluk ambasi dogolik nen yegen?” yiluk yogokukama, 34at Yesus nen, men yogisasike,
“Akoni weyak kagarigogi mende eti inebe dombok weyak kagarigogi eti anduwanenggeat o, yiluk eberogonat yokisigi o. 35Nen, it inanduwanengge mende eti ineugi inom mondogat dogoligogi dek mendeat, inaʼburi eberogonat mende kalogat, inom mondogat dogoligogi o. 36Eti kak, an Allah ebe aʼbut nen, kit kerle piyalogo kinasokne ʼbinagagi kalok, eberogonat kerle piyalek kinasokneat dogogun o,” yiluk yogisasike.
“Kinombae Iblis at o,” yiluk yogisasike wene
37Esigit diluk yogisasikesik, omanggi men yogisasike,
“Mende, kit, ap Abraham nen endago mende werek yiluk, eti an nilu o. Mende, kit kinakla nen an nane waganusak kinaʼit mondok eti paga, kit nenat an nebe nasuwogoluk nabok mbaligogi o. 38An nombae nimbisak dogolik nilenggen kasi lagagi mendeat yokisasi nggorlek, kirat, kinombae etnogo nen yiligogo mende ane kologo kagarigogi o,” yiluk yogisasike. 39Esigit diluk yogisasinem, it nen,
“A! Nit ninombae Abraham at kak yoma re,” yiluk yisukama, at Yesus nen, men yogisasike,
“Kit kinebe Abraham nen endago mende eberogonat dogolepma, Abraham kagako lagike mendeat kagako dogolep o. 40Mende, an wene ebe wene Allah nen yisinem nasuk kolkigi mende yokisasinem, kit nen an nebe nasuwogoluk nabok mbaligogi eti kak, at Abraham nen esigit diluk kagakidek mende kagarigogi o. 41Kit kinombae etnogo kagako lagike mende kagarigogi o,” yiluk yogisasinem, it nen, men yogokuka,
“A! Nit inil arurlu yugunengge kagako dogolik endak ninaka mende dek o. Nit ninombae Allah arligat o,” yiluk yogokukama, 42at Yesus nen, men yogisasike,
“Kit kinombae Allah eberogonat dogolepma, an nebe erlo Allah mendeat wagagisik werek eti an kinendainggen kunik dogolep o. An nabusagat nakla ambalok wagagi ʼbuk. At nenat laʼbani wagikemo wagagi o. 43Esigit diluk wagagisik wene yokisaligogo mende kit didigidek werek eti nenaluk. Esigit diluk werek eti an nane kolek dogusak kinaʼit eti paga, didigidek werek o. 44Esigit diluk kinaʼit eti kit kinombae Iblis atma, kit nen at warlok ambaligogo mende etiat warlok nen kagarigogi o. At Iblis eti erlo paga nenat akoni inarigogo mendeat o. At wene ebe wene akla dek eti paga, wene ebeat wene yisinem inane legerigogo dek o. Iblis enggalat yiligogo eti at obabut ikogatma enggalat yiligogo eti o. Inenggalat yiligogi eti erlo arat o. 45Mende, an nen wene ebe wene yokisiligogo eti paga, kit nen,
Eberogonat, yiluk didiligogi dego. 46An nen weyak kagakonem, kit amberek nen kinilenggen niyegep kalok, yoknitni nda. Dek o. An nen, wene ebe weneat yanggul kisasi nggorlek, didigidek eti nenaluk. 47Ta nen ebe Allah mende kalok, Allah wene eti asuk koligogo mendeat, kit kinebe Allah mende ʼbuk. Ninat mende eti paga, at ane kinasuk kolusak kinaʼit o,” yiluk yogisasike.
“Abraham awan endak lagidek werek nggorlek, an nikogat werek o,” yiluk yogisasike wene
48At Yesus nen wene esigit diluk yogisasikemo, it ap Yahudi mende yomenogo nen, men yisuka,
“Kat kebe ap Samaria mende yi! Kugi obabut weyak mende kakla unggekesik werek o, yiluk yisi lago etnogo eberogonat yokogo lago kigi,” yiluk yogoko werekma, 49at Yesus nen, men yogisasike,
“An kugi obabut weyak mende nakla unggigidek o. An nen nombae pogorako nggorlek mende, kit nen an nendaga weyak kagarogo ʼbiligogi o. 50Mende, an nenggaerek nake pogot nabuwagaluk kagarigogo ʼbuk. Dek o. At te, an pogot nabuwagaluk, at omanggi nen wene inoba ʼbigik, nggokik, kagasigin mende werek o. 51Nen, ta nen an nane kologo kagako dogogin kalok, watlagidek iluk mondok dogogin o, yiluk eberogonat yokisigi o,” yiluk yogisasinem, 52it ap Yahudi mene yomenogo nen, men yogokuka,
“Ap Abraham inom, ap Allah wene yogisasi laguka mende yomenogo inom, arat watlarik laguka mende, kat nen yisi dogolik,
Ta nen an nane kologo kagako dogogin kalok, watlagidek iluk mondok dogogin o, yiluk yegen eti paga, kugi obabut weyak mende eberogonat kakla unggekesik werek, yiluk, didagogo o. 53Nit ninakomba Abraham ebe watlagike mende eti ebe elege negen. Mende, karat, kebe nggok a? It ap Allah wene yogisasi laguka mende yomenogo watlarik laguka mende, kat kebe ta kak nen yiligogon?” yiluk yogokukama, 54-55at Yesus nen, men yogisasike,
“An nenggaerek nen pogorakasi dogolepma, we yugunat pogorakasi dogolep o. An, nombae ebe nilu mende eti at ebe kit nen didigidek dogolik,
Nit ninombae Allah, yiluk yiligogi etnogo, at ebe nenat, pogot nabigogo. An nen,
At ebe nonggodek, yiluk yilepma, kit kinenggalat yiligogi kagat, nenggalat yilep o. Mende, at ebe nilu nogo nen, at ane kologo kagarigogo o. 56Nen, kit kinakomba Abraham etnogo nen, an wisigin nabok yisi dogolik,
At wagonem nilenggen kigin, yiluk at akla arlenggen welagikesikmo, ilenggen arat niyasikesik akla arlenggen kasike,” yiluk yogisasinem, 57it ap Yahudi mende yomenogo nen, men yogokuka,
“Kat kebe endak lagagindik oba nen 50 tahun awan welagidek mendeat, Abraham erlok kilenggen kasigindik nen yiligogon a? Erlok dek o,” yiluk yogokukama, 58at Yesus nen, men yogisasike,
“An nane eberogonat yokisak o. Ap Abraham eti ebe awan endak lagidek werek nggorlek, an nikok mondogat werek o,” yiluk yogisasike. 59Esigit diluk yogisasinem, it ap yomenogo nen, at Yesus ebe nggit paga wasuwogoluk ininggimo wagangguka mende, Yesus ebe limak lagikesik nen, o Allah ago palekma togot diluk werlekmangge lagike.
Pašlaik izvēlēts:
Yohanes 8: DNA
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties