Juan 13
13
Ginhugasan ni Jesus ang mga Tiil sang Iya mga Gintuton-an
1Karon bisperas na sang Piesta sang Pascua. Si Jesus nakahibalo nga ang iya tion nag-abot na sa pagtaliwan sa sining kalibutan pakadto sa Amay. Ginhigugma gid niya sa gihapon ang mga nagatuo sa iya nga yari sa kalibutan, kag ginhigugma niya sila tubtob sa katapusan.
2Si Jesus kag ang iya mga gintuton-an nagpanihapon. Ang Yawa nakatanom na sa tagipusoon ni Judas nga anak ni Simon Iscariote sang handom sa pagluib kay Jesus.#13:2 Ang Yawa…kay Jesus: ukonAng Yawa nagpamat-od na nga si Judas nga anak ni Simon Iscariote, magaluib kay Jesus. 3Si Jesus nakahibalo nga ang Amay naghatag sa iya sang bug-os nga gahom. Nakahibalo man sia nga naghalin sia sa Dios kag magabalik sia sa Dios. 4Gani sang nagakaon sila nagtindog si Jesus, nag-uba sang iya kunop, nagkuha sang tualya kag ginwagkos ini sa iya hawak. 5Dayon nagbubo sia sang tubig sa labador, kag nagsugod sa paghugas sang mga tiil sang mga gintuton-an kag ginpahiran sang tualya nga iya ginwagkos. 6Nakaabot sia kay Simon Pedro nga nagsiling sa iya, “Ginoo, hugasan mo bala ang akon mga tiil?”
7Si Jesus nagsabat sa iya, “Indi pa ikaw makahangop subong sang ginahimo ko, pero mahangpan mo ini sa ulihi.”
8Si Pedro nagsiling, “Indi! Indi gid ako magpahugas sang akon mga tiil sa imo tubtob san-o!”
Si Jesus nagsabat, “Kon indi ko mahugasan ang imo mga tiil, indi na ikaw akon gintuton-an.”
9Nagsabat si Simon Pedro, “Ginoo, kon amo ina, hugasi indi lamang ang akon mga tiil, kundi pati man ang akon mga kamot kag ulo!”
10Si Jesus nagsiling, “Ang nakapaligo na matinlo ang iya bug-os nga lawas, kag indi na kinahanglan manghugas luas lamang sang iya mga tiil.#13:10 Ang iban nga mga manuskrito wala nagalakip sangluas lamang sang iya mga tiil. Tanan kamo mga matinlo na luas lamang sa isa.” (11Kay si Jesus nakahibalo na kon sin-o ang magaluib sa iya. Gani nga nagsiling sia, “Tanan kamo mga matinlo na luas lamang sa isa.”)
12Sang#Luc. 22:27. mahugasan na ni Jesus ang ila mga tiil, ginsuksok niya ang iya kunop kag nagbalik sa iya lugar sa lamisa. Nagpamangkot sia sa ila, “Nahangpan bala ninyo ang akon ginhimo sa inyo? 13Ginatawag ninyo ako nga Manunodlo kag Ginoo, kag husto ina, tungod kay amo gid man ako. 14Ako amo ang inyo Ginoo kag Manunodlo, kag bag-o lang ako maghugas sang inyo mga tiil. Gani kamo man dapat maghinugasay sang inyo mga tiil. 15Ginhatagan ko kamo sing sulondan, agod nga inyo man himuon ang ginhimo ko sa inyo. 16Nagasiling#Mat. 10:24; Luc. 6:40; Juan 15:20. ako sa inyo sang matuod: wala sing ulipon nga labaw pa sang sa iya agalon, kag wala sing ginsugo nga labaw pa sang sa nagsugo sa iya. 17Karon nga nahibaluan na ninyo ini nga kamatuoran, malipayon kamo kon inyo ini buhaton!
18“Wala#Sal. 41:9. ako nagahambal nahanungod sa inyo tanan. Kilala ko ang akon mga ginpili. Pero kinahanglan matuman ang kasulatan nga nagasiling, ‘Ang tawo nga nagsalo sa akon pagkaon, nagkontra sa akon.’ 19Karon ginasugid ko ini sa inyo sa wala pa ini mahanabo, agod nga kon mahanabo ini, magatuo kamo nga ‘Ako Amo Ako’. 20Nagasiling#Mat. 10:40; Mar. 9:37; Luc. 9:48; 10:16. ako sa inyo sang matuod: ang nagabaton sang bisan sin-o nga akon ginapadala, nagabaton man sa akon, kag ang nagabaton sa akon, nagabaton sang nagpadala sa akon.”
Gintagna ni Jesus ang Pagluib sa Iya
(Mat. 26:20-25; Mar. 14:17-21; Luc. 22:21-23)
21Sa tapos masiling ini ni Jesus, natublag gid sia sing tuman kag nagpabutyag, “Nagasiling ako sa inyo sang matuod: ang isa sa inyo magaluib sa akon.”
22Ang mga gintuton-an nagtinulokay nga nagapalibog gid kon sin-o ang iya ginatumod. 23Ang isa sang mga gintuton-an nga ginhigugma ni Jesus nagapungko sa tupad gid ni Jesus. 24Ginsinyasan sia ni Simon Pedro kag ginsingganan, “Pamangkuta sia kon sin-o ang iya ginatumod.”
25Gani ang amo nga gintuton-an nagsandiay naman sa kay Jesus kag nagpamangkot, “Ginoo, sin-o bala sia?”
26Si Jesus nagsabat, “Ang akon hatagan sining diutay nga pinihak sang tinapay nga nasawsaw ko, amo ina sia.” Gani nagkuha sia sang diutay nga pinihak sang tinapay, ginsawsaw niya ini kag ginhatag kay Judas nga anak ni Simon Iscariote. 27Sang pagbaton ni Judas sang tinapay, sa gilayon ginsudlan sia ni Satanas. Si Jesus nagsiling sa iya, “Dalia kag himua dayon ang dapat mo himuon!” 28Karon sa mga nagpanihapon, wala gid sing may nakahangop kon ngaa ginhambal ini ni Jesus sa iya. 29Naghunahuna ang iban nga mga gintuton-an nga si Jesus nagsugo sa iya sa pagbakal sang ila mga kinahanglanon para sa piesta, ukon sa paghatag sing limos sa mga imol, kay si Judas amo ang nagauyat sang ila kwarta.
30Ginbaton ni Judas ang tinapay kag naggwa sia gilayon. Gab-i na sadto.
Ang Bag-o nga Sugo
31Sang makahalin na si Judas, si Jesus nagsiling, “Karon ginapasidunggan ang Anak sang Tawo, kag karon paagi sa iya, ginapasidunggan ang Dios. 32Kag kon ang Dios ginapasidunggan paagi sa iya, dayon ang Dios mismo magapasidungog sang Anak sang Tawo, kag himuon niya ini sa gilayon. 33Mga#Juan 7:34. anak ko, indi na ako makapakig-upod sa inyo sing madugay. Magapangita kamo sa akon, pero isiling ko sa inyo subong sang ginsiling ko man sa mga Judio, ‘Kamo indi makakadto sa akon pagakadtuan.’ 34Ginahatag#Juan 15:12, 17; 1 Juan 3:23; 2 Juan 5. ko sa inyo ang isa ka bag-o nga sugo: maghigugmaanay kamo. Subong nga ako nagahigugma sa inyo, sa amo man nga bagay dapat kamo maghigugmaanay. 35Kon nagahigugmaanay kamo, dayon ang tanan nga mga tawo makahibalo nga mga gintuton-an ko kamo.”
Gintagna ni Jesus ang Pagpanghiwala ni Pedro
(Mat. 26:31-35; Mar. 14:27-31; Luc. 22:31-34)
36Si Simon Pedro nagpamangkot sa iya, “Ginoo, diin ka bala makadto?”
Si Jesus nagsabat, “Kon diin ako makadto, indi ka makasunod subong, pero sa ulihi, magasunod ka sa akon.”
37Si Pedro nagpamangkot, “Ginoo, ngaa man indi ako makasunod sa imo subong? Handa ako nga mapatay para sa imo!”
38Si Jesus nagsabat, “Handa ka gid bala nga mapatay para sa akon? Nagasiling ako sa imo sang matuod: sa wala pa magpamalo ang manok, magasiling ka sing makatlo nga ikaw wala makakilala sa akon.”
Pašlaik izvēlēts:
Juan 13: MBBHIL12
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Maayong Balita nga Biblia © Philippine Bible Society, 2012