Yohanes 7
7
Yesus o Yerusalem pesta kagakonem puk agikesik nen wusasike wene
1Wene esigit diluk arat yogisasikesik nen, it ap nggokndek Yahudi mende nen, Yesus ebe wasuwogoluk abok mbalko laguka eti paga, at ebe o Yudea wusalok noko dogu aʼit nen, o Galilea dogolik etoma noko lagike. 2Esigit diluk noko lagike eta amot, it akoni Yahudi mende paganeat orliya pal diluk welaguka mende inakla eberogo, pesta iyago nausak oba arat panggok yi wagike. 3-5Esigit diluk panggok yi wagikemo dogolik, at Yesus enggaerek agarlagi mende nen, inendainggen at oba panggot digidek welaguka eti paga, men yogokuka,
“Kat kagoromi kane waganigogi mende yomenogo nen, kat kagarigogo mende kagakonem inilenggen kiyawak nen, o yoma togot diluk o Yudea wusan nda. Ap inendaga werek asuwogoluk inakla ambasi dogolik kalok, limago kagarigogi dek o. Eti paga, kat kagako lagan eti akoni agat oba mende inebe taʼbokogonat inilu asuwagaluk selegampogo kagasi wusan o,” yiluk yogokuka. 6Esigit diluk yogokukama, at Yesus nen men yogisasike,
“O kibitngge-yogongge kit nen kagasusak mende, erlok werek mende, an nen kagasusak oba panggok yi wagidek awan werek o. 7It akoni agat oba mende nen kit kak, inaʼit mondok, kagat kinabigogi dek mende, an nen,
It kagarigogi eti weyak mondok yiluk yiligogo eti paga, anat inaʼit mondok kagat nabigogi o,” yiluk yogisasikesik, 8omanggi men yogisasike,
“An kagasusak oba awan werek eti paga, pesta kagasugun eti kagakonem yogondak yaat wusagin dek o. Kirat pesta kagakonem wusa lani o,” 9yiluk yogisasikesik, at o Galilea etoma puk agike.
Yesus pesta orliya palogo kagakonem wusasikesik kagakike wene
10Esigit diluk puk agikemo, at agarlagi yomenogoat pesta etnogo kagakonem arat wusasukasikmo nen, at Yesus yabunggane akoni inonggodek werek nggorlek limago wusasike. 11Etoma wusasikesik werek nggorlek, it ap nggokndek Yahudi mende pesta kagakonem dogolik Yesus ebe kweyasuwogoluk kinok waganggo dogolik,
“At ebe nggoma werek?” yiluk yisukama, 12it akoni dogalegat yomenogo inasuk kolkukasik nen, inane pok-pok yisi dogolik, it amberek nen,
“At pano,” yisinem, it amberek nen,
“Dek o. At weyak. Akoni nuket diyiligogo,” yiluk yisuka. 13Esigit diluk yisuka mende, it ap nggokndek Yahudi mende inayuk nen, Yesus abok inane selekmarogo mbalkidek. Laʼbokogonat yisuka.
14 Pesta etnogo nilik lago nggorlek kisogo Yesus Allah ago palekma unggisikesik, wene yanggul isasike. 15Yanggul isasinem, it ap nggokndek Yahudi mende nen pogorako dogolik men yisuka,
“Iya! Ninayuk o. Ap yi sekolah kagakidek mende, yi wene ndi wene yoma ninggit diluk nen ilu aga ambegep?” yiluk yisukama, 16at Yesus nen, men yogisasike,
“An nen wene yanggul kisaligogo eti an nakla nen nggagalogo yanggul kisaligogo dek mende, at an laʼbani wagike mende etnogo nen yoknoko nggorlek yanggul kisaligogo o. 17Ta nen Allah akla ambaligogo mende motogo kagasusak warlok kalok, an nen wene yanggul isaligogo eti pasik,
Allah nen yangguloko nggorlek yiligogo, yigik,
Enggaerek akla nen nggagalogo yiligogo, yigik, enggagat kalok ilu asiginat o. 18Ta nen wene enggaerek akla nen nggagalogo yiligogo eti akoni nen pogorasuwagaluk yiligogo o. Mende, ta nen, at laʼbi wagike mende pogorasuwagaluk yiligogo kalok, enggalat yiligogo mondok dek o. At te, eberogonat yiligogo o. 19Nen, Allah nen wene ninasuk wakike wene eti Musa nen kolal mbalogo wokisasike dek nogo? Wokisasikeat kigi. Mende, ap kit mende omanggi nen wene eti motogo kagakidek dogolik an nasuwogoluk nabok mbaligogi eti nenaluk,” yiluk yogisasikemo, 20it akoni dogalegat yomenogo nen, men yogokuka,
“A! Kat kugi obabut weyak mende kakla unggekesik kunu-gunu agandik o. Ta nen kasigiluk yisi agama nen yiligogon?” yiluk yogokukama, 21at Yesus nen men yogisasike,
“An nen omanggi pasik elalinat kagaki mende, kit taʼbokogonat nen,
Iya! yiluk kinayuk aga o. 22Mende, kit kinaʼburi inowado inenggarlimo mende mbalinabigogi eti erlo at Musa ʼbuk. Dek o. Erlo Musa ebe awan endak lagidek werek nggorlek ninakombalak nen mbalinako laguka mendeat o. Eti paga, Musa nen esigit diluk mbalinabusak yiluk yokisasikemo, kininggi 7 paga hari Sabat Allah ake werlegat dogolik mbalinabigogi o. 23Nen, wene Allah nen ninasuk wakike mende at Musa nen wokisasike mende eti sagalunogo yiluk, ininggi 7 paga hari Sabat Allah ake werlegat dogolik inowado inenggarlimo mende mbalinabigogi mende, an nen nininggi 7 paga hari Sabat Allah ake werlegat dogolik, ap omanggi ebe mondok pano kagaki mende, kit nenaluk mbet nirigogi? 24Wene ebe dikogo kinonggodek mende, we wene selekma mende arlek kinilu dogolik, akoni amberek wene inoba ʼbusak dek o. Wene dikogo kinilu atluk nen, weyak kagarigogi ndak-ndagat wene inoba ʼbisi dogono o,” yiluk yogisasike.
“At Yesus ebe ap erlo nggi mende wagike,” yiluk yisuka wene
25At Yesus nen wene esigit diluk yogisasi werekma, it akoni o Yerusalem mende inebe pelakngge nen men yiligogi,
“Ap wasuwogoluk kweyarigogi etnogo ebe eti dek a? Ebe etiat o. 26Mende, ebe lakani! Ninayuk o. Ayuk degat dogolik, wene yoknisasinem, it nen wene onggo yogokidegat togot diligogi yi. It ap nineugi nggokndek yoma inakla nen,
Ap yi nit akoni ndil ninabuwagaluk Allah nen laʼbi wisigin, yiluk yisike etnogo ebe etiat, yiluk inakla ambegasik nen yiligogi a? 27Esigit diluk mende, nit akoni ndil ninabuwagaluk Allah nen laʼbi wisigin yisike etnogo ebe wago kalok, erlo ngga nen waga, akoni taʼbokogonat inonggodek dogogun mende, ap yi,
Ebe ap erlo etoma mende, yiluk niniluat o,” yiluk yisi laguka.
28Esigit diluk yisi lagukama, at Yesus Allah ago palekma ane nggokogo wene yogisasi dogolik, men yogisasike,
“An nebe inom, nebe o etoma nen wagagi inom, kit kinilu nogo? An wagagi eti an nabusagat nakla nen nggagalogo wagagi dek o. At ane eberogonat yiligogo mende etnogo nenat laʼbani wagike mende, at ebe kit kinonggodek o. 29Esigit diluk mende, an narligat at nenat laʼbani wagikemo, o at werekma etoma nenat wagagi eti paga, an at ebe nilu o,” yiluk yogisasikemo, 30it akoni nen Yesus ebe pakawogoluk kagakuka mende, at ebe pakausak oba arat mot asi wagidek eti paga, ebe ininggi pakigidek togot disuka. 31It amberek nen pakawogoluk kagako laguka mende, it akoni dogalegat yomenogo inebe pelakngge dogalegat inendainggen Yesus oba panggot disukasik men yisuka.
“Ap eti elalin mende kagake, erlok dek ambegep? Nen, akoni ndil ninabuwagaluk Allah nen laʼbi wisigin yisike etnogo witluk nen, ebe diduwagaluk elalin mende nggogat kagasigin nogo? Dek o,” yiluk yisuka.
Yesus ebe pakawogoluk kagakuka wene
32Esigit diluk yisi dogolik, it akoni dogalegat yomenogo inane pok-pok Yesus abok yisinem, it ap Farisi mende inasuk kolkukasik nen, it ap Allah indewerek ineugi nggokndek inom nen, ap Allah ago palek anggorlem dogoligogi mende amberek inom nen, Yesus ebe pakawagaluk wene mbalkuka. 33Esigit diluk yisi nggorlek, at Yesus nen men yogisasike,
“An we, elalma ake ninggi mbereat ninom dogoluk nen, at laʼbani wagike mende etnogo oba suguluk arat ligin o. 34An o etoma lalok werek nggorlek, kit nen an kweyak nabik noko dogogun mende, kit o an dogoginmo etoma wisusak mondok erlok dek eti paga, an ninom abuk asugun dek o,” yiluk, yogisasikemo, 35it ap Yahudi mende ineugi nggokndek yomenogo nen, it-it yisi dogolik, men yisuka,
“Ap yi o nggoma lalok werekma, nit at kweyarik lalok ninom abuk asugun dek nen yokniseke ambegep. Ap nit mende olirok akoni Yunani mende werekma inoba lagukasik werekma inoba lalok nen, akoni Yunani mende wena yanggul isasi dogigiluk yeke ambegep a? 36At nen yoknisasi dogolik,
Kit an nebe kweyak nabik noko dogogun mende, an ninom abuk asugun dek o. Nen, kit o an dogoginmo etoma wisusak mondok erlok dek o, yiluk yokniseke eti, at akla ninggit diluk ambekesik nen yokniseke ambegep?” yiluk yisi laguka.
Yesus nen akoni inilugurinabigogo mende pasik yogisasike wene
37Wene esigit diluk yisukasik oba nen, pesta etnogo ilugun nggobokogo arat agonem, hari nggok eti paga Yesus ebe melagikesik nen, ane nggokogonat men yogisasike,
“Ta nen i abu kalok, an noba na wisusak o. 38Nen, ta nen endainggen an noba panggot disi kalok, i inilugurinabigogo mende at akla nen elesi punak-punak dukisi dogogin o, yiluk Allah wene kolal mbalek oba yisuka kagat, kagat lasigin o,” yiluk 39wene esigit diluk yogisasike eti akoni inedainggen at oba panggot diligogi mende inebe dombok Allah Agurengge wogisagin, yiluk abok yisike mende, etinem, at Yesus ebe pogorako nggorlek dagasike etnogo awan dagigidek nogo nen, Allah Agurengge awan wusa ʼbi wagidek werek nggorlek yisike.
40Wene esigit diluk yogisasinem, akoni dogalegat yomenogo inasuk kolkukasik, it amberek nen, men yisuka,
“Ap yi, ap omanggi Allah wene yoknisa wisigin yiluk, anggorlem werek etnogoat o,” yiluk yisinem 41it amberek nen,
“Dek o. Akoni ndil ninabuwagaluk Allah nen laʼbi wisigin yisike etnogoat, o” yiluk yisi laguka mendeat, it amberek nen, men yisuka,
“Akoni ndil ninabuwagaluk Allah nen, laʼbi wisigin yisike etnogo, o Galilea nen erlok wisusak nogo? Erlok dek o. 42Akoni ndil ninabigin mende Allah nen laʼbi wisigin yisike mende eti ap Daud nen endago mende, at Daud enggaerek aguma erloma welagike paga, o Betlehem etoma endak lasigin yiluk Allah wene paga kolal mbalogo ʼbisukama werek etnogo dek?” 43Esigit diluk yilik lago lagukasik, ilugun oba, akoni dogalegat yomenogo Yesus pasik inane sagalogo inebe minggikuka. 44Esigit diluk minggikukasik, it amberek nen Yesus ebe pakawogoluk kagakuka mende, ininggi pakigidek togot disuka.
Ap Yahudi mende ineugi nggokndek inendainggen Yesus oba panggot digidek kagakuka wene
45Esigit diluk togot disukasik werekma, it ap Allah ago palek anggorlem welaguka mende yomenogo nen Yesus ebe pakawagaluk wene yogisasuka mende yomenogo nen suguluk it ap Allah indewerek mende ineugi nggokndek inom, ap Farisi mende inom, inoba wagukama, wene men yogisasuka,
“Ap etnogo ebe paʼbiluk ninoba wolok wagidek eti nenaluk,” yiluk yogisasukama, 46it nen, men yogisasuka
“Iya. Wene at nen yiligogo eti kak, it ap amberek nen wene esigit diluk yisinem iyiligogi dek mende, at nen wene ninat yiligogo paga ebe togot dogo,” yiluk yogisasukama 47it ap Farisi mende yomenogo nen, men yogisasuka,
“Kit, at nen nuket dinagakemo nen yiligogi a? 48Nit ap Yahudi mende kineugi nggokndek inom, ap Farisi mende inom, amberek nen inendainggen at oba panggot diluk, kagakonem omanggi kiligogi a? Mondok dek o. 49Mondok dek mende, it akoni dogalegat yoma wene Allah nen ninasuk wakike wene etnogo inonggodek dogolik yiligogi eti Allah nen inalem ʼbiyekemo werek o,” yiluk yogisasuka. 50Esigit diluk yogisasukama ap it mende omanggi endaga Nikodemus, alebat kibanggo Yesus oba wagike mende etnogo nen, it men yogisasike,
51“Warligi yi. Wene Allah nen ninasuk wakike mende eti paga, ap omanggi ane inasuk kolkidegat, nen, at kagake mende wene erlo dikogo inonggodegat dogolik, wene ndak ibat oba ʼbusak, yiluk yisike nogo? Esigit diluk yigidek o,” yiluk yogisasikemo, 52it nen at men yogokuka,
“Kat, kaguma o Galilea mende nogo? Ap Allah wene yogisiligogi mende omanggi o Galilea nen wisigin yiluk Allah wene paga kolal mbalek omanggi werekma kilenggen kigin mondok dek etnaga, kilenggen panorogo ʼbikasi dogono nda,” yiluk yogokuka, 53[Esigit diluk yogoko lagukasik, akoni yomenogo inagumangge dombok ngginggil warogo laguka.
Pašlaik izvēlēts:
Yohanes 7: DNA
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties