Yohanes 9
9
Yesus nen ap omanggi ilenggen mbuk mende pano kagakike wene
1At Yesus ebe o etoma togot diluk lago dogolik, ilenggen ʼbikasike mende, ap omanggi agoya akla nen ilenggen mondok mbuk endak lagike mende kasike. 2Ilenggen kasikemo nen, at agoromi ane waganggo laguka mende yomenogo nen Yesus endema wagangguka,
“Ninewe. Ap ilenggen mbuk eti, erlo at enggaerek nen weyak kagakikemo nen a? At te, agoya ombae nen weyak kagakukama nen esigit diluk endak lagike a.” yiluk yogokuka mende, 3at Yesus nen, men yogisasike,
“Erlo ap yi inom, agoya ombae inom, weyak kagakuka paga ilenggen mbuk endak lagike ʼbuk. Mende, Allah nen ap yi pano kagakonem akoni nen inilenggen kalok, at Allah nen kagarigogo mende inilu asuwagaluk endak lagikemo o,” yiluk yogisasikesik nen, 4omanggi men yogisasike,
“Yabunggane o amum asigin o. Esigit diluk amum agonem, akoni nen yi mende ndi mende kagasusak erlok dek asigin eti paga, at laʼbani wagike mende kagarigogo mende eti o yogondak o liya werek nggorlek ya pagaat kagako doguwok o. 5An agat oba yoma dogolik, nebe o liya kak etnogo nen, akoni liya kagarinabigogo o,” 6yiluk esigit diluk arat yogisasikesik nen, wosi supogo agat oba ʼbisikesik nen, inggi nen agat inom ʼbisi negen kagarogo nen ap etnogo ilenggen oba dabul disike. 7Esigit diluk dabul disikesik nen, ap etnogo men yogokike,
“I Siloam yenggelekma eli paga kelokonggen sobali lan o,” yiluk yogokike. I eti nit ninane paga laʼbisike yu kak endaga Siloam werekma yogokike. Esigit diluk yogokikemo at etnogo lagikesik, elokonggen oba sobalkikemo ilenggen pano agikemo iyogoba wagike. 8Esigit diluk ilenggen pano atluk wagonem, it akoni at agarlagi mende inom, it amberek ap etnogo alep ambe nggino weyak yisinem inilenggen kasi laguka mende inom, inilenggen kasukasik nen, men yisuka,
“Iya. Ninayuk o. Ap yi, ebe korek mondok dogolik, ambe nggino weyak yisi laga mende etnogo dek a? Ap etnogoat o,” yiluk yisukama, 9it akoni yomenogo amberek nen men yisuka,
“Ebe arat o,” yigik, it amberek nen,
“At ʼbuk. Ninat mende, at elokonggen salek,” yigik, yisukama at enggaerek nen,
“Eberogonat an nebeat o,” yiluk yogisasikemo, 10it nen at oba kinok waganggo dogolik,
“Ninggit diluk nen kilenggen pano aga,” yiluk yogokukama, 11at ap etnogo nen men yogisasike,
“Ap endaga Yesus yiligogi etnogo nen agat mende inggi nen ʼbisi negen kagarogo nilenggen oba dabul danggesik men yokneke,
I Siloam yenggelekma eli paga kelokonggen sobali lan o, yiluk yoknekemo, at nen yokneke kagat, lagarik arat sobalkima, nilenggen pano aga o,” yiluk yogisasikemo, 12it nen at yogoko dogolik,
“Ap eti ebe nggoma werek?” yiluk yisukama at nen,
“An nonggodek o,” yiluk yogisasike.
It ap Farisi mende nen ap ilenggen mbuk mende Yesus nen pano kagakike mende etnogo endema wagangguka wene
13Esigit diluk yisikemo, it nen, ap ilenggen mbuk mende etnogo ap Farisi mende inoba wolok laguka. 14Etinem, ininggi 7 paga hari Sabat Allah ake werlegat werek nggorlek, at Yesus nen agat mende ʼbisi negen kagarogo ap ilenggen mbuk mende pano kagakike. 15Esigit diluk pano kagakike eti paga, it ap Farisi mende nen ap ilenggen mbuk mende etnogo endema waganggo dogolik,
“Ninggit diluk nen kilenggen pano aga,” yiluk yisuka mende, at nen,
“At etnogo nen agat mende ʼbisi negen kagarogo nilenggen oba dabul danggemo, sobali lagima, pano aga o,” yiluk yogisasikemo, 16it ap Farisi mende amberek nen, men yisuka,
“Nininggi 7 paga hari Sabat Allah ake werlegat dogusak yiluk, wene mbalek mende eti sagalogo ʼbekesik kagake eti paga, at ebe Allah werekma nen wagike mende, dek o,” yiluk yisuka mende, it ap amberek nen,
“At ebe weyak kagarigogo mende dogolepma, wene diduwagaluk elalin mende yigit diluk kagasusak a? Dek o,” yiluk it inakla esigit diluk inasokondek dombok ambasukasik inaneyak sagalogo inebe minggikuka o. 17Esigit diluk minggikukasik ap ilenggen mbuk mende pano kagakike etnogo oba endema yabunggane waganggo dogolik,
“Kat,
At nen nilenggen pano kagat nake yiluk yegen kigi. Eti paga, kat nen ap eti abok ninggit diluk ambaligogon,” yiluk yogokukama, at nen,
“At ebe Allah wene yogisiligogo mende etnogoat o,” yiluk yogisasike. 18Esigit diluk yogisasike mende, it ap nggokndek Yahudi mende nen ap yi alebat ilenggen mbuk welagike mende, yogondak ilenggen arat pano agama, yiluk didusak inaʼit nen, ap etnogo agoya ombae waisasukama it wagukama nen, inendema waganggo dogolik,
19“Kit nen, elege ilenggen mbuk endak lagama yisigip etnogo, ebe yiat a? At yogondak ilenggen ninggit diluk nen pano aga?” yiluk yogisasukama, 20it nen yogisasi dogolik,
“Ap yi, ebe nit nen endako mende ilenggen mbuk endak lagike, yisi lago etnogo mendeat ogwe, 21ninggit diluk nen pano aga nit ninonggodek o. Nen, ta nen pano kagake, nit ninonggodegat o. Eti paga, at ebe abat. Elege ʼbuk. Ebe arluweat kak yoma. At enggaerek abok yokisawak nen endema waganini o,” yiluk yogisasuka. 22Esigit diluk yogisasuka eti it ap nggokndek Yahudi mende nen, yisi dogolik,
“It akoni inebe dombok nen,
Ap yi, Allah nen nit akoni ndil ninabuwagaluk laʼbi wisigin yisike etnogo Kristus ebe yiat o, yiluk ʼbukakogo yisi kalok, o sembayan yiligogoma nen likalok wusa ʼbuwok nen,” yiluk wene mbalkuka mende werek eti paga, ap eti agoya ombae it ap nggokndek Yahudi mende inayuk nen,
23men yisuka eti,
“At ebe, abat. Elege ʼbuk. Ebe arluweat kak yoma re. At enggaerek yokisawak nen endema waganini o,” yiluk yogisasuka. 24Esigit diluk yisukama it nen ap alebat ilenggen mbuk endak lagikesik welagike mende etnogo yabunggane waikukama wagikemo, men yogokuka,
“Ap eti ebe weyak kagarigogo mende nit ninilumo, kat kenggaerek nen kane eberogonat Allah endaga kumbuk mbalogo yoknisan o,” yiluk yogokukama, 25at nen men yogisasike,
“At ap eti weyak kagarigogo mende a? Dek a. An nonggodek mende, an alebat nen nilenggen mbuk welagi mende, yogondak ya pano agarik werek etiat an nilu o,” yiluk yogisasikemo, 26it nen, men yogokuka,
“At nen ninggit diluk kagat kake? Kilenggen ninggit diluk pano kagat kake,” yiluk yogokukama, 27at nen, men yogisasike,
“Wene pagane arat yokisigi mendeat, kinasuk kolusak kinaʼit kagako dogolik nen, yabunggane kinasuk koluwogoluk yiligogi eti nenaluk. Kit at agoromi asusak warlok nen yiligogi a? E a,” yiluk yogisasikemo, 28it nen inane aik dagok yogoko dogolik,
“Kat at agot agandik yiligogon kigi. Nit, ap Musa agoromi werek o. 29Nen, ap Musa etiat, wene Allah nenat yogokike, yiluk, nit ninilu mende, ap eti at ebe o nggoma nen waga mende, nit ninonggodek o,” yiluk yisukama 30at nen, men yogisasike,
“Iya! Nayuk o. Ap eti nen, an nilenggen pano kagat nake mendeat, kit nen,
At ebe o nggoma nen waga mende nit ninonggodek, yiluk yiligogi eti, an nayuk arigogo o. 31Akoni weyak kagarigogi mende Allah nen inane asuk mondok koligogo dek eti nit ninilu o. Akoni Allah inayukogo dogolik, at akla ambaligogo mende motogo kagarigogo mende kalok, inane Allah asuk koligogo o. 32Nen, akoni pagane ebenggeranem erlo paga nen yogondak kurli, akoni amberek inilenggen mbuk endak latlukmo nen yabunggane pano kagarinakuka, yiluk ninasuk koligogi mondok dek o. 33Ap eti Allah nen laʼbi wagidek dogolepma, at nen yi kagakik, ndi kagakik, kagarigogo esigit diluk kagako dogolep dek o,” yiluk yogisasikemo, 34it nen, men yogokuka,
“Kat kobabut weyagat endak lagagindik, weyak mondok kagarigogo mendeat, kat nen wene nit yanggul nisausak a? Mondok erlok dek o,” yiluk yogokukasik nen, o sembayan yiligogoma nen inggi nggorlo nggigilogo leget sikmangge wula ʼbisuka.
Yesus nen, “Akoni ebe wene pasik inilenggen mbuk negen werek,” yiluk yogisasike wene
35Akoni nen, “it nen ap etnogo leget abel sikmangge wula ʼbega,” yiluk yisukama, at Yesus asuk kolkikesik oba nen, yabunggane ap etnogo imbisak abuk agukasik, men yogokike,
“Ap omanggi ebe abat endak lasi wisigin, yisuka etnogo, ebe didiluk nen kendainggen at oba panggot degen a?” yiluk yogokikemo 36at nen, men yogisasike,
“Ap eti ebe ta o, newe. An nen ap eti ebe didiluk nen nendainggen at oba panggot dik nen, yanggul nisin o,” yiluk yogokikemo, 37at Yesus nen,
“Kat kilenggen arat niyegen etnogo yogondak nimbisak wenenggak yiligogi nebe yiat o,” yiluk yogosigin ambasike, 38at nen, men yogokike,
“Yogondak arat didagagirik nendainggen koba panggot digi o, newe,” yiluk indibagal yunggulogo Yesus pogorakike. 39Esigit diluk pogorakikemo, at Yesus nen, men yogokike,
“An nen akoni amberek inilenggen mbuk mende panorinakik, it amberek inilenggen pano mende mbugut diyigik, kagako dogigiluk nebe agat oba yoma wusa wagagi o,” yiluk yisinem, 40it ap Farisi mende amberek etoma dogolik inasuk kolkukasik nen, men yisuka,
“Kat kakla nen,
It inilenggen mbuk, yiluk ambasi dogolik nit yoknisegen a? Dek o,” yiluk yogokukama, 41at Yesus nen, men yogisasike,
“Kit kinilenggen mbuk dogolepma, kit weyak yiluk wene kinoba ʼbilep dek o. Mende, kit nen,
Nit ninilenggen pano kiligogi o, yiluk yiligogi eti paga Allah nen,
Kit weyak, yiluk, wene kinoba ʼbekemo werek o,” yiluk yogisasike.
Pašlaik izvēlēts:
Yohanes 9: DNA
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties