Tom 1
1
Yeezu Naŋ Eŋ Noɔre Ka O Na Toŋ La A Vooroŋ Soŋ
1N ba Tiyofilo, a n gane dɛndɛŋ poɔ, N da sɛge la a yɛlɛ na zaa a Yeezu naŋ da e kyɛ wuli a yi a piiluu saŋ, 2O naŋ da tu a Vooroŋ Soŋ zie a kyɛ ko a apostoliimine, a banaŋ o naŋ da kaa-iri na noɔre a te ta a daare na ba naŋ da de O do ne tenvelaa.#1:2 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ 3A O kũũ puoriŋ, O da leɛ-iri la a kuuni poɔ, a tu yɛlɛ naŋ ba taa bonnoo zie, a de O meŋɛ wuli ba beri lezaayi, a yele a Naaŋmen naaloŋ yɛlɛ korɔ ba. 4O naŋ da naŋ be a ba zie, O da ko ba la noɔre ka ba ta wa yire a Gyɛruzɛlɛm poɔ, kyɛ ba bebe a kyɛllɛ a Saa nɔ-eŋnaa. O da yelee la, “A ŋaa la ka yɛ da woŋ yi N zie; 5bonso, Gyɔɔn da terɛ la suobu ane koɔ̃, kyɛ a koŋ la kɔɔre, ba na ko yɛ la suobu ane a Vooroŋ Soŋ.”
A Yeezu Tenvelaa Duobu Yɛlɛ
6Azuiŋ a potuuribo naŋ da wa lantaa, ba da soore la a Yeezu, “Daana, a saŋ ŋa poɔ la ka fo na e ka a Izerayɛl naaloŋ leɛ wa are o aroozie be?” 7Ka O da yeli sɔge, “A ba e yɛ yɛlɛ ka yɛ baŋ a saŋ bee a bebie na a Saa naŋ biŋ ne O meŋɛ kpeɛ̃õ. 8Kyɛ yɛ na nyɛ la kpeɛ̃õ saŋ na a Vooroŋ Soŋ naŋ na wa a yɛ zie, ka yɛ na leɛ n dansediribe, a Gyɛruzɛlɛm poɔ, a Gyudiya zaa poɔ, ane Samareya poɔ, a te ta a tendaa koŋkobo zaa.” 9O naŋ da wa yeli a yeli ŋa baare, ba da kaara O la ka ba da wa de O do ne, kyɛ ka zunzugri da wa pɔge O, ka ba ba la nyɛ O. 10O naŋ da naŋ duoro kyɛ ka ba da gbolɔ kaara a sazu la ka noba mine bayi naŋ da su kparpeɛle da wa are ba zie a daadaalɛ. 11Ba da yelee la, “Galili noba, bonso ka yɛ are a gbolɔ kaara sazu poɔ lɛ? A Yeezu ŋa ba naŋ de O yi a yɛ zie a do ne tenvelaa, na leɛ wa la a lɛ ne o zu yɛ naŋ nyɛ O ka O duoro a tenvelaa.”
Ba Naŋ Kaa-iri Mateɛse Ka O Leɛre Gyudase Zu
(Mat 27:3-10)
12Lɛ la ka ba da leɛ yi a taŋ na ba naŋ boɔlɔ Oliva zu a gaa Gyɛruzɛlɛm. A taŋ da peɛle la Gyɛruzɛlɛm a seŋ pɛnnoo bebiri daare kyɛmmo. 13A Piita ane Gyɔɔn ane Gyimisi ane Anduru, Filipi ane Tɔmaase, Batolomi ane Matio, Gyimisi, a Alfeo bidɔɔ ane Saamon, a Zelɔte ane Gyudase, a Gyimisi bidɔɔ naŋ da te kpɛ a teŋkpoŋ poɔ, ba da te do la a peɛzudie, a zie na ba naŋ da kpeɛrɛ. 14A bama zaa da kpimare la puoruu, ba ne pɔgeba mine ane Mareya a Yeezu ma, ane a O yɔɔmine.
15A bebie na poɔ, Piita da iri are la a yelderebɛ#1:15 Yelderebɛ: A yelderebɛ la noba na naŋ sage de a Daana Yeezu Kirista yɛlɛ. sogɔŋ (a noba zaa naŋ da lantaa da ta la kɔɔ ane lezare), kyɛ yeli: 16“N bamine, a ferɛɛ la ka a Naaŋmen gane yelbie tu a tuubu, aŋa lɛ a Vooroŋ Soŋ naŋ da tu a Davil zie a daŋ yeli kyaare ne a Gyudase. Ona la da taa a noba wa ne ka ba da wa nyɔge a Yeezu, 17bonso ba da sɔre o la poɔ te poɔ ka o meŋ da taa o tonnoɔre tonɔ a te poɔ.”
18(A dɔɔ ŋa da da la weɛ ane o faaloŋ boma, a da ɛge le tulimo, ka o poɔ da puri ka o nyaga zaa puri yaare. 19A Gyɛruzɛlɛm noba zaa da wa baŋ la a yeli ŋa, lɛnso ka ba da boɔlɔ a weɛ bamenne kɔkɔre poɔ ka Akɛldama, “A tɛgɛ la Zẽẽ Weɛ.”) 20“Bonso ba sɛge la a Yiele gane poɔ:
‘Vɛŋ ka o kpɛzie leɛ dabuo,
ka neɛzaa ta kpeɛrɛ be’;
‘kyɛ vɛŋ ka neɛ kaŋ leɛre o zu.’
21Azuiŋ a noba na kaŋ naŋ da tuuro te a saŋ na a Daana Yeezu naŋ da be a te zie, 22a piili ne a Gyɔɔn suobu teroo, a te ta a daare na ba naŋ da de O yi ne a te zie do ne, a ferɛɛ la ka ba kaŋ laŋne te ka te waa a O kũũ leɛ-iruu dansediribe.” 23A lɛ zuiŋ, ba pãã da iri la noba bayi, Yuzɛb ba naŋ boɔlɔ Basaba, ka o yuori kaŋ meŋ da di Gyustu ane Mateɛse. 24Lɛ la ka ba da puori a yeli, “Daana, fõõ la baŋ nensaala zaa sukyiri. Wuli te a noba bama bayi poɔ, onaŋ soba fo naŋ kaa-iri 25ka o na leɛre a Gyudase naŋ bare te kyɛ gaa o gaabo zie zu, a tonɔ a toma ŋa ane apostoliimine toma.” 26Ba da lɔɔ la bie ka ba nyɛ onaŋ soba ba naŋ na iri, ka a da wuli ka Mateɛse la; ka ba da de o poɔ a apostoliimine pie ne yeni na poɔ.
Pašlaik izvēlēts:
Tom 1: DNTTP
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
First New Testament in Dagaare Language © The Bible Society of Ghana, 2013.